عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
حوكمدانی ئه‌حه‌زیا له‌لایه‌ن یه‌زدانه‌وه‌ 
1
پاش مردنی ئه‌حاڤ، مۆئاب له‌ ئیسرائیل یاخی بوو.
2
ئه‌حه‌زیاش له‌ په‌نجه‌ره‌ی ژووری سه‌ره‌وه‌ی كۆشكه‌كه‌ی له‌ سامیره‌ كه‌وته‌ خواره‌وه‌ و بریندار بوو، چه‌ند نێردراوێكی نارد و پێی گوتن: «بڕۆن پرسیار له‌ به‌عل‌زه‌بوبی خوداوه‌ندی عه‌قرۆن بكه‌ن، ئایا له‌م بریندارییه‌م چاك ده‌بمه‌وه‌؟»
3
فریشته‌ی یه‌زدانیش به‌ ئه‌لیاسی تیشبی فه‌رموو: «هه‌سته‌ سه‌ربكه‌وه‌ بۆ بینینی نێردراوه‌كانی پاشای سامیره‌ و پێیان بڵێ: ”ئایا له‌به‌ر ئه‌وه‌ی كه‌ له‌ ئیسرائیل خودا نییه‌، ئێوه‌ ده‌چن پرسیار له‌ به‌عل‌زه‌بوبی خوداوه‌ندی عه‌قرۆن ده‌كه‌ن؟“
4
له‌به‌ر ئه‌وه‌ یه‌زدان ئه‌مه‌ ده‌فه‌رموێت: ”له‌سه‌ر ئه‌و نوێنه‌ هه‌ڵناستیته‌وه‌ كه‌ له‌سه‌ری ڕاكشاویت، به‌ دڵنیاییه‌وه‌ ده‌مریت!“» ئینجا ئه‌لیاس ڕۆیشت.
5
كاتێك نێردراوه‌كان گه‌ڕانه‌وه‌ لای پاشا، پاشا لێی پرسین: «بۆچی گه‌ڕانه‌وه‌؟»
6
ئه‌وانیش وه‌ڵامیان دایه‌وه‌: «پیاوێك به‌ره‌وپیرمان هات، پێی گوتین: ”بڕۆن و بگه‌ڕێنه‌وه‌ بۆ لای ئه‌و پاشایه‌ی كه‌ ئێوه‌ی ناردووه‌ و پێی بڵێن، ’یه‌زدان ئه‌مه‌ ده‌فه‌رموێت: ئایا له‌به‌ر ئه‌وه‌ی كه‌ له‌ ئیسرائیل خودا نییه‌، ئێوه‌ ده‌چن پرسیار له‌ به‌عل‌زه‌بوبی خوداوه‌ندی عه‌قرۆن ده‌كه‌ن؟ له‌سه‌ر ئه‌و نوێنه‌ هه‌ڵناستیته‌وه‌ كه‌ له‌سه‌ری ڕاكشاویت، به‌ دڵنیاییه‌وه‌ ده‌مریت!‘“»
7
پاشا لێی پرسین: «ئه‌و پیاوه‌ی به‌ره‌وپیرتان هات و ئه‌م قسانه‌ی پێ گوتن، شێوه‌ی چۆن بوو؟»
8
ئه‌وانیش وه‌ڵامیان دایه‌وه‌: «پیاوێكی تووكن بوو، پشتێنێكی چه‌رمیشی له‌ كه‌مه‌ری به‌ستبوو.»
ئه‌ویش گوتی: «ئه‌وه‌ ئه‌لیاسی تیشبییه‌.»
9
ئینجا فه‌رمانده‌یه‌كی له‌گه‌ڵ په‌نجا سه‌ربازه‌كه‌ی نارده‌ لای ئه‌لیاس، ئه‌ویش چوو بۆ لای ئه‌لیاس و بینی وا له‌سه‌ر لووتكه‌ی كێوێك دانیشتووه‌، پێی گوت: «ئه‌ی پیاوی خودا، پاشا ده‌ڵێت، ”وه‌ره‌ خواره‌وه‌!“»
10
ئه‌لیاسیش وه‌ڵامی فه‌رمانده‌كه‌ی دایه‌وه‌: «ئه‌گه‌ر من پیاوی خودام، با ئاگر له‌ ئاسمانه‌وه‌ بێته‌ خواره‌وه‌ و خۆت و په‌نجا پیاوه‌كه‌ت بسووتێنێت!» ئینجا ئاگر له‌ ئاسمانه‌وه‌ هاته‌ خواره‌وه‌ و خۆی و په‌نجا پیاوه‌كه‌ی سووتاند.
11
دیسان فه‌رمانده‌یه‌كی دیكه‌ی به‌ په‌نجا سه‌ربازه‌كه‌یه‌وه‌ نارده‌ لای ئه‌لیاس، پێی گوت: «ئه‌ی پیاوی خودا، پاشا ده‌ڵێت: ”په‌له‌ بكه‌ و وه‌ره‌ خواره‌وه‌!“»
12
ئه‌لیاسیش وه‌ڵامی دایه‌وه‌ و پێی گوتن: «ئه‌گه‌ر من پیاوی خودام، با ئاگر له‌ ئاسمانه‌وه‌ بێته‌ خواره‌وه‌ و خۆت و په‌نجا پیاوه‌كه‌ت بسووتێنێت!» ئینجا ئاگری خودا له‌ ئاسمانه‌وه‌ هاته‌ خواره‌وه‌ و خۆی و په‌نجا پیاوه‌كه‌ی سووتاند.
13
بۆ جاری سێیه‌م فه‌رمانده‌یه‌كی له‌گه‌ڵ په‌نجا سه‌ربازه‌كه‌ی نارد. فه‌رمانده‌كه‌ی سێیه‌م سه‌ركه‌وت و چوو له‌به‌رده‌م ئه‌لیاس كه‌وته‌ سه‌ر چۆك و لێی پاڕایه‌وه‌، پێی گوت: «ئه‌ی پیاوی خودا، با ژیانی خۆم و ژیانی ئه‌م په‌نجا خزمه‌تكاره‌ت له‌به‌رچاو به‌هادار بێت.
14
ببینه‌، ئاگر له‌ ئاسمانه‌وه‌ هاته‌ خواره‌وه‌ و دوو فه‌رمانده‌كه‌ی یه‌كه‌می له‌گه‌ڵ سه‌ربازه‌كانیان سووتاند. به‌ڵام ئێستا با ژیانی من له‌به‌رچاوت به‌هادار بێت!»
15
ئینجا فریشته‌ی یه‌زدان به‌ ئه‌لیاسی فه‌رموو: «له‌گه‌ڵی بڕۆ خواره‌وه‌، لێی مه‌ترسه‌.» ئه‌ویش هه‌ستا و له‌گه‌ڵی چووه‌ خواره‌وه‌ بۆ لای پاشا.
16
به‌ پاشای گوت: «یه‌زدان ئه‌مه‌ ده‌فه‌رموێت: له‌به‌ر ئه‌وه‌ی نێردراوت نارد هه‌تا پرسیار له‌ به‌عل‌زه‌بوبی خوداوه‌ندی عه‌قرۆن بكه‌ن، ئایا له‌ ئیسرائیل خودا نییه‌ هه‌تا پرس به‌و بكه‌یت؟ له‌به‌ر ئه‌مه‌ له‌سه‌ر ئه‌و نوێنه‌ هه‌ڵناستیته‌وه‌ كه‌ له‌سه‌ری ڕاكشاویت، به‌ دڵنیاییه‌وه‌ ده‌مریت!»
17
ئینجا پاشا مرد، به‌پێی فه‌رمایشتی یه‌زدان له‌ ڕێگه‌ی ئه‌لیاسه‌وه‌.
له‌به‌ر ئه‌وه‌ی ئه‌حه‌زیا كوڕی نه‌بوو، یۆرام له‌ جێی ئه‌و بوو به‌ پاشا، له‌ ساڵی دووه‌می پاشایه‌تی یه‌هۆرامی كوڕی یه‌هۆشافاتی پاشای یه‌هودا.
18
ڕووداوه‌كانی دیكه‌ی پاشایه‌تی ئه‌حه‌زیا و ئه‌وه‌ی كردی له‌ په‌ڕتووكی كاروباری ڕۆژانه‌ی پاشاكانی ئیسرائیل تۆمار كراون.