عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
دایكا لەشفرۆشان و دڕندە 
1
پاشی ئێك ژ وان حەفت فریشتەیێن حەفت ترار ڤێ بوون هات و ل گەل من ئاخفت و گۆت: «وەرە، ئەز دێ سزایێ لەشفرۆشا مەزن، ئەوا ل سەر گەلەك ئاڤان روینشتی، نیشا تە دەم،[a]
2
ئەوا پاشایێن ئەردی دەهمەنپیسی ل گەل كری و ئاكنجیێن ئەردی ب شەرابا دەهمەنپیسیا وێ هاتینە سەرخۆشكرن.»
3
ئینا فریشتەی ب رێكا گیانێ پیرۆز ئەز برمە چۆلی و من ژنەك دیت ل سەر دڕندەیەكێ سۆر یێ پڕ ژ ناڤێن كوفریان یا روینشتی بوو، ئەوی دڕندەی حەفت سەر و دەهـ شاخ هەبوون.
4
ژنێ جلكێن بنەفشی و سۆر ل بەر بوون و ب زێڕی و ب بەرێن بهاگران و مراریان یا خەملاندی بوو و پەرداغەكا زێڕین یا پڕی تشتێن جهێ دلڕەشیێ و پیساتیا دەهمەنپیسیا وێ د دەستی دا بوو.
5
ل سەر ئەنیا وێ ناڤەكێ نهێنی یێ نڤیسی بوو:
«بابلا مەزن،
دایكا لەشفرۆش
و تشتێن جهێ دلڕەشیێ ل سەر ئەردی.»
6
من دیت ئەو ژن ب خوینا پیرۆزكریان و خوینا شاهدێن عیسای یا سەرخۆش بوو. دەمێ من ئەو دیتی، ئەز گەلەك مەندەهۆش بووم.
7
هنگی فریشتەی گۆتە من: «بۆچی تۆ یێ مەندەهۆشی؟ ئەز دێ نهێنیا ژنێ و دڕندەیێ ئەو هەلگرتی، ئەوێ حەفت سەر و دەهـ شاخ هەین، بۆ تە بێژم.
8
ئەو دڕندەیێ تە دیتی، ئەو هەبوو لێ نوكە نینە و نێزیكە ئەو دەركەڤیتە چاڵا بێ بن و بچیتە وێرانبوونێ. ئاكنجیێن ئەردی، ئەوێن هەر ژ دامەزراندنا جیهانێ، ناڤێن وان د پەرتووكا ژیانێ دا نەهاتینە نڤیسین، دەمێ دڕندەی دبینن دێ مەندەهۆش بن، چنكو ئەو هەبوو لێ نوكە نینە و دێ هێت.
9
ل ڤێرێ زێنێ ئاقلمەندی هەی یێ فەرە، ئەو حەفت سەر، حەفت چیانە كو ژن ل سەر روینشتیە. حەفت پاشانە ژی،
10
پێنج ژ وان كەفتینە، ئێك یێ هەی، یێ دی هێشتا نەهاتیە و هەر دەمێ هات، پێدڤیە بۆ دەمەكێ كورت بمینیت.
11
ئەو دڕندەیێ هەبوو لێ نوكە نینە، یێ هەشتێیە، لێ ئەو ژ حەفتانە و یێ دچیتە وێرانبوونێ.
12
ئەو دەهـ شاخێن تە دیتین، دەهـ پاشانە هێشتا پاشایەتی وەرنەگرتیە، لێ دێ دەستهەلاتێ وەكو پاشا بۆ دەمەكێ گەلەك كورت ل گەل دڕندەی وەرگرن.[b]
13
ئەوان ئێك مەبەستا هەی، كو ئەو دێ هێز و دەستهەلاتا خۆ دەنە دڕندەی.
14
ئەو دێ ل دژی بەرخی كەڤنە جەنگێ و بەرخ دێ ب سەر وان كەڤیت، چنكو ئەو خودانێ خودانانە و پاشایێ پاشایانە. گازیكری و هەلبژارتی و دلسۆزێن وی دێ ل گەل وی بن.»
15
پاشی فریشتەی گۆتە من: «ئەو ئاڤێن تە دیتین، كو لەشفرۆش ل سەر یا روینشتیە، گەل و جەماوەر و مللەت و زمانن.
16
ئەو دەهـ شاخێن تە دیتین و دڕندە، دێ كەربێن خۆ ژ لەشفرۆشێ ڤەكەن. دێ وێ وێران و رویس كەن و دێ گۆشتێ وێ خۆن و وێ ب ئاگری سوژن،
17
چنكو خودێ یا كریە د دلێ وان دا، كو مەبەستا وی ب جهـ بینن و ئێك مەبەست هەبیت و پاشایەتیا خۆ بدەنە دڕندەی، تاكو پەیڤێن خودێ ب جهـ بهێن.
18
ئەو ژنكا تە دیتی، ئەو باژێڕێ مەزنە یێ پاشایەتیێ ل سەر پاشایێن ئەردی دكەت.»
  1. a. ‏17‏:1 یەرمیا ‏51‏:12‏-13
  2. b. ‏17‏:12 دانیێل ‏7‏:24