عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
ماڵی هه‌تاهه‌تایی 
1
له‌به‌ر ئه‌وه‌ی ئێمه‌ ده‌زانین، ئه‌گه‌ر چادره‌ زه‌مینییه‌كه‌مان[a] ڕووخا، خانووێكمان له‌ خوداوه‌ هه‌یه‌ كه‌ هه‌تاهه‌تاییه‌ له‌ ئاسماندایه‌، خانووێكی ده‌ستكرد نییه‌.
2
ئێمه‌ش له‌م چادره‌دا ده‌ناڵێنین، شه‌یداین ماڵی ئاسمانیمان له‌ سه‌ری بپۆشین،
3
چونكه‌ ئه‌گه‌ر پۆشیمان به‌ ڕووتی نابینرێین.
4
له‌به‌ر ئه‌وه‌ی له‌م چادره‌داین له‌به‌ر بارگرانی ده‌ناڵێنین، كه‌ نامانه‌وێت دایبكه‌نین به‌ڵكو بپۆشرێین، تاكو مردن له‌لایه‌ن ژیانه‌وه‌ قووت بدرێت.
5
خودایه‌ ئه‌وه‌ی ئێمه‌ی به‌ تایبه‌ت بۆ ئه‌مه‌ دروستكردووه‌، ئه‌ویش وه‌ك پێشه‌كی ڕۆحی پیرۆزی پێمان داوه‌ بۆ ده‌سته‌به‌ری ئه‌وه‌ی دێت.
6
بۆیه‌ هه‌موو كات دڵنیاین و ده‌زانین كه‌ هه‌تا له‌ له‌شدا نیشته‌جێ بین، له‌ عیسای خاوه‌ن شكۆ دوورین،
7
چونكه‌ به‌ باوه‌ڕ ده‌ڕۆین نه‌ك به‌ بینراو.
8
ئیتر دڵنیاین و به‌ باشتری ده‌زانین، له‌ له‌ش دوور بكه‌وینه‌وه‌ و له‌لای عیسای خاوه‌ن شكۆ نیشته‌جێ بین.
9
بۆیه‌ ئامانجی به‌رزمان داده‌نێین، ئه‌گه‌ر له‌ له‌شدا نیشته‌جێ بین یان دوور بین، ئه‌و لێمان ڕازی بێت،
10
چونكه‌ ده‌بێت هه‌موومان له‌به‌رده‌م ته‌ختی دادگایی مه‌سیح ده‌ربكه‌وین، تاكو هه‌ریه‌كه‌ بۆ ئه‌و شتانه‌ی به‌هۆی جه‌سته‌وه‌ كردوویه‌تی شایسته‌یی خۆی وه‌ربگرێت، ئه‌گه‌ر باشه‌ یاخود خراپه‌.
خزمه‌تی ئاشتبوونه‌وه‌ 
11
له‌به‌ر ئه‌وه‌ی ترسی مه‌سیحی خاوه‌ن شكۆ له‌ دڵمانه‌، هه‌ر بۆیه‌ هه‌وڵ ده‌ده‌ین خه‌ڵكی قایل بكه‌ین. بۆ خوداش ده‌ركه‌وتین، هیوادارم بۆ ویژدانی ئێوه‌ش به‌ ته‌واوی ده‌ربكه‌وین.
12
ئێمه‌ نامانه‌وێ جارێكی دیكه‌ له‌ لای ئێوه‌ به‌خۆماندا هه‌ڵبده‌ین، به‌ڵكو ده‌رفه‌تێكتان ده‌ده‌ینێ شانازیمان پێوه‌ بكه‌ن، تاكو بتوانن وه‌ڵامی ئه‌وانه‌ بده‌نه‌وه‌ كه‌ شانازی به‌ ڕواڵه‌ته‌وه‌ ده‌كه‌ن، نه‌ك به‌ دڵ.
13
ئه‌گه‌ر مێشكمان تێكچووبێت، له‌به‌ر خودایه‌، ئه‌گه‌ر هۆشمه‌ند بین، له‌به‌ر ئێوه‌یه‌.
14
خۆشه‌ویستی مه‌سیح دیلی كردووین، چونكه‌ دڵنیاین له‌وه‌ی كه‌ یه‌كێك له‌ جیاتی هه‌موو خه‌ڵك مرد، بۆیه‌ هه‌موو خه‌ڵك مردن.
15
ئه‌و له‌بری هه‌مووان مرد تاكو زیندووان ئیتر بۆ خۆیان نه‌ژین، به‌ڵكو بۆ ئه‌و كه‌سه‌ی له‌ پێناویان مرد و هه‌ستایه‌وه‌.
16
له‌به‌ر ئه‌وه‌ به‌ چاوی دنیاییه‌وه‌ سه‌یری كه‌س ناكه‌ین. ئه‌گه‌ر پێشتر به‌ چاوی دنیاییه‌وه‌ سه‌یری مه‌سیحمان كردبێت، ئیتر له‌مه‌ودوا به‌و چاوه‌ سه‌یری ناكه‌ین.
17
كه‌واته‌ ئه‌گه‌ر هه‌ركه‌سێك له‌گه‌ڵ مه‌سیحدا یه‌كبگرێت، ده‌بێت به‌ به‌دیهێنراوێكی نوێ، شته‌ كۆنه‌كان به‌سه‌رچوون و شتی نوێ هات.
18
ئه‌مه‌ش هه‌مووی له‌ خوداوه‌یه‌، كه‌ له‌گه‌ڵ خۆی له‌ ڕێگه‌ی مه‌سیحه‌وه‌ ئاشتی كردینه‌وه‌ و خزمه‌تی ئه‌م ئاشتبوونه‌وه‌ی پێداین،
19
واته‌ خودا به‌هۆی مه‌سیحه‌وه‌ جیهانی له‌گه‌ڵ خۆی ئاشت ده‌كرده‌وه‌، گوناهه‌كانیان له‌سه‌ر نانووسێت و په‌یامی ئاشتبوونه‌وه‌ی به‌ ئێمه‌ سپاردووه‌.
20
كه‌واته‌ ئێمه‌ باڵوێزی مه‌سیحین، خوداش له‌ ڕێگه‌ی ئێمه‌وه‌ جیهان بانگهێشت ده‌كات، له‌بری مه‌سیح لێتان ده‌پاڕێینه‌وه‌: له‌گه‌ڵ خودا ئاشت بنه‌وه‌.
21
ئه‌وه‌ی گوناهی نه‌ده‌ناسی خودا له‌ پێناوی ئێمه‌ كردییه‌ گوناه، تاكو به‌ یه‌كبوون له‌گه‌ڵ ئه‌و ببین به‌ ڕاستودروستی خودا.
  1. a. 5‏:1 مه‌به‌ستی له‌ جه‌سته‌ی مرۆڤانه‌یه‌، شتێكی كاتییه‌.