عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
سندوقی خودا له‌ ئه‌شدۆد و عه‌قرۆن 
1
فه‌له‌ستییه‌كانیش سندوقی خودایان برد و له‌ به‌ردی یارمه‌تییه‌وه‌ هێنایان بۆ ئه‌شدۆد[a] .
2
ئینجا فه‌له‌ستییه‌كان سندوقی خودایان برد و هێنایان بۆ په‌رستگای داگۆن و له‌ته‌نیشت داگۆن[b] دایاننا.
3
جا ئه‌شدۆدییه‌كان بۆ سبه‌ینێ به‌یانی زوو له‌ خه‌و هه‌ستان و بینییان وا داگۆن له‌به‌رده‌م سندوقی یه‌زدان به‌ده‌مدا كه‌وتووه‌! ئینجا داگۆنیان هه‌ڵگرت و له‌ شوێنه‌كه‌ی خۆی دایاننایه‌وه‌.
4
بۆ سبه‌ینێ به‌یانی زوو له‌ خه‌و هه‌ستان و بینییان وا داگۆن له‌به‌رده‌م سندوقی یه‌زدان به‌ده‌مدا كه‌وتووه‌، سه‌ری داگۆن و هه‌ردوو ده‌ستی بڕاونه‌ته‌وه‌ و له‌سه‌ر سه‌كۆی ده‌روازه‌كه‌ دانراون، ته‌نها به‌شی سه‌ره‌وه‌ی په‌یكه‌ری داگۆن ماوه‌ته‌وه‌.
5
له‌به‌ر ئه‌وه‌ كاهینه‌كانی داگۆن و هه‌موو ئه‌وانه‌ش كه‌ ده‌چنه‌ ناو په‌رستگای داگۆن له‌ ئه‌شدۆد، هه‌تا ئه‌مڕۆش پێ له‌سه‌ر سه‌كۆی ده‌رگاكه‌ نانێن.
6
یه‌زدان به‌ ده‌ستێكی به‌هێز له‌ خه‌ڵكی ئه‌شدۆد و ده‌وروبه‌ری دا، خراپه‌ی به‌سه‌رھێنان، تووشی ئاوسانی[c] جه‌سته‌ی كردن.
7
كاتێك پیاوانی ئه‌شدۆد بینییان وایه‌، گوتیان: «نابێت سندوقی خوداوه‌ندی ئیسرائیل له‌لامان بمێنێته‌وه‌، چونكه‌ ده‌ستی له‌سه‌ر ئێمه‌ و له‌سه‌ر داگۆنی خوداوه‌ندمان قورس بووه‌.»
8
جا ناردیان و هه‌موو حوكمڕانه‌ فه‌له‌ستییه‌كانیان بۆ لای خۆیان كۆكرده‌وه‌ و گوتیان: «چی له‌ سندوقی خوداوه‌ندی ئیسرائیل بكه‌ین؟»
ئه‌وانیش وه‌ڵامیان دایه‌وه‌: «با سندوقی خوداوه‌ندی ئیسرائیل بگوازرێته‌وه‌ بۆ گه‌ت.» ئینجا سندوقی خودای ئیسرائیلیان بۆ گه‌ت گواسته‌وه‌.
9
به‌ڵام پاش ئه‌وه‌ی گواستیانه‌وه‌، یه‌زدان دژایه‌تی شاره‌كه‌ی كرد و زۆر به‌ توندی ئه‌وانی تۆقاند، له‌ خه‌ڵكی شاره‌كه‌ی دا، له‌ بچووكه‌وه‌ هه‌تا گه‌وره‌، تووشی ئاوسان هاتن.
10
ئینجا سندوقی خودایان بۆ عه‌قرۆن نارد.
جا كه‌ سندوقی خودا چووه‌ ناو عه‌قرۆنه‌وه‌، عه‌قرۆنییه‌كان هاواریان كرد و گوتیان: «سندوقی خوداوه‌ندی ئیسرائیلیان بۆ ناو ئێمه‌ گواسته‌وه‌ هه‌تا خۆمان و گه‌له‌كه‌مان بكوژن.»
11
جا ناردیان و هه‌موو حوكمڕانه‌ فه‌له‌ستییه‌كانیان كۆكرده‌وه‌ و گوتیان: «سندوقی خودای ئیسرائیل بنێرن و با بگه‌ڕێته‌وه‌ بۆ شوێنه‌كه‌ی خۆی، با خۆمان و گه‌له‌كه‌مان نه‌مرین.» چونكه‌ ترسی مردن له‌ناو هه‌موو شاره‌كه‌دا هه‌بوو و ده‌ستی خودا له‌وێ زۆر قورس بوو.
12
ئه‌وانه‌ش كه‌ نه‌مردن تووشی ئاوسان بوون، هاواری شاره‌كه‌ بۆ ئاسمان به‌رزبووه‌وه‌.
  1. a. 5‏:1 شارێكی فه‌له‌ستییه‌كان بوو.
  2. b. 5‏:2 واته‌ په‌یكه‌ری داگۆن.
  3. c. 5‏:6 ئه‌م نه‌خۆشییه‌ كه‌ له‌ ڕێگای جرجه‌وه‌ بووه‌، ده‌شێت تاعوونه‌ ڕه‌شه‌ بێت كه‌ لووی لیمفاوی له‌بن باڵ و بن ڕان دروستده‌كات.