عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
پاشایه‌تی ئه‌مه‌سیا 
1
ئه‌مه‌سیا كاتێك بوو به‌ پاشا گه‌نجێكی بیست و پێنج ساڵان بوو، بیست و نۆ ساڵ له‌ ئۆرشه‌لیم پاشایه‌تی كرد، دایكیشی ناوی یه‌هۆعه‌دین بوو، خه‌ڵكی ئۆرشه‌لیم بوو.
2
ئه‌وه‌ی له‌به‌رچاوی یه‌زدان ڕاست بوو كردی، به‌ڵام نه‌ك به‌ دڵێكی ته‌واوه‌وه‌.
3
كاتێك جڵه‌وی پاشایه‌تییه‌كه‌ له‌ ده‌ستی جێگیر بوو، سزای مردنی به‌سه‌ر ئه‌و كاربه‌ده‌ستانه‌دا سه‌پاند كه‌ پاشای باوكیان كوشتبوو.
4
به‌ڵام كوڕه‌كانی ئه‌وانی نه‌كوشت، به‌ڵكو به‌و شێوه‌یه‌ی كرد كه‌ له‌ په‌ڕتووكی ته‌وراتی موسادا نووسراوه‌، كه‌ یه‌زدان فه‌رمانی داوه‌ و فه‌رموویه‌تی: «باوك له‌ جیاتی كوڕ ناكوژرێت و كوڕ له‌ جیاتی باوك ناكوژرێت، هه‌ر یه‌كێك له‌سه‌ر گوناهی خۆی ده‌كوژرێت.»[a]
5
ئه‌مه‌سیا یه‌هودای كۆكرده‌وه‌ و به‌پێی بنه‌ماڵه‌كان داینان به‌ فه‌رمانده‌ی هه‌زاران و سه‌دان له‌ هه‌موو یه‌هودا و بنیامیندا. پاشان له‌ گه‌نجی بیست ساڵ به‌ره‌و سه‌ره‌وه‌ی سه‌رژمێری كرد و بینی سێ سه‌د هه‌زار پیاو كه‌ ئاماده‌ بوون بۆ جه‌نگ، پڕچه‌ككراو به‌ ڕم و قه‌ڵغان بوون.
6
هه‌روه‌ها سه‌د هه‌زار پاڵه‌وانی به‌هێزی له‌ ئیسرائیل به‌ سه‌د تالنت زیو[b] به‌كرێ گرت.
7
به‌ڵام پیاوێكی خودا هات بۆ لای و گوتی: «ئه‌ی پاشا، با سوپای ئیسرائیل له‌گه‌ڵتدا نه‌یێت، چونكه‌ یه‌زدان له‌گه‌ڵ ئیسرائیلدا نییه‌، ته‌نانه‌ت له‌گه‌ڵ كه‌س له‌ نه‌وه‌ی ئه‌فرایمدا نییه‌.
8
هه‌تا ئه‌گه‌ر تۆش به‌ ئازایه‌تییه‌وه‌ به‌ره‌و پێشه‌وه‌ بڕۆیت و شه‌ڕ بكه‌یت، ئه‌وا خودا له‌به‌رده‌م دوژمن ده‌تخات، چونكه‌ له‌لای خودا هێز هه‌یه‌ بۆ یارمه‌تیدان و بۆ خستنیش.»
9
ئه‌مه‌سیا له‌ پیاوه‌كه‌ی خودای پرسی: «ئه‌ی چی بكرێت بۆ ئه‌و سه‌د تالنته‌ی كه‌ داومه‌ته‌ چه‌ته‌كانی ئیسرائیل؟»
پیاوه‌كه‌ی خوداش گوتی «یه‌زدان ده‌توانێت له‌وه‌ زیاترت پێبدات.»
10
ئیتر ئه‌مه‌سیا ئه‌و به‌كرێگیراوانه‌ی جیا كرده‌وه‌ كه‌ له‌ ئه‌فرایمه‌وه‌ هاتبوون هه‌تا بۆ شوێنه‌كه‌ی خۆیان بگه‌ڕێنه‌وه‌، ئه‌وانیش له‌ یه‌هودا زۆر تووڕه‌ بوون و به‌ گڕی تووڕه‌ییه‌وه‌ گه‌ڕانه‌وه‌ بۆ شوێنه‌كه‌ی خۆیان.
11
به‌ڵام ئه‌مه‌سیا وره‌ی دایه‌ به‌رخۆی و ڕابه‌رایه‌تی سوپاكه‌ی كرد بۆ دۆڵی خوێ[c] و ده‌ هه‌زار كه‌سی له‌ نه‌وه‌ی سێعیر كوشت،
12
نه‌وه‌ی یه‌هوداش ده‌ هه‌زاریان به‌ زیندوویی لێ به‌ دیل گرتن و هێنایانن بۆ سه‌ر خه‌ره‌ندێك[d] و له‌سه‌ر هه‌ڵدێره‌كه‌وه‌ فڕێیان دانه‌ خواره‌وه‌ و هه‌موویان پارچه‌پارچه‌ بوون.
13
به‌ڵام ئه‌و چه‌تانه‌ی كه‌ ئه‌مه‌سیا نه‌یهێشت له‌گه‌ڵیدا بچنه‌ جه‌نگه‌كه‌، هێرشیان كرده‌ سه‌ر شارۆچكه‌كانی یه‌هودا، له‌ سامیره‌وه‌ هه‌تا بێت‌حۆرۆن و سێ هه‌زاریان لێ كوشتن و تاڵانێكی زۆریشیان برد.
14
پاش ئه‌وه‌ی ئه‌مه‌سیا له‌ لێدانی ئه‌دۆمییه‌كان گه‌ڕایه‌وه‌، بته‌كانی نه‌وه‌ی سێعیری هێنا و كردنی به‌ خوداوه‌ندی خۆی و كڕنۆشی بۆ بردن و بخووری بۆ سووتاندن.
15
جا تووڕه‌یی یه‌زدان له‌ ئه‌مه‌سیا جۆشا و پێغه‌مبه‌رێكی بۆ نارد و پێی گوت: «بۆچی داوای خوداوه‌نده‌كانی ئه‌و گه‌له‌ت كرد كه‌ نه‌یانتوانی گه‌له‌كه‌ی خۆیان له‌ ده‌ستت ده‌رباز بكه‌ن؟»
16
كاتێك هێشتا قسه‌ی له‌گه‌ڵ ده‌كرد، پێی گوت: «ئایا تۆیان كردووه‌ به‌ ڕاوێژكاری پاشا؟ بێده‌نگ به‌ با نه‌تكوژن!»
ئه‌و كاته‌ پێغه‌مبه‌ره‌كه‌ وه‌ستا، به‌ڵام گوتی: «زانیم كه‌ خودا بڕیاری داوه‌ به‌ له‌ناوبردنت، چونكه‌ ئه‌مه‌ت كرد و گوێت له‌ ڕاوێژم نه‌گرت.»
17
پاش ئه‌وه‌ی ئه‌مه‌سیای پاشای یه‌هودا ڕاوێژی كرد، ناردی به‌دوای یه‌هۆئاشی كوڕی یه‌هۆئاحازی كوڕی یێهوی پاشای ئیسرائیلدا و گوتی: «وه‌ره‌، با ڕووبه‌ڕوو شه‌ڕ بكه‌ین.»
18
یه‌هۆئاشی پاشای ئیسرائیلیش وه‌ڵامی ئه‌مه‌سیای پاشای یه‌هودای دایه‌وه‌ و گوتی: «خڕنووكی لوبنانی ناردی بۆ لای دار ئورزی لوبنانی و گوتی: ”كچه‌كه‌ت بده‌ به‌ كوڕه‌كه‌م هه‌تا ببێته‌ ژنی،“ ئینجا ئاژه‌ڵێكی كێوی له‌ لوبنان به‌سه‌ر خڕنووكه‌كه‌دا ڕۆیشت و پانی كرده‌وه‌.
19
تۆ گوتت ئه‌دۆمم شكاندووه‌، ئێستا له‌خۆبایی بوویت، شانازیت كرد هه‌تا ڕێزداربیت، له‌ ماڵی خۆت بمێنه‌وه‌! بۆچی به‌ڵا به‌سه‌ر خۆتدا ده‌هێنیت؟ ئینجا ده‌كه‌ویت، خۆت و یه‌هوداش له‌گه‌ڵت.»
20
به‌ڵام ئه‌مه‌سیا گوێی نه‌گرت، ئه‌مه‌ش له‌لایه‌ن خوداوه‌ بوو چونكه‌ خودا ویستی بیانداته‌ ده‌ستی یه‌هۆئاش، له‌به‌ر ئه‌وه‌ی ڕوویان له‌ خوداوه‌نده‌كانی ئه‌دۆم كرد.
21
له‌به‌ر ئه‌وه‌ یه‌هۆئاشی پاشای ئیسرائیل هێرشی برد، له‌گه‌ڵ ئه‌مه‌سیای پاشای یه‌هودا له‌ بێت‌شه‌مه‌شی یه‌هودا ڕووبه‌ڕووی یه‌كتر بوونه‌وه‌.
22
له‌ ئه‌نجامدا یه‌هودا به‌رامبه‌ر به‌ ئیسرائیل تێكشكان، هه‌ركه‌سه‌ و به‌ره‌و ماڵه‌كه‌ی خۆی هه‌ڵات.
23
ئه‌مه‌سیای پاشای یه‌هودا، كوڕی یۆئاشی كوڕی ئه‌حه‌زیا، له‌لایه‌ن یه‌هۆئاشی پاشای ئیسرائیله‌وه‌ له‌ بێت‌شه‌مه‌ش به‌ دیل گیرا. پاشان یه‌هۆئاش هێنای بۆ ئۆرشه‌لیم و شوورای ئۆرشه‌لیمی له‌ ده‌روازه‌ی ئه‌فرایمه‌وه‌ هه‌تا ده‌روازه‌ی گۆشه‌كه‌ وێران كرد، كه‌ چوار سه‌د باڵ[e] بوو.
24
هه‌موو زێڕ و زیو و قاپوقاچاغه‌كانی ناو په‌رستگای خودا كه‌ له‌لای عوبێد ئه‌دۆم بوو، هه‌روه‌ها گه‌نجینه‌كانی كۆشكی پاشا و بارمته‌كانی برد و گه‌ڕایه‌وه‌ سامیره‌.
25
ئه‌مه‌سیای كوڕی یۆئاشی پاشای یه‌هوداش له‌دوای مردنی یه‌هۆئاشی كوڕی یه‌هۆئاحازی پاشای ئیسرائیل، پازده‌ ساڵ ژیا.
26
ڕووداوه‌كانی دیكه‌ی پاشایه‌تی ئه‌مه‌سیا له‌ سه‌ره‌تاوه‌ هه‌تا كۆتایی له‌ په‌ڕتووكی پاشاكانی یه‌هودا و ئیسرائیل تۆمار كراون.
27
له‌و كاته‌وه‌ی كه‌ ئه‌مه‌سیا له‌ یه‌زدان هه‌ڵگه‌ڕایه‌وه‌، له‌ ئۆرشه‌لیم پیلانیان له‌ دژی گێڕا و هه‌ڵات بۆ لاخیش، ئینجا چه‌ند پیاوێكیان به‌دوایدا نارده‌ شاری لاخیش و له‌وێ كوشتیان.
28
به‌ ئه‌سپ هێنرایه‌وه‌ ئۆرشه‌لیم و له‌وێ له‌ شاری یه‌هودا له‌گه‌ڵ باوباپیرانی نێژرا.
  1. a. 25‏:4 له‌سه‌ر گوناهی خۆی ده‌كوژرێت: بڕوانه‌ \+xt دواوتار 24‏:16‏\+xt*.
  2. b. 25‏:6 كه‌مێك زیاتر له‌ 3,4 ته‌نی زیو ده‌بوو.
  3. c. 25‏:11 دۆڵی خوێ: ده‌كه‌وێته‌ باشووری ده‌ریای مردوو.
  4. d. 25‏:12 شوێنێكی ڕێك و به‌رزه‌، سه‌ركه‌وتن به‌سه‌ریدا زۆر زه‌حمه‌ته‌، وه‌ك (خه‌ره‌ندی ڕه‌واندوز).
  5. e. 25‏:23 چوار سه‌د باڵ: نزیكه‌ی 180 مه‌تر.