عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
پەترۆس خوازۆكەكێ فاڵنجی ساخ دكەت 
1
رۆژەكێ پەترۆس و یوحەننا ل دەمژمێر سێیێ پشتی نیڤرۆ ل دەمێ نڤێژێ سەردكەفتنە پەرستگەهێ.
2
ل دەرگەهێ پەرستگەهێ یێ كو دگۆتنێ «دەرگەهێ جوان»، زەڵامەك هەبوو هەر ژ زكماكی یێ فاڵنجی بوو، هەر رۆژ دهاتە هەلگرتن و ل وێرێ ددانا، دا خێران ژ ئەوێن دهێنە پەرستگەهێ بخوازیت.
3
دەمێ دیتی پەترۆس و یوحەننای ل بەرە ب ژۆر بكەڤن، خێر ژ وان خواست.
4
پەترۆسی و یوحەننای ب هویری بەرێ خۆ دایێ و پەترۆسی گۆتێ: «بەرێ خۆ بدە مە.»
5
چاڤێ وی زل ما ل وان و ل هیڤیێ بوو، كو خێرەكێ ل گەل بكەن.
6
ئینا پەترۆسی گۆت: «نە من زیڤ هەیە و نە زێڕ، لێ ئەز دێ وی دەمە تە یێ من هەی: ب ناڤێ عیسایێ مەسیحێ ناسیرەیی رابە و بڕێڤە هەڕە.»
7
ب دەستێ راستێ گرت و راوەستاند و د جهـ دا هێز كەفتە پێ و گۆزەكێن وی،
8
خۆ هەڵاڤێت و راوەستیا و دەست ب بڕێڤەچوونێ كر و ل گەل وان چوو پەرستگەهێ و د ناڤ دا دگەڕیا، خۆ دهەڵاڤێت و پەسنا[a] خودێ دكر.
9
هەمیێن ئامادە دیت ئەو یێ بڕێڤە دچیت و پەسنا خودێ دكەت،
10
نیاسی كو ئەو خوازۆكە یێ ل بەر «دەرگەهێ جوان» یێ پەرستگەهێ دروینشت، ژ بەر ڤێ رویدانێ حێبەتی و مەندەهۆش بوون.
گۆتارا پەترۆسی د پەرستگەهێ دا 
11
دەمێ ئەوێ بەری نوكە فاڵنجی د ناڤ ئەیوانا پەرستگەهێ دا، ئەوا ب «ئەیوانا سلێمان» ناڤدار، پەترۆس و یوحەننا بەرنەددان، گەلەك ژ خەلكی ب لەز و حێبەتی ل دەوروبەرێن وان خڕڤە بوون.
12
دەمێ پەترۆسی ئەڤ چەندە دیتی، گۆتە وان: «گەلی ئیسرائیلیان، بۆچی هوین ب ڤێ چەندا رویدای حێبەتی دبن؟ و بۆچی هوین وەسا بەرێ خۆ ددەنە مە، هەروەكو مە ب شیان و خودێترسیا خۆ وە كربیت، كو ئەڤ زەڵامە بڕێڤە بچیت؟
13
خودایێ ئیبراهیمی و خودایێ ئیسحاقی و خودایێ یەعقوبی، خودایێ بابكالێن مە، خزمەتكارێ خۆ[b] عیسا پایەبەرز كر، یێ كو هەوە دایە دەستێ پیلاتۆسی و ماندەل[c] كری، دەمێ وی دڤیا عیسای ئازاد بكەت.
14
هەوە یێ راست و پیرۆز ماندەل كر و داخواز كر مێركوژەك بۆ هەوە بهێتە ئازادكرن.
15
هەوە ژیاندەر كوشت، لێ خودێ ژ ناڤ مریان راكر. ئەم ل سەر ڤێ چەندێ شاهدین.
16
ژ ئەگەرێ باوەریێ ب ناڤێ وی، ئەڤ كەسێ هوین دبینن و دنیاسن ب هێز كەفت. ناڤێ عیسای ئەو بهێز ئێخست. باوەری ئینانێ ب وی ئەڤ ساخلەمیە ل بەر چاڤێن هەوە هەمیان دایێ.
17
گەلی برا، ئەز دزانم هەوە و سەرۆكێن هەوە ب نەزانین ئەڤ كریارە ل گەل عیسای كر،
18
لێ خودێ ئەو چەندا پێشوەخت ل سەر دەڤێ هەمی پێغەمبەرێن خۆ راگەهاندی ب جهـ ئینا، كو مەسیح دێ ئازارێ كێشیت.
19
ئەڤجا ل خۆ بزڤڕن و بۆ خودێ ڤەگەڕنەڤە دا ل گونەهێن هەوە بهێتە بورین،
20
دا دەمێن ڤەگەشبوونێ ژ دەڤ خودانی بهێن و مەسیحی بۆ هەوە بهنێریت، ئەوێ ژ بەرێ وەرە بۆ هەوە هاتیە دانان، كو عیسایە.
21
فەرە ئەو ل ئەسمانان بهێتە وەرگرتن، تا دەمێ نویكرنا هەمی تشتان، هەروەكو خودێ ب رێیا پێغەمبەرێن خۆ یێن پیرۆز ژ كەڤن دا گۆتی.
22
مووسای گۆت: ‹خودان خودایێ هەوە، دێ ژ ناڤ برایێن هەوە پێغەمبەرەكێ وەكو من هنێریت. ب هەمی تشتێن دبێژیتە هەوە، گوهداریا وی بكەن.
23
ئەو كەسێ گوهداریا وی نەكەت، دێ ژ ناڤ مللەتی هێتە ڤەقەتاندن و ژناڤبرن.›[d]
24
هۆسا هەمی پێغەمبەران ژ ساموئێلی بگرە تا وان كەسێن ل دویڤ وی هاتین ل سەر ڤان رۆژان پێشبینی كرن.
25
هوین كوڕێن پێغەمبەران و وێ پەیمانێنە، ئەوا خودێ ل گەل بابكالێن مە گرێ دای دەمێ گۆتیە ئیبراهیمی: ‹ب دویندەها[e] تە، هەمی مللەتێن ئەردی دێ هێنە بەرەكەتدار كرن.›
26
خودێ خزمەتكارێ خۆ ژ ناڤ مریان راكر و ل بەراهیێ بۆ هەوە هنارت، داكو هەر ئێك ژ هەوە ژ كارێن وی یێن نەباش ڤەگەڕینیت و هۆسا هەوە بەرەكەتدار بكەت.»
  1. a. 3‏:8 مەدح و سەنا
  2. b. 3‏:13 د پەیمانا كەڤن دا، «خزمەتكارێ خودانی» ناڤونیشانەكە بۆ مەسیحی. بنێڕە: ئیشایا 42‏:1؛ 52‏:13
  3. c. 3‏:13 ئینكار
  4. d. 3‏:23 گۆتارا مووسای 18‏:15‏، 19
  5. e. 3‏:25 نەسل یان زوڕیەت