عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
ئه‌لیاس و عۆبه‌دیا 
1
دوای ماوه‌یه‌كی زۆر، له‌ ساڵی سێیه‌می وشكه‌ساڵی فه‌رمایشتی یه‌زدان بۆ ئه‌لیاس هات: «بڕۆ و خۆت بۆ ئه‌حاڤ ده‌ربخه‌، منیش باران بۆ سه‌ر خاكه‌كه‌ ده‌بارێنم.»
2
جا ئه‌لیاس چوو خۆی بۆ ئه‌حاڤ ده‌ربخات.
قاتوقڕی له‌ سامیره‌ په‌ره‌ی سه‌ندبوو،
3
ئیتر ئه‌حاڤ بانگی عۆبه‌دیای كرد، كه‌ سه‌رپه‌رشتیاری كۆشكه‌كه‌ی ئه‌و بوو. عۆبه‌دیا كه‌سێكی له‌خواترس بوو،
4
كاتێك كه‌ ئیزابێل پێغه‌مبه‌ره‌كانی یه‌زدانی قڕكرد، عۆبه‌دیا سه‌د پێغه‌مبه‌ری برد و شاردنییه‌وه‌، هه‌ر په‌نجا و له‌ ئه‌شكه‌وتێك و نان و ئاوی بۆ دابین كردن.
5
ئه‌حاڤ به‌ عۆبه‌دیای گوت: «به‌ناو خاكه‌كه‌دا بڕۆ هه‌موو دۆڵ و كانیاوه‌كان، به‌ڵكو گیا په‌یدا بكه‌ین و ئه‌سپ و هێستره‌كان به‌ زیندوویی بهێڵینه‌وه‌ و به‌ ناچاری ئاژه‌ڵه‌كانمان سه‌رنه‌بڕین.»
6
ئینجا خاكه‌كه‌یان له‌نێوانیان دابه‌ش كرد هه‌تا به‌ناویدا بڕۆن، ئه‌حاڤ به‌ ته‌نها به‌ ڕێگایه‌كدا ڕۆیشت و عۆبه‌دیاش به‌ ته‌نها به‌ ڕێگایه‌كی دیكه‌دا ڕۆیشت.
7
كاتێك عۆبه‌دیا له‌ ڕێگا بوو، تووشی ئه‌لیاس بوو، جا ناسییه‌وه‌ و كڕنۆشی بۆ برد، گوتی: «ئه‌وه‌ تۆی گه‌وره‌م، ئه‌لیاس؟»
8
ئه‌ویش گوتی: «منم، بڕۆ به‌ گه‌وره‌كه‌ت بڵێ: ”ئه‌لیاس لێره‌یه‌.“»
9
عۆبه‌دیاش گوتی: «گوناهم چییه‌، هه‌تا خزمه‌تكاره‌كه‌ت بده‌یته‌ ده‌ستی ئه‌حاڤ بۆ ئه‌وه‌ی بمكوژێت؟
10
به‌ یه‌زدانی زیندوو، خودای خۆت، گه‌لێك و پاشایه‌تییه‌ك نه‌ماوه‌ پاشای گه‌وره‌كه‌م كه‌سێكی به‌دواتدا نه‌ناردبێ. ده‌یانگوت كه‌ تۆ له‌لای ئه‌وان نیت، جا سوێندی ده‌دان بۆ ئه‌وه‌ی له‌ قسه‌كه‌یان دڵنیابێته‌وه‌.
11
تۆش ئێستا ده‌ڵێیت: ”بڕۆ به‌ گه‌وره‌كه‌ت بڵێ، ’ئه‌لیاس لێره‌یه‌.‘“
12
كاتێك كه‌ من له‌لات ده‌ڕۆم ڕۆحی یه‌زدان هه‌ڵتده‌گرێت بۆ شوێنێك كه‌ من نایزانم، جا كه‌ ده‌چم و به‌ ئه‌حاڤ ڕاده‌گه‌یه‌نم، ئه‌ویش ناتدۆزێته‌وه‌، من ده‌كوژێت. خۆشت ده‌زانیت خزمه‌تكاره‌كه‌ت له‌ منداڵییه‌وه‌ له‌خواترسه‌.
13
ئایا ئه‌وه‌ی كه‌ كردم به‌ گه‌وره‌م ڕانه‌گه‌یه‌نراوه‌، كاتێك ئیزابێل پێغه‌مبه‌ره‌كانی یه‌زدانی كوشت، منیش سه‌د پێغه‌مبه‌ری یه‌زدانم شارده‌وه‌، هه‌ر په‌نجا و له‌ ئه‌شكه‌وتێك، نان و ئاوم بۆ دابین كردن.
14
ئێستاش تۆ پێم ده‌ڵێیت: ”بڕۆ به‌ پاشای گه‌وره‌ت بڵێ، ’ئه‌لیاس لێره‌یه‌،‘“ ئه‌ویش ده‌مكوژێت!»
15
ئه‌لیاسیش گوتی: «به‌ یه‌زدانی زیندوو، خودای سوپاسالار، ئه‌وه‌ی ده‌یپه‌رستم، من ئه‌مڕۆ خۆم بۆ ئه‌حاڤ ده‌رده‌خه‌م.»
ئه‌لیاس له‌ كێوی كارمه‌ل 
16
ئینجا عۆبه‌دیا چوو بۆ لای ئه‌حاڤ و پێی ڕاگه‌یاند، ئه‌حاڤیش چوو بۆ لای ئه‌لیاس.
17
كاتێك ئه‌حاڤ ئه‌لیاسی بینی، پێی گوت: «ئه‌وه‌ تۆی، ئه‌ی تێكده‌ری ئیسرائیل؟»
18
ئه‌لیاسیش گوتی: «من ئیسرائیلم تێكنه‌داوه‌، به‌ڵكو تۆ و ماڵی باوكت ئه‌مه‌تان كردووه‌، به‌ وازهێنانتان له‌ فه‌رمانه‌كانی یه‌زدان و ملكه‌چبوونتان بۆ به‌عله‌كان.
19
ئێستاش بنێره‌ و له‌ كێوی كارمه‌ل هه‌موو ئیسرائیلم لێ كۆبكه‌وه‌، هه‌روه‌ها چوار سه‌د و په‌نجا پێغه‌مبه‌ره‌كه‌ی به‌عل و چوار سه‌د پێغه‌مبه‌ره‌كه‌ی ئه‌شێراش، كه‌ له‌سه‌ر خوانه‌كه‌ی ئیزابێل نان ده‌خۆن.»
20
جا ئه‌حاڤ به‌دوای هه‌موو نه‌وه‌ی ئیسرائیلیدا نارد، هه‌موو پێغه‌مبه‌ره‌كانی له‌ كێوی كارمه‌ل كۆكرده‌وه‌.
21
ئه‌لیاسیش له‌ هه‌موو گه‌ل چووه‌ پێشه‌وه‌ و گوتی: «هه‌تا كه‌ی له‌نێوان ئه‌م دووانه‌دا دوو دڵ ده‌بن؟ ئه‌گه‌ر یه‌زدان خودایه‌ دوای بكه‌ون، ئه‌گه‌ر به‌علیش خودایه‌ دوای ئه‌و بكه‌ون.»
به‌ڵام گه‌ل به‌ یه‌ك وشه‌ش وه‌ڵامیان نه‌دایه‌وه‌.
22
پاشان ئه‌لیاس به‌ گه‌لی گوت: «به‌ ته‌نها من به‌ پێغه‌مبه‌ری یه‌زدان ماومه‌ته‌وه‌، پێغه‌مبه‌ره‌كانی به‌علیش چوار سه‌د و په‌نجا پیاون.
23
دوو جوانه‌گامان[a] بده‌نێ، با ئه‌وان گایه‌ك بۆ خۆیان هه‌ڵبژێرن و له‌تی بكه‌ن و له‌سه‌ر ته‌خته‌داره‌كان دایبنێن، به‌ڵام با ئاگری تێبه‌ر نه‌ده‌ن. منیش گایه‌كه‌ی دیكه‌ به‌و جۆره‌ لێ ده‌كه‌م و له‌سه‌ر ته‌خته‌داره‌كان دایده‌نێم و ئاگری تێبه‌ر ناده‌م.
24
ئینجا به‌ ناوی خوداوه‌ندی خۆتانه‌وه‌ بپاڕێنه‌وه‌ و منیش به‌ ناوی یه‌زدانه‌وه‌ ده‌پاڕێمه‌وه‌. ئه‌و خودایه‌ی كه‌ به‌ ئاگر وه‌ڵام ده‌داته‌وه‌، ئه‌و خودایه‌.»
هه‌موو گه‌ل وه‌ڵامیان دایه‌وه‌ و گوتیان: «قسه‌یه‌كی جوانه‌.»
25
ئینجا ئه‌لیاس به‌ پێغه‌مبه‌ره‌كانی به‌علی گوت: «جوانه‌گایه‌ك بۆ خۆتان هه‌ڵبژێرن و یه‌كه‌م جار ئێوه‌ ئاماده‌ی بكه‌ن له‌به‌ر ئه‌وه‌ی ئێوه‌ زۆرترن، به‌ ناوی خوداوه‌نده‌كه‌شتانه‌وه‌ بپاڕێنه‌وه‌، به‌ڵام ئاگری تێبه‌ر مه‌ده‌ن.»
26
ئیتر ئه‌وان ئه‌و جوانه‌گایه‌یان برد كه‌ پێیان درابوو، ئاماده‌یان كرد.
له‌ به‌یانییه‌وه‌ هه‌تا نیوه‌ڕۆ به‌ ناوی به‌عله‌وه‌ پاڕانه‌وه‌ و گوتیان: «ئه‌ی به‌عل، وه‌ڵاممان بده‌وه‌!» به‌ڵام كوا ده‌نگ و كوا وه‌ڵام. هه‌روه‌ها به‌ ده‌وری ئه‌و قوربانگایه‌دا هه‌ڵده‌به‌زینه‌وه‌ كه‌ دروستیان كردبوو.
27
له‌ نیوه‌ڕۆدا ئه‌لیاس ده‌ستی به‌ گاڵته‌پێكردنیان كرد و گوتی: «قاییمتر هاوار بكه‌ن! ئه‌و خوداوه‌نده‌! له‌وانه‌یه‌ داڵغه‌ی لێدا بێت، چووبێته‌ سه‌ر ئاو، له‌ گه‌شت بێت، له‌وانه‌یه‌ نوستبێت و ده‌بێت به‌ئاگا بهێنرێته‌وه‌.»
28
ئه‌وانیش به‌ ده‌نگی به‌رز هاواریان كرد، وه‌ك پیشه‌ی خۆیان به‌ شمشێر و ڕم له‌ خۆیان دا، هه‌تا خوێنیان لێ چۆڕایه‌وه‌.
29
كاتێك عه‌سر داهات هه‌تا كاتی قوربانی ئێواره‌[b] حاڵیان كرد، به‌ڵام كوا ده‌نگ و كوا وه‌ڵام و كوا گوێگر؟
30
ئه‌لیاس به‌ هه‌موو گه‌لی گوت: «وه‌رنه‌ پێشه‌وه‌ بۆ لام.» ئه‌وانیش لێی چوونه‌ پێشه‌وه‌. ئینجا قوربانگا وێرانكراوه‌كه‌ی یه‌زدانی چاككرده‌وه‌.
31
پاشان ئه‌لیاس دوازده‌ به‌ردی برد، هێنده‌ی ژماره‌ی هۆزه‌كانی نه‌وه‌ی یاقوب كه‌ فه‌رمایشتی یه‌زدانی بۆ هاتبوو، پێی فه‌رمووبوو: «ناوت ئیسرائیل ده‌بێت.»
32
له‌و به‌ردانه‌ قوربانگایه‌كی به‌ ناوی یه‌زدان بنیاد نا و له‌ ده‌وری قوربانگاكه‌ ئاوه‌ڕۆیه‌كی دروستكرد كه‌ جێگای دوو پێوانه‌[c] تۆوی تێدا ده‌بووه‌وه‌.
33
ئینجا ته‌خته‌داره‌كانی ڕێكخست و جوانه‌گاكه‌ی له‌توپه‌ت كرد و له‌سه‌ر ته‌خته‌داره‌كان داینا. ئینجا گوتی: «چوار گۆزه‌ ئاو پڕ بكه‌ن و به‌سه‌ر قوربانییه‌كه‌ و به‌سه‌ر داره‌كانیدا بكه‌ن.»
34
گوتی: «دووباره‌ی بكه‌نه‌وه‌.» دووباره‌یان كرده‌وه‌.
گوتی: «سێ باره‌ی بكه‌نه‌وه‌.» سێ باره‌یان كرده‌وه‌.
35
جا ئاو له‌ ده‌وری قوربانگاكه‌ ڕۆیشت و ئاوه‌ڕۆكه‌ش پڕ بوو له‌ ئاو.
36
له‌ كاتی پێشكه‌شكردنی قوربانی، ئه‌لیاسی پێغه‌مبه‌ر هاته‌ پێشه‌وه‌ و گوتی: «ئه‌ی یه‌زدان، خودای ئیبراهیم و ئیسحاق و ئیسرائیل، ئه‌مڕۆ با بزانرێت كه‌ تۆ له‌ ئیسرائیل خودایت، منیش به‌نده‌ی تۆم و به‌ فه‌رمایشتی تۆ هه‌موو ئه‌م كارانه‌م كردووه‌.
37
ئه‌ی یه‌زدان، وه‌ڵامم بده‌وه‌، وه‌ڵامم بده‌وه‌، با ئه‌م گه‌له‌ بزانن كه‌ تۆ یه‌زدانی په‌روه‌ردگاریت، تۆ دڵیان به‌ره‌و لای خۆت ڕاده‌كێشیت.»
38
ئینجا ئاگری یه‌زدان كه‌وته‌ خواره‌وه‌، قوربانی و ته‌خته‌دار و به‌رد و خۆڵه‌كه‌ی خوارد، ئاوی ناو ئاوه‌ڕۆكه‌شی وشك كرد.
39
كاتێك هه‌موو گه‌ل ئه‌وه‌یان بینی، به‌ ڕوودا كه‌وتن و گوتیان: «یه‌زدان خودایه‌، یه‌زدان خودایه‌!»
40
ئینجا ئه‌لیاس پێی گوتن: «پێغه‌مبه‌ره‌كانی به‌عل بگرن و مه‌هێڵن پیاوێكیان لێ ده‌رباز بێت.» ئه‌وانیش گرتیانن، ئه‌لیاس بردنییه‌ خواره‌وه‌ بۆ دۆڵی قیشۆن و له‌وێ سه‌ری بڕین.
41
پاشان ئه‌لیاس به‌ ئه‌حاڤی گوت: «بڕۆ بخۆ و بخۆوه‌، چونكه‌ ده‌نگی بارانێكی زۆر دێت.»
42
جا ئه‌حاڤ چوو بخوات و بخواته‌وه‌، به‌ڵام ئه‌لیاس سه‌ركه‌وته‌ سه‌ر لووتكه‌ی كارمه‌ل، چه‌مایه‌وه‌ سه‌ر زه‌وی و ده‌موچاوی خسته‌ نێو ئه‌ژنۆكانییه‌وه‌.
43
به‌ خزمه‌تكاره‌كه‌ی گوت: «هه‌سته‌، ڕووه‌و ده‌ریا بڕوانه‌.» ئه‌ویش هه‌ستا و ڕووه‌و ده‌ریا ڕوانی و گوتی: «هیچ نییه‌.»
ئه‌لیاسیش حه‌وت جار گوتی: «دیسان ته‌ماشا بكه‌وه‌.»
44
له‌ جاری حه‌وته‌م گوتی: «ئه‌وه‌تا په‌ڵه‌ هه‌ورێكی بچووك كه‌ هێنده‌ی له‌پی ده‌ستێك ده‌بێت له‌ ده‌ریاوه‌ به‌رز ده‌بێته‌وه‌.»
ئینجا ئه‌لیاس گوتی: «بڕۆ به‌ ئه‌حاڤ بڵێ: ”گالیسكه‌كه‌ت ئاماده‌ بكه‌ و بڕۆ خواره‌وه‌ با بارانه‌كه‌ ڕێت لێ نه‌گرێت.“»
45
ئاسمان له‌م لاوه‌ بۆ ئه‌و لا به‌ هه‌ور و با ڕه‌شداگه‌ڕا و بارانێكی زۆر باری، ئه‌حاڤ سوار بوو و چوو بۆ یه‌زره‌عیل.
46
هێزی یه‌زدان بۆ ئه‌لیاس هات، ناوقه‌دی به‌ست و له‌به‌رده‌م ئه‌حاڤه‌وه‌ ڕایكرد، هه‌تا گه‌یشته‌ یه‌زره‌عیل.
  1. a. 18‏:23 له‌و كاته‌وه‌ی كه‌ گوێره‌كه‌ی نێر له‌ شیر ده‌بڕدرێته‌وه‌ پێی ده‌گوترێت (نۆبه‌ن) یان (جوانه‌گا).
  2. b. 18‏:29 مه‌به‌ستی له‌ قوربانی ئێوارانی په‌رستگای یه‌زدانه‌. \+xt بڕوانه‌ ده‌رچوون 29‏:38‏-41.‏\+xt*‏
  3. c. 18‏:32 دوو پێوانه‌: عیبری: دوو \+tl سه‌ئا\+tl*، نزیكه‌ی پازده‌ لیتر.