عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
كوشتنی ماڵی ئه‌حاڤ 
1
ئه‌حاڤ حه‌فتا كوڕی له‌ سامیره‌ هه‌بوو. جا یێهو چه‌ند نامه‌یه‌كی نووسی و ناردی بۆ كاربه‌ده‌ستانی یه‌زره‌عیل له‌ سامیره‌، بۆ پیران و په‌روه‌رده‌كارانی شازاده‌كانی ئه‌حاڤ، گوتی:
2
«ئێوه‌ كوڕه‌كانی گه‌وره‌كه‌تان و گالیسكه‌ و ئه‌سپتان له‌لایه‌، شاری قه‌ڵابه‌ند و چه‌كتان هه‌یه‌. به‌ گه‌یشتنی ئه‌م نامه‌یه‌
3
له‌ كوڕانی گه‌وره‌كه‌تان چاكترین و شایسته‌ترینیان هه‌ڵبژێرن، له‌سه‌ر ته‌ختی باوكی دایبنێن. ئینجا بۆ ماڵی گه‌وره‌كه‌تان بجه‌نگن.»
4
به‌ڵام ئه‌وان زۆر زۆر ترسان و گوتیان: «دوو پاشا له‌به‌رده‌می نه‌وه‌ستان، ئێمه‌ چۆن له‌به‌رده‌می بوه‌ستین؟»
5
ئیتر سه‌رپه‌رشتیاری كۆشك و فه‌رمانڕه‌وای شاره‌كه‌ و پیران و په‌روه‌رده‌كارانی شازاده‌كانی ئه‌حاڤ په‌یامێكیان بۆ یێهو نارد و گوتیان: «ئێمه‌ خزمه‌تكاری تۆین و هه‌موو ئه‌وه‌ی پێمانی بڵێی ده‌یكه‌ین. ئێمه‌ كه‌س ناكه‌ینه‌ پاشا، ئه‌وه‌ی پێت باشه‌ بیكه‌.»
6
ئینجا یێهو نامه‌ی دووه‌می بۆ ناردن و گوتی: «ئه‌گه‌ر ئێوه‌ له‌گه‌ڵ مندان و گوێڕایه‌ڵی من ده‌بن، كه‌لله‌سه‌ری كوڕه‌كانی گه‌وره‌كه‌تان بهێنن و سبه‌ینێ له‌م كاته‌دا وه‌رنه‌ لام له‌ یه‌زره‌عیل.»
له‌و كاته‌دا حه‌فتا شازاده‌ له‌گه‌ڵ گه‌وره‌ پیاوانی شاره‌كه‌ بوون، ئه‌وانه‌ی كه‌ په‌روه‌رده‌یان ده‌كردن.
7
كاتێك نامه‌كه‌یان پێگه‌یشت، كوڕه‌كانی پاشایان برد و هه‌ر حه‌فتایان سه‌ربڕین، كه‌لله‌سه‌ره‌كانیان له‌ناو چه‌ند سه‌به‌ته‌یه‌كدا دانا و ناردیان بۆ لای یێهو له‌ یه‌زره‌عیل.
8
كاتێك نێردراوه‌كه‌ هات به‌ یێهوی ڕاگه‌یاند: «كه‌لله‌سه‌ری كوڕه‌كانی پاشایان هێناوه‌.»
ئه‌ویش گوتی: «به‌ دوو كۆمه‌ڵ كه‌ڵه‌كه‌یان بكه‌ن و هه‌تا به‌یانی له‌ ده‌روازه‌ی شاره‌كه‌ دایانبنێن.»
9
به‌یانی یێهو چووه‌ ده‌ره‌وه‌. له‌به‌رده‌م هه‌موو گه‌ل ڕاوه‌ستا و گوتی: «ئێوه‌ بێتاوانن. ئه‌وه‌تا من له‌ گه‌وره‌كه‌م یاخی بووم و كوشتم، ئه‌ی كێ هه‌موو ئه‌مانه‌ی كوشت؟
10
له‌به‌ر ئه‌وه‌ بزانن كه‌ هیچ وشه‌یه‌ك له‌ فه‌رمایشتی یه‌زدان ناشكێت، كه‌ له‌سه‌ر ماڵی ئه‌حاڤ فه‌رموویه‌تی. یه‌زدانیش ئه‌وه‌ی كرد كه‌ له‌ ڕێگه‌ی ئه‌لیاسی به‌نده‌یه‌وه‌ فه‌رمووی.»
11
ئینجا یێهو له‌ یه‌زره‌عیل هه‌موو پاشماوه‌ی ماڵی ئه‌حاڤی كوشت، له‌ هه‌موو گه‌وره‌ پیاو و دۆستی نزیك و كاهینه‌كان، هه‌تا تاقی لێ بڕین.
12
پاشان یێهو هه‌ستا و به‌ره‌و سامیره‌ چوو. له‌ ڕێگادا، له‌ بێت‌عێقه‌دی شوانه‌كان،
13
تووشی چه‌ند خزمێكی ئه‌حه‌زیای پاشای یه‌هودا بوو، جا گوتی: «ئێوه‌ كێن؟»
ئه‌وانیش گوتیان: «ئێمه‌ خزمه‌كانی ئه‌حه‌زیاین و هاتووینه‌ته‌ خواره‌وه‌ هه‌تا سڵاو له‌ بنه‌ماڵه‌ی پاشا و شاژنی دایك بكه‌ین.»
14
ئه‌ویش گوتی: «به‌ زیندوویی بیانگرن!» ئه‌وانیش به‌ زیندوویی گرتیانن و له‌لای بیره‌كه‌ی بێت‌عێقه‌د سه‌ریان بڕین، چل و دوو كه‌س بوون، كه‌سیان لێ نه‌هێشتنه‌وه‌.
15
دوای ئه‌وه‌ی له‌وێ ڕۆیشت، تووشی یه‌هۆنادابی كوڕی ڕێكاب بوو كه‌ هاتبوو پێشوازی لێبكات. یێهو سڵاوی لێكرد و پێی گوت: «ئایا تۆش دڵسۆزی منیت، هه‌روه‌ك من دڵسۆزی تۆم؟»
یه‌هۆنادابیش وه‌ڵامی دایه‌وه‌: «به‌ڵێ.»
یێهو گوتی: «كه‌واته‌، ده‌ستتم بده‌رێ.» ئینجا ده‌ستی دایێ و یێهو سه‌ری خسته‌ ناو گالیسكه‌كه‌.
16
یێهو گوتی: «له‌گه‌ڵم وه‌ره‌ و دڵگه‌رمیم بۆ یه‌زدان ببینه‌.» ئینجا له‌گه‌ڵ خۆی سواری گالیسكه‌كه‌ی كرد.
17
كاتێك یێهو هاته‌ سامیره‌، هه‌موو پاشماوه‌ی بنه‌ماڵه‌ی ئه‌حاڤی له‌ سامیره‌ كوشت، له‌ناوی بردن، به‌پێی فه‌رمایشتی یه‌زدان كه‌ به‌ ئه‌لیاسی فه‌رموو.
كوشتنی خزمه‌تكاره‌كانی به‌عل 
18
ئینجا یێهو هه‌موو گه‌لی كۆكرده‌وه‌ و پێی گوتن: «ئه‌حاڤ په‌رۆشی په‌رستنی به‌عل نه‌بوو، به‌ڵام یێهو زۆر په‌رۆشه‌.
19
ئێستاش هه‌موو پێغه‌مبه‌ره‌كانی به‌عل و هه‌موو ئه‌وانه‌ی ده‌یپه‌رستن و هه‌موو كاهینه‌كانیم بۆ بانگ بكه‌ن. كه‌س بزر نه‌بێت، چونكه‌ قوربانییه‌كی گه‌وره‌ بۆ به‌عل ده‌كه‌م. ئه‌وه‌ی خۆی بدزێته‌وه‌ ده‌كوژرێت.» به‌ڵام یێهو ئه‌م فێڵه‌ی بۆ به‌عل‌په‌رسته‌كان به‌كارهێنا بۆ ئه‌وه‌ی له‌ناویان ببات.
20
ئینجا یێهو گوتی: «بانگه‌وازی كۆبوونه‌وه‌یه‌كی پیرۆز بكه‌ن بۆ به‌عل.» ئه‌وانیش بانگه‌وازیان كرد.
21
یێهو به‌ناو هه‌موو ئیسرائیلدا بانگه‌وازی كرد، هه‌موو به‌عل‌په‌رسته‌كان هاتن، كه‌س نه‌ما نه‌یه‌ت. هاتنه‌ په‌رستگای به‌عل و په‌رستگای به‌علیان پڕكرد، له‌م سه‌ره‌وه‌ بۆ ئه‌و سه‌ر.
22
ئینجا یێهو به‌ لێپرسراوی جلوبه‌رگه‌كانی گوت: «جلوبه‌رگ بۆ هه‌موو به‌عل په‌رسته‌كان بهێنه‌ ده‌ره‌وه‌.» ئه‌ویش جلوبه‌رگی بۆ هێنانه‌ ده‌ره‌وه‌.
23
پاشان یێهو و یه‌هۆنادابی كوڕی ڕێكاب هاتنه‌ ناو په‌رستگای به‌عل و به‌ به‌عل‌په‌رسته‌كانی گوت: «بگه‌ڕێن و ببینن نه‌وه‌ك یه‌كێك له‌ به‌نده‌كانی یه‌زدان لێره‌ له‌گه‌ڵتان بێت، ته‌نها به‌عل په‌رستان لێره‌ بمێننه‌وه‌.»
24
ئیتر كه‌ چوونه‌ ژووره‌وه‌ بۆ ئه‌وه‌ی قوربانی سووتاندن بكه‌ن، هه‌شتا پیاو له‌ ده‌ره‌وه‌ دانرابوون كه‌ یێهو ئاگاداری كردبوونه‌وه‌: «ئه‌گه‌ر یه‌ك پیاو له‌و پیاوانه‌ی كه‌ به‌ ده‌ستی ئێوه‌م داوه‌ ده‌رباز بێت، ئه‌وا گیانی ئێوه‌ له‌ جیاتی گیانی ئه‌و ده‌بێت.»
25
كاتێك یێهو له‌ پێشكه‌شكردنی قوربانی سووتاندن بووه‌وه‌، به‌ پاسه‌وانه‌ تایبه‌ته‌كان و ئه‌فسه‌ره‌كانی گوت: «بڕۆنه‌ ژووره‌وه‌ و بیانكوژن، مه‌هێڵن كه‌س ده‌رباز بێت.» ئه‌وانیش به‌ شمشێر هه‌موویان كوشت. ئینجا پاسه‌وانه‌ تایبه‌ته‌كان و ئه‌فسه‌ره‌كان فڕێیان دانه‌ ده‌ره‌وه‌ و به‌ره‌و نزرگه‌ی ناوه‌وه‌ی په‌رستگای به‌عل ڕۆیشتن.
26
كۆڵه‌كه‌كانی په‌رستگای به‌علیان هێنایه‌ ده‌ره‌وه‌. دوای ئه‌وه‌ی سووتاندیانن،
27
تێكیان شكاندن و په‌رستگای به‌علیان ڕووخاند و كردیانه‌ زبڵدان، هه‌تا ئێستاش شوێنه‌واری ماوه‌.
28
ئیتر یێهو په‌رستنی به‌علی له‌ ئیسرائیل نه‌هێشت،
29
هه‌رچه‌نده‌ له‌ گوناهه‌كانی یارۆڤعامی كوڕی نه‌ڤات لای نه‌دا، كه‌ به‌هۆیه‌وه‌ وای كردبوو ئیسرائیل گوناه بكات، په‌رستنی دوو گوێره‌كه‌ زێڕینه‌كه‌ له‌ بێت‌ئێل و له‌ دان.
30
پاشان یه‌زدان به‌ یێهوی فه‌رموو: «چونكه‌ ئه‌وه‌ی من پێم ڕاست بوو تۆ كردت، هه‌موو ئه‌وه‌ی كه‌ له‌ دڵم بوو ده‌رهه‌ق به‌ ماڵی ئه‌حاڤ كردت، هه‌تا چواره‌مین نه‌وه‌ت له‌سه‌ر ته‌ختی ئیسرائیل داده‌نیشێت.»
31
به‌ڵام یێهو ڕه‌چاوی ئه‌وه‌ی نه‌كرد كه‌ به‌ هه‌موو دڵییه‌وه‌ به‌پێی فێركردنه‌كانی یه‌زدانی په‌روه‌ردگاری ئیسرائیل بڕوات، له‌ گوناهه‌كانی یارۆڤعامی كوڕی نه‌ڤات لای نه‌دا كه‌ به‌هۆیه‌وه‌ وای كردبوو ئیسرائیل گوناه بكات.
32
له‌و سه‌رده‌مه‌دا یه‌زدان ده‌ستی به‌ بچووك كردنه‌وه‌ی خاكی ئیسرائیل كرد، جا حه‌زائێل له‌و سنوورانه‌ی ئیسرائیله‌وه‌ لێی دان
33
كه‌ له‌وبه‌ری ڕووباری ئوردونه‌وه‌ بوو، له‌لای ڕۆژهه‌ڵاته‌وه‌، واته‌: هه‌موو خاكی گلعاد، هه‌رێمی گادی و ڕه‌ئوبێنی و مه‌نه‌شه‌ییه‌كان، له‌ عه‌رۆعێر ئه‌وه‌ی له‌سه‌ر ده‌ربه‌ندی ئه‌رنۆنه‌ و له‌ گلعاد و باشان.
34
ڕووداوه‌كانی دیكه‌ی پاشایه‌تی یێهو و هه‌موو كاره‌كانی و پاڵه‌وانیه‌تییه‌كه‌ی كه‌ كردی له‌ په‌ڕتووكی كاروباری ڕۆژانه‌ی پاشاكانی ئیسرائیل تۆمار كراون.
35
یێهو له‌گه‌ڵ باوباپیرانی سه‌ری نایه‌وه‌ و له‌ سامیره‌ ناشتیان. ئیتر یه‌هۆئاحازی كوڕی له‌دوای خۆی بوو به‌ پاشا.
36
ئه‌و ماوه‌یه‌ی كه‌ یێهو له‌ سامیره‌ پاشایه‌تی ئیسرائیلی كرد، بیست و هه‌شت ساڵ بوو.