عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
ئینجا سلێمان گوتی: «یه‌زدان فه‌رموویه‌تی، كه‌ له‌ناو هه‌وری تاردا نیشته‌جێ ده‌بێت.
2
من په‌رستگایه‌كی شكۆدارم بۆ بنیاد نایت، شوێنێك هه‌تاهه‌تایه‌ بۆ نیشته‌جێبوونت.»
3
كاتێك هه‌موو كۆمه‌ڵی ئیسرائیل ڕاوه‌ستا بوون، پاشا ڕووی خۆی وه‌رگێڕا و داوای به‌ره‌كه‌تی بۆ هه‌موویان كرد.
4
ئینجا گوتی:
«ستایش بۆ یه‌زدانی په‌روه‌ردگاری ئیسرائیل ئه‌وه‌ی به‌ ده‌می خۆی به‌ڵێنی به‌ داودی باوكم دا و به‌ ده‌ستی خۆی به‌جێی هێنا، هه‌روه‌ك فه‌رمووی:
5
”له‌و ڕۆژه‌وه‌ی ئیسرائیلی گه‌لی خۆمم له‌ میسره‌وه‌ هێناوه‌ته‌ ده‌ره‌وه‌، هیچ شارێكم له‌ناو هه‌موو هۆزه‌كانی ئیسرائیل هه‌ڵنه‌بژاردووه‌ بۆ ئه‌وه‌ی په‌رستگایه‌ك بنیاد بنێن هه‌تا ناوه‌كه‌م له‌وێ بێت و هیچ كه‌سێكیشم هه‌ڵنه‌بژاردووه‌ ببێته‌ فه‌رمانڕه‌وای ئیسرائیلی گه‌لی من،
6
به‌ڵكو ئۆرشه‌لیمم هه‌ڵبژاردووه‌ هه‌تا ناوه‌كه‌م له‌وێ بێت و داودم هه‌ڵبژاردووه‌ تاكو فه‌رمانڕه‌وایه‌تی ئیسرائیلی گه‌لی من بكات.“
7
«له‌ دڵی داودی باوكیشمدا بوو په‌رستگایه‌ك بۆ ناوی یه‌زدانی په‌روه‌ردگاری ئیسرائیل بنیاد بنێت.
8
به‌ڵام یه‌زدان به‌ داودی باوكمی فه‌رموو: ”له‌به‌ر ئه‌وه‌ی له‌ دڵتدا بوو په‌رستگایه‌ك بۆ ناوه‌كه‌م بنیاد بنێیت، باشت كرد كه‌ ئه‌مه‌ له‌ دڵتدا بوو،
9
له‌گه‌ڵ ئه‌وه‌شدا تۆ په‌رستگاكه‌ بنیاد نانێیت، به‌ڵكو كوڕه‌كه‌ت ئه‌وه‌ی له‌ خوێنی خۆته‌، ئه‌و په‌رستگاكه‌ بۆ ناوی من بنیاد ده‌نێت.“
10
«یه‌زدان به‌ڵێنی خۆی برده‌سه‌ر، ئه‌وه‌ی كه‌ فه‌رمووی. منیش شوێنی داودی باوكمم گرته‌وه‌ و له‌سه‌ر ته‌ختی ئیسرائیل دانیشتم، هه‌روه‌ك یه‌زدان فه‌رمووی. په‌رستگاكه‌شم بۆ ناوی یه‌زدانی په‌روه‌ردگاری ئیسرائیل بنیاد نا.
11
له‌وێشدا سندوقه‌كه‌م دانا، ئه‌وه‌ی ئه‌و په‌یمانه‌ی یه‌زدانی تێیدایه‌ كه‌ له‌گه‌ڵ ئیسرائیلدا به‌ستی.»
نوێژی سلێمان بۆ ته‌رخانكردن 
12
ئینجا سلێمان له‌به‌رده‌م قوربانگای یه‌زدان به‌رامبه‌ر به‌ هه‌موو كۆمه‌ڵی ئیسرائیل ڕاوه‌ستا و ده‌ستی به‌رز كرده‌وه‌.
13
سلێمان سه‌كۆیه‌كی له‌ بڕۆنز دروستكردبوو و له‌ناوه‌ڕاستی حه‌وشه‌كه‌دا داینابوو، درێژییه‌كه‌ی پێنج باڵ و پانییه‌كه‌شی پێنج باڵ[a] بوو، به‌رزییه‌كه‌شی سێ باڵ[b] ، جا له‌سه‌ری ڕاوه‌ستا به‌رامبه‌ر به‌ هه‌موو كۆمه‌ڵی ئیسرائیل چۆكی دادا و ده‌ستی بۆ ئاسمان به‌رز كرده‌وه‌ و
14
گوتی:
«ئه‌ی یه‌زدانی په‌روه‌ردگاری ئیسرائیل، هیچ خودایه‌ك له‌ ئاسمان و له‌سه‌ر زه‌وی له‌ وێنه‌ی تۆ نییه‌، په‌یمانی خۆشه‌ویستییه‌كه‌ت بۆ خزمه‌تكاره‌كانت ده‌به‌یته‌سه‌ر، ئه‌وانه‌ی له‌به‌رده‌می تۆ به‌ دڵسۆزییه‌وه‌ ڕه‌فتار ده‌كه‌ن.
15
تۆ به‌ڵێنی خۆتت بۆ به‌نده‌كه‌ت، بۆ داودی باوكم هێنایه‌ دی. ئه‌وه‌ی به‌ ده‌مت به‌ڵێنت پێدا، ئه‌مڕۆ به‌ ده‌ستی خۆتت هێنایه‌ دی.
16
«ئێستاش ئه‌ی یه‌زدانی په‌روه‌ردگاری ئیسرائیل، ئه‌و به‌ڵێنه‌ی كه‌ تۆ به‌ به‌نده‌كه‌ی خۆت، به‌ داودی باوكی منت دا، بۆی بهێنه‌ دی، كه‌ فه‌رمووت: ”پیاو له‌ تۆ نابڕێت له‌به‌رده‌مم بۆ دانیشتن له‌سه‌ر ته‌ختی ئیسرائیل، ته‌نها ئه‌گه‌ر كوڕانت ئاگاداری ئه‌وه‌ بن كه‌ به‌گوێره‌ی فێركردنه‌كه‌م له‌به‌رده‌مم ڕه‌فتار بكه‌ن، هه‌روه‌ك چۆن تۆ ڕه‌فتارت كرد.“
17
ئێستاش ئه‌ی یه‌زدانی په‌روه‌ردگاری ئیسرائیل، با ئه‌و به‌ڵێنه‌ت بێته‌ دی كه‌ به‌ڵێنت به‌ داودی به‌نده‌ت دا.
18
«به‌ڵام ئایا به‌ڕاستی خودا له‌گه‌ڵ مرۆڤ له‌سه‌ر زه‌وی نیشته‌جێ ده‌بێت؟ ئه‌وه‌تا ئاسمان و ئاسمانی ئاسمانه‌كان جێی تۆیان تێدا نابێته‌وه‌، ئیتر چۆن ئه‌م په‌رستگایه‌ كه‌ من بنیادم ناوه‌!
19
به‌ڵام ئه‌ی یه‌زدان، خودای من، ئاوڕ له‌ نوێژ و له‌ داواكارییه‌كانی به‌نده‌كه‌ت بده‌وه‌ و گوێ له‌ هاوار و ئه‌و نوێژه‌ بگره‌ كه‌ به‌نده‌كه‌ت له‌به‌رده‌مت ده‌یكات.
20
با شه‌و و ڕۆژ چاوه‌كانت كراوه‌ بن له‌سه‌ر ئه‌م په‌رستگایه‌، له‌سه‌ر ئه‌و شوێنه‌ی كه‌ فه‌رمووت: ”ناوی من له‌وێ ده‌بێت،“ هه‌تا گوێت له‌و نوێژه‌ بێت كه‌ به‌نده‌كه‌ت به‌ره‌و ئه‌م شوێنه‌ ده‌یكات.
21
هه‌روه‌ها گوێ له‌ پاڕانه‌وه‌ی به‌نده‌كه‌ت و ئیسرائیلی گه‌لت بگره‌ ئه‌وانه‌ی به‌ره‌و ئه‌م شوێنه‌ نوێژ ده‌كه‌ن، تۆش له‌ ئاسمانه‌وه‌ له‌ شوێنی نیشته‌جێبوونته‌وه‌ بیبیسته‌، جا كه‌ له‌ ئاسمانه‌وه‌ بیستت لێمان خۆشبه‌.
22
«ئه‌گه‌ر یه‌كێك گوناهی ده‌رهه‌ق به‌ هاوڕێكه‌ی كرد و سوێندخواردنی به‌سه‌ردا سه‌پێنرا و هات بۆ ئه‌وه‌ی له‌به‌رده‌م قوربانگاكه‌ت له‌م په‌رستگایه‌ سوێنده‌كه‌ی بخوات،
23
تۆ له‌ ئاسمانه‌وه‌ گوێ بگره‌ و ده‌ستبه‌كار به‌. دادوه‌ری له‌نێوان خزمه‌تكاره‌كانت بكه‌، حوكم بده‌ به‌سه‌ر تاوانباردا به‌وه‌ی ڕێگای خۆی به‌سه‌ر خۆیدا بهێنه‌ره‌وه‌، ئه‌ستۆپاكی كه‌سی بێتاوان ده‌ربخه‌ و به‌گوێره‌ی بێتاوانییه‌كه‌ی پێی ببه‌خشه‌.
24
«كاتێك ئیسرائیلی گه‌له‌كه‌ی خۆت به‌هۆی ئه‌و گوناهه‌ی به‌رامبه‌رت ده‌یكه‌ن، له‌به‌رده‌م دوژمنه‌كانیان تێكده‌شكێن، ئه‌گه‌ر گه‌ڕانه‌وه‌ بۆ لات و دانیان نایه‌وه‌ به‌ ناوی تۆ، له‌به‌رده‌مت له‌م په‌رستگایه‌دا نزا و نوێژیان كرد و پاڕانه‌وه‌،
25
تۆش له‌ ئاسمانه‌وه‌ گوێ بگره‌ و له‌ گوناهی ئیسرائیلی گه‌لت خۆشبه‌ و بیانگه‌ڕێنه‌وه‌ ئه‌و خاكه‌ی كه‌ به‌ خۆیان و باوباپیرانیانت داوه‌.
26
«ئه‌گه‌ر ئاسمان داخرا و باران نه‌باری به‌هۆی ئه‌وه‌ی گه‌له‌كه‌ت گوناهیان ده‌رهه‌ق به‌ تۆ كرد، پاشان نوێژیان ڕووه‌و ئه‌م شوێنه‌ كرد و دانیان به‌ ناوه‌كه‌تدا نا و له‌ گوناهه‌كه‌یان پاشگه‌ز بوونه‌وه‌، چونكه‌ گرفتارت كردن،
27
تۆش له‌ ئاسمانه‌وه‌ گوێ بگره‌ و له‌ گوناهی خزمه‌تكاره‌كانت و ئیسرائیلی گه‌لی خۆت خۆشبه‌، فێری ئه‌و ڕێگا باشه‌یان بكه‌ كه‌ ده‌بێت پێیدا بڕۆن و باران به‌سه‌ر خاكه‌كه‌تدا ببارێنه‌، ئه‌وه‌ی به‌ میرات داوته‌ به‌ گه‌له‌كه‌ت.
28
«هه‌ر كاتێك قاتوقڕی، په‌تا، بای گه‌رمه‌سێر، كولله‌ یان سن له‌ خاكه‌كه‌ ده‌دات؛ یان هه‌ر كاتێك دوژمن له‌ شاره‌كانیان گه‌مارۆیان ده‌ده‌ن؛ یان هه‌ر به‌ڵا و ده‌ردێك دێت؛
29
ئیتر كاتێك هه‌ركه‌سێكی ئیسرائیلی گه‌لی خۆت نوێژ یان داواكارییه‌ك له‌ تۆ بكات، له‌لایه‌ن ئه‌وه‌ی كه‌ ده‌رد و ئازاری خۆی ده‌زانێت و ده‌ستی به‌رامبه‌ر به‌م په‌رستگایه‌ به‌رز ده‌كاته‌وه‌،
30
ئه‌وا تۆ له‌ ئاسمانه‌وه‌ له‌ شوێنی نیشته‌جێبوونته‌وه‌ گوێ بگره‌. لێی خۆشبه‌، له‌به‌ر ئه‌وه‌ی ته‌نها تۆ دڵی ئاده‌میزاد ده‌ناسیت، بۆ هه‌ركه‌سێك به‌گوێره‌ی هه‌ڵسوكه‌وته‌كانی كاردانه‌وه‌ت هه‌بێت،
31
بۆ ئه‌وه‌ی به‌ درێژایی ڕۆژانی ژیانیان له‌م خاكه‌ی به‌ باوباپیرانی ئێمه‌ت داوه‌ لێت بترسن و ڕێگاكانت بگرنه‌به‌ر.
32
«هه‌روه‌ها ئه‌و بیانییه‌ی كه‌ له‌ ئیسرائیلی گه‌له‌كه‌ی خۆت نییه‌ و له‌ پێناوی ناوی مه‌زنت و ده‌ستی پۆڵایین و بازووی به‌هێزت له‌ خاكێكی دووره‌وه‌ هاتووه‌، جا كه‌ هات و به‌ره‌و ئه‌م په‌رستگایه‌ نوێژی كرد،
33
تۆ له‌ ئاسمانه‌وه‌ له‌ شوێنی نیشته‌جێبوونته‌وه‌ و به‌پێی هه‌موو ئه‌وه‌ی ئه‌م بیانییه‌ لێت ده‌پاڕێته‌وه‌ بۆی به‌جێبهێنه‌، هه‌تا هه‌موو گه‌لانی زه‌وی به‌ ناوی تۆ ئاشنا بن و وه‌ك ئیسرائیلی گه‌له‌كه‌ی خۆت لێت بترسن، هه‌روه‌ها بۆ ئه‌وه‌ی بزانن ئه‌م ماڵه‌ی كه‌ بنیادم ناوه‌ هه‌ڵگری ناوی تۆیه‌.
34
«كاتێك گه‌له‌كه‌ت له‌ دژی دوژمنه‌كه‌ی بۆ جه‌نگ ده‌چێت، بۆ هه‌ركوێ كه‌ ده‌یاننێریت، كه‌ نوێژیان بۆت كرد ڕووه‌و ئه‌و شاره‌ی كه‌ هه‌ڵتبژاردووه‌ و ئه‌و په‌رستگایه‌ی بۆ ناوه‌كه‌ت بنیادم ناوه‌،
35
تۆ له‌ ئاسمانه‌وه‌ گوێ له‌ نوێژ و داواكارییه‌كانیان بگره‌ و دادوه‌رییان بۆ بكه‌.
36
«كه‌س نییه‌ گوناه نه‌كات، كاتێك گوناهت به‌رامبه‌ر ده‌كه‌ن تۆش لێیان تووڕه‌ بوویت و ئه‌وانت خسته‌ به‌رده‌م دوژمن، به‌ دیلیان گرتن و بۆ خاكی دوژمن ڕاپێچیان كردن، دوور بێت یان نزیك؛
37
له‌دوای ئه‌مه‌ ئه‌گه‌ر له‌و خاكه‌ی بۆی ڕاپێچ ده‌كرێن هاتنه‌وه‌ هۆش خۆیان، له‌و خاكه‌وه‌ی كه‌ بۆی ڕاپێچ كراون تۆبه‌یان كرد و لێت پاڕانه‌وه‌، گوتیان: ”گوناه و تاوان و خراپه‌مان كرد؛“
38
ئیتر به‌ هه‌موو دڵ و گیانیانه‌وه‌ گه‌ڕانه‌وه‌ لات، له‌ خاكی دیلیێتییان كه‌ بۆی ڕاپێچ كراون، هه‌روه‌ها نوێژیان كرد ڕووه‌و ئه‌و خاكه‌ی داوته‌ به‌ باوباپیرانیان و ئه‌و شاره‌ی هه‌ڵتبژاردووه‌ و ئه‌و په‌رستگایه‌ی بۆ ناوی تۆ بنیادم ناوه‌؛
39
ئه‌وا تۆ له‌ ئاسمانه‌وه‌ له‌ شوێنی نیشته‌جێبوونته‌وه‌ گوێ له‌ نوێژ و داواكارییان بگره‌ و دادوه‌رییان بۆ بكه‌. هه‌روه‌ها له‌ گه‌له‌كه‌ت خۆشبه‌، له‌و گوناهانه‌ی به‌رامبه‌رت كردوویانه‌.
40
«ئێستاش ئه‌ی خودایه‌، تكایه‌ با چاوه‌كانت كراوه‌ و گوێیه‌كانت شل بن بۆ نوێژه‌كانی ئه‌م شوێنه‌.
41
ئێستا ئه‌ی یه‌زدانی په‌روه‌ردگار، هه‌سته‌ و وه‌ره‌ بۆ شوێنی حه‌وانه‌وه‌ت،
خۆت و سندوقی هێزت.
ئه‌ی خودای په‌روه‌ردگار، با كاهینه‌كانت ڕاستودروستی له‌به‌ر بكه‌ن و
خۆشه‌ویستانت به‌ چاكه‌ شاد بن.
42
ئه‌ی یه‌زدانی په‌روه‌ردگار، ده‌ستنیشانكراوه‌كه‌ت ڕه‌ت مه‌كه‌ره‌وه‌،
خۆشه‌ویستییه‌ نه‌گۆڕه‌كه‌ت بۆ داودی به‌نده‌ت له‌یاد بێت.»
  1. a. 6‏:13 پێنج باڵ: نزیكه‌ی 2,3 مه‌تر.
  2. b. 6‏:13 سێ باڵ: نزیكه‌ی 4‏،1 مه‌تر.