عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
ئه‌بیا له‌گه‌ڵ باوباپیرانی سه‌ری نایه‌وه‌ و له‌ شاری داود نێژرا. ئیتر ئاسای كوڕی له‌دوای خۆی بوو به‌ پاشا. له‌ سه‌رده‌می پاشایه‌تی ئه‌و خاكه‌كه‌ ماوه‌ی ده‌ ساڵ له‌ ئاشتیدا بوو.
پاشایه‌تی ئاسا 
2
ئاساش ئه‌وه‌ی له‌به‌رچاوی یه‌زدانی په‌روه‌ردگاری خۆی باش و ڕاست بوو كردی.
3
قوربانگا نامۆكان و نزرگه‌كانی سه‌ر به‌رزایی تێكدا، به‌رده‌ ته‌رخانكراوه‌كانی[a] شكاند، ستوونه‌ ئه‌شێراكانی[b] بڕییه‌وه‌.
4
به‌ خه‌ڵكی یه‌هودای گوت كه‌ ڕوویان له‌ یه‌زدان بكه‌ن، خودای باوباپیرانیان، كار به‌ فێركردن و فه‌رمانه‌كانی بكه‌ن.
5
له‌ هه‌موو شارۆچكه‌كانی یه‌هوداش نزرگه‌كانی سه‌ر به‌رزاییه‌كان و قوربانگاكانی بخووری تێكدا، پاشایه‌تییه‌كه‌ له‌ سایه‌یدا حه‌سایه‌وه‌.
6
ئه‌و شاره‌ قه‌ڵابه‌نده‌كانی یه‌هودای ئاوه‌دان كرده‌وه‌، چونكه‌ ئاشتی له‌ خاكه‌كه‌دا به‌رقه‌رار بوو. له‌و ساڵانه‌ جه‌نگ ڕووی نه‌دا، چونكه‌ یه‌زدان پاشای حه‌سانده‌وه‌.
7
به‌ یه‌هودای گوت: «با ئه‌م شارۆچكانه‌ بنیاد بنێینه‌وه‌، با ده‌وریان به‌ شوورا و قولله‌ و ده‌روازه‌ و شمشیره‌[c] بگرین. خاكه‌كه‌ هێشتا له‌ژێر ده‌ستی ئێمه‌یه‌، چونكه‌ ڕوومان له‌ یه‌زدانی په‌روه‌ردگارمان كردووه‌؛ ڕوومان له‌و كرد و ئه‌ویش له‌ هه‌موو لایه‌كه‌وه‌ ئێمه‌ی حه‌سانده‌وه‌.» ئیتر كاری بیناسازییان كرد و سه‌ركه‌وتوو بوون.
8
ئاسا سوپایه‌كی سێ سه‌د هه‌زار كه‌سی پڕ چه‌ككراوی به‌ قه‌ڵغانی گه‌وره‌ و ڕم هه‌بوو له‌ یه‌هودا، سوپایه‌كی دوو سه‌د و هه‌شتا هه‌زار كه‌سیشی له‌ تیرهاوێژ و قه‌ڵغان به‌ ده‌ست هه‌بوو له‌ بنیامین، هه‌ر هه‌موویان پاڵه‌وانی به‌هێز بوون.
9
زه‌ره‌حی كوشی سوپایه‌كی بێشوماری به‌ سێ سه‌د گالیسكه‌وه‌ له‌ دژیان جوڵاند و هه‌تا مارێشا هات.
10
ئاساش چوو بۆ به‌ره‌نگاربوونه‌وه‌یان و له‌ دۆڵی چه‌فیتا له‌لای مارێشادا بۆ جه‌نگ ڕیزیان به‌ست.
11
ئینجا ئاسا هاواری بۆ یه‌زدانی په‌روه‌ردگاری خۆی كرد و گوتی: «ئه‌ی یه‌زدان، كه‌س وه‌ك تۆ نییه‌ یارمه‌تی لاوازه‌كان بدات له‌ دژی به‌ هێزه‌كان. ئه‌ی یه‌زدانی په‌روه‌ردگارمان یارمه‌تیمان بده‌، چونكه‌ ئێمه‌ پشتمان به‌ تۆ به‌ستووه‌ و به‌ ناوی تۆوه‌ هاتووین بۆ شه‌ڕ له‌گه‌ڵ ئه‌م سوپا زه‌به‌لاحه‌. ئه‌ی یه‌زدان، تۆ خودامانیت، ڕێگا مه‌ده‌ هیچ مرۆڤێك به‌سه‌رتدا زاڵ بێت.»
12
یه‌زدان له‌به‌رده‌م ئاسا و یه‌هودا كوشییه‌كانی تێكشكاند، جا كوشییه‌كان هه‌ڵاتن و
13
ئاسا و ئه‌و له‌شكره‌ش كه‌ له‌گه‌ڵی بوو هه‌تا گرار ڕاویان نان، كوشییه‌كان ئه‌وه‌نده‌ كه‌سیان لێ كوژرا كه‌ نه‌یانتوانی هه‌ستنه‌وه‌، چونكه‌ له‌به‌رده‌م یه‌زدان و سوپاكه‌ی شكان. پیاوانی یه‌هودا تاڵانێكی زۆریان ده‌ست كه‌وت.
14
پاشان هه‌موو گونده‌كانی ده‌وروبه‌ری گراریان وێران كرد، چونكه‌ ترسی یه‌زدان باڵی به‌سه‌ریاندا كێشابوو. هه‌موو شارۆچكه‌كانیشیان تاڵان كرد، چونكه‌ تاڵانێكی زۆریان تێدابوو.
15
هه‌روه‌ها هێرشیان كرده‌ سه‌ر چادری شوان و وشتره‌وانه‌كان، مه‌ڕ و بزن و وشتری زۆریان دایه‌ پێش خۆیان و گه‌ڕانه‌وه‌ ئۆرشه‌لیم.
  1. a. 14‏:3 به‌ردی به‌ ستوونی دانراو بۆ په‌رستن. بڕوانه‌ دواوتار 16‏:21‏-22.
  2. b. 14‏:3 ستوونه‌ ئه‌شێرا: هێمای خواژنه‌. بڕوانه‌ \+xt یه‌كه‌م پاشایان 11‏:5‏\+xt*‏.
  3. c. 14‏:7 شمشیر، پارچه‌ دارێك بووه‌ له‌ جیاتی قوفڵ له‌ دواوه‌ی ده‌رگا به‌ شێوه‌ی ئاسۆیی دانراوه‌ بۆ داخستنی ده‌رگا.