عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
دەربارەی نڤێژ و كۆمبوونێ 
1
ئەڤجا بەری هەمی تشتان، ئەز هیڤی دكەم كو داخوازی و نڤێژ و مەهدەری و سوپاسیكرن ژ پێخەمەت هەمی مرۆڤان بهێنە كرن،
2
بۆ پاشایان و هەمی دەستهەلاتداران ژی، دا ژیانەكا تەنا و ئارام، ب هەمی خودێترسی و رێز، بڕێڤە ببەین.
3
ئەڤ چەندە یا باشە و جهێ دلخۆشیێیە ل نك قورتالكەرێ مە خودێ.
4
ئەوی دڤێت هەمی مرۆڤ قورتال ببن و بگەهنە زانینا راستیێ.[a]
5
چنكو ئێك خودێ هەیە و ئێك ناڤگین د ناڤبەرا خودێ و مرۆڤان دا هەیە، ئەو ژی مەسیح عیسایێ مرۆڤە.
6
ئەوی خۆ وەكو نرخێ ئازادیا هەمی مرۆڤان بەخش كر. ئەڤەیە شاهدەییا د دەمێ وێ یێ گونجای دا هاتیە دان.
7
بۆ وێ شاهدەییێ ئەز یێ كریمە راگەهێنەرێ پەیامێ و هنارتی -راستیێ دبێژم و درەوان ناكەم- و مامۆستایێ مللەتان یێ باوەری و راستیێ.
8
ئەڤجا من دڤێت ل هەر جهەكێ هوین كۆم دبن، زەڵام نڤێژان بكەن. بلا دەستێن خۆ ب پیرۆزی بلند بكەن، بێی تۆڕەبوون و گەنگەشە.
9
هەروەسا من دڤێت ژن ب جلكێن بكێرهاتی، ب تۆرە و بەرئاقلی خۆ بخەملینن، نە ب ڤەهاندنا پرچا خۆ، یان زێڕ، یان مراری، یان ژی جلكێن بهاگران،[b]
10
لێ ب كریارێن باش، كو بكێر وان ژنان بهێن یێن ب ئاشكرایی دبێژن ئەم خودێترسین.
11
بلا ژن ب بێدەنگی و هەمی ملكەچی فێركرنێ وەربگرن.
12
ئەز دەستویریێ نادەم كو ژن فێركرنێ[c] بدەتە زەڵامی و ل سەر زاڵ ببیت، لێ بلا یا بێدەنگ بیت،
13
چنكو ل بەراهیێ ئادەم هاتە ئافراندن پاشی حەوا
14
و ئادەم نەهاتە خاپاندن، لێ ژن هاتە خاپاندن و سەرپێچی كر.[d]
15
لێ ب زاڕۆكئینانێ دێ قورتال بیت، ئەگەر ئەو ب خۆڕاگری د باوەری و حەزژێكرن و پیرۆزی دا بمینن.
  1. a. ‏2‏:4 حزقیێل ‏18‏:23
  2. b. ‏2‏:9 1 پەترۆس ‏3‏:3
  3. c. ‏2‏.12 مەبەست پێ فێركرن و دەستهەلاتا كەنیسەیێیە كو فەرە د دەستێ زەڵامان دا بیت.
  4. d. ‏2‏:13‏-14 دەستپێكرن ‏2‏:7؛ ‏2‏:21‏-22؛ ‏3‏:1‏-6