عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
ساخكرن د شەمبیێ دا 
1
عیسا جارەكا دی چوو د كنیشتەیێ ڤە، مرۆڤەكێ دەست گورۆج[a] ل وێرێ بوو.
2
چاڤێ وان لێ بوو كا دێ وی ل شەمبیێ ساخ كەت، دا وی تاوانبار بكەن.
3
گۆتە زەڵامێ دەست گورۆج: «رابە ل ناڤەندێ راوەستە!»
4
پاشی گۆتە وان: «ئایا ل شەمبیێ كرنا كارێ باش رەوایە، یان كارێ خراب؟ قورتالكرنا ژیانەكێ یان كوشتن؟» لێ ئەو بێدەنگ بوون.
5
عیسا ب تۆڕەبوون ڤە ل وان زڤڕی و ژ سەرهشكیا وان خەمگین بوو، گۆتە وی مرۆڤی: «دەستێ خۆ درێژ كە!» وی ژی دەستێ خۆ درێژ كر و دەستێ وی ساخ بووڤە.
6
ئینا فەریسی دەركەفتن و د گاڤێ دا ل گەل لایەنگرێن هێرودێسی ل دژی عیسای دەست ب پیلان دانانێ كرن، كا چەوا وی بكوژن.
جەماوەرەكێ مەزن ل كنارێ دەریاكا جەلیلێ 
7
عیسا و شاگردێن خۆ ژ وێرێ چوونە دەریاكێ و جەماوەرەكێ مەزن ژ جەلیلێ ب دویڤ كەفتن.
8
دەمێ خەلكی گوهـ ل وان تشتێن وی كرین بووی، گەلەك كەس ژ یەهودیایێ، ئورشەلیمێ، ئەدومیێ، رەخێ دی یێ رویبارێ ئوردن و ژ دەوروبەرێن سور و سایدایێ ژی هاتنە نك وی.
9
عیسای ژ بەر وێ گێلەشۆكا مەزن گۆتە شاگردێن خۆ كو بۆ وی بەلەمەكا بچویك ئامادە بكەن، داكو فشار لێ نەهێتە كرن،
10
چنكو وی گەلەك خەلك ساخ كربوون، لەوما هەر ئێكێ نەساخ ژی بزاڤ دكر خۆ نێزیكی عیسای بكەت، داكو دەستێ خۆ بگەهینیتێ.
11
دەمێ گیانێن پیس ئەو ددیت، بەرامبەری وی دكەفتنە سەر چۆكێن خۆ و دكرنە قێڕی: «تۆ كوڕێ خودێی!»
12
لێ وی ب توندی فەرمان ل وان دكر، كو وی ئاشكرا نەكەن.
هەلبژارتنا دوازدە هنارتیان 
13
پاشی عیسا ب سەر چیای كەفت و گازی وان كر یێن وی دڤیان. ئەو ژی چوونە نك وی.
14
دوازدە شاگرد دەست نیشان كرن و ناڤێ «هنارتی» دانا سەر وان، دا ل گەل وی بن و وان بهنێریت دا مزگینیێ رابگەهینن
15
و وان دەستهەلات بۆ دەرئێخستنا ئەجنەیان هەبیت.
16
ئەڤە ئەو دوازدەنە ئەوێن وی دەست نیشان كرین: شەمعون ئەوێ ناڤێ وی كریە پەترۆس،
17
یەعقوب و یوحەننایێ برایێ وی، كوڕێن زەبەدی، ناڤێ وان كرە بووانەرجس ئانكو كوڕێن برویسیێ،
18
ئەندراوس، فیلیپوس، بەرتولماوس، مەتتا، توماس، یەعقوبێ كوڕێ حەلفی، تەداوس، شەمعونێ وەڵاتپەروەر[b]
19
و یەهودایێ ئەسخەریوتی ئەوێ بێبەختی ل عیسای كری.
عیسا و بەعلزەبول 
20
پاشی عیسا هاتە مالەكێ و جارەكا دی جەماوەرەك لێ خڕڤەبوو، تاكو ئێدی عیسا و شاگردێن وی نەشیاین خوارنێ ژی بخۆن.
21
دەمێ مرۆڤێن وی گوهـ لێ بووی، هاتن دا ببەن، چنكو دگۆتن: «ئەو یێ تێكچووی.»
22
مامۆستایێن دەستووری ئەوێن ژ ئورشەلیمێ هاتینە خوار دگۆتن: «بەعلزەبولی[c] یێ هنگافتی» و «ئەو ب دەستهەلاتا سەرۆكێ ئەجنەیان، ئەجنەیان دەردئێخیت.»
23
ئەڤجا عیسای گازی وان كر و ب نموونەیان ل گەل وان ئاخفت و گۆت: «ئبلیس چەوا دشێت ئبلیسی دەربئێخیت؟
24
ئەگەر پاشایەتیەكێ دووبەرەكی بكەڤیتە د ناڤ دا، ئەو نەشێت خۆ رابگریت.
25
یان ئەگەر مالەكێ دووبەرەكی بكەڤیتە د ناڤ دا، ئەو نەشێت خۆ رابگریت.
26
ئەگەر ئبلیس دژی خۆ راوەستیا و دووبەرەكی كەفتە د ناڤ دا، ئەو نەشێت خۆ رابگریت، بەلكو ئەو دێ نەمانا وی بیت.
27
لێ كەس نەشێت بچیتە د مالا زەڵامەكێ هێزدار ڤە و كەلوپەلێن وی تالان بكەت، ئەگەر ئەو ل بەراهیێ وی زەڵامێ هێزدار گرێ نەدەت و پشتی هنگی مالا وی تالان بكەت.
28
راستیێ دبێژمە هەوە: هەر گونەهەك و هەر گۆتنەكا خراب یا چەوا بیت، خودێ دێ ل مرۆڤان بوریت،
29
لێ ئەوێ كوفریان د دەرهەقا گیانێ پیرۆز دا بكەت، چ جاران ل وی ناهێتە بورین، بەلكو گونەها وی دێ هەروهەر مینیت.»
30
ب ڤێ ئاخفتنێ بەرسڤا وان دا ئەوێن دگۆتن: «گیانەكێ پیس یێ هنگافتی.»
دایك و برایێن عیسای 
31
د وی دەمی دا، دایك و برایێن وی هاتن و ژ دەرڤە راوەستیان و هنارتنە د دویڤ را.
32
جەماوەرەك ل دۆرێن وی یێ روینشتی بوو، گۆتنە وی: «ئەڤە دایكا تە و برایێن تە ژ دەرڤە د راوەستیاینە، داخوازا تە دكەن.»
33
بەرسڤا وان دا و گۆت: «دایكا من و برایێن من كینە؟»
34
بەرێ خۆ دا ئەوێن ل دەوروبەرێن وی دروینشتی و گۆت: «ئها ئەڤەنە دایك و برایێن من!
35
چنكو هەر كەسێ ب حەزا خودێ بكەت، ئەوە خویشك و برا و دایكا من.»
  1. a. 3‏:1 گورۆج ئانكو سەقەت
  2. b. 3‏:18 q شەمعونێ وەڵاتپەروەر بنێڕە فەرهەنگۆكێ.
  3. c. 3‏:22 q بەعلزەبول ناڤێ سەرۆكێ ئەجنەیانە، ئانكو ئبلیسی. ل فەرهەنگۆكێ بنێڕە.