عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
ڕاگه‌یاندنی وشكه‌ساڵی له‌لایه‌ن ئه‌لیاسه‌وه‌ 
1
ئه‌وه‌ بوو ئه‌لیاسی[a] تیشبی كه‌ دانیشتووێكی گلعاد بوو به‌ ئه‌حاڤی گوت: «به‌ یه‌زدانی زیندوو، خودای ئیسرائیل، ئه‌و خودایه‌ی كه‌ ده‌یپه‌رستم، له‌م چه‌ند ساڵه‌ی داهاتوو نه‌ شه‌ونم ده‌بێت و نه‌ باران، هه‌تا له‌ ده‌می منه‌وه‌ نه‌گوترێت!»
2
پاشان فه‌رمایشتی یه‌زدان بۆ ئه‌لیاس هات:
3
«لێره‌ بڕۆ و ڕوو له‌ ڕۆژهه‌ڵات بكه‌، له‌لای شیوی كه‌ریس خۆت بشاره‌وه‌، كه‌ له‌ به‌ری ڕۆژهه‌ڵاتی ڕووباری ئوردونه‌.
4
له‌ جۆگه‌كه‌ ده‌خۆیته‌وه‌ و فه‌رمانیشم به‌ قه‌له‌ڕه‌شه‌كان داوه‌ له‌وێ خواردنت بۆ دابین بكه‌ن.»
5
ئه‌ویش كاری به‌ فه‌رمایشتی یه‌زدانی كرد، چوو له‌ شیوی كه‌ریس مایه‌وه‌، كه‌ له‌ به‌ری ڕۆژهه‌ڵاتی ڕووباری ئوردونه‌.
6
قه‌له‌ڕه‌شه‌كانیش به‌یانییان و ئێواران نان و گۆشتیان بۆ ده‌هێنا، له‌ جۆگه‌كه‌ش ئاوی ده‌خوارده‌وه‌.
بێوه‌ژنی سه‌ره‌فه‌ند 
7
پاش ماوه‌یه‌ك جۆگه‌كه‌ وشكی كرد، چونكه‌ باران له‌ خاكه‌كه‌ نه‌بوو.
8
ئینجا فه‌رمایشتی یه‌زدانی بۆ هات، فه‌رمووی:
9
«هه‌سته‌ و بڕۆ شارۆچكه‌ی سه‌ره‌فه‌ندی نزیكی سه‌یدا و له‌وێ بمێنه‌وه‌، له‌وێ فه‌رمانم به‌ بێوه‌ژنێك داوه‌ خواردنت بۆ دابین بكات.»
10
ئه‌ویش هه‌ستا و چوو بۆ سه‌ره‌فه‌ند. كاتێك گه‌یشته‌ لای ده‌روازه‌ی شارۆچكه‌كه‌، بێوه‌ژنێكی بینی له‌وێ چه‌ند چیلكه‌ دارێكی كۆده‌كرده‌وه‌، بانگی كرد و گوتی: «بێ زه‌حمه‌ت جامێك ئاوم بۆ بهێنه‌، با بیخۆمه‌وه‌.»
11
كاتێك چوو بیهێنێت، بانگی كرده‌وه‌ و گوتی: «له‌گه‌ڵ ده‌ستت پارووه‌ نانێكیشم بۆ بهێنه‌.»
12
ئه‌ویش گوتی: «سوێند به‌ خوداكه‌ی تۆ ده‌خۆم، به‌ یه‌زدانی زیندوو، نانم نییه‌، مشتێك ئارد نه‌بێت له‌ كوپه‌یه‌ك و تۆزێك زه‌یت له‌ گۆزه‌یه‌ك. ئه‌وه‌تا دوو چیلكه‌ دارم كۆكردووه‌ته‌وه‌ هه‌تا بیانبه‌مه‌وه‌ و ژه‌مێك بۆ خۆم و كوڕه‌كه‌م دروستبكه‌م، بیخۆین و بمرین.»
13
ئه‌لیاسیش پێی گوت: «مه‌ترسه‌، بڕۆوه‌ و ئه‌وه‌ بكه‌ كه‌ گوتت، به‌ڵام یه‌كه‌م جار له‌وه‌ی هه‌ته‌ كولێره‌یه‌كی بچووكم بۆ دروستبكه‌ و بۆم بهێنه‌ ده‌ره‌وه‌، پاشانیش بۆ خۆت و كوڕه‌كه‌ت دروستبكه‌،
14
چونكه‌ یه‌زدانی په‌روه‌ردگاری ئیسرائیل به‌م جۆره‌ ده‌فه‌رموێت: ”كوپه‌ی ئارده‌كه‌ به‌تاڵ نابێت و گۆزه‌ی زه‌یته‌كه‌ش لێی كه‌م ناكات، هه‌تا ئه‌و ڕۆژه‌ی یه‌زدان باران به‌سه‌ر ڕووی زه‌ویدا ده‌بارێنێت.“»
15
ئه‌ویش چوو و به‌ قسه‌ی ئه‌لیاسی كرد، ئیتر هه‌موو ڕۆژێك ئه‌لیاس و بێوه‌ژنه‌كه‌ و ماڵه‌كه‌ نانیان هه‌بوو.
16
كوپه‌ی ئارده‌كه‌ به‌تاڵ نه‌بوو، گۆزه‌ی زه‌یته‌كه‌ش لێی كه‌م نه‌بووه‌وه‌، هه‌روه‌ك ئه‌وه‌ی یه‌زدان له‌سه‌ر زاری ئه‌لیاسه‌وه‌ فه‌رمووی.
17
دوای ماوه‌یه‌ك كوڕی ژنه‌ خاوه‌ن ماڵه‌كه‌ نه‌خۆش كه‌وت، نه‌خۆشییه‌كه‌ی به‌ جۆرێك سه‌خت بوو كه‌ هه‌ناسه‌ی لێ بڕا.
18
ئینجا به‌ ئه‌لیاسی گوت: «ئه‌ی پیاوی خودا، چیت له‌سه‌ر من هه‌یه‌؟ ئایا هاتووی بۆ لای من هه‌تا تاوانه‌كه‌م به‌بیر بهێنیته‌وه‌ و كوڕه‌كه‌م بمرێنیت؟»
19
ئه‌لیاسیش پێی گوت: «كوڕه‌كه‌تم بدێ.» له‌ باوه‌شییه‌وه‌ بردی و سه‌ری خسته‌ ژووره‌كه‌ی سه‌ره‌وه‌ كه‌ تێیدا ده‌مایه‌وه‌، له‌سه‌ر جێگاكه‌ی خۆی پاڵی خست.
20
هاواری بۆ یه‌زدان كرد و گوتی: «ئه‌ی یه‌زدان، خودای من، ئایا خراپه‌ت به‌سه‌ر ئه‌م بێوه‌ژنه‌ش هێنا كه‌ من له‌لای ئه‌و ئاواره‌م، به‌وه‌ی كوڕه‌كه‌ی ئه‌وت كوشت؟»
21
ئینجا سێ جار له‌سه‌ر كوڕه‌كه‌ درێژ بوو و هاواری بۆ یه‌زدان كرد، گوتی: «ئه‌ی یه‌زدان، خودای من، با گیانی ئه‌م كوڕه‌ بگه‌ڕێته‌وه‌ ناوی!»
22
یه‌زدانیش گوێی له‌ هاواره‌كه‌ی ئه‌لیاس گرت، گیانی كوڕه‌كه‌ گه‌ڕایه‌وه‌ ناوی و زیندووبووه‌وه‌.
23
ئینجا ئه‌لیاس كوڕه‌كه‌ی برد و له‌ ژووره‌كه‌ی سه‌ره‌وه‌ هێنایه‌ خواره‌وه‌ بۆ ناو ماڵه‌كه‌ و دایه‌ ده‌ست دایكی. ئه‌لیاس گوتی: «ببینه‌، كوڕه‌كه‌ت زیندووه‌!»
24
ژنه‌كه‌ش به‌ ئه‌لیاسی گوت: «ئێستا زانیم كه‌ تۆ پیاوی خودایت و ئه‌وه‌ی ده‌یڵێیت فه‌رمایشتی یه‌زدانه‌ و ڕاستییه‌.»
  1. a. 17‏:1 ئه‌لیاس: له‌ زمانی عیبری به‌ واتای (یه‌زدان خوداكه‌یه‌) دێت.