عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
داود و نابال و ئه‌بیگایل 
1
ئه‌وه‌ بوو ساموئێل مرد، هه‌موو ئیسرائیل كۆبوونه‌وه‌ و شیوه‌نیان بۆ گێڕا، له‌ ماڵه‌كه‌ی خۆیدا له‌ ڕامه‌ ناشتیان.
دوای ئه‌وه‌ داود هه‌ستا و به‌ره‌و چۆڵه‌وانی ماعۆن دابه‌زی.
2
پیاوێك هه‌بوو له‌ ماعۆن موڵك و ماڵی له‌ كه‌رمه‌ل[a] بوو. زۆر ده‌وڵه‌مه‌ند بوو، سێ هه‌زار سه‌ر مه‌ڕ و هه‌زار سه‌ر بزنی هه‌بوو، له‌ كه‌رمه‌ل ده‌یبڕینه‌وه‌.
3
پیاوه‌كه‌ ناوی نابال بوو، ئه‌بیگایلی ژنی تێگه‌یشتوو و ڕوخسار جوان بوو، به‌ڵام پیاوه‌كه‌ كه‌ له‌ خێڵی كالێبی بوو، دڵڕه‌ق و به‌د ڕه‌فتار بوو.
4
داود له‌ چۆڵه‌وانییه‌وه‌ بیستی كه‌ نابال مه‌ڕه‌كانی ده‌بڕێته‌وه‌،
5
ده‌ خزمه‌تكاری نارد و پێی گوتن: «سه‌ربكه‌ون بۆ كه‌رمه‌ل و بڕۆن بۆ لای نابال و به‌ ناوی منه‌وه‌ سڵاوی لێ بكه‌ن،
6
ئاوا بڵێن: ”ته‌مه‌ن درێژ بیت، خۆت و خاووخێزانت سه‌لامه‌ت بن و هه‌رچیت هه‌یه‌ سه‌لامه‌ت بێت!
7
«”ئێستا بیستوومه‌ كه‌ له‌لای ئێوه‌ كاتی بڕینه‌وه‌ی مه‌ڕه‌كانه‌. به‌ درێژایی ئه‌و ماوه‌یه‌ی شوانه‌كانت له‌گه‌ڵ ئێمه‌ له‌ كه‌رمه‌ل بوون ئازارمان نه‌دان و هیچیان لێ بزر نه‌بوو.
8
له‌ خزمه‌تكاره‌كانی خۆت بپرسه‌ و ئه‌وان پێت ده‌ڵێن. له‌به‌ر ئه‌وه‌ با ئه‌و خزمه‌تكارانه‌م په‌سه‌ند بن له‌لات. له‌به‌ر ئه‌وه‌ی له‌ ڕۆژێكی چاكدا هاتووین، ئه‌وه‌ی له‌ ده‌ستت دێت بیده‌ خزمه‌تكاره‌كانت و داودی كوڕت.“»
9
كاتێك خزمه‌تكاره‌كان هاتن و به‌ ناوی داوده‌وه‌ ته‌واوی ئه‌م په‌یامه‌یان به‌ نابال ڕاگه‌یاند، چاوه‌ڕێیان كرد.
10
نابالیش وه‌ڵامی خزمه‌تكاره‌كانی داودی دایه‌وه‌ و گوتی: «داود كێیه‌ و كوڕی یه‌سا كێیه‌؟ له‌م ڕۆژانه‌دا ئه‌و خزمه‌تكارانه‌ زۆر بوون كه‌ هه‌ریه‌كه‌ و له‌به‌رده‌م گه‌وره‌كه‌ی هه‌ڵدێت.
11
ئایا نان و ئاو و ئه‌و ئاژه‌ڵانه‌ی سه‌رم بڕییوه‌ بۆ ئه‌وانه‌ی خوری مه‌ڕه‌كانم ده‌بڕنه‌وه‌، بیبه‌م و بیده‌مه‌ خه‌ڵكێك كه‌ نازانم خه‌ڵكی كوێن؟»
12
جا خزمه‌تكاره‌كانی داود به‌ ڕێگاكه‌یاندا گه‌ڕانه‌وه‌، هاتن و هه‌موو ئه‌و قسانه‌یان پێی ڕاگه‌یاند.
13
داودیش به‌ پیاوه‌كانی گوت: «با هه‌ریه‌كه‌ و شمشێره‌كه‌ی له‌ خۆی ببه‌ستێت!» جا هه‌ریه‌كه‌ و شمشێره‌كه‌ی له‌ خۆی به‌ست، داودیش شمشێره‌كه‌ی له‌ خۆی به‌ست. نزیكه‌ی چوار سه‌د پیاو به‌دوای داوده‌وه‌ سه‌ركه‌وتن، دوو سه‌د كه‌سیش له‌لای كه‌لوپه‌له‌كان مانه‌وه‌.
14
یه‌كێك له‌ خزمه‌تكاره‌كان به‌ ئه‌بیگایلی ژنی نابالی ڕاگه‌یاند و گوتی: «داود چه‌ند نێردراوێكی له‌ چۆڵه‌وانییه‌وه‌ نارد بۆ سڵاوكردن له‌ گه‌وره‌مان، ئه‌ویش به‌ڕوویاندا ته‌قییه‌وه‌،
15
ئه‌و پیاوانه‌ش چاكه‌ی زۆریان بۆمان بووه‌ و ئه‌زیه‌تیان نه‌داوین، به‌ درێژایی ئه‌و ماوه‌یه‌ی كه‌ له‌ كێڵگه‌ له‌گه‌ڵیاندا بووین هیچمان لێ بزر نه‌بووه‌.
16
هه‌موو ئه‌و ماوه‌یه‌ی كه‌ له‌گه‌ڵیان بووین و مه‌ڕمان ده‌له‌وه‌ڕاند، شه‌و و ڕۆژ شوورای ده‌ورمان بوون.
17
ئێستاش بزانه‌ و ببینه‌ چی ده‌كه‌یت، چونكه‌ بۆ گه‌وره‌مان و بۆ ماڵه‌كه‌ی كاره‌سات به‌ڕێوه‌یه‌، گه‌وره‌مان كابرایه‌كی به‌دفه‌ڕه‌ و قسه‌ی له‌گه‌ڵدا ناكرێت.»
18
ئه‌بیگایلیش به‌ په‌له‌ دوو سه‌د نان و دوو مه‌شكه‌ شه‌راب و پێنج مه‌ڕی كه‌وڵكراو و پێنج پێوانه‌[b] دانه‌وێڵه‌ی برژاو و سه‌د هێشووه‌ كشمیش و دوو سه‌د نانه‌ هه‌نجیری برد و له‌ گوێدرێژه‌كانی باركرد،
19
به‌ خزمه‌تكاره‌كانی گوت: «له‌پێشمه‌وه‌ بڕۆن، منیش وا له‌ دواتانه‌وه‌ دێم.» به‌ڵام به‌ نابالی مێردی نه‌گوت.
20
كاتێك به‌ سواری گوێدرێژه‌كه‌ ده‌ڕۆیشت و به‌ناو شیوه‌كه‌دا ده‌هاته‌ خواره‌وه‌، بینی وا داود و پیاوه‌كانی به‌ره‌و ڕووی دێنه‌ خواره‌وه‌، چاوی پێیان كه‌وت.
21
داودیش قسه‌ی ده‌كرد و ده‌یگوت: «بێ سوود هه‌موو شته‌كانی ئه‌و پیاوه‌م له‌ چۆڵه‌وانیدا پاراست و له‌ هه‌موو ئه‌وه‌ی هی ئه‌و بوو هیچ بزر نه‌بوو، كه‌چی له‌ جیاتی چاكه‌ خراپه‌م ده‌داته‌وه‌.
22
با خودا توندترین سزای داود بدات، ئه‌گه‌ر هه‌تا به‌ره‌به‌یان نێرینه‌م هێشته‌وه‌ له‌ هه‌موو ئه‌وه‌ی هی ئه‌وه‌!»
23
كاتێك ئه‌بیگایل داودی بینی، به‌ په‌له‌ له‌ گوێدرێژه‌كه‌ دابه‌زی و له‌به‌رده‌م داود له‌سه‌ر ڕوو كه‌وت، كڕنۆشی برد،
24
خۆی فڕێدا به‌رپێی و گوتی: «گه‌وره‌م، ئه‌م تاوانه‌ با له‌سه‌ر من بێت، با كاره‌كه‌ره‌كه‌ت پێت بڵێت و گوێ له‌ قسه‌كانی بگره‌.
25
تكایه‌ با گه‌وره‌م دڵی خۆی به‌ ناباله‌وه‌ خه‌ریك نه‌كات، ئه‌و پیاوه‌ به‌دفه‌ڕه‌، چونكه‌ ناوی به‌ خۆیه‌وه‌یه‌، ناوی ناباله‌ و گێلایه‌تی له‌لای ئه‌وه‌. به‌ڵام من كاره‌كه‌ری تۆم و ئه‌و خزمه‌تكارانه‌ی تۆم نه‌بینی كه‌ ناردبووتن.
26
«ئێستاش گه‌وره‌م، به‌ یه‌زدانی زیندوو و به‌ گیانی خۆت، یه‌زدان كه‌ ڕێگای لێ گرتوویت له‌ خوێنڕشتن و تۆڵه‌سه‌ندنه‌وه‌ به‌ ده‌ستی خۆت، ئێستا با دوژمنه‌كانت وه‌ك نابالیان لێ بێت له‌گه‌ڵ هه‌موو ئه‌وانه‌ی داوای خراپه‌ت بۆ ده‌كه‌ن.
27
ئێستاش ئه‌م دیارییه‌ی كاره‌كه‌ره‌كه‌ت هێناویه‌تی بۆ گه‌وره‌م، با بدرێته‌ ئه‌و خزمه‌تكارانه‌ كه‌ له‌دوای گه‌وره‌مه‌وه‌ ده‌ڕۆن.
28
«هه‌روه‌ها له‌ تاوانی كاره‌كه‌ره‌كه‌ت خۆشبه‌، له‌به‌ر ئه‌وه‌ بێگومان یه‌زدان بنه‌ماڵه‌یه‌كی چه‌سپاو بۆ گه‌وره‌كه‌م دروستده‌كات، چونكه‌ گه‌وره‌كه‌م له‌ پێناوی یه‌زدان ده‌جه‌نگێت. با به‌ درێژایی ژیانت خراپه‌ت تێدا به‌دی نه‌كرێت.
29
ئه‌گه‌ر پیاوێك ڕاست بێته‌وه‌ و ڕاوت بنێت و بیه‌وێ بتكوژێت، یه‌زدانی په‌روه‌ردگارت ژیانی گه‌وره‌م له‌گه‌ڵ چه‌پكی ژیان ده‌پێچێته‌وه‌، ژیانی دوژمنانیشت له‌ناو له‌پی به‌رده‌قانییه‌وه‌ تووڕ ده‌درێن[c] .
30
هه‌روه‌ها كاتێك كه‌ یه‌زدان هه‌موو ئه‌و چاكه‌یه‌ی سه‌باره‌ت به‌ تۆ فه‌رموویه‌تی ده‌یكات، ده‌تكاته‌ فه‌رمانڕه‌وای ئیسرائیل،
31
با ئه‌مه‌ نه‌بێته‌ بارێكی گران و كۆسپ له‌سه‌ر دڵی گه‌وره‌م، كه‌ بڵێن خوێنێكی به‌خۆڕاییت ڕشتووه‌، هه‌روه‌ها گه‌وره‌م به‌ ده‌ستی خۆی تۆڵه‌ی خۆی كردووه‌ته‌وه‌. جا كه‌ یه‌زدان چاكه‌ی له‌گه‌ڵ گه‌وره‌مدا كرد، كاره‌كه‌ره‌كه‌ت له‌بیر بێت.»
32
داودیش به‌ ئه‌بیگایلی گوت: «ستایش بۆ یه‌زدانی په‌روه‌ردگاری ئیسرائیل، ئه‌وه‌ی ئه‌مڕۆ تۆی ناردووه‌ بۆ پێشوازیكردنم.
33
هه‌روه‌ها ژیریت به‌ره‌كه‌تدار بێت، به‌ره‌كه‌تدار بیت كه‌ ئه‌مڕۆ منت گه‌ڕانده‌وه‌ له‌ خوێنڕشتن و تۆڵه‌سه‌ندنه‌وه‌ به‌ ده‌ستی خۆم.
34
به‌ یه‌زدانی زیندوو، خودای ئیسرائیل، ئه‌وه‌ی نه‌یهێشت خراپه‌ت له‌گه‌ڵ بكه‌م، ئه‌گه‌ر به‌ په‌له‌ به‌پیرمه‌وه‌ نه‌ده‌هاتیت، هه‌تا ڕووناكی به‌ره‌به‌یان نێرێكم بۆ نابال نه‌ده‌هێشته‌وه‌.»
35
ئینجا ئه‌وه‌ی بۆی هێنابوو داود له‌ ده‌ستی وه‌رگرت و پێی گوت: «به‌ سه‌لامه‌تی سه‌ربكه‌وه‌ بۆ ماڵه‌كه‌ت و ببینه‌ من گوێم لێ گرتیت و داواكارییه‌كه‌ی تۆم به‌جێهێنا.»
36
پاشان ئه‌بیگایل هاته‌وه‌ لای نابال، بینی ئه‌وه‌تا له‌ ماڵه‌كه‌یدا خوان ئاماده‌كراوه‌ وه‌ك خوانی پاشا، نابال دڵخۆشه‌ و زۆر سه‌رخۆش بووه‌. ئینجا هه‌تا ڕووناكی به‌ره‌به‌یان، نه‌ كه‌م و نه‌ زۆر هیچ شتێكی بۆ نه‌گێڕایه‌وه‌.
37
ئه‌وه‌ بوو بۆ به‌یانی كاتێك سه‌رخۆشییه‌كه‌ نابالی به‌ردا، ژنه‌كه‌ی ئه‌و قسانه‌ی بۆ گێڕایه‌وه‌، جا تووشی شۆك بوو، وه‌ك به‌ردی لێ هات.
38
ئیتر نزیكه‌ی دوای ده‌ ڕۆژ یه‌زدان له‌ نابالی دا و مرد.
39
كاتێك داود بیستییه‌وه‌ كه‌ نابال مردووه‌، گوتی: «ستایش بۆ یه‌زدان كه‌ له‌ كێشه‌كه‌م دادپه‌روه‌ری بۆ كردم، له‌و سووكایه‌تییه‌ی له‌لایه‌ن ناباله‌وه‌ پێم كرا، به‌نده‌كه‌ی له‌ خراپه‌كردن پاراست، یه‌زدان خراپه‌كه‌ی نابالی به‌سه‌ر خۆیدا هێنایه‌وه‌.»
ئینجا داود ناردی و له‌گه‌ڵ ئه‌بیگایل قسه‌ی كرد هه‌تا ببێته‌ ژنی.
40
جا خزمه‌تكاره‌كانی داود هاتنه‌ كه‌رمه‌ل بۆ لای ئه‌بیگایل و پێیان گوت: «داود ئێمه‌ی بۆ لات ناردووه‌ هه‌تا بتكاته‌ ژنی خۆی.»
41
ئه‌ویش هه‌ستا و كڕنۆشی برد و سه‌ری خسته‌ سه‌ر زه‌وی، گوتی: «ئه‌وه‌تا كاره‌كه‌ره‌كه‌ت كه‌نیزه‌یه‌ بۆ شوشتنی پێی خزمه‌تكاره‌كانی گه‌وره‌م.»
42
به‌ په‌له‌ هه‌ستا و سواری گوێدرێژێك بوو، پێنج كچه‌ كاره‌كه‌ریش له‌گه‌ڵ پێیدا ڕۆیشتن و دوای نێردراوه‌كانی داود كه‌وت و بوو به‌ ژنی.
43
هه‌روه‌ها داود پێشتر ئه‌حینۆعه‌می یه‌زره‌عیلی هێنابوو، جا هه‌ردووكیان ژنی بوون.
44
شاولیش میخه‌لی كچی كه‌ ژنی داود بوو، دابوویه‌ په‌لتیێلی كوڕی لایش كه‌ خه‌ڵكی گه‌لیم بوو.
  1. a. 25‏:2 واته‌ كه‌رمه‌ل له‌ باشووری خاكی ئیسرائیل، نه‌ك كێوی كارمه‌ل كه‌ له‌ باكووره‌.
  2. b. 25‏:18 پێنج پێوانه‌: عیبری: پێنج \+tl سه‌ئا\+tl*، نزیكه‌ی 37 لیتر.
  3. c. 25‏:29 یان قۆچه‌قانییه‌وه‌ بهاوێژرێت.