عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
شاول شاری یاڤێش ڕزگار ده‌كات 
1
ئینجا ناحاشی عه‌مۆنی سه‌ركه‌وت و یاڤێش گلعادی گه‌مارۆ دا، هه‌موو پیاوانی یاڤێش به‌ ناحاشیان گوت: «په‌یمانمان له‌گه‌ڵدا ببه‌سته‌ و ئێمه‌ش ده‌بین به‌ خزمه‌تكارت.»
2
به‌ڵام ناحاشی عه‌مۆنی وه‌ڵامی دانه‌وه‌: «به‌مه‌ په‌یمانتان له‌گه‌ڵدا ده‌به‌ستم، به‌ هه‌ڵكۆڵینی چاوی ڕاستی هه‌ر هه‌مووتان تاكو ببنه‌ مایه‌ی سه‌رشۆڕی هه‌موو ئیسرائیل.»
3
پیرانی یاڤێشیش پێیان گوت: «حه‌وت ڕۆژ مۆڵه‌تمان بده‌رێ تاكو نێردراو بۆ هه‌موو خاكی ئیسرائیل بنێرین و ئه‌گه‌ر كه‌س نه‌بوو ڕزگارمان بكات، ئه‌وا خۆمان ده‌ده‌ینه‌ ده‌ست تۆ.»
4
جا نێردراوه‌كان هاتن بۆ گیڤعای شاول و ئه‌و قسه‌یه‌یان به‌ گه‌ل گوت و گه‌لیش ده‌نگیان به‌رزكرده‌وه‌ و گریان.
5
له‌و كاته‌دا شاول له‌دوای گاگه‌له‌كه‌وه‌ له‌ كێڵگه‌وه‌ ده‌گه‌ڕایه‌وه‌، شاول گوتی: «چی له‌ گه‌ل ڕوویداوه‌، بۆچی ده‌گرین؟» ئه‌وانیش قسه‌كانی پیاوانی یاڤێشیان بۆ گێڕایه‌وه‌.
6
كاتێك شاول گوێی له‌م قسانه‌ بوو، ڕۆحی خودا به‌ تواناوه‌ هاته‌ سه‌ری و زۆر تووڕه‌ بوو.
7
ئینجا دوو گای گرت و پارچه‌پارچه‌ی كردن و به‌ ده‌ستی نێردراوه‌كاندا بۆ هه‌موو خاكی ئیسرائیلی نارد و گوتی: «ئه‌وه‌ی به‌شوێن شاول و ساموئێل[a] نه‌كه‌وێت، گایه‌كانی ئاوایان لێ ده‌كرێت.» جا ترسی یه‌زدان كه‌وته‌ سه‌ر گه‌ل و هه‌موویان وه‌ك یه‌ك پیاو هاتنه‌ ده‌ره‌وه‌.
8
كاتێك شاول له‌ به‌زه‌قدا ژماردنی، نه‌وه‌ی ئیسرائیل سێ سه‌د هه‌زار و پیاوانی یه‌هوداش سی هه‌زار بوون.
9
به‌ نێردراوه‌كانیان گوت كه‌ هاتبوون: «ئاوا ده‌ڵێن به‌ پیاوانی یاڤێش گلعاد: ”سبه‌ینێ كاتێك خۆر گه‌رم دادێت، ڕزگاریتان بۆ ده‌بێت.“» ئینجا نێردراوه‌كان چوون و به‌ پیاوانی یاڤێشیان ڕاگه‌یاند، ئه‌وانیش دڵخۆش بوون.
10
پیاوانی یاڤێش به‌ عه‌مۆنییه‌كانیان گوت: «سبه‌ینێ خۆمان ده‌ده‌ینه‌ ده‌ست ئێوه‌ و ئێوه‌ش چی به‌ باش ده‌زانن ئه‌وه‌مان له‌گه‌ڵدا بكه‌ن.»
11
بۆ سبه‌ینێ شاول سوپاكه‌ی كرده‌ سێ له‌شكر، له‌ به‌ره‌به‌یاندا هاتنه‌ ناوه‌ڕاستی ئۆردوگاكه‌ و هه‌تا ئه‌و كاته‌ی خۆر گه‌رم داهات له‌ عه‌مۆنییه‌كانیان دا، ئه‌وانه‌ش كه‌ مانه‌وه‌ په‌رته‌وازه‌ بوون، هه‌تا وای لێهات دوو كه‌سیان به‌یه‌كه‌وه‌ نه‌مانه‌وه‌.
پابه‌ندبوون به‌ پاشایه‌تی شاول 
12
ئینجا گه‌ل به‌ ساموئێلیان گوت: «كێن ئه‌وانه‌ی ده‌ڵێن: ”ئایا شاول وه‌ك پاشا پاشایه‌تیمان ده‌كات؟“ ئه‌و پیاوانه‌مان بده‌نێ با بیانكوژین.»
13
به‌ڵام شاول گوتی: «كه‌س له‌م ڕۆژه‌دا ناكوژرێت، چونكه‌ له‌م ڕۆژه‌دا یه‌زدان فریای ئیسرائیل كه‌وت.»
14
پاشان ساموئێل به‌ گه‌لی گوت: «وه‌رن، با بچینه‌ گلگال و له‌وێ پاشایه‌تییه‌كه‌ دووپات بكه‌ینه‌وه‌.»
15
جا هه‌موو گه‌ل چوونه‌ گلگال و له‌وێ له‌به‌رده‌م یه‌زدان پاشایه‌تی شاولیان دووپات كرده‌وه‌ و له‌وێ قوربانی هاوبه‌شییان له‌به‌رده‌م یه‌زدان سه‌ربڕی و له‌وێ شاول و هه‌موو پیاوانی ئیسرائیل ئاهه‌نگێكی گه‌وره‌یان گێڕا.
  1. a. 11‏:7 واته‌ چوون بۆ جه‌نگ له‌ دژی ناحاشی عه‌مۆنی.