عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
یاخیبوونی ئیسرائیل له‌ دژی ڕه‌حه‌ڤه‌عام 
1
ڕه‌حه‌ڤه‌عام چوو بۆ شه‌خه‌م، چونكه‌ هه‌موو ئیسرائیل چووبوونه‌ ئه‌وێ بۆ ئه‌وه‌ی بیكه‌نه‌ پاشا.
2
یارۆڤعامی كوڕی نه‌ڤات ئه‌وه‌ی له‌به‌رده‌م سلێمان پاشا هه‌ڵاتبوو هێشتا له‌ میسر بوو، به‌ڵام كاتێك ئه‌مه‌ی بیست له‌ میسره‌وه‌ گه‌ڕایه‌وه‌.
3
پاشان به‌دوایاندا نارد، ئینجا یارۆڤعام و هه‌موو ئیسرائیل چوونه‌ لای ڕه‌حه‌ڤه‌عام و پێیان گوت:
4
«باوكت نیره‌كه‌ی ئێمه‌ی[a] قورس كرد، به‌ڵام ئێستا تۆ له‌ ئه‌ركه‌ سه‌خته‌كه‌ی باوكت و له‌ نیره‌ قورسه‌كه‌ی ئێمه‌ سووك بكه‌ره‌وه‌، ئێمه‌ش خزمه‌تت ده‌كه‌ین.»
5
ڕه‌حه‌ڤه‌عامیش وه‌ڵامی دانه‌وه‌: «له‌پاش سێ ڕۆژی دیكه‌ بگه‌ڕێنه‌وه‌ لام.» گه‌لیش ڕۆیشتن.
6
ئینجا ڕه‌حه‌ڤه‌عام پاشا ڕاوێژی به‌و پیرانه‌ كرد كه‌ له‌ خزمه‌تی سلێمانی باوكیدا بوون كاتێك كه‌ له‌ ژیاندا بوو، لێی پرسین: «ته‌گبیرتان چییه‌، چۆن وه‌ڵامی ئه‌م گه‌له‌ بده‌مه‌وه‌؟»
7
ئه‌وانیش قسه‌یان له‌گه‌ڵی كرد و گوتیان: «ئه‌گه‌ر له‌گه‌ڵ ئه‌م گه‌له‌ چاك بیت و ڕازییان بكه‌یت و قسه‌ی چاكیان له‌گه‌ڵ بكه‌یت، ئه‌وا بۆ هه‌میشه‌ ده‌بنه‌ به‌نده‌ی تۆ.»
8
به‌ڵام ڕه‌حه‌ڤه‌عام ڕاوێژی پیره‌كانی پشتگوێ خست كه‌ پێیان دا و ڕاوێژی به‌و گه‌نجانه‌ كرد كه‌ له‌گه‌ڵی گه‌وره‌ ببوون و خزمه‌تیان ده‌كرد.
9
لێی پرسین: «ئێوه‌ ڕاتان چییه‌؟ به‌ چی وه‌ڵامی ئه‌م گه‌له‌ بده‌ینه‌وه‌، كه‌ قسه‌یان له‌گه‌ڵ كردووم و گوتیان: ”ئه‌و نیره‌ی باوكت كه‌ له‌سه‌ر ئێمه‌ی داناوه‌ سووكی بكه‌ره‌وه‌؟“»
10
ئه‌و گه‌نجانه‌ش كه‌ له‌گه‌ڵی گه‌وره‌ ببوون، وه‌ڵامیان دایه‌وه‌: «ئه‌و گه‌له‌ی كه‌ پێیان گوتی: ”باوكت نیره‌كه‌ی ئێمه‌ی قورس كردووه‌، به‌ڵام تۆ نیره‌كه‌مان له‌سه‌ر سووك بكه‌“ تۆ پێیان بڵێ: ”په‌نجه‌ تووته‌م له‌ كه‌مه‌ری باوكم ئه‌ستوورتره‌.
11
باوكم به‌ نیرێكی قورس باری كردوون، ئێستاش من زیاتر ده‌خه‌مه‌ سه‌ر نیره‌كه‌تان، باوكم به‌ قامچی ته‌مبێی كردوون، من به‌ دووپشك ته‌مبێتان ده‌كه‌م.“»
12
له‌ ڕۆژی سێیه‌م یارۆڤعام و هه‌موو گه‌ل هاتنه‌ لای ڕه‌حه‌ڤه‌عام، هه‌روه‌ك پاشا پێی گوتبوون: «له‌پاش سێ ڕۆژی دیكه‌ بگه‌ڕێنه‌وه‌ لام.»
13
پاشا به‌ توندی وه‌ڵامی دانه‌وه‌، ڕاوێژی پیره‌كانی پشتگوێ خست،
14
به‌پێی ئامۆژگاری گه‌نجه‌كان قسه‌ی له‌گه‌ڵ كردن و گوتی: «باوكم نیره‌كه‌ی ئێوه‌ی قورس كرد، منیش نیره‌كه‌تان قورستر ده‌كه‌م. باوكم به‌ قامچی ته‌مبێی كردن، من به‌ دووپشك ته‌مبێتان ده‌كه‌م.»
15
پاشا گوێی له‌ گه‌ل نه‌گرت، ئه‌مه‌ به‌ ویستی خودا بوو، هه‌تا فه‌رمایشته‌كه‌ی بهێنێته‌ دی، ئه‌وه‌ی یه‌زدان له‌ ڕێگه‌ی ئاحییای شیلۆنی به‌ یارۆڤعامی كوڕی نه‌ڤاتی فه‌رمووبوو.
16
كاتێك هه‌موو ئیسرائیل بینییان پاشا گوێی لێ نه‌گرتن، گه‌ل وه‌ڵامی پاشایان دایه‌وه‌:
«چ به‌شێكمان له‌گه‌ڵ داود هه‌یه‌،
چ میراتێك له‌ كوڕی یه‌سا؟
ئه‌ی ئیسرائیل، بگه‌ڕێنه‌وه‌ چادره‌كانتان!
ئه‌ی داود، ته‌ماشای ماڵه‌كه‌ت بكه‌!»
ئیتر هه‌موو ئیسرائیلییه‌كان گه‌ڕانه‌وه‌ چادره‌كانیان.
17
به‌ڵام ڕه‌حه‌ڤه‌عام هێشتا پاشایه‌تی ده‌كرد به‌سه‌ر ئه‌و ئیسرائیلییانه‌ی له‌ شارۆچكه‌كانی یه‌هودا نیشته‌جێ بوون.
18
ڕه‌حه‌ڤه‌عام پاشا ئه‌دۆنیرامی نارد، ئه‌وه‌ی كه‌ سه‌رپه‌رشتیاری كاری بێگاری بوو، به‌ڵام نه‌وه‌ی ئیسرائیل به‌ردبارانیان كرد و مرد. ئیتر ڕه‌حه‌ڤه‌عام پاشا پێڕاگه‌یشت كه‌ سواری گالیسكه‌كه‌ی بێت و به‌ره‌و ئۆرشه‌لیم هه‌ڵبێت.
19
به‌و شێوه‌یه‌ هه‌تا ئه‌مڕۆ ئیسرائیل له‌ بنه‌ماڵه‌ی داود یاخی بوون.
  1. a. 10‏:4 مه‌به‌ستی له‌ بارگرانییه‌.