عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
پاشایه‌تی ئاحاز 
1
له‌ ساڵی حه‌ڤده‌یه‌می پاشایه‌تی په‌قه‌حی كوڕی ڕه‌مه‌لیاهو، ئاحازی كوڕی یۆتام بوو به‌ پاشای یه‌هودا.
2
ئاحاز گه‌نجێكی بیست ساڵان بوو كاتێك بوو به‌ پاشا، شازده‌ ساڵیش له‌ ئۆرشه‌لیم پاشایه‌تی كرد. به‌ پێچه‌وانه‌ی داودی باپیره‌ گه‌وره‌ی، ئه‌وه‌ی له‌به‌رچاوی یه‌زدانی په‌روه‌ردگاری ڕاست بوو نه‌یكرد.
3
هه‌مان ڕێچكه‌ی پاشاكانی ئیسرائیلی گرته‌به‌ر، ته‌نانه‌ت كوڕه‌كه‌شی كرده‌ قوربانی سووتاندن، وه‌ك نه‌ریته‌ قێزه‌ونه‌كانی ئه‌و گه‌لانه‌ی كرد كه‌ یه‌زدان له‌به‌رده‌م نه‌وه‌ی ئیسرائیل ده‌ریكردن.
4
هه‌روه‌ها له‌ نزرگه‌كانی سه‌ر به‌رزایی و له‌سه‌ر گرده‌كان و له‌ژێر هه‌موو دارێكی سه‌وزدا قوربانی سه‌ربڕی و بخووری سووتاند.
5
پاشان ڕه‌چینی پاشای ئارام و په‌قه‌حی كوڕی ڕه‌مه‌لیاهوی پاشای ئیسرائیل بۆ جه‌نگ سه‌ركه‌وتنه‌ ئۆرشه‌لیم و ئاحازیان گه‌مارۆ دا، به‌ڵام نه‌یانتوانی به‌سه‌ریدا زاڵ بن.
6
له‌و كاته‌دا ڕه‌چینی پاشای ئارام ئێله‌تی بۆ ئارامییه‌كان گه‌ڕانده‌وه‌ و پیاوانی یه‌هودای له‌ ئێله‌ت ده‌ركرد. ئه‌دۆمییه‌كانیش هاتنه‌ ئێله‌ت و له‌وێ نیشته‌جێ بوون هه‌تا ئه‌مڕۆ.
7
ئاحاز نێردراوی نارده‌ لای تگله‌ت پلئه‌سه‌ری پاشای ئاشور و گوتی، «من خزمه‌تكار و له‌ژێر فه‌رمانی تۆم، سه‌ربكه‌وه‌ و له‌ ده‌ستی پاشای ئارام و پاشای ئیسرائیل ڕزگارم بكه‌ كه‌وا لێم ڕاست بوونه‌ته‌وه‌.»
8
هه‌روه‌ها ئاحاز ئه‌و زێڕ و زیوه‌ی له‌ناو په‌رستگای یه‌زدان و له‌ناو گه‌نجینه‌كانی كۆشكی پاشادا بوو بردی و به‌ دیاری بۆ پاشای ئاشوری نارد.
9
پاشای ئاشوریش به‌ قسه‌ی كرد و هێرشی كرده‌ سه‌ر دیمه‌شق و داگیری كرد. خه‌ڵكه‌كه‌ی ڕاپێچی «قییر» كرد، ڕه‌چینیشی كوشت.
10
پاشان ئاحاز پاشا چوو بۆ دیمه‌شق بۆ بینینی تگله‌ت پلئه‌سه‌ری پاشای ئاشور. ئه‌و قوربانگایه‌ی بینی كه‌ له‌ دیمه‌شقه‌، ئیتر نه‌خشه‌ی قوربانگاكه‌ و بیناسازییه‌كه‌ی به‌ هه‌موو ورده‌كاری دروستكردنه‌وه‌، بۆ ئوریای كاهینی نارد.
11
ئوریای كاهینیش قوربانگایه‌كی بنیاد نا هه‌روه‌ك ئه‌وه‌ی ئاحازی پاشا له‌ دیمه‌شقه‌وه‌ ناردی، ئوریای كاهین ئه‌وه‌ی كرد هه‌تا ئاحازی پاشا له‌ دیمه‌شق هاته‌وه‌.
12
كاتێك پاشا له‌ دیمه‌شق هاته‌وه‌، قوربانگاكه‌ی بینی و لێی نزیك بووه‌وه‌ و پێشكه‌شكراوی له‌سه‌ر پێشكه‌ش كرد.
13
قوربانی سووتاندنه‌كه‌ی و پێشكه‌شكراوی دانه‌وێڵه‌كه‌ی له‌سه‌ر سووتاند، شه‌رابه‌ پێشكه‌شكراوه‌كه‌ی ڕشت، خوێنی قوربانی هاوبه‌شییه‌كه‌ی[a] خۆی به‌سه‌ر قوربانگاكه‌ پرژاند.
14
قوربانگا بڕۆنزییه‌كه‌ی به‌رده‌م یه‌زدانیش، ئه‌وه‌ی له‌به‌رده‌م په‌رستگاكه‌ بوو له‌نێوان قوربانگاكه‌ و په‌رستگای یه‌زدان، بردی له‌لای باكووری قوربانگا نوێیه‌كه‌ داینا.
15
ئینجا ئاحاز پاشا فه‌رمانی به‌ ئوریای كاهین كرد و پێی گوت: «له‌سه‌ر قوربانگا نوێیه‌ گه‌وره‌كه‌، قوربانی سووتاندنی به‌یانییان و پێشكه‌شكراوی دانه‌وێڵه‌ی ئێواران، قوربانی سووتاندنی پاشا، پێشكه‌شكراوی دانه‌وێڵه‌كانی، قوربانی سووتاندنی هه‌موو خه‌ڵكی خاكه‌كه‌ و پێشكه‌شكراوی دانه‌وێڵه‌كانیان له‌سه‌ری ده‌سووتێنیت. هه‌روه‌ها شه‌رابه‌ پێشكه‌شكراوه‌كه‌یان و خوێنی هه‌موو قوربانی سووتاندنێك و هه‌موو قوربانی سه‌ربڕاوێكی له‌سه‌ر ده‌پرژێنیت. به‌ڵام من قوربانگا بڕۆنزییه‌كه‌ به‌كارده‌هێنم بۆ داواكردنی ڕێنمایی له‌ خودا.»
16
ئوریای كاهینیش هه‌مان ئه‌وه‌ی كرد كه‌ ئاحازی پاشا فه‌رمانی پێ كرد.
17
پاشان ئاحاز پاشا ته‌خته‌داری عه‌ره‌بانه‌كانی ئاو گواستنه‌وه‌شی بڕییه‌وه‌ و ده‌ستشۆره‌كه‌ی له‌سه‌ری لابرد، حه‌وزه‌ بڕۆنزییه‌كه‌شی[b] له‌سه‌ر گایه‌ بڕۆنزییه‌كان هێنایه‌ خواره‌وه‌ كه‌ له‌ ژێری بوون و له‌سه‌ر جێگایه‌كی به‌ردڕێژكراو دانا.
18
ئاحاز له‌ پێناو ڕه‌زامه‌ندی پاشای ئاشور كه‌پری شه‌ممه‌ی لادا كه‌ له‌ناو په‌رستگای یه‌زدان دروستكرابوو، ئه‌و ده‌روازه‌یه‌شی داخست كه‌ پاشا لێیه‌وه‌ ده‌هاته‌ ژووره‌وه‌.
19
ڕووداوه‌كانی دیكه‌ی پاشایه‌تی ئاحاز و ئه‌وه‌ی كردی له‌ په‌ڕتووكی كاروباری ڕۆژانه‌ی پاشاكانی یه‌هودا تۆمار كراون.
20
ئاحاز له‌گه‌ڵ باوباپیرانی سه‌ری نایه‌وه‌ و له‌گه‌ڵ باوباپیرانی له‌ شاری داود نێژرا. ئیتر حه‌زقیای كوڕی له‌دوای خۆی بوو به‌ پاشا.
  1. a. 16‏:13 قوربانی هاوبه‌شی: ئه‌م قوربانییه‌ هاوده‌می قوربانی سووتاندن بوو. ته‌نها یه‌ك كه‌س هه‌ڵده‌ستا به‌ دابینكردنی ئه‌م قوربانییه‌، به‌ڵام له‌گه‌ڵ خه‌ڵكی دیكه‌ به‌شی زۆری ئه‌م قوربانییه‌یان له‌به‌رده‌م خودا ده‌خوارد وه‌ك هێمایه‌ك بۆ پێكه‌وه‌ ژیان. \+xt بڕوانه‌ لێڤییه‌كان 7‏:11‏-15.‏\+xt*‏
  2. b. 16‏:17 كۆگای ئاو بووه‌، هه‌روه‌ها پێی گوتراوه‌ ده‌ریا، \+xt بڕوانه‌ ده‌رچوون 30‏:17‏-21.‏\+xt*‏