عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
نموونەیا بریكارێ دەستپیس 
1
عیسای گۆتە شاگردێن خۆ: «مرۆڤەكێ دەولەمەند بریكارەك هەبوو، بۆ وی هاتە گۆتن كو بریكار مالێ وی پویچ دكەت.
2
ئینا گازی بریكاری كر و پرسیار ژێ كر: ‹ئەڤە چیە من دەربارەی تە گوهـ لێ دبیت؟ كا تۆ ژمێریاریا بریكاریا خۆ بدە من. چنكو ئێدی تۆ نەشێی بریكار بی.›
3
ئینا بریكاری گۆتە خۆ: ‹ئەز چ بكەم؟ چنكو خودانێ من دێ بریكاریێ ژ من ستینیت. من هێز نینە كۆلانێ بكەم و شەرم دكەم خوازۆكیێ بكەم.
4
ئەڤە من زانی دێ چ كەم، داكو دەمێ ژ بریكاریێ دهێمە دەرئێخستن، من د مالێن خۆ دا وەربگرن.›
5
ئینا ئێك ئێكە گازی قەردارێن خودانێ خۆ كرن و پرسیار ژ یێ ئێكێ كر: ‹چەند قەرێ خودانێ من ل سەر تەیە؟›
6
بەرسڤ دا و گۆت: ‹سەد جڕنیێن[a] زەیتا زەیتوونان.› ئینا گۆتێ: ‹پسۆلەیا خۆ بگرە و ب لەز روینە و بنڤیسە پێنجی.›
7
پاشی گۆتە یێ دی: ‹و چەند ل سەر تەیە؟› بەرسڤ دا و گۆت: ‹سەد كوارێن[b] گەنمی.› گۆتێ: ‹پسۆلەیا خۆ بگرە و بنڤیسە هەشتێ.›
8
ئەڤجا خودانێ وی پەسنا[c] بریكارێ خۆ یێ دەستپیس كر، ژ بەر كو ب ژیری رەفتار كر. چنكو كوڕێن ڤی سەردەمی ل گەل نفشێ خۆ ژ كوڕێن رۆناهیێ[d] ژیرترن.
9
ئەز دبێژمە هەوە: ب مالێ دونیایێ بۆ خۆ هەڤالان پەیدا بكەن، داكو دەمێ مالێ هەوە نەما، هوین ل مالێن هەتا هەتایێ بهێنە وەرگرتن.
10
یێ ل سەر پیچەكێ دەستپاك بیت، دێ ل سەر گەلەكێ ژی یێ دەستپاك بیت و یێ ل سەر پیچەكێ دەستپاك نەبیت، ل سەر گەلەكێ ژی یێ دەستپاك نابیت.
11
ئەڤجا ئەگەر هوین ل سەر مالێ دونیایێ د دەستپاك نەبن، ئەو كیە دێ هەوە ل سەر دەولەمەندیا راستەقینە دانیت؟
12
ئەگەر هوین ل سەر مالێ ئێكێ دی د دەستپاك نەبن، یێ هەوە كی دێ دەتە هەوە؟
13
چ خزمەتكار نەشێن خزمەتا دوو خودانان بكەن، چنكو یان دێ كەرب ژ ئێكی ڤەبن و حەز ژ یێ دی كەت، یان ژی دێ گەهیتە ئێك ژ وان و یێ دی پشت گوهـ ڤە هاڤێت. هوین نەشێن خزمەتا خودێ و پارەی بكەن.»
دەستوور و پاشایەتیا خودێ 
14
فەریسیان ژی ئەوێن حەز ژ پارەی دكر، گوهـ ل ڤێ چەندێ هەمیێ بوو و تڕانەیێن خۆ پێ كرن.
15
ئەوی گۆتە وان: «هوین خۆ ل بەر چاڤێن خەلكی راستدار دەردئێخن، لێ خودێ یا د دلێ هەوە دا دزانیت. ئەو تشتێ د ناڤ مرۆڤان دا یێ دلخواز بیت، ئەو ل نك خودێ یێ دلڕەشە.
16
دەستوور و رێنمایێن پێغەمبەران تاكو دەمێ یوحەننای دهاتنە راگەهاندن. ژ هنگی وەرە مزگینیا پاشایەتیا خودێ یا دهێتە راگەهاندن و هەر كەسەك ب زۆری یێ خۆ دكەتە د ناڤ دا.
17
لێ ژناڤچوونا ئەرد و ئەسمانی ب ساناهیترە ژ كەفتنا خالەكا دەستووری.
18
هەر كەسێ ژنا خۆ بەردەت و ئێكا دی بینیت، دەهمەنپیسیێ دكەت و هەر كەسێ ژنەكا بەردای بینیت، ئەو دەهمەنپیسیێ دكەت.
دەولەمەند و لەعازەر 
19
مرۆڤەكێ دەولەمەند هەبوو، جلكێن بنەفشی و كتانی دكرنە بەر خۆ و هەمی رۆژان د خۆشیەكا مەزن دا دژیا.
20
مرۆڤەكێ بەلەنگاز ژی هەبوو دگۆتنێ لەعازەر، ل بەر دەرگەهێ وی دەولەمەندی كەفتبوو و كولكان لەشێ وی گرتبوو.
21
دلێ وی نەساخی دچوویێ ژ بەرمایكێن مێزا دەولەمەندی تێر ببیت، سە ژی دهاتن و كولكێن وی دئالیستن.
22
وەسا چێبوو ئەو بەلەنگاز مر و فریشتەیان هەلگرت و كرە د هەمبێزا ئیبراهیمی دا، پاشی ئەوێ دەولەمەند ژی مر و هاتە ڤەشارتن.
23
دەمێ د وارێ مریان[e] دا دهاتە ئەشكەنجەدان، سەرێ خۆ راكر، ژ دویر ڤە چاڤێن وی ب ئیبراهیمی كەفتن و لەعازەر یێ د هەمبێزا وی دا.
24
ئینا گازی كر و گۆت: ‹بابێ من ئیبراهیم، دلۆڤانیێ ب من ببە و لەعازەری بهنێرە نك من، داكو تبلا خۆ ب ئاڤێ تەڕ بكەت و ئەزمانێ من پێ سار بكەت، چنكو ئەز د ڤێ گوڕیا ئاگری دا یێ ئازاران دكێشم.›
25
لێ ئیبراهیمی گۆت: ‹كوڕێ من، بینە بیرا خۆ كو تە خۆشیێن خۆ د ژیانا خۆ دا وەرگرتن و لەعازەری ژی نەخۆشی كێشان، لێ ڤێ گاڤێ ئەو ل ڤێرێ یێ دهێتە دلخۆش كرن و تۆ یێ ئازاران دكێشی.
26
سەرەڕای ڤێ هەمیێ، نهالەكا گەلەك مەزن د ناڤبەرا مە و هەوە دا یا هاتیە دانان، تاكو ئەوێن بڤێن ژ ڤێرێ بچن و دەربازی لایێ هەوە ببن، ئەو نەشێن، هەروەسا ئەوێن ل لایێ هەوە ژی نەشێن دەربازی لایێ مە ببن.›
27
ئینا گۆت: ‹ئەڤجا بابۆ، ئەز هیڤیان ژ تە دكەم تۆ وی بهنێرییە مالا بابێ من،
28
چنكو من پێنج برایێن هەین، بلا وان ئاگەهدار بكەت، دا ئەو ژی نەهێنە ڤی جهێ ئەشكەنجەدانێ.›
29
لێ ئیبراهیمی گۆتێ: ‹وان مووسا و پێغەمبەرێن هەین، بلا گوهێ خۆ بدەنە وان.›
30
ئینا وی گۆت: ‹نە، بابێ من ئیبراهیم، ئەگەر ئێك ژ ناڤ مریان رابیت و بچیتە نك وان، دێ ل خۆ زڤڕن.›
31
ئیبراهیمی گۆتێ: ‹ئەگەر ئەو گوهێ خۆ نەدەنە مووسای و پێغەمبەران، خۆ ئەگەر ئێك ژ ناڤ مریان ژی رابیت، ئەو باوەر ناكەن.›»
  1. a. 16‏:6 هەر جڕنیەك نێزیكی 35 لیترایە.
  2. b. 16‏:7 هەر كوارەك نێزیكی 390 لیترایە.
  3. c. 16‏:8 q پەسن: مەدح و سەنا
  4. d. 16‏:8 q كوڕێن رۆناهیێ: مەبەست پێ باوەردارن.
  5. e. 16‏:23 ل فەرهەنگۆكێ بنێڕە.