عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
په‌یامی ساموئێل به‌ هه‌موو ئیسرائیل گه‌یشت.[a]
ئیسرائیلیش بۆ به‌ره‌نگاربوونه‌وه‌ی فه‌له‌ستییه‌كان بۆ شه‌ڕ چوونه‌ ده‌ره‌وه‌ و له‌لای به‌ردی یارمه‌تی ئۆردوگایان دامه‌زراند، فه‌له‌ستییه‌كانیش له‌لای ئه‌فێق.
فه‌له‌ستییه‌كان سندوقی خودا ده‌به‌ن 
2
ئینجا فه‌له‌ستییه‌كان به‌ره‌یان به‌ست بۆ به‌ره‌نگاربوونه‌وه‌ی ئیسرائیل و شه‌ڕ هه‌ڵگیرسا، ئیسرائیل له‌ ڕووی فه‌له‌ستییه‌كان به‌زین و ئه‌وانیش له‌ به‌ره‌ی جه‌نگه‌كه‌دا، نزیكه‌ی له‌ چوار هه‌زار پیاویان دا.
3
ئینجا سه‌ربازه‌كان گه‌ڕانه‌وه‌ بۆ ئۆردوگاكه‌ و پیرانی ئیسرائیل پرسییان: «بۆچی یه‌زدان ئه‌مڕۆ ئێمه‌ی به‌رامبه‌ر به‌ فه‌له‌ستییه‌كان به‌زاند؟ با سندوقی په‌یمانی یه‌زدان له‌ شیلۆوه‌ بهێنین بۆ ئێره‌، با بێته‌ نێومانه‌وه‌ و له‌ ده‌ست دوژمنه‌كانمان ڕزگارمان بكات.»
4
جا گه‌ل ناردیان بۆ شیلۆ و له‌وێوه‌ سندوقی په‌یمانیان هه‌ڵگرت، كه‌ هی یه‌زدانی سوپاسالاره‌، ئه‌وه‌ی له‌نێوان كه‌ڕوبه‌كان[b] له‌سه‌ر ته‌خت دانیشتووه‌[c] . دوو كوڕه‌كه‌ی عێلیش، حۆفنی و فینه‌حاس له‌وێ له‌گه‌ڵ سندوقی په‌یمانی خودا بوون.
5
ئه‌وه‌ بوو له‌ كاتی چوونه‌ ناوه‌وه‌ی سندوقی په‌یمانی یه‌زدان بۆ ناو ئۆردوگاكه‌، هه‌موو ئیسرائیل به‌ ده‌نگێكی به‌رز هاواریان كرد كه‌ زه‌وی له‌رزاند.
6
فه‌له‌ستییه‌كانیش گوێیان له‌ ده‌نگی هاواره‌كه‌ بوو و گوتیان: «ده‌نگی ئه‌م هاواره‌ به‌رزه‌ چی بوو له‌ناو ئۆردوگای عیبرانییه‌كان؟»
جا كه‌ زانییان سندوقی یه‌زدان هاتووه‌ته‌ ناو ئۆردوگاكه‌،
7
فه‌له‌ستییه‌كان ترسان، چونكه‌ گوتیان: «خوداوه‌ندێك هاتووه‌ته‌ ناو ئۆردوگاكه‌وه‌!» هه‌روه‌ها گوتیان: «قوڕمان به‌سه‌ر! چونكه‌ هه‌رگیز پێشتر شتی وا نه‌بووه‌.
8
قوڕمان به‌سه‌ر! كێ له‌ ده‌ست ئه‌و خوداوه‌نده‌ توانادارانه‌ فریامان ده‌كه‌وێت؟ ئه‌وانه‌ ئه‌و خوداوه‌ندانه‌ن كه‌ له‌ چۆڵه‌وانیدا گه‌لی میسریان تووشی هه‌موو جۆره‌ ده‌ردێك كرد.
9
فه‌له‌ستییه‌كان به‌هێزبن و پیاوبن! ئه‌گینا ده‌بنه‌ كۆیله‌ی عیبرانییه‌كان، وه‌ك چۆن ئه‌وان كۆیله‌ی ئێوه‌ بوون. جا پیاوبن و بجه‌نگن!»
10
ئیتر فه‌له‌ستییه‌كان جه‌نگان و ئیسرائیل به‌زی و هه‌ریه‌كه‌ و به‌ره‌و چادره‌كه‌ی هه‌ڵات و كوشتاره‌كه‌ زۆر گه‌وره‌ بوو، سی هه‌زار سه‌ربازی پیاده‌ له‌ ئیسرائیل كوژران.
11
سندوقی خودا ده‌ستی به‌سه‌ردا گیرا و هه‌ردوو كوڕه‌كه‌ی عێلیش، حۆفنی و فینه‌حاس كوژران.
مردنی عێلی 
12
پیاوێكی بنیامینیش له‌ به‌ره‌ی جه‌نگه‌وه‌ ڕایكرد و هه‌ر له‌و ڕۆژه‌دا هاته‌ شیلۆ، جله‌كانی دڕابوون و سه‌ری تۆزاوی بوو.
13
هات و بینی وا عێلی له‌سه‌ر كورسییه‌ك له‌ قه‌راغ ڕێگاكه‌ دانیشتووه‌ و چاوه‌ڕێیه‌تی، چونكه‌ دڵی بۆ سندوقی خودا له‌ مه‌راقدا بوو. كاتێك پیاوه‌كه‌ هاته‌ ناو شارۆچكه‌كه‌ و هه‌واڵه‌كه‌ی ڕاگه‌یاند، هه‌موو شارۆچكه‌كه‌ هاواریان لێ به‌رزبووه‌وه‌.
14
عێلیش گوێی له‌ ده‌نگی هاواره‌كه‌ بوو و گوتی: «ده‌نگی ئه‌و هاتوهاواره‌ چییه‌؟»
ئینجا پیاوه‌كه‌ به‌ په‌له‌ هات و به‌ عێلی ڕاگه‌یاند.
15
عێلیش ته‌مه‌نی نه‌وه‌د و هه‌شت ساڵ بوو و چاوه‌كانی له‌ ده‌ستدا بوو و توانای بینینی نه‌بوو.
16
پیاوه‌كه‌ به‌ عێلی گوت: «من له‌ به‌ره‌ی جه‌نگه‌وه‌ هاتووم و هه‌ر ئه‌مڕۆ من له‌ به‌ره‌كه‌ هه‌ڵاتووم.»
عێلیش پرسی: «چی ڕوویدا، كوڕم؟»
17
هه‌واڵده‌ره‌كه‌ش وه‌ڵامی دایه‌وه‌ و گوتی: «ئیسرائیل له‌به‌رده‌م فه‌له‌ستییه‌كان هه‌ڵات و هه‌روه‌ها به‌زینێكی گه‌وره‌ له‌ناو سوپادا ڕوویدا و هه‌روه‌ها هه‌ردوو كوڕه‌كه‌ت، حۆفنی و فینه‌حاس كوژران، سندوقی خوداش ده‌ستی به‌سه‌ردا گیرا.»
18
جا كه‌ باسی سندوقی خودا كرا عێلی له‌سه‌ر كورسییه‌كه‌ به‌ره‌و دواوه‌ كه‌وت به‌لای ده‌روازه‌كه‌دا و ملی شكا و مرد، چونكه‌ پیاوێكی پیر و قورس بوو، چل ساڵ ڕابه‌رایه‌تی ئیسرائیلی كرد.
19
بووكه‌كه‌ی عێلی، ژنه‌كه‌ی فینه‌حاس سكی پڕ بوو، له‌ مانگی خۆی بوو، كاتێك بیستی سندوقی خودا بردراوه‌ و خه‌زوور و مێرده‌كه‌شی مردوون، ژانی گرت و منداڵی بوو. ژانه‌كه‌ی زۆری بۆ هێنا،
20
له‌ سه‌ره‌مه‌رگدا ئه‌و ژنانه‌ی به‌سه‌رییه‌وه‌ وه‌ستابوون پێیان گوت: «مه‌ترسه‌، چونكه‌ كوڕێكت بووه‌.» به‌ڵام وه‌ڵامی نه‌دایه‌وه‌ و گوێی پێنه‌دا.
21
منداڵه‌كه‌شی ناونا ئیخاڤۆد[d] و گوتی: «شكۆمه‌ندی له‌ ئیسرائیل داماڵرا.» چونكه‌ سندوقی خودا بردرا و له‌به‌ر خه‌زوور و مێرده‌كه‌شی.
22
ئینجا گوتی: «شكۆمه‌ندی له‌ ئیسرائیل داماڵرا، چونكه‌ سندوقی خودا بردرا.»
  1. a. 4‏:1 له‌ ڕووداوه‌كانی به‌شی چوار هێشتا ساموئێل نه‌بووه‌ته‌ كاربه‌ده‌ستێك له‌نێو گه‌لی ئیسرائیل. \+xt بڕوانه‌ 7‏:3‏\+xt*.
  2. b. 4‏:4 له‌نێوان كه‌ڕوبه‌كان: جووتێك په‌یكه‌ری بوونه‌وه‌ری ئاسمانی باڵداره‌، له‌ شێوه‌ی ئاژه‌ڵ و مرۆڤدایه‌، بۆ پارێزگاریكردن له‌ سندوقی په‌یمان دانرابوو، بڕوانه‌ \+xt ده‌رچوون 25‏:22 و عیبرانییه‌كان 9‏:5‏\+xt*‏.
  3. c. 4‏:4 له‌ سه‌رده‌می په‌یمانی كۆن خودا له‌ شوێنی هه‌ره‌پیرۆزی په‌رستگا ئاماده‌ ده‌بوو، به‌ تایبه‌ت سندوقی په‌یمان و نێوان كه‌ڕوبه‌كان وه‌ك ته‌ختی خودا بوون.
  4. d. 4‏:21 (ئیخاڤۆد) واته‌ شكۆمه‌ند نییه‌.