عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
فەرمانێن خودێ د سەر تیتالێن مرۆڤان رانە 
1
فەریسی و هندەك مامۆستایێن دەستووری ژ ئورشەلیمێ هاتبوون و ل نك وی كۆم بوون.
2
وان دیت كو هندەك شاگردێن وی یێ خوارنێ ب دەستێن هەڕمی، ئانكو نەشویشتی، دخۆن.
3
(فەریسی و جوهی هەمی ب تیتالێن باب و كالان ڤە د گرێداینە، هەتا ب شێوازێ دروست دەستێن خۆ نەشوون، ناخۆن.
4
ئەگەر ژ بازاڕی زڤڕیبان ژی خوارن نەدخوار هەتا دەستێن خۆ نەشویشتبان. گەلەك تشتێن دی ژی ژێ وەرگرتبوون دا ب جهـ بینن، وەكو شویشتنا پەرداغ، دوولك، ئامانێن سفری و نڤینان.)
5
فەریسی و مامۆستایێن دەستووری پرسیار ژێ كرن: «بۆچی شاگردێن تە ل دویڤ تیتالێن باب و كالان ناچن، لێ ب دەستێن هەڕمی خوارنێ دخۆن؟»
6
بەرسڤا وان دا: «ئیشایا یێ راست بوو دەمێ پێشبینی دەربارەی هەوە دووڕویان كری، هەروەكو هاتیە نڤیسین:
‹ئەڤ مللەتە ب دەڤی رێزێ ل من دگریت،
لێ دلێ وی گەلەك یێ ژ من دویرە.
7
ئەو ژ قەستا من دپەرێسن،
فێركرنا ئەو پێ رادبن، ئەو شیرەتێن مرۆڤانە.›[a]
8
هەوە فەرمانا خودێ هێلا و هوین پێگیریێ ب تیتالێن مرۆڤان دكەن.»
9
پاشی گۆتە وان: «هوین چەند د شارەزانە، كو فەرمانا خودێ بدەنە رەخەكی داكو تیتالێن خۆ بپارێزن!
10
مووسای یا گۆتی: رێزێ ل دایك و بابێن خۆ بگرە[b] و هەر كەسێ ئاخفتنێن كرێت بێژیتە دایكا خۆ یان بابێ خۆ، دڤێت بهێتە كوشتن.[c]
11
لێ هوین دبێژن: ئەگەر ئێك بێژیتە دایكا خۆ یان بابێ خۆ: ئەو هاریكاریا ئەز دا دەمە هەوە، ‹قوربانی› یە، ئانكو وەكو پێشكێشی من دا خودێ،
12
ئێدی هوین ناهێلن ئەو چ تشتی بۆ بابێ خۆ یان دایكا خۆ بكەت.
13
هوین هۆسا ب ڤان تیتالێن خۆ یێن بۆ نفشێن نوی دهێلن، پەیڤا خودێ ژ كار دئێخن. گەلەك تشتێن دی ژی وەكو ڤێ هوین دكەن.»
چیە مرۆڤی دهەڕمینیت؟ 
14
دیسان گازی خەلكی كر و گۆتێ: «هوین هەمی گوهێ خۆ بدەنە من و تێبگەهن:
15
تشتەك نینە ژ دەرڤە بهێتە د لەشێ مرۆڤی دا و مرۆڤی بهەڕمینیت، لێ ئەو تشتێن ژ مرۆڤی دەردكەڤن، مرۆڤی دهەڕمینن.
16
ئەوێ گوهـ بۆ بهیستنێ هەین، بلا ببهیسیت!»
17
دەمێ ژ نك جەماوەری چووی و ڤەگەڕیایە مال، شاگردان دەربارەی وێ نموونەیێ پرسیار ژێ كر.
18
ئینا گۆتە وان: «ئەرێ هوین ژی تێنەگەهشتینە؟ ما هوین نزانن هەر چ تشتێ ژ دەرڤە دهێتە د ناڤ مرۆڤی دا، نەشێت مرۆڤی بهەڕمینیت؟
19
چنكو ناچیتە د دلێ وی دا، لێ دچیتە د زكی دا، پاشی دەردكەڤیتە ژ دەرڤە.» ب ڤێ ئاخفتنێ هەمی خوارن پاقژ هێلان.
20
ئینا گۆت: «ئەو تشتێ ژ مرۆڤی دەردكەڤیت، ئەوە مرۆڤی دهەڕمینیت،
21
چنكو ژ ناڤ دا، ژ دلێ مرۆڤان هزرێن خراب دەردكەڤن: بێنامویسی، دزی، كوشتن،
22
دەهمەنپیسی، زكڕەشی، خرابی، خاپاندن، بێدەلنگی، چاڤپیسی، بوهتان، دفنبلندی و بێمێشكی.
23
ئەڤ تشتێن خراب هەمی ژ ناڤ مرۆڤی دزێن و مرۆڤی دهەڕمینن.»
باوەریا ژنەكا نەجوهی 
24
پاشی عیسای ئەو دەڤەر هێلا و چوو دەوروبەرێن سور. چوو مالەكێ و ئەوی دڤیا كەس پێ نەزانیت، د سەر هندێ را ئەو نەدشیا ڤەشارتی بمینیت.
25
لێ ژنەكێ های ژێ هەبوو، كچا وێ گیانەكێ پیس تێدا بوو، ئینا ئێكسەر هات و خۆ هاڤێتە بەر پێیێن وی.
26
ئەو ژن یونانی بوو و خەلكا فینیقیا سوریێ بوو. هیڤی ژێ كر كو ئەجنەی ژ كچا وێ دەربئێخیت.
27
لێ ئەوی گۆتە وێ: «بهێلە زاڕۆك ل پێشیێ تێر بن، چنكو نە دروستە نانێ زاڕۆكان ببەن و بهاڤێژنە بەر كویچكان.»
28
بەرسڤا وی دا و گۆت: «دروستە خودان، لێ كویچكێن ل بن مێزێ ژ بەرمایكێن زاڕۆكان دخۆن!»
29
ئینا گۆتە وێ: «ژ بەر ڤێ پەیڤێ هەڕە، ئەجنە ژ كچا تە دەركەفت.»
30
دەمێ ژن ڤەگەڕیایە مالا خۆ، دیت كو كچا وێ یا ل سەر تەختی درێژ كریە و ئەجنە یێ ژێ دەركەفتی.
ساخكرنا ئێكێ كەڕ 
31
پاشی عیسای دەوروبەرێن سور هێلان، د رێكا سایدا را بوری و د ناڤ توخیبێن دەڤەرا دێكاپۆلیس[d] را دەرباز بوو و هاتە دەریاكا جەلیل.
32
وان ئێكێ كەڕ و لال ئینا نك وی و هیڤی ژێ كرن كو دەستێ خۆ بدانیتە سەر،
33
ئینا ئەو ب تنێ برە وێڤەی كۆمبوویان و تبلێن خۆ كرنە د گوهێن زەڵامی را، پاشی تف كر و دەست كرە ئەزمانێ وی،
34
بەرێ خۆ دا ئەسمانی، بێهنا خۆ هەلكێشا و گۆتە وی: «ئەففاتا!» ئانكو: «ڤەببە.»
35
د وی دەمی دا گوهـ و گرێیا ئەزمانێ وی ڤەبوون و راست ئاخفت.
36
عیسای ئەو راسپاردن كو نەبێژنە كەسێ، لێ چەند وی پتر ئەو دراسپاردن، ئەوان پتر رویدان رادگەهاند.
37
خەلك گەلەك گوهشین و دگۆتن: «ئەوی هەمی كریار ب باشی كرینە! ئەو وە دكەت كو یێن كەڕ ببهیسن و یێن لال بئاخڤن.»
  1. a. 7‏:7 ئیشایا 29‏:13
  2. b. 7‏:10 دەركەفتن 20‏:12؛ گۆتارا مووسای 5‏:16
  3. c. 7‏:10 دەركەفتن 21‏:17؛ پەرستن و پیرۆزی 20‏:9
  4. d. 7‏:31 q دێكاپۆلیس: ئانكو دەهـ باژێڕ. ل فەرهەنگۆكێ بنێڕە.