عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
پیتاك به‌خشین بۆ بنیادنانی په‌رستگا 
1
پاشان داودی پاشا به‌ هه‌موو كۆمه‌ڵه‌كه‌ی گوت: «سلێمانی كوڕم، ئه‌وه‌ی كه‌ خودا هه‌ڵیبژاردووه‌، گه‌نجێكی پێنه‌گه‌یشتووه‌. كاره‌كه‌ش گه‌وره‌یه‌، چونكه‌ په‌رستگاكه‌ بۆ مرۆڤ نییه‌، به‌ڵكو بۆ یه‌زدانی په‌روه‌ردگاره‌.
2
منیش به‌ هه‌موو توانامه‌وه‌ ئه‌مانه‌م بۆ په‌رستگای خودام ئاماده‌ كردووه‌، زێڕ بۆ زێڕنگه‌ری، زیو بۆ زیوگه‌ری، بڕۆنز بۆ بڕۆنزگه‌ری، ئاسن بۆ ئاسنگه‌ری، ته‌خته‌ بۆ دارتاشی، بڕێكی زۆر له‌ به‌ردی عاشقبه‌ند و به‌رده‌ پیرۆزه‌[a] و چه‌ندین جۆره‌ به‌ردی ڕه‌نگاوڕه‌نگ، هه‌روه‌ها هه‌موو جۆره‌ به‌ردێكی باش و مه‌ڕمه‌ڕی سپی.
3
له‌سه‌ر هه‌موو ئه‌وه‌ی بۆ په‌رستگا پیرۆزه‌كه‌ ئاماده‌م كردووه‌، له‌به‌ر خۆشحاڵیم به‌ په‌رستگای خوداكه‌م، ئێستا گه‌نجینه‌یه‌كی تایبه‌تی خۆشم له‌ زێڕ و زیو ده‌به‌خشم:
4
سێ هه‌زار تالنت[b] زێڕ له‌ زێڕی ئۆفیر و حه‌وت هه‌زار تالنت[c] زیوی پوخته‌كراو بۆ ڕووكه‌شكردنی دیواری ته‌لاره‌كان و
5
هه‌ر كارێك كه‌ به‌ زێڕ و زیو ده‌كرێت، هه‌موو كارێكی ده‌ستی وه‌ستا پیشه‌وه‌ره‌كانیش. ئێستا كێ خوازیاره‌ خۆی بۆ یه‌زدان ته‌رخان بكات؟»
6
ئینجا گه‌وره‌ی بنه‌ماڵه‌ و سه‌رۆك هۆزه‌كانی ئیسرائیل و فه‌رمانده‌ی هه‌زاران و سه‌دان، لێپرسراوانی كاره‌كانی پاشاش هه‌موویان به‌ خواستی خۆیان پیتاكیان به‌خشی.
7
بۆ كاری بیناسازی په‌رستگای خودا پێنج هه‌زار تالنت[d] زێڕ و ده‌ هه‌زار درهه‌می[e] زێڕ، ده‌ هه‌زار تالنت[f] زیو، هه‌ژده‌ هه‌زار تالنت[g] بڕۆنز و سه‌د هه‌زار تالنت[h] ئاسنیان به‌خشی.
8
ئه‌وه‌ی به‌ردی گرانبه‌های هه‌بوو دایه‌ گه‌نجینه‌ی په‌رستگای یه‌زدان كه‌ یه‌حیێلی گێرشۆنی به‌رپرسی بوو.
9
گه‌ل به‌ به‌خشنده‌یی ڕابه‌ره‌كانیان دڵخۆش بوون، چونكه‌ به‌ هه‌موو دڵیانه‌وه‌ پیتاكه‌كانیان به‌ یه‌زدان به‌خشی، داودی پاشاش زۆر دڵخۆش بوو.
نوێژی داود 
10
داود له‌به‌رده‌م هه‌موو كۆمه‌ڵه‌كه‌ ستایشی یه‌زدانی كرد و گوتی:
«ستایش بۆ تۆ ئه‌ی یه‌زدان،
خودای ئیسرائیل، باوكمانی
له‌ ئه‌زه‌له‌وه‌ و بۆ هه‌تاهه‌تایه‌.
11
ئه‌ی یه‌زدان، بۆ تۆیه‌ گه‌وره‌یی و توانا،
مه‌زنی و پایه‌به‌رزی و شكۆ،
چونكه‌ هه‌موو ئه‌وه‌ی له‌ ئاسمان و له‌ زه‌ویدایه‌ هی تۆیه‌.
ئه‌ی یه‌زدان، پاشایه‌تی هی تۆیه‌ و
تۆ هه‌ره‌به‌رزیت و له‌ هه‌مووان پایه‌به‌رزتری.
12
ده‌وڵه‌مه‌ندی و ڕێز له‌لای تۆوه‌ دێن،
تۆ فه‌رمانڕه‌وای هه‌مووانیت.
هێز و توانا له‌ ده‌ستی تۆدان
تاكو هه‌مووان به‌هێز و وره‌به‌رز بكه‌یت.
13
ئێستاش ئه‌ی خودای ئێمه‌، سوپاست ده‌كه‌ین و
ستایشی ناوه‌ شكۆداره‌كه‌ت ده‌كه‌ین.
14
«به‌ڵام من كێم و گه‌له‌كه‌م كێیه‌ هه‌تا بتوانین به‌م دڵفراوانییه‌وه‌ ببه‌خشین؟ هه‌موو شتێك له‌ تۆوه‌ دێت، له‌وه‌ی كه‌ هی تۆیه‌ به‌ تۆمان به‌خشییه‌وه‌.
15
ئێمه‌ له‌به‌رچاوی تۆدا نامۆین و وه‌ك هه‌موو باوباپیرانمان ئاواره‌ین[i] . ڕۆژانمان له‌سه‌ر زه‌وی وه‌ك سێبه‌رن و ئومێدیش نییه‌.
16
ئه‌ی یه‌زدانی په‌روه‌ردگارمان، هه‌موو ئه‌م سامانه‌ی كه‌ ئاماده‌مان كردووه‌ هه‌تا په‌رستگایه‌ك بۆ ناوی پیرۆزت بنیاد بنێین، هه‌مووی له‌ تۆوه‌ هاتووه‌ و هه‌موو شتێكیش هی تۆیه‌.
17
خودایه‌ من ده‌زانم كه‌ تۆ دڵه‌كان تاقی ده‌كه‌یته‌وه‌ و به‌ دڵی پاك دڵخۆش ده‌بیت. من به‌ خواستی خۆم و به‌ ڕاستگۆییه‌وه‌ هه‌موو ئه‌م شتانه‌م به‌خشیوه‌. ئێستاش دڵخۆش بووم كه‌ گه‌له‌كه‌ی تۆم لێره‌ بینی چۆن به‌ خواستی دڵی خۆیان پیتاكیان پێ به‌خشیت.
18
ئه‌ی یه‌زدان، خودای ئیبراهیم و ئیسحاق و ئیسرائیلی باوباپیرانمان، ئه‌م بیركردنه‌وه‌یه‌ بۆ هه‌تاهه‌تایه‌ له‌ دڵی گه‌له‌كه‌تدا بپارێزه‌ و دڵیان به‌لای خۆتدا ڕابكێشه‌.
19
هه‌روه‌ها وا بكه‌ سلێمانی كوڕم پڕ به‌ دڵ فه‌رمان و یاسا و فه‌رزه‌كانت به‌جێبهێنێت، هه‌موویان په‌یڕه‌و بكات و ئه‌و په‌رستگایه‌ بنیاد بنێت كه‌ ئاماده‌كاریم بۆی كردووه‌.»
20
پاشان داود به‌ هه‌موو كۆمه‌ڵه‌كه‌ی گوت: «تكایه‌ ستایشی یه‌زدانی په‌روه‌ردگارتان بكه‌ن.» ئینجا هه‌موو كۆمه‌ڵه‌كه‌ ستایشی یه‌زدانی خودای باوباپیرانی خۆیان كرد و به‌ چۆكدا هاتن و كڕنۆشیان بۆ یه‌زدان و پاشا برد.
دانپێدانانی پاشایه‌تی سلێمان 
21
پاشان له‌ ڕۆژی دواتر قوربانییان بۆ یه‌زدان سه‌ربڕی و قوربانی سووتاندنیان بۆ یه‌زدان سه‌رخست، هه‌زار گا و هه‌زار به‌ران و هه‌زار به‌رخی نێر له‌گه‌ڵ شه‌رابه‌ پێشكه‌شكراوه‌كانیان و قوربانی سه‌ربڕاوی زۆر بۆ هه‌موو ئیسرائیل.
22
جا له‌و ڕۆژه‌دا به‌ ئه‌وپه‌ڕی خۆشییه‌وه‌ له‌به‌رده‌م یه‌زدان خواردیان و خواردیانه‌وه‌.
پاشان دووباره‌ سلێمانی كوڕی داودیان وه‌ك پاشا ڕاگه‌یاند و وه‌ك فه‌رمانڕه‌وایه‌ك له‌لایه‌ن یه‌زدانه‌وه‌ ده‌ستنیشان كرا، سادۆقیش وه‌ك كاهین دانرایه‌وه‌.
23
ئیتر سلێمان وه‌ك پاشا له‌سه‌ر كورسی یه‌زدان دانیشت، له‌ جێی داودی باوكی. سه‌ركه‌وتوو بوو و هه‌موو ئیسرائیلیش گوێڕایه‌ڵی بوون.
24
هه‌روه‌ها هه‌موو سه‌ركرده‌ و پاڵه‌وان و سه‌رجه‌م كوڕه‌كانی داودی پاشا سوێندیان خوارد ملكه‌چی سلێمانی پاشا بن.
25
یه‌زدانیش سلێمانی له‌به‌رچاوی هه‌موو ئیسرائیل زۆر مه‌زن كرد، شكۆیه‌كی شاهانه‌ی وای پێدا كه‌ پێش خۆی له‌ ئیسرائیل نه‌درابووه‌ هیچ پاشایه‌كی دیكه‌.
مردنی داود 
26
داودی كوڕی یه‌سا پاشایه‌تی هه‌موو ئیسرائیلی كرد،
27
ئه‌و ماوه‌یه‌ش كه‌ پاشایه‌تی ئیسرائیلی كرد چل ساڵ بوو، حه‌وت ساڵ له‌ حه‌برۆن و سی و سێ ساڵیش له‌ ئۆرشه‌لیم پاشایه‌تی كرد.
28
له‌ ته‌مه‌نێكی باشی پیریدا مرد و له‌ ژیان و ده‌وڵه‌مه‌ندی و ڕێز، تێری خواردبوو. پاشان سلێمانی كوڕی له‌دوای خۆی بوو به‌ پاشا.
29
ڕووداوه‌كانی پاشایه‌تی داود له‌ سه‌ره‌تاوه‌ هه‌تا كۆتایی له‌ په‌ڕتووكی تۆماره‌كانی ساموئێلی پێشبینیكه‌ر و له‌ تۆماره‌كانی ناتانی پێغه‌مبه‌ر نووسراون، هه‌روه‌ها له‌ تۆماره‌كانی گادی پێشبینیكه‌ر،
30
له‌گه‌ڵ هه‌موو ورده‌كارییه‌كانی پاڵه‌وانیێتی و پاشایه‌تییه‌كه‌ی و هه‌موو ئه‌و ڕۆژگارانه‌شی كه‌ به‌سه‌ر خۆی و به‌سه‌ر ئیسرائیل و هه‌موو پاشایه‌تییه‌كانی خاكه‌كاندا تێپه‌ڕین.
  1. a. 29‏:2 به‌رده‌ پیرۆزه‌: به‌ردێكی شینی سه‌وزباو. بڕوانه‌ \+xt ده‌رچوون 28‏:18‏\+xt*‏.
  2. b. 29‏:4 سێ هه‌زار تالنت: نزیكه‌ی سه‌د ته‌ن.
  3. c. 29‏:4 حه‌وت هه‌زار تالنت: نزیكه‌ی 240 ته‌ن.
  4. d. 29‏:7 پێنج هه‌زار تالنت: نزیكه‌ی 170 ته‌ن.
  5. e. 29‏:7 ده‌ هه‌زار درهه‌م: نزیكه‌ی 84 كیلۆگرام، درهه‌م پاره‌ و پولێكی فارسی بووه‌.
  6. f. 29‏:7 نزیكه‌ی 345 ته‌ن.
  7. g. 29‏:7 نزیكه‌ی 610 ته‌ن.
  8. h. 29‏:7 نزیكه‌ی 3450 ته‌ن.
  9. i. 29‏:15 ئاواره‌ین: بڕوانه‌ \+xt په‌یدابوون 23‏:4‏\+xt*‏.