عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
ده‌ركه‌وتنی یه‌زدان بۆ سلێمان 
1
پاش ئه‌وه‌ی سلێمان بنیادنانی په‌رستگای یه‌زدان و كۆشكی پاشای ته‌واو كرد، هه‌روه‌ها هه‌موو ئه‌وانه‌شی ته‌واو كرد كه‌ پێی خۆشبوو،
2
دووباره‌ یه‌زدان بۆ سلێمان ده‌ركه‌وته‌وه‌، هه‌روه‌ك چۆن له‌ گبعۆن بۆی ده‌ركه‌وت.
3
جا یه‌زدان پێی فه‌رموو:
«گوێم له‌ نوێژ و پاڕانه‌وه‌كه‌ت بوو كه‌ له‌به‌رده‌مم پاڕایته‌وه‌، ئه‌م په‌رستگایه‌م پیرۆز كرد كه‌ بنیادت ناوه‌، تاكو بۆ هه‌تاهه‌تایه‌ ناوه‌كه‌م له‌وێ دابنێم، چاوه‌كانم و دڵیشم هه‌میشه‌ له‌وێ ده‌بن.
4
«تۆش ئه‌گه‌ر به‌ دڵسۆزی و دڵپاكییه‌وه‌ دۆستایه‌تیم بكه‌یت، وه‌ك ئه‌وه‌ی داودی باوكت كردی، هه‌موو ئه‌وه‌ی فه‌رمانم پێ كردوویت بیكه‌یت و فه‌رز و حوكمه‌كانم به‌جێبهێنیت،
5
ئه‌وا هه‌تاهه‌تایه‌ ته‌ختی پاشایه‌تییه‌كه‌ت له‌سه‌ر ئیسرائیل جێگیر ده‌كه‌م، هه‌روه‌ك چۆن به‌ڵێنم به‌ داودی باوكت دا و فه‌رمووم: ”پیاو له‌ تۆ نابڕێت له‌سه‌ر ته‌ختی ئیسرائیل.“
6
«به‌ڵام ئه‌گه‌ر ئێوه‌ یاخود نه‌وه‌كانتان لێم هه‌ڵگه‌ڕێنه‌وه‌ و چاوتان له‌ فه‌رز و فه‌رمانه‌كانم نه‌بوو كه‌ پێم داون، چوون و خودای دیكه‌تان په‌رست و كڕنۆشتان بۆ بردن،
7
ئه‌وا ئیسرائیل له‌سه‌ر ڕووی ئه‌و خاكه‌ی پێم داون ده‌بڕمه‌وه‌ و ئه‌م په‌رستگایه‌ش كه‌ بۆ ناوی خۆم ته‌رخانم كردووه‌ له‌به‌رچاوم نایهێڵم. ئیسرائیل له‌نێو هه‌موو گه‌لان ده‌بێته‌ په‌ند و مایه‌ی گاڵته‌جاڕی،
8
ئه‌م په‌رستگا پایه‌به‌رزه‌ش، هه‌ركه‌سێك پێیدا تێبپه‌ڕێت سه‌ری سوڕده‌مێنێت و فیكه‌ لێده‌دات، ده‌ڵێت: ”بۆچی یه‌زدان وای له‌م خاكه‌ و له‌م په‌رستگایه‌ كرد؟“
9
ئینجا خه‌ڵكی وه‌ڵام ده‌ده‌نه‌وه‌: ”له‌به‌ر ئه‌وه‌ی وازیان له‌ یه‌زدانی په‌روه‌ردگاریان هێناوه‌، ئه‌وه‌ی كه‌ باوباپیرانیانی له‌ خاكی میسره‌وه‌ ده‌رهێنا، ده‌ستیان به‌ خودای دیكه‌وه‌ گرتووه‌، كڕنۆشیان بۆ بردوون و ئه‌وانیان په‌رستووه‌، له‌به‌ر ئه‌وه‌ یه‌زدان تووشی ئه‌م هه‌موو كاره‌ساته‌ی كردن.“»
كرداری دیكه‌ی سلێمان 
10
له‌ كۆتایی ئه‌و بیست ساڵه‌ی كه‌ سلێمان تێیدا هه‌ردوو ته‌لاره‌كه‌ی بنیاد نا، په‌رستگای یه‌زدان و كۆشكی پاشا،
11
سلێمانی پاشا بیست شارۆچكه‌ی له‌ خاكی جه‌لیل به‌ حیرامی پاشای سور به‌خشی، چونكه‌ حیرام داری ئورز و سنه‌وبه‌ر و زێڕی بۆ سلێمان ناردبوو، به‌ دڵی ئه‌و.
12
به‌ڵام كاتێك حیرام له‌ سوره‌وه‌ بۆ بینینی ئه‌و شارۆچكانه‌ چوو كه‌ سلێمان پێیدابوو، به‌ دڵی نه‌بوون.
13
گوتی: «براكه‌م، ئه‌م شارۆچكانه‌ چین كه‌ تۆ به‌ منت داون؟» ئینجا ناوی لێنان خاكی كاڤول[a] ، هه‌تا ئه‌مڕۆش به‌و ناوه‌ ناوده‌بردرێت.
14
حیرام سه‌د و بیست تالنت[b] زێڕی بۆ پاشا ناردبوو.
15
ئه‌و پڕۆژانه‌ی سلێمان پاشا به‌ بێگاری ئه‌نجامی دا ئه‌مانه‌ بوون: بنیادنانی په‌رستگای یه‌زدان، كۆشكی خۆی، ته‌لانه‌كان[c] ، شوورای ئۆرشه‌لیم، حاچۆر، مه‌گیدۆ، هه‌روه‌ها گه‌زه‌ر،
16
كه‌ فیرعه‌ونی پاشای میسر كاتێك سه‌ركه‌وت و گه‌زه‌ری گرت و سووتاندی، كه‌نعانییه‌كانی دانیشتووی شاره‌كه‌ی كوشت و به‌ دیاری دایه‌ كچه‌كه‌ی خۆی، ژنه‌كه‌ی سلێمان.
17
ئینجا سلێمان گه‌زه‌ری بنیاد نایه‌وه‌، هه‌روه‌ها بێت‌حۆرۆنی خواروو و
18
به‌عه‌لات و ته‌دمۆری له‌ چۆڵه‌وانی له‌ناو خاكه‌كه‌دا ئاوه‌دان كرده‌وه‌،
19
له‌گه‌ڵ هه‌موو كۆگاكانی[d] سلێمان، هه‌روه‌ها ئه‌و شارۆچكانه‌ی سه‌ربازگه‌ی گالیسكه‌ و ئه‌و شارۆچكانه‌ی سه‌ربازگه‌ی ئه‌سپ سواره‌كان و هه‌موو ئه‌وه‌ی سلێمان ئاره‌زووی كرد له‌ ئۆرشه‌لیم و لوبنان و له‌ هه‌موو خاكی ژێر ده‌سه‌ڵاتی خۆی بنیادی بنێت.
20
هه‌روه‌ها هه‌موو ئه‌و خه‌ڵكه‌ی پاشماوه‌ی ئه‌موری و حیتی و پریزی و حیڤی و یه‌بوسییه‌كان بوون، كه‌ له‌ نه‌وه‌ی ئیسرائیل نه‌بوون،
21
پاشماوه‌ی ئه‌م هه‌موو نه‌ته‌وانه‌ی كه‌ نه‌وه‌ی ئیسرائیل نه‌یانتوانیبوو به‌ ته‌واوی قڕیان بكه‌ن[e] سلێمان وه‌ك كۆیله‌ بێگاری به‌سه‌ردا سه‌پاندن، هه‌تا ئه‌مڕۆش به‌سه‌ریان سه‌پێنراوه‌.
22
به‌ڵام سلێمان كه‌سی له‌ نه‌وه‌ی ئیسرائیل نه‌كرده‌ كۆیله‌، چونكه‌ ئه‌وان پیاوی جه‌نگ و كاربه‌ده‌ست، سه‌ركرده‌، فه‌رمانده‌، ئه‌فسه‌ری گالیسكه‌ و گالیسكه‌سواره‌كانی بوون.
23
ئه‌مانه‌ش ئه‌و كاربه‌ده‌سته‌ باڵایانه‌ بوون كه‌ له‌سه‌ر كاره‌كانی سلێمان بوون، پێنج سه‌د و په‌نجا چاودێر له‌سه‌ر ئه‌و خه‌ڵكه‌ی كاره‌كه‌یان ده‌كرد.
24
پاش ئه‌وه‌ی كچه‌كه‌ی فیرعه‌ون له‌ شاری داوده‌وه‌ چووه‌ كۆشكه‌كه‌ی كه‌ سلێمان بۆی بنیاد نابوو، ده‌ستی به‌ دروستكردنی ته‌لان كرد.
25
سلێمان ساڵانه‌ سێ جار قوربانی سووتاندن و قوربانی هاوبه‌شی سه‌رده‌خسته‌ سه‌ر ئه‌و قوربانگایه‌ی بۆ یه‌زدانی بنیاد نا، بخووریشی له‌گه‌ڵ ئه‌وه‌دا ده‌سووتاند كه‌ له‌به‌رده‌م یه‌زدان بوو، په‌رستگاكه‌ی ته‌واو كرد.
26
هه‌روه‌ها سلێمانی پاشا چه‌ند كه‌شتییه‌كی له‌ عه‌چیۆن گه‌ڤه‌ر ئه‌وه‌ی له‌ نزیك ئێله‌ته‌ له‌سه‌ر كه‌ناری ده‌ریای سوور[f] له‌ خاكی ئه‌دۆم دروستكرد.
27
حیرامیش خزمه‌تكاره‌كانی خۆی كه‌ كه‌شتیوان و شاره‌زای ده‌ریا بوون ناردنییه‌ ناو كه‌شتییه‌كان بۆ ئه‌وه‌ی له‌گه‌ڵ خزمه‌تكاره‌كانی سلێماندا بن.
28
ئیتر چوونه‌ ئۆفیر و له‌وێوه‌ چوار سه‌د و بیست تالنت[g] زێڕیان هه‌ڵگرت و بۆ سلێمان پاشایان هێنا.
  1. a. 9‏:13 ناوی كاڤول نزیكه‌ له‌ وشه‌یه‌كی عیبری كه‌ واته‌ (بێ فه‌ڕ).
  2. b. 9‏:14 تالنت: نزیكه‌ی 34 كیلۆگرامه‌. بڕوانه‌ \+xt ده‌رچوون 25‏:39‏\+xt*‏.
  3. c. 9‏:15 به‌رازاییه‌كانیان له‌ شێوه‌ی پایه‌ ڕێكخستووه‌، بۆ پاڵپشتی كۆشكی پاشا سوودی لێ وه‌رگیراوه‌.
  4. d. 9‏:19 چه‌ند شارێكی دروستكردووه‌ وه‌ك مه‌ڵبه‌ندێكی ئه‌مباركردن و دابینكردنی ئازووقه‌.
  5. e. 9‏:21 قڕیان بكه‌ن: له‌ زمانی عیبری ئه‌م زاراوه‌یه‌ ده‌گه‌ڕێته‌وه‌ بۆ شتێك یان كه‌سێك كه‌ ده‌به‌خشرێت به‌ یه‌زدان، زۆر جار به‌خشینه‌كه‌ به‌ ته‌واوی له‌ ناوده‌بردرێت.
  6. f. 9‏:26 عیبری \+tl سوف\+tl* واته‌ (زه‌ل). ده‌شێت مه‌به‌ست له‌ ده‌ریای سوف بێت، ئه‌و ده‌ریایه‌ بێت كه‌ ده‌كه‌وێته‌ سه‌رووی باكووری كه‌نداوی سوێسی ئه‌مڕۆ، به‌ڵام له‌ ده‌قی یۆنانی په‌یمانی نوێ هه‌ر به‌ ده‌ریای سوور نووسراوه‌. بڕوانه‌ \+xt عیبرانییه‌كان 11‏:29‏\+xt*‏.
  7. g. 9‏:28 چوار سه‌د و بیست تالنت: نزیكه‌ی 14,5 ته‌ن.