عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
له‌دایكبوونی ساموئێل 
1
پیاوێك هه‌بوو له‌ ڕاماته‌یمی چوفییه‌كان له‌ ناوچه‌ شاخاوییه‌كانی ئه‌فرایم، ناوی ئه‌لقانه‌ی كوڕی یه‌رۆحامی كوڕی ئه‌لیهوی كوڕی تۆحوی كوڕی چوفی ئه‌فرایمی بوو.
2
دوو ژنی هه‌بوو، یه‌كێكیان ناوی حه‌نا و ئه‌وی دیكه‌یان ناوی په‌نینا بوو، په‌نینا منداڵی هه‌بوو، به‌ڵام حه‌نا منداڵی نه‌بوو.
3
ئه‌م پیاوه‌ هه‌موو ساڵێك له‌ شارۆچكه‌كه‌یه‌وه‌ ده‌چوو بۆ كڕنۆشبردن و سه‌ربڕینی قوربانی بۆ یه‌زدانی سوپاسالار له‌ شیلۆ و له‌وێ دوو كوڕه‌كه‌ی عێلی كاهینی یه‌زدان بوون، كه‌ یه‌كێكیان ناوی حۆفنی و ئه‌وی دیكه‌یان ناوی فینه‌حاس بوو.
4
جا كه‌ ڕۆژی ئه‌وه‌ هات ئه‌لقانه‌ قوربانی سه‌رببڕێت و به‌شی په‌نینای ژنی و هه‌موو كوڕ و كچه‌كانی بدات،
5
به‌ڵام دوو به‌شی دایه‌ حه‌نا، چونكه‌ حه‌نای خۆشده‌ویست هه‌رچه‌نده‌ یه‌زدان منداڵدانی به‌ستبوو.
6
هه‌وێیه‌كه‌شی به‌رده‌وام په‌ستی ده‌كرد بۆ ئه‌وه‌ی بێزاری بكات، چونكه‌ یه‌زدان وه‌جاخی كوێر كردبوو.
7
وای ده‌كرد، ساڵ له‌دوای ساڵ هه‌ر كاتێك حه‌نا بۆ ماڵی یه‌زدان بچووایه‌، هه‌وێیه‌كه‌ی ئاوا په‌ستی ده‌كرد، بۆیه‌ حه‌نا ده‌ستی به‌ گریان كرد و نانی نه‌خوارد.
8
ئیتر ئه‌لقانه‌ی مێردی پێی گوت: «حه‌نا، بۆچی ده‌گریت و نان ناخۆیت؟ بۆچی دڵگرانیت؟ ئایا من له‌ ده‌ كوڕ چاكتر نیم بۆت؟»
9
له‌دوای ئه‌وه‌ی له‌ شیلۆ نانیان خوارد و خواردییانه‌وه‌، حه‌نا هه‌ستا، عێلی كاهینیش له‌سه‌ر كورسییه‌ك له‌لای چوارچێوه‌ی ده‌رگای چادری په‌رستنی یه‌زدان دانیشتبوو.
10
حه‌ناش به‌ په‌ژاره‌وه‌ نوێژی بۆ یه‌زدان كرد و دایه‌ پڕمه‌ی گریان.
11
حه‌نا نه‌زرێكی[a] كرد و گوتی: «یه‌زدانی سوپاسالار، ئه‌گه‌ر به‌ڕاستی ته‌ماشای داماوی كاره‌كه‌ره‌كه‌ت بكه‌یت و به‌ یادی خۆتم بهێنیته‌وه‌، كاره‌كه‌ره‌كه‌ت له‌بیر نه‌كه‌یت و كوڕێكی پێبده‌یت، ئه‌وا من ژیانی كوڕه‌كه‌ به‌ یه‌زدان ده‌به‌خشم و گوێزان به‌سه‌ر سه‌ریدا نایه‌ت.»
12
ئه‌وه‌ بوو كه‌ له‌به‌رده‌م یه‌زدان زۆر نوێژی كرد و عێلیش سه‌یری ده‌می ده‌كرد،
13
حه‌ناش له‌ دڵی خۆیدا ده‌یگوت و ته‌نها لێوه‌كانی ده‌جوڵانه‌وه‌ و ده‌نگی نه‌ده‌بیسترا، عێلی وای زانی سه‌رخۆشه‌.
14
جا پێی گوت: «هه‌تا كه‌ی سه‌رخۆش ده‌بیت؟ شه‌رابه‌كه‌ت له‌ خۆت دووربخه‌ره‌وه‌.»
15
حه‌ناش وه‌ڵامی دایه‌وه‌ و گوتی: «نه‌خێر گه‌وره‌م، من ژنێكی دڵته‌نگم، شه‌راب و خواردنه‌وه‌ی مه‌ستیم نه‌خواردووه‌ته‌وه‌، به‌ڵكو ده‌ردی دڵی خۆم له‌به‌رده‌م یه‌زدان هه‌ڵده‌ڕێژم.
16
كاره‌كه‌ره‌كه‌ت به‌ كچێكی به‌دكار مه‌زانه‌، له‌به‌ر خه‌م و خه‌فه‌تی زۆرم، هه‌تا ئێستا قسه‌م ده‌كرد.»
17
عێلیش وه‌ڵامی دایه‌وه‌ و گوتی: «بڕۆ به‌ سه‌لامه‌تی و با خودای ئیسرائیل ئه‌و داواكارییه‌ت پێبدات كه‌ لێت داوا كردووه‌.»
18
حه‌ناش گوتی: «با كه‌نیزه‌كه‌ت له‌به‌رچاوانت په‌سه‌ند بێت.» ئینجا حه‌نا به‌ ڕێگای خۆیدا ڕۆیشت و نانی خوارد و خه‌م له‌ ڕووی ڕه‌وییه‌وه‌.
19
به‌یانی زوو له‌ خه‌و هه‌ستان و له‌به‌رده‌م یه‌زدان كڕنۆشیان برد و گه‌ڕانه‌وه‌، هاتنه‌وه‌ ماڵه‌كه‌ی خۆیان له‌ ڕامه‌. ئیتر ئه‌لقانه‌ له‌گه‌ڵ حه‌نای ژنی جووت بوو و یه‌زدانیش به‌ یادی خۆی هێنایه‌وه‌.
20
ئه‌وه‌ بوو له‌و ساڵه‌دا حه‌نا سكی پڕ بوو، كوڕێكی بوو و ناوی لێنا ساموئێل، گوتی: «چونكه‌ داوام له‌ یه‌زدان كرد.»
حه‌نا ساموئێل ته‌رخان ده‌كات 
21
ئینجا ئه‌لقانه‌ و سه‌رجه‌م ماڵه‌كه‌ی چوون بۆ سه‌ربڕینی قوربانی ساڵانه‌ بۆ یه‌زدان و به‌جێهێنانی نه‌زره‌كه‌ی.
22
به‌ڵام حه‌نا نه‌چوو و به‌ مێرده‌كه‌ی گوت: «پاش ئه‌وه‌ی كوڕه‌كه‌ له‌ شیر ده‌بڕدرێته‌وه‌، ده‌یبه‌م هه‌تا له‌به‌رده‌م یه‌زدان پێشكه‌ش بكرێت و هه‌تاهه‌تایه‌ له‌وێ بمێنێته‌وه‌.»
23
ئه‌لقانه‌ی مێردیشی پێی گوت: «خۆت چی به‌ باش ده‌زانیت ئه‌وه‌ بكه‌ و بمێنه‌وه‌ هه‌تا له‌ شیری ده‌بڕیته‌وه‌، ته‌نها با یه‌زدان وشه‌ی خۆی بچه‌سپێنێت.» جا حه‌نا مایه‌وه‌ و شیری به‌ منداڵه‌كه‌ی دا هه‌تا ئه‌و كاته‌ی له‌ شیری بڕییه‌وه‌.
24
پاش ئه‌وه‌ی له‌ شیری بڕییه‌وه‌، له‌گه‌ڵ خۆی سه‌ری خست له‌گه‌ڵ گایه‌كی سێ ساڵان و یه‌ك ئێفه‌[b] ئارد و مه‌شكه‌یه‌ك شه‌راب و هێنای بۆ ماڵی یه‌زدان له‌ شیلۆ، كوڕه‌كه‌ش هێشتا منداڵ بوو.
25
ئینجا گایه‌كه‌یان سه‌ربڕی و كوڕه‌كه‌یان هێنایه‌ لای عێلی،
26
حه‌نا گوتی: «گه‌وره‌م! منت له‌ یاده‌؟ دڵنیابه‌ من ئه‌و ژنه‌م كه‌ لێره‌ له‌لای تۆ وه‌ستام و نوێژم كرد بۆ یه‌زدان،
27
له‌ پێناوی ئه‌م منداڵه‌ نوێژم كرد و یه‌زدانیش داواكارییه‌كه‌ی پێدام كه‌ لێم داوا كرد.
28
له‌به‌ر ئه‌وه‌ منیش ده‌یده‌مه‌وه‌ یه‌زدان، بۆ ئه‌وه‌ی به‌ درێژایی ژیانی ته‌رخان بكرێت بۆ یه‌زدان.»
ئیتر ساموئێل له‌وێ مایه‌وه‌ و یه‌زدانی په‌رست.
  1. a. 1‏:11 واته‌ پابه‌ندكردنی مرۆڤ خۆیه‌تی به‌ مه‌رجێكه‌وه‌، له‌ كاتێكدا كه‌ داخوازییه‌ك به‌رز ده‌كاته‌وه‌ بۆ خودا و به‌ ئه‌رێ وه‌ڵام ده‌درێته‌وه‌ له‌لایه‌ن خوداوه‌. بڕوانه‌ \+xt سه‌رژمێری 21‏:2‏\+xt*‏.
  2. b. 1‏:24 ‏نزیكه‌ی شازده‌ كیلۆیه‌.