عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
داواكردنی دانایی له‌لایه‌ن سلێمانه‌وه‌ 
1
سلێمانی كوڕی داود ده‌سه‌ڵاتی خۆی به‌سه‌ر پاشایه‌تییه‌كه‌یدا به‌هێز كرد، چونكه‌ یه‌زدانی په‌روه‌ردگاری خۆی له‌گه‌ڵی بوو، زۆر مه‌زنی كرد.
2
پاشان سلێمان قسه‌ی له‌گه‌ڵ هه‌موو ئیسرائیل كرد، له‌گه‌ڵ فه‌رمانده‌كانی هه‌زاران و سه‌دان، هه‌روه‌ها دادوه‌ره‌كان و هه‌موو سه‌ركرده‌كان له‌ هه‌موو ئیسرائیل كه‌ گه‌وره‌ی بنه‌ماڵه‌كان بوون.
3
ئیتر سلێمان و هه‌موو كۆمه‌ڵه‌كه‌ له‌گه‌ڵی چوونه‌ سه‌ر ئه‌و نزرگه‌یه‌ی له‌سه‌ر به‌رزاییه‌كه‌ی گبعۆنه‌، چونكه‌ چادری چاوپێكه‌وتنی خودا ئه‌وه‌ی موسای به‌نده‌ی یه‌زدان له‌ چۆڵه‌وانیدا دروستی كرد، له‌وێ بوو.
4
داود له‌ قیریه‌ت یه‌عاریمه‌وه‌ سندوقی خودای هێنا بۆ ئه‌و شوێنه‌ی كه‌ ئاماده‌ی كردبوو، له‌به‌ر ئه‌وه‌ له‌ ئۆرشه‌لیم چادرێكی بۆ هه‌ڵدابوو.
5
به‌ڵام ئه‌و قوربانگا بڕۆنزییه‌ی كه‌ به‌سه‌لئێلی كوڕی ئوری كوڕی حوور دروستی كردبوو، له‌ گبعۆن له‌به‌رده‌م چادره‌كه‌ی په‌رستنی یه‌زدان بوو، ئیتر سلێمان و كۆمه‌ڵه‌كه‌ له‌وێ پرسیاریان له‌ یه‌زدان كرد.
6
سلێمان له‌ یه‌زدان چووه‌ پێشه‌وه‌ و هه‌زار قوربانی سووتاندنی سه‌رخسته‌ سه‌ر قوربانگا بڕۆنزییه‌كه‌ كه‌ له‌به‌رده‌م چادری چاوپێكه‌وتندا بوو.
7
له‌و شه‌وه‌دا خودا بۆ سلێمان ده‌ركه‌وت و پێی فه‌رموو: «داوا بكه‌، چیت پێ بده‌م؟»
8
سلێمانیش به‌ خودای گوت: «تۆ له‌گه‌ڵ داودی باوكم چاكه‌ی گه‌وره‌ت كردووه‌، منت له‌ جێی ئه‌و كردووه‌ته‌ پاشا.
9
ئێستاش ئه‌ی یه‌زدانی په‌روه‌ردگار، با به‌ڵێنه‌كه‌ت له‌گه‌ڵ داودی باوكمدا بچه‌سپێت، چونكه‌ تۆ منت كردووه‌ته‌ پاشای گه‌لێكی زۆر كه‌ وه‌ك خۆڵی زه‌وییه‌.
10
ئێستا دانایی و زانینم پێ ببه‌خشه‌ بۆ ئه‌وه‌ی ڕابه‌رایه‌تی ئه‌م گه‌له‌ بكه‌م، چونكه‌ كێ ده‌توانێت فه‌رمانڕه‌وایه‌تی ئه‌م گه‌له‌ گه‌وره‌یه‌ت بكات؟»
11
خوداش به‌ سلێمانی فه‌رموو: «له‌به‌ر ئه‌وه‌ی ئه‌مه‌ له‌ دڵتدا بوو و داوای ده‌وڵه‌مه‌ندی و پاره‌ و پوول و پایه‌داری و مردنی دوژمنه‌كانت و داوای ته‌مه‌ن درێژیت نه‌كرد، به‌ڵكو داوای دانایی و زانینت بۆ خۆت كرد، بۆ ئه‌وه‌ی دادوه‌رایه‌تی گه‌له‌كه‌م بكه‌یت، ئه‌وه‌ی تۆم كردووه‌ته‌ پاشای،
12
ئه‌وا دانایی و زانینت پێ ده‌به‌خشم. سه‌رباری ئه‌وه‌ش ده‌وڵه‌مه‌ندی و پاره‌ و پوول و پایه‌دارییه‌كی وات پێ ده‌به‌خشم كه‌ شتی وا نه‌بووبێت بۆ پاشاكانی پێش تۆ و بۆ ئه‌وانه‌ی له‌دوای تۆش دێن.»
13
پاشان سلێمان له‌ چادری چاوپێكه‌وتنه‌وه‌ كه‌ له‌سه‌ر به‌رزاییه‌كه‌ی گبعۆن بوو چوو بۆ ئۆرشه‌لیم و پاشایه‌تی ئیسرائیلی كرد.
14
سلێمان گالیسكه‌ و ئه‌سپ سواری كۆكرده‌وه‌، هه‌زار و چوار سه‌د گالیسكه‌ و دوازده‌ هه‌زار ئه‌سپ سواری هه‌بوو. له‌ شاره‌كانی گالیسكه‌كان و له‌گه‌ڵ خۆیدا له‌ ئۆرشه‌لیم داینان.
15
پاشا كارێكی وای كرد كه‌ له‌ ئۆرشه‌لیم زێڕ و زیو وه‌ك به‌ردیان لێ بێت، دار ئورزیش له‌ زۆری وه‌ك دار هه‌نجیری زوورگه‌كان بێت.
16
ئه‌سپه‌كانی سلێمان له‌ میسر و له‌ قه‌ڤێیه‌وه‌[a] هاورده‌ ده‌كران. بازرگانه‌كانی پاشا له‌ قه‌ڤێیه‌وه‌ به‌ نرخێكی بازاڕ وه‌ریانده‌گرتن.
17
گالیسكه‌ له‌ میسره‌وه‌ به‌ شه‌ش سه‌د شاقل[b] زیو و ئه‌سپیش به‌ سه‌د و په‌نجا[c] هاورده‌یان ده‌كرد، هه‌روه‌ها بۆ هه‌موو پاشاكانی حیتی و ئارامی هه‌نارده‌یان ده‌كرد.
  1. a. 1‏:16 قه‌ڤێ: ده‌شێت كیلیكیا بێت. بڕوانه‌ \+xt كردار 6‏:9‏\+xt*‏ هتد.
  2. b. 1‏:17 شه‌ش سه‌د شاقل: نزیكه‌ی 7 كیلۆگرام.
  3. c. 1‏:17 سه‌د و په‌نجا شاقل: نزیكه‌ی 1,7 كیلۆگرام.