عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
عیسا هەر دوازدە هنارتیان دهنێریت 
1
عیسای هەر دوازدە شاگرد خڕڤەكرن و شیان و دەستهەلات ل سەر ئەجنەیان و ساخكرنا نەخۆشیان دا وان
2
و هنارتن داكو پاشایەتیا خودێ بۆ خەلكێ رابگەهینن و ژ نەساخیان ساخكەن
3
و گۆتە وان: «بۆ رێكێ چ تشتان هەلنەگرن، نە داری و نە چانتكی و نە نانی و نە پارەیان و بلا كەسێ دوو كراس د گەل دا نەبن.
4
چ مالا هوین بچنێ، ل وێرێ بمینن، هەتا هوین ژ وی باژێڕی دەردكەڤن.
5
ئەگەر خەلكێ باژێڕەكی هوین قەبیل نەكرن، دەمێ ژ باژێڕی دەردكەڤن، تۆزێ ژ پێیێن خۆ داقوتن، دا ل سەر وان ببیتە شاهدەیی.»
6
ئەڤجا ئەو دەركەفتن و چوونە گوندان و ل هەمی جهان مزگینی دگەهاند و خەلك ساخ دكرن.
ئالۆزبوونا هێرودێسی 
7
هێرودێسێ دەستهەلاتدار، ئەو هەمی رویدانێن چێدبوون بهیستن. ئینا هزرێن هێرودێسی ئالۆز بوون، چنكو هندەكان دگۆت: ‹یوحەننا ژ ناڤ مریان یێ رابووی.›
8
هندەكان ژی دگۆت: ‹ئلیاس یێ دیار بووی› و هندەكێن دی دگۆت: ‹ئێك ژ پێغەمبەرێن كەڤن یێ ژ مرنێ رابووی.›
9
هێرودێسی گۆت: «من سەرێ یوحەننای یێ دایە بڕین، لێ ئەو كیە، ئەوێ ئەز ڤان تشتان دەربارەی وی دبهیسم؟» و وی بزاڤ دكر ببینیت.
عیسا خوارنێ ددەتە پێنج هزاران 
10
پشتی هنارتی ڤەگەڕیاین، هەمی كریارێن وان كرین بۆ عیسای گۆتن. ئینا ئەوی هنارتی ب تنێ ل گەل خۆ برنە باژێڕەكی دبێژنێ بێت سایدا.
11
لێ خەلكی پێ زانی و خۆ گەهاندە وی. عیسای پێشوازیا وان كر و بۆ وان بەحسێ پاشایەتیا خودێ كر و ئەوێن پێدڤی ب چارەسەركرنێ ساخ كرن.
12
دەمێ رۆژ بەرەڤ ئاڤابوونێ ڤە چووی، هەر دوازدە شاگردێن وی هاتنە نك و گۆتنێ: «جەماوەری بڤەڕەڤینە دا بچنە گوند و مالێن دەوروبەر و ل وێرێ ڤەحەویێن و خوارنەكێ پەیدا بكەن، چنكو ئەم یێ ل جهەكێ ڤەدەر.»
13
ئینا گۆتە وان: «هوین تشتەكی بدەنێ دا بخۆن.» ئەوان گۆت: «مە ژ پێنج نان و دوو ماسیان پێڤەتر نینە، ژبلی ئەگەر ئەم بچین خوارنێ بۆ ڤی هەمی جەماوەری بكڕین.»
14
چنكو ژمارەیا زەڵامان نێزیكی پێنج هزاران بوو. پاشی گۆتە شاگردێن خۆ: «وان بكەنە كۆم كۆم و بلا پێنجی پێنجی روینن.»
15
ئەوان گۆتنا وی ب جهـ ئینا و داخواز ژ هەمیان كر روینن.
16
عیسای هەر پێنج نان و هەردوو ماسی وەرگرتن، بەرێ خۆ دا ئەسمانی و سوپاسیا خودێ كر و ئەو كەر كرن و دانەڤ شاگردێن خۆ، داكو بدەنە جەماوەری.
17
هەمیان خوار و تێر بوون، پاشی دوازدە سەڵكێن پرتێن بەرمایكان راكرن.
دانپێدانا پەترۆسی كو عیسا مەسیحە 
18
دەمێ عیسای ب تنێ نڤێژ دكر و شاگردێن وی ل گەل بوون، پرسیار ژ وان كر: «خەلك دبێژن ئەز كیمە؟»
19
ئەوان بەرسڤا وی دا: «هندەك دبێژن تۆ یوحەننایێ تافیركەری و هندەك دبێژن تۆ ئلیاسی و هندەك ژی دبێژن تۆ ئێك ژ پێغەمبەرێن كەڤنی ژ مرنێ رابووی.»
20
عیسای گۆتە وان: «و هوین چ دبێژن، ئەز كیمە؟» پەترۆسی بەرسڤا وی دا و گۆت: «تۆ مەسیحێ خودێی.»
عیسا پێشبینیا مرن و رابوونا خۆ دكەت 
21
لێ عیسای ئەو ب توندی ئاگەهدار كرن و فەرمان ل وان كر، كو ڤێ چەندێ نەبێژنە كەسێ
22
و گۆت: «دڤێت كوڕێ مرۆڤ گەلەك ئازارێ بكێشیت و ژ لایێ ریهسپی و سەرۆكێن كاهنان و مامۆستایێن دەستووری ڤە بهێتە رەتكرن و بهێتە كوشتن و ل رۆژا سێیێ راببیتەڤە.»
23
پاشی گۆتە هەمیان «ئەگەر ئێكی بڤێت ل دویڤ من بهێت، بلا خۆ ماندەل[a] بكەت و هەر رۆژ خاچا خۆ هەلگریت و ب دویڤ من بكەڤیت.
24
هەر كەسێ بڤێت ژیانا خۆ قورتال بكەت، دێ وێ ژ دەست دەت، لێ ئەوێ ژیانا خۆ پێخەمەتی من ژ دەست بدەت، دێ وێ قورتال كەت.
25
چنكو ما دێ چ مفایێ مرۆڤی بیت، ئەگەر جیهان هەمی ب دەست خۆ ڤە ئینا، لێ خۆ ژ دەست دا، یان ژی خۆ دۆڕاند[b] ؟
26
چنكو هەر كەسێ شەرمێ ب من و پەیڤێن من بكەت، كوڕێ مرۆڤ ژی، دەمێ ب مەزناهیا خۆ و یا بابێ خۆ و یا فریشتەیێن پیرۆز ڤە دهێت، دێ شەرمێ پێ كەت.
27
لێ ب راستی دبێژمە هەوە: هندەك ژ ئەوێن ل ڤێرێ راوەستیاین، تاكو هاتنا پاشایەتیا خودێ نەبینن، تام ناكەنە مرنێ.»
دیاربوونا مەزناهیا عیسای 
28
نێزیكی هەشت رۆژان پشتی وان ئاخفتنان، عیسای پەترۆس و یوحەننا و یەعقوب ل گەل خۆ برن و سەركەفتە چیایەكی، داكو نڤێژێ بكەت.
29
دەمێ عیسای نڤێژ دكر، دیمەنێ دێمێ وی هاتە گوهۆڕین و جلكێن وی سپی بوون و تەیسین.
30
ژ نشكەكێ ڤە دوو زەڵام ل گەل دئاخفتن، ئێك ژ وان مووسا بوو و یێ دی ئلیاس بوو.
31
ئەو هەردوو ب مەزناهی دیار بوون و بەحسێ دەركەفتنا عیسای[c] دكر كو نێزیك ببوو ل ئورشەلیمێ ب جهـ بینیت.
32
خەوێ چاڤێن پەترۆسی و یێن د گەل دا گران كربوون، لێ دەمێ باش هشیار بووین، مەزناهیا وی و هەردوو مرۆڤێن ل گەل وی راوەستیای دیتن.
33
دەمێ هەردوو مرۆڤ ژ عیسای دویر كەفتین، پەترۆسی گۆتە عیسای: «مامۆستا، باش بوو ئەم ل ڤێرێ! ئەڤجا دا ئەم سێ كەپران چێكەین، ئێك بۆ تە، ئێك بۆ مووسای و ئێك ژی بۆ ئلیاسی.» وی نەدزانی وی چ دگۆت،
34
لێ دەمێ ئەوی ئەو ئاخفتن دكرن، عەورەك هات و سیبەر ل وان كر. دەمێ كەفتینە ناڤ عەوری، شاگرد ترسیان.
35
دەنگەك ژ عەوری هات و گۆت: «ئەڤەیە كوڕێ من یێ من هەلبژارتی، گوهێ خۆ بدەنێ.»
36
دەمێ دەنگ ژ عەوری دەركەفتی، وان عیسا ب تنێ دیت، ئێدی ئەڤ رویدانە ڤەشارت و ل وان رۆژان ئەو تشتێ دیتی نەگۆتە كەسێ.
عیسا گیانێ پیس ژ زاڕۆكەكێ دەردئێخیت 
37
ل رۆژا پاشتر دەمێ ژ چیای هاتینە خوارێ، جەماوەرەكێ زۆر كەفتنە پێشیا وی
38
و زەڵامەكی ژ ناڤ وان گازی كر: «مامۆستا، ئەز هیڤیێ ژ تە دكەم تۆ بەرێ خۆ بدەیە كوڕێ من، چنكو ئێكانەیێ منە.
39
ژ نشكەكێ ڤە گیانەكێ پیس وی دهنگێڤیت و دەملدەست دكەتە قێڕی. ئەو تەپێ دئینیتێ و كەف ب سەر دەڤی دكەڤیت، دهەڕشینیت و زوی ب زوی ژێڤەنابیت.
40
من هیڤی ژ شاگردێن تە كر كو وی ژێ دەربئێخن، لێ نەشیان.»
41
عیسای بەرسڤ دا و گۆت: «هەی نفشێ بێباوەر و خوار، تا كەنگی دێ د ناڤ هەوە دا مینم و بێهنا خۆ ل هەوە فرەهـ كەم؟» گۆتە زەڵامی: «كوڕێ خۆ بینە ڤێرێ.»
42
دەمێ زاڕۆك دهات، ئەجنەی ئەو ل ئەردی دا و تەپێ گرت. عیسای ل گیانێ پیس حەیتاند و زاڕۆك ساخ كر و داڤ بابێ وی.
43
ئینا هەمی ژ مەزناهیا خودێ بەهتین.
هێشتا هەمی د گوهشینا كریارێن عیسای دا مابوون، عیسای گۆتە شاگردێن خۆ:
عیسا جارەكا دی پێشبینیا مرنا خۆ دكەت 
44
«هوین ڤێ ئاخفتنێ بكەنە د گوهێن خۆ دا: چ نەمایە دێ كوڕێ مرۆڤ رادەستی مرۆڤان هێتە كرن.»
45
لێ ئەو د ڤێ ئاخفتنێ نەگەهشتن و ژ وان هاتبوو ڤەشارتن، لەوما ئەو تێنەگەهشتن. ترسیان ژی پرسیارێ دەربارەی وێ ئاخفتنێ ژێ بكەن.
كیە یێ هەری مەزن؟ 
46
د سەر ڤێ چەندێ را د ناڤ وان دا كێشمەكێشەك چێبوو، كا د ناڤ وان دا یێ هەری مەزن كیە.
47
لێ عیسای ئەوا د دلێ وان دا زانی، ئەڤجا زاڕۆكەك ئینا و ب رەخ خۆ ڤە راوەستاند
48
و گۆتە وان: «هەر كەسێ ب ناڤێ من ڤی زاڕۆكی قەبیل بكەت، ئەوی ئەز قەبیل كرم و یێ من قەبیل بكەت، ئەوی ئەو قەبیل كر یێ ئەز هنارتیم. هەر كەسێ د ناڤ هەوە هەمیان دا یێ هەری بچویك بیت، ئەوە یێ مەزن.»
یێ دژی هەوە نەبیت، ل گەل هەوەیە 
49
پاشی یوحەننای گۆت: «مامۆستا، مە كەسەك دیت ب ناڤێ تە ئەجنە دەردئێخستن، لێ مە نەهێلا وی كاری بكەت، چنكو ئەو ل گەل مە ب دویڤ تە ناكەڤیت.»
50
ئینا عیسای گۆتێ: «رێكێ لێ نەگرن، چنكو ئەوێ دژی هەوە نەبیت، د گەل هەوە دایە.»
گوندەكێ سامەریان عیسای رەت دكەت 
51
دەمێ رۆژێن بلندبوونا وی نێزیك بووین، بڕیار دا بچیتە ئورشەلیمێ.
52
وی هندەك هنارتی ل پێشیا خۆ هنارتن، چوونە گوندەكی ژ گوندێن سامەریان، داكو خانیەكی بۆ وی ل وی گوندی ئامادە بكەن.
53
لێ رازی نەبوون پێشوازیا وی بكەن، چنكو ئەو بەرەڤ ئورشەلیمێ ڤە دچوو.
54
دەمێ هەردوو شاگردێن وی یەعقوب و یوحەننای ئەڤ تشتە دیتی، گۆتن: «خودان، تە دڤێت ژ خودێ بخوازین ئاگر ژ ئەسمانان بهێتە خوارێ و وان ب ئێكجاری بسوژیت؟»
55
ئینا عیسا ل وان زڤڕی و ئەو پاشڤە برن،
56
پاشی چوونە گوندەكێ دی.
مەرجێن دویڤكەفتنا عیسای 
57
دەمێ د رێكێ دا دچوون، ئێكی دگۆتێ: «تۆ كیڤە بچی، دێ ل دویڤ تە هێم.»
58
ئینا عیسای گۆتێ: «رویڤیان كون رویڤیێن هەین و باڵندەیێن ئەسمانی هێلینێن هەین، لێ كوڕێ مرۆڤ چ جهـ نینن سەرێ خۆ دانیتێ.»
59
گۆتە ئێكێ دی: «ل دویڤ من وەرە.» لێ وی مرۆڤی گۆت: «خودان، دەستویریا من بدە، دا ئەز ل پێشیێ بچم بابێ خۆ ڤەشێرم.»
60
عیسای گۆتێ: «بهێلە مری مریێن خۆ ڤەشێرن. لێ تۆ هەڕە مزگینیا پاشایەتیا خودێ بدە.»
61
ئێكێ دی گۆتێ: «خودان، ئەز دێ ب دویڤ تە كەڤم، لێ تۆ دەستویریا من بدە، ئەز ل پێشیێ خاترا خۆ ژ مالا خۆ بخوازم.»
62
عیسای گۆتێ: «كەس نینە دەستێ خۆ دانیتە سەر هنجاڕی و بەرێ خۆ بدەتە پشت خۆ و ب كێر پاشایەتیا خودێ بهێت.»
  1. a. 9‏:23 ئینكار
  2. b. 9‏:25 ئانكو: خۆ ژ ژیانێ خۆسارەت كر
  3. c. 9‏:31 ئانكو مرنا وی