عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
گیانێ پیرۆز ب سەر هنارتیان دا دهێت 
1
دەمێ رۆژا پێنجیێ[a] هاتی، ئەو هەمی پێكڤە ل جهەكی بوون.
2
ژ نشكەكێ ڤە دەنگەك ژ ئەسمانان هات هەروەكو دەنگێ هڕوبایەكی و ئەو مالا لێ روینشتین ژ دەنگێ هڕوبای تژی بوو.
3
ئەڤجا بۆ وان ئەزمان وەكو گوڕیا ئاگری دیار بوون و ل سەر هەر ئێك ژ وان بەڵاڤ بوون،
4
هەمی ژ گیانێ پیرۆز پڕ بوون و ب زمانێن دی دەست ب ئاخفتنێ كرن، هەروەكو گیانێ پیرۆز شیان دایە وان.
5
ل وی دەمی جوهیێن ژ خودێ ترس، یێن ژ هەمی وەڵاتێن جیهانێ هاتین، ل ئورشەلیمێ بوون.
6
دەمێ ئەو دەنگ هاتی، خەلك ل وان خڕڤە بوون و مەندەهۆش بوون، چنكو هەر كەسەكی ژ وان گوهـ لێ دبوو كو ئەو یێ ب زمانێ وی دئاخڤن،
7
حێبەتی بوون و گۆتن: «ئەرێ ئەڤێن دئاخڤن نە خەلكێ جەلیلن؟
8
پا چەوا هەر ئێك ژ مە، ب زمانێ وی باژێڕێ لێ پەیدا بووی، دبهیسیت؟
9
هندەك ژ مە ئەشكانینە، میدینە، ئیلامینە، هندەك ژ ئاكنجیێن مێزۆپۆتامیا، دەڤەرا یەهودیایێ، هەرێمێن كەپەدۆكیا، پۆنتۆس، ئاسیا[b] ،
10
فریگیا و پامفیلیا، مسرێ و دەڤەرێن لیبیا ئەوێن نێزیكی قەیرەوانێ و گەلەك مێڤانێن رۆمایی یێن د ناڤ مە دا،
11
جوهی و ئەوێن بووینە جوهی، هەروەسا كریتی و عەرەب ژی. ئەم دبهیسین ئەڤە یێ ب زمانێن مە، ل سەر كارێن مەزن یێن خودێ، دئاخڤن.»
12
هەمی حێبەتی بوون و هزرێن وان ئالۆز بوون و پرسیار ژ ئێكودوو كرن: «رامانا ڤێ چەندێ چیە؟»
13
لێ هندەكان ب سڤكاتی ڤە گۆتن: «ئەو دسەرخۆشن!»
گۆتارا پەترۆسی 
14
پەترۆس ل گەل هەر یازدە هنارتیان راوەستیا و ب دەنگەكێ بلند گۆت: «گەلی جوهیان و هەمی ئاكنجیێن ئورشەلیمێ، گوهـ بدەنە ئاخفتنا من، دا ئەز بۆ هەوە ڤێ چەندێ روهن بكەم.
15
ئەڤە نە دسەرخۆشن هەروەكو هوین هزر دكەن، چنكو هێشتا دەمژمێر نەهێ سپێدێیە.
16
لێ ئەڤەیە ئەوا ل سەر زارێ یۆئێل پێغەمبەری هاتیە گۆتن:
17
‹خودێ دبێژیت ئەز د ڤان رۆژێن دویماهیێ دا،
دێ ژ گیانێ خۆ داڕێژمە سەر هەمی مرۆڤان
و كچ و كوڕێن هەوە دێ پەیامان گەهینن
و گەنجێن هەوە دێ بینینان بینن و پیرێن هەوە دێ خەونان بینن.
18
خۆ ل سەر بەنیێن خۆ ژی ژ ژن و زەڵامان،
ل وان رۆژان ئەز دێ گیانێ خۆ داڕێژم
و دێ پەیامێ گەهینن.
19
ئەز دێ ل ژۆری، ل ئەسمانی، مەندەهۆشیان دیار كەم
و ل ژێری، ل ئەردی، نیشانان،
خوین و ئاگر و دویكێلەكا زۆر پەیدا كەم.
20
بەری رۆژا گراڤی و بەركەفتی یا خودانی بهێت،
رۆژ دێ تاری بیت
و هەیڤ ژی وەكو خوینێ دێ سۆر بیت
21
و هەر كەسەكێ هەوارا خۆ بگەهینیتە ناڤێ خودانی، دێ قورتال بیت.›[c]
22
گەلی ئیسرائیلیان، گوهێ خۆ بدەنە ڤێ ئاخفتنێ: عیسایێ ناسیرەیی مرۆڤەكە ژ لایێ خودێ ڤە بۆ هەوە هاتیە پەسەندكرن. هەروەكو هوین دزانن، خودێ ل سەر دەستێ وی گەلەك حنێر و مەندەهۆشی و نیشان د ناڤ هەوە دا یێن كرین.
23
ئەو، ل دویڤ نەخشەیێ ڤەبڕ و زانینا پێشوەخت یا خودێ، رادەستی هەوە هاتە كرن و هەوە ب دەستێن خودێنەنیاسان خاچ دا و كوشت،
24
لێ خودێ ژ مرنێ راكرەڤە و ژ ئێشانێن مرنێ ئازاد كر، چنكو مرن نەشیا وی دەستەسەر بكەت.
25
داوود دەربارەی وی دبێژیت:
‹من هەردەم ل بەرامبەری خۆ خودان ددیت،
چنكو ئەو ل رەخێ منێ راستێیە، داكو ژ جهـ نەلقیێم.
26
ژ بەر وێ چەندێ دلێ من پڕ خۆش بوو
و ئەزمانێ من گەلەك شاد بوو
و دێ لەشێ من د هیڤیان دا ژیت.
27
چنكو تۆ دەروونێ من ناهێلییە د ناڤ وارێ مریان[d] دا
و تۆ ناهێلی پیرۆزێ تە تووشی رزیبوونێ ببیت.
28
تە رێكێن ژیانێ بۆ من دانە نیاسین
و دێ ب دیدارا خۆ من پڕ شادی كەی.›[e]
29
گەلی برا، دێ ب ئاشكرایی بێژمە هەوە، كو بابێ مە داوود یێ مری و یێ هاتیە ڤەشارتن و گۆڕێ وی تا ئەڤرۆ یێ مایە ل نك مە.
30
ئەڤجا، ژ بەر كو داوود پێغەمبەر بوو، دزانی خودێ سویند یا بۆ خواری، كو ئێك دێ ژ بنەمالا وی هێت و دێ ل سەر تەختێ وی روینیت.[f]
31
ئەوی پێشوەخت دیت و ل سەر رابوونا مەسیحی ئاخفت و گۆتبوو ئەو د وارێ مریان دا نەهاتە هێلان و لەشێ وی تووشی رزیبوونێ نەبوو.
32
خودێ ئەڤ عیسایە ژ مرنێ ساخ كرەڤە و ئەم هەمی بۆ وێ راستیێ شاهدین.
33
ئەڤجا عیسا بۆ دەستێ راستێ یێ خودێ هاتە بلندكرن و سۆزا گیانێ پیرۆز ژ بابی وەرگرت و ئەو سۆزا دایێ ئەڤا نوكە هوین دبینن و دبهیسن، ئەوا ب سەر مە دا رشتی.
34
داوود نە بلند ببوو ئەسمانان و ئەو ب خۆ دبێژیت:
‹خودانی گۆتە خودانێ من:
ل دەستێ منێ راستێ روینە،
35
تاكو ئەز دوژمنێن تە بكەمە تەختەپێ بۆ پێیێن تە.[g]
36
بلا هەمی خەلكێ ئیسرائیلێ پشتڕاست بزانن، كو عیسا ئەوێ هەوە ب خاچێ ڤە هەلاویستی، خودێ یێ كریە خودان و مەسیح ژی!»
37
دەمێ ئامادەبوویان گوهـ ل ڤێ ئاخفتنێ بووی، هەروەكو تیرەك ب دلێ وان كەفتی و پرسیار ژ پەترۆس و هنارتیێن دی كرن و گۆتن: «گەلی برا، ئەم چ بكەین؟»
38
پەترۆسی بەرسڤا وان دا و گۆت: «ل خۆ بزڤڕن و بلا هەر كەسەك ژ هەوە بۆ لێبورینا گونەهان ب ناڤێ عیسایێ مەسیح بهێتە تافیركرن و دێ دیاریا گیانێ پیرۆز وەرگریت،
39
چنكو سۆز بۆ هەوە و زاڕۆكێن هەوەیە و بۆ وان هەمی كەسێن دویرە، ئەوێن خودان خودایێ مە دێ گازی كەتێ.»
40
پەترۆسی گەلەك شیرەتێن دی بۆ ئامادەبوویان گۆتن: «خۆ ژ ڤی نفشێ ڤاڕێ قورتال بكەن!»
41
ئەو كەسێن ئاخفتنا وی ب دلەكێ فرەهـ وەرگرتی، هاتنە تافیركرن و ل وێ رۆژێ نێزیكی سێ هزار مرۆڤ گەهشتنە جڤاتا وان.
42
ئەوان خۆ بۆ گوهداریا وانەیێن هنارتیان، ژیانا هەڤپشكیێ، كەركرنا نانی و نڤێژان تەرخان دكر.
هەڤپشكیا باوەرداران 
43
گەلەك مەندەهۆشی و نیشان ل سەر دەستێ هنارتیان هاتنە كرن و ترس كەفتە د ناڤ دلێ هەمی مرۆڤان دا،
44
هەمی باوەردار د ئێكگرتی بوون و ئەو د هەمی تشتێ وان هەیی دا د هەڤپشك بوون.
45
مال و ملكێن خۆ دفرۆتن و بهایێ وان ل دویڤ پێدڤی یا هەر ئێكی ل سەر خۆ لێكڤەدكر.
46
ئەو هەر رۆژ ب ئێك دل ل سەر كۆمبوونێ د پەرستگەهێ ڤە د بەردەوام بوون و د مالان دا نان كەر دكر و ب شادی و دلساخی خوارن پێكڤە دخوار.
47
پەسنا[h] خودێ دكرن و جهێ رەزامەندیا هەمیان بوون و خودانی رۆژانە ئەوێن قورتال دبوون زێدە دكرن.
  1. a. 2‏:1 جەژنەكا جوهیانە. ل فەرهەنگۆكێ بنێڕە: \k رۆژا پێنجیێ\k*.
  2. b. 2‏:9 q ئاسیا مەبەست پێ ئاسیایا بچویكە كو دكەڤیتە رۆژئاڤایێ ئەنادۆلێ.
  3. c. 2‏:21 یۆئێل 2‏:28‏-32
  4. d. 2‏:27 ل فەرهەنگۆكێ بنێڕە
  5. e. 2‏:28 زەبوور 16‏:8‏-11
  6. f. 2‏:30 2 ساموئێل 7‏:12‏-13؛ زەبوور 132‏:11
  7. g. 2‏:35 زەبوور 110‏:1؛ تەختەپێ: ئەو تەختەدارە یێ مرۆڤ بۆ خۆشكرنا جهێ پێیان ددانیتە بن پێیێن خۆ.
  8. h. 2‏:47 مەدح و سەنا