عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
پاولۆسی ب گەمیێ بەرەڤ رۆمایێ دبەن 
1
دەمێ بڕیار هاتیە دان كو ئەم ب گەمیێ بچینە ئیتالیا، پاولۆس و هندەك گرتیێن دی رادەستی سەرلەشكەرەكێ سوپایێ ئیمپراتۆری كرن، ناڤێ وی یولیۆس بوو.
2
ئەم ل گەمیەكێ ژ باژێڕێ ئەدرەمیتێ سیار بووین، كو ل بەر بوو بچیتە هندەك جهان ل كنارێن هەرێما ئاسیایێ، ئەم ب رێ كەفتین و ئەرستارخۆس ژ باژێڕێ سالونیكی ژ هەرێما مەقدۆنیا ل گەل مە هات.
3
ل رۆژا پاشتر ئەم گەهشتینە سایدا. یولیۆسی رەفتارەكا باش ل گەل پاولۆسی كر و دەستویری دایێ كو سەرەدانا هەڤالێن خۆ بكەت، دا پێدڤیێن خۆ ژ وان وەرگریت.
4
پاشی ئەم ژ وێرێ ب گەمیێ ب رێ كەفتین و د پشت[a] قوبرس را چووین، چنكو با دژی مە دهات.
5
دەمێ ئەم د نیڤا وێ دەریایا بەرامبەری هەرێمێن كیلیكیا و پامفیلیایێ را دەربازبووین، ئەم ل بەندەرێ میرا ل هەرێما لیكیایێ پەیا بووین.
6
ل وێرێ سەرلەشكەری گەمیەك دیت یا باژێڕێ ئەسكەندەریێ بوو بەرەڤ ئیتالیا دچوو، ئەم لێ سیار كرین.
7
گەمیێ ئەم هێدی هێدی ب گەلەك رۆژان برین و ب زۆری ئەم گەهشتینە نێزیكی كنیدۆسێ. بای نەهێلا ئەم پتر بچین، لەوما ئەم د پشت گزیرتەیا كریت را ل نێزیكی سەلمۆنی دەرباز بووین.
8
ب زۆری ئەم گەهشتینە جهەكی دبێژنێ «بەندەرێن جوان» كو ل نێزیكی باژێڕێ لاسەیایێ بوو.
9
دەمەكێ درێژ ب سەرڤە چووبوو و وەغەركرن ب رێكا دەریایێ ب مەترسی كەفتبوو، ئێدی رۆژیگرتن[b] ژی دەرباز ببوو، لەوما پاولۆسی شیرەت ل وان كر
10
و گۆت: «گەلی زەڵامان، ئەز دبینم ئەڤ وەغەرە دێ یا ب زەحمەت و زیانەكا مەزن بیت، نە ب تنێ ل سەر باری و گەمیێ، لێ ل سەر ژیانا مە ب خۆ ژی،»
11
لێ سەرلەشكەری پتر گوهداریا سەرۆكێ گەمیڤانان و خودانێ گەمیێ دكر ژ گۆتنا پاولۆسی.
12
بەندەر ب كێر دەربازكرنا وەرزێ زڤستانێ نەدهات، لەوما پڕانیا وان بڕیار دا ژ وێرێ بچن، ب وێ هیڤیێ كو ئەو بشێن خۆ بگەهیننە فینكس و زڤستانێ ل وێرێ ببورینن، كو ئەو بەندەرەكە ل كریت، بەرێ وێ یێ ل باشوورێ رۆژئاڤا و باكوورێ رۆژئاڤا.
باڕۆڤە 
13
دەمێ بایەكێ هێدی ژ باشووری ڤە هاتی، وان هزركر ئەو گەهشتنە مەبەستا خۆ، ئینا لەنگەر[c] راكر و ژ نێزیك ڤە د بەر كریت را دەرباز دبوون،
14
لێ پشتی دەمەكێ كورت، هڕوبایەكێ دژوار هات، دبێژنێ ‹ئوراكیلون›[d]
15
وی ل گەمیێ دا و ئێدی گەمی نەشیا روی ب روی بای بچیت، ئەڤجا مە دەست ژێ بەردان و باڕۆڤەیێ ئەم برین.
16
دەمێ ئەم د پشت گزیرتەیەكا بچویك را دەرباز دبووین، ناڤێ وێ كاودا بوو، ب زۆری مە شیا دەستێ خۆ دانینە سەر بەلەمێ.
17
پشتی ئەو بلند كریە د گەمیێ دا، گەمیڤانان نیڤا گەمیێ ب وەریسان شداند. ئەو دترسیان ل ‹سیرتس›[e] بنێ گەمیێ ژ ئەردی بگریت، لەوما وان باگرێن گەمیێ ئینانە خوار و هۆسا گەمی دهاتە هاژوتن.
18
ژ بەر دژواریا باڕۆڤەیێ ل سەر مە، وان ل رۆژا پاشتر دەست ب هاڤێتنا بارێ گەمیێ كر.
19
ل رۆژا سێیێ وان ب دەستێن خۆ كەلوپەلێن گەمیێ هاڤێتن.
20
گەلەك رۆژان مە رۆژ و ستێر نەدیتن و باڕۆڤە ل سەر مە هەر یا دژوار بوو، ئێدی هەمی هیڤیێن قورتالبوونا مە هاتنە بڕین.
21
دەمەكێ درێژ بوو وان خوارن نە خواری، ئینا پاولۆس د ناڤ وان دا رابوو و گۆت: «گەلی زەڵامان، پێدڤی بوو هەوە گوهێ خۆ دابا من و ژ كریت نەدابا رێ، هوین دا خۆ ژ ڤێ زەحمەت و زیانێ پارێزن.
22
نوكە ئەز هیڤیێ ژ هەوە دكەم بێ ئومێد نەبن، چنكو كەس ژ هەوە ژیانا خۆ ژ دەست نادەت، ب تنێ گەمی دێ تێك شكێت،
23
چنكو شڤێدی فریشتەیەكێ وی خودایێ ئەز یێ ویمە و خزمەتا وی دكەم، ل نك من راوەستیا
24
و گۆت: ‹پاولۆس، نەترسە! دڤێت تۆ ل بەرامبەری قەیسەری راوەستی و ئەڤە ل سەر خاترا تە، خودێ دێ ژیانا هەمی رێڤنگێن ل گەل تە پارێزیت!›
25
ئەڤجا گەلی زەڵامان، د پشتڕاست بن، چنكو من باوەریا ب خودێ هەی، كو دێ وەسا چێبیت، هەروەكو بۆ من هاتیە گۆتن.
26
لێ دڤێت گەمی ب ئەردێ گزیرتەیەكێ بكەڤیت.»
27
ل شەڤا چواردێ، كو هێشتا ئەم د دەریا ئەدریاتیك دا دهاتینە هاژوتن، ل نیڤا شەڤێ گەمیڤانان هزر كر كو ئەو یێن نێزیكی هشكاتیێ بووین.
28
وان كویراتیا ئاڤێ پیڤا، دیت كو بیست بەژنە، پشتی پیچەكێ پێشڤە چووین، جارەكا دی پیڤا، دیت كو پازدە بەژنە.
29
ئەو دترسیان كو ئەم ب جهەكێ كەڤرین بكەڤین، لەوما چوار لەنگەر ژ پاشیا گەمیێ بەردان و نڤێژ دكر كو رۆژ ل وان بهەلێت.
30
لێ دەمێ گەمیڤانان بزاڤ كری ژ گەمیێ بڕەڤن و بەلەم داهێلایە دەریایێ، ب وێ بەهانەیێ كو وان دڤێت ژ پێشیا گەمیێ لەنگەران بەردەنە خوارێ،
31
پاولۆسی گۆتە سەرلەشكەری و سەربازان: «ئەگەر ئەڤ گەمیڤانە نەمیننە د گەمیێ دا، هوین نەشێن قورتال ببن.»
32
ئینا سەربازان وەریسێن بەلەمێ بڕین و هێلا بكەڤیتە د ئاڤێ دا.
33
بەری سپێدێ، پاولۆسی هیڤی ژ هەمیان كر كو تشتەكی بخۆن و گۆت: «ئەڤە رۆژا چواردێیە هوین د بن فشارێ ڤەنە و برسی ماینە و هەوە چ نەخوارییە.
34
ژ بەر هندێ هیڤی ژ هەوە دكەم، هوین تشتەكی بخۆن، چنكو ئەڤە بۆ قورتالبوونا هەوەیە و مویەك ژ سەرێ كەسێ ژ هەوە ناكەڤیت.»
35
پشتی وی ئەڤە گۆتی، نانەك هەلگرت و ل بەرامبەر هەمیان سوپاسیا خودێ كر، كەركر و دەست ب خوارنێ كر.
36
وی دەمی هەمی ب ئومێد كەفتن و وان ژی خوارن خوار.
37
ئەم هەمی ئەوێن د گەمیێ دا، دوو سەد و حەفتێ و شەش كەس بووین.
38
پشتی ژ خوارنێ تێر بووین، گەنم هاڤێتە د دەریایێ دا، دا گەمیێ سڤك بكەن.
تێكشكەستنا گەمیێ 
39
دەمێ بوویە سپێدە، ئەوان نەدزانی كا ئەو گەهشتینە كیژ ئەردی، لێ وان كەنداڤەك دیت، كنارێ وێ خیز بوو. ئینا بڕیار دا، ئەگەر بشێن، گەمیێ بهاژونە وێرێ.
40
وان لەنگەر قەتاندن و هێلانە د دەریایێ دا و وەریسێن ب دەستكێن ئاراستەكرنا گەمیێ ڤە سست كرن و باگرا پێشیێ ل بەر بای بلند كر و قەستا كناری كر.
41
لێ گەمی كەفتە د ناڤ پێلێن دژوار دا و بنێ وێ ب گرەكی كەفت كو یێ بن ئاڤ بوو، ئەڤجا پێشیا وێ تێڕا چكلی و د جهـ دا ما، لێ ژ بەر دژواریا پێلان پاشیا وێ تێك دشكەست.
42
نەخشەیێ سەربازان ئەو بوو كو گرتیان بكوژن، دا كەس مەلەڤانیا نەكەت و بڕەڤیت.
43
لێ سەرلەشكەری ڤیا پاولۆسی قورتال كەت، ئینا نەهێلا ئەو نەخشەیێ خۆ ب جهـ بینن و فەرمان داكو ئەوێن دشێن مەلەڤانیا بكەن، ل بەراهیێ خۆ بهاڤێژنە ئاڤێ و دەركەڤنە هشكاتیێ.
44
ئەوێن ماین ژی، ب دویڤ وان را، هندەك ل سەر دەپان و هندەك ل سەر پارچەیێن گەمیێ بچن. هۆسا هەمی ب سلامەتی گەهشتنە هشكاتیێ.
  1. a. 27‏:4 ئانكو ئەو لایێ با لێ نەدەت.
  2. b. 27‏:9 مەبەست پێ رۆژیگرتنا رۆژا كەفارەتێ* یا جوهیانە، كو دكەڤیتە دەستپێكا زڤستانێ.
  3. c. 27‏:13 q لەنگەر: ئاڵاڤێ راوەستاندنا گەمیێ یان بەلەمێیە.
  4. d. 27‏:14 پەیڤەكا یونانیە ئانكو بایێ باكوور و رۆژهەلاتی.
  5. e. 27‏:17 q سیرتس: بوڕەكە ل نێزیكی كنارێن لیبیا.