عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
بنیادنانی په‌رستگای سلێمان 
1
ئینجا سلێمان ده‌ستی به‌ بنیادنانی په‌رستگای یه‌زدان كرد له‌ ئۆرشه‌لیم له‌ كێوی مۆریا، كه‌ له‌وێدا یه‌زدان خۆی بۆ داودی باوكی ده‌رخستبوو. په‌رستگاكه‌ له‌سه‌ر جۆخینه‌كه‌ی ئه‌ره‌ونای یه‌بوسی بوو، ئه‌و شوێنه‌ی كه‌ داود ئاماده‌ی كردبوو.
2
له‌ دووی مانگی دووه‌می ساڵی چواره‌می پاشایه‌تییه‌كه‌ی ده‌ستی به‌ بنیادنان كرد.
3
سلێمان ئه‌م بناغه‌یه‌ی لێدا بۆ بنیادنانی په‌رستگای خودا، درێژییه‌كه‌ی به‌ باڵ به‌پێی پێوانه‌ كۆنه‌كه‌، شه‌ست باڵ[a] و پانییه‌كه‌ی بیست باڵ[b] بوو.
4
هه‌یوانی به‌رده‌م پیرۆزگاكه‌ درێژییه‌كه‌ی وه‌ك پانی پیرۆزگاكه‌ بیست باڵ بوو، به‌رزییه‌كه‌شی بیست باڵ بوو.
له‌ناوه‌وه‌ش به‌ زێڕی بێگه‌رد ڕووكه‌شی كرد.
5
هۆڵه‌ سه‌ره‌كییه‌كه‌شی به‌ ته‌خته‌ی دار سنه‌وبه‌ر داپۆشی و به‌ زێڕی بێگه‌ردیش ڕووكه‌شی كرد و وێنه‌ی دار خورما و زنجیری له‌سه‌ر هه‌ڵكۆڵین و
6
په‌رستگاكه‌ی به‌ به‌ردی گرانبه‌ها ڕازانده‌وه‌ بۆ جوانی و زێڕه‌كه‌ش زێڕی په‌رڤایم[c] بوو.
7
كاریته‌ و چوارچێوه‌ی ده‌رگاكان، دیواره‌كان و ده‌رگاكانی پیرۆزگاكه‌ی به‌ زێڕ ڕووكه‌ش كرد و وێنه‌ی كه‌ڕوبه‌كانی[d] له‌سه‌ر دیواره‌كان هه‌ڵكۆڵی.
8
شوێنی هه‌ره‌پیرۆزیشی بنیاد نا كه‌ درێژییه‌كه‌ی وه‌ك پانی پیرۆزگاكه‌ بیست باڵ بوو و پانییه‌كه‌شی بیست باڵ بوو و به‌ زێڕی بێگه‌رد ڕووكه‌شی كرد كه‌ كێشه‌كه‌ی شه‌ش سه‌د تالنت[e] بوو.
9
كێشی بزماره‌كانیش په‌نجا شاقل زێڕ[f] بوو، به‌شه‌كانی سه‌ره‌وه‌شی به‌ زێڕ ڕووكه‌ش كرد.
10
له‌ شوێنی هه‌ره‌پیرۆزدا په‌یكه‌ری دوو كه‌ڕوبی تاشی[g] و به‌ زێڕ ڕووكه‌شی كردن.
11
درێژی باڵه‌كانی هه‌ردوو كه‌ڕوبه‌كه‌ بیست باڵ بوو: درێژی باڵی كه‌ڕوبه‌كه‌ی یه‌كه‌م پێنج باڵ[h] بوو، به‌ر دیواری پیرۆزگاكه‌ ده‌كه‌وت، درێژی باڵه‌كه‌ی دیكه‌شی پێنج باڵ بوو، به‌ر باڵی كه‌ڕوبه‌كه‌ی دووه‌م ده‌كه‌وت؛
12
به‌ هه‌مان شێوه‌ درێژی باڵی كه‌ڕوبه‌كه‌ی دووه‌م پێنج باڵ بوو و به‌ر دیواری پیرۆزگاكه‌ ده‌كه‌وت و باڵه‌كه‌ی دیكه‌شی پێنج باڵ بوو و به‌ر باڵی كه‌ڕوبه‌كه‌ی یه‌كه‌م ده‌كه‌وت.
13
باڵه‌كانی ئه‌م دوو كه‌ڕوبه‌ كرابوونه‌وه‌ و بیست باڵ درێژ بوون، له‌سه‌ر پێیه‌كانیان ڕاوه‌ستا بوون و ڕووشیان ڕووه‌و هۆڵی سه‌ره‌كی پیرۆزگاكه‌ بوو.
14
په‌رده‌كه‌ی له‌ ڕیسی مۆر و ئه‌رخه‌وانی و سووری تۆخ و كه‌تانی ناسك دروستكرد و وێنه‌ی كه‌ڕوبه‌كانی له‌سه‌ر چنی.
15
له‌به‌رده‌م پپرۆزگاكه‌دا دوو كۆڵه‌كه‌ی دروستكرد كه‌ درێژی هه‌ریه‌كه‌یان سی و پێنج باڵ[i] بوو و ئه‌و تاجه‌ی كه‌ له‌سه‌ر هه‌ر یه‌كێكیان بوو پێنج باڵ بوو.
16
زنجیری هۆنییه‌وه‌ و له‌سه‌ر سه‌ری دوو كۆڵه‌كه‌كه‌ داینان، سه‌د هه‌ناریشی دروستكرد و به‌ زنجیره‌كانه‌وه‌ هه‌ڵیواسین.
17
دوو كۆڵه‌كه‌شی له‌به‌رده‌م پیرۆزگاكه‌ ڕاگرت، یه‌كێكیان له‌لای باشوور و ئه‌وی دیكه‌یان له‌لای باكوور، كۆڵه‌كه‌كه‌ی لای باشووری ناونا یاكین[j] و كۆڵه‌كه‌كه‌ی لای باكووریشی ناونا بۆعه‌ز[k] .
  1. a. 3‏:3 شه‌ست باڵ: نزیكه‌ی 27 مه‌تر.
  2. b. 3‏:3 بیست باڵ: نزیكه‌ی نۆ مه‌تر، لێره‌ و له‌ ئایه‌تی 4، 8، 11، 13.
  3. c. 3‏:6 جۆر یان سه‌رچاوه‌ی زێڕه‌كه‌یه‌ (ده‌شێت باشووری ڕۆژهه‌ڵاتی عه‌ره‌بستان بێت).
  4. d. 3‏:7 كه‌ڕوبه‌كان: بوونه‌وه‌رێكی ئاسمانی باڵداره‌. بڕوانه‌ \+xt حزقیێل 10‏:5‏\+xt*‏.
  5. e. 3‏:8 شه‌ش سه‌د تالنت: نزیكه‌ی 21 هه‌زار كیلۆگرام.
  6. f. 3‏:9 په‌نجا شاقل زێڕ: نزیكه‌ی 0,6 كیلۆگرام.
  7. g. 3‏:10 دوو كه‌ڕوبی تاشی: بڕوانه‌ \+xt یه‌كه‌م پاشایان 6‏:23‏\+xt*‏.
  8. h. 3‏:11 پێنج باڵ: نزیكه‌ی 2,3 مه‌تر، لێره‌ و له‌ ئایه‌تی 12 و 15.
  9. i. 3‏:15 سی و پێنج باڵ: نزیكه‌ی 16 مه‌تر.
  10. j. 3‏:17 یاكین: ده‌شێت واتاكه‌ی (بنیاد ده‌نێت) بێت.
  11. k. 3‏:17 بۆعه‌ز: ده‌شێت واتاكه‌ی (هێز له‌ناو ئه‌و هه‌یه‌) بێت.