عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
مەرج بۆ چاڤدێرێن كەنیسەیان 
1
ئەڤ گۆتنە جهێ پشتڕاستیێیە: ئەگەر دلێ ئێكی ل سەر چاڤدێریێ بیت، ئەو حەز ژ كارەكێ باش دكەت.
2
ئەڤجا پێدڤیە چاڤدێر: یێ بێگازندە بیت، مێرێ ئێك ژن بیت، ل سەر خۆ یێ زاڵ بیت، خودان رەفتارەكا ئاقلانە بیت، یێ رێزدار بیت، یێ مێڤاندار بیت و بشێت فێركرنێ بكەت،
3
مەی ڤەخۆر نەبیت[a] و توند نەبیت، لێ یێ دلنەرم بیت، شەڕفرۆش نەبیت و حەزژێكەرێ پارەی نەبیت.
4
ب باشی رێڤەبەریا مالا خۆ بكەت و وە بكەت كو زاڕۆكێن وی ب هەمی رێزگرتن ملكەچی وی بن.
5
ما ئەگەر كەسەك نەزانیت رێڤەبەریا مالا خۆ بكەت، دێ چەوا چاڤێ خۆ دەتە كەنیسەیا خودێ؟
6
پێدڤیە ئەو باوەردارەكێ نوی نەبیت، دا دفنبلند نەبیت و نەكەڤیتە د دادكرنا ئبلیسی دا.
7
هەروەسا پێدڤیە ناڤودەنگەكێ باش د ناڤ یێن ژ دەرڤە[b] دا هەبیت، دا نەكەڤیتە شەرمزاریێ و خەفكا ئبلیسی.[c]
مەرج بۆ خزمەتكارێن كەنیسەیان 
8
هەروەسا پێدڤیە خزمەتكار ژی رێزدار بن، خودان ئێك ئاخفتن بن، گەلەك مەیێ ڤەنەخۆن، چاڤێ وان ل مفایێ حەرام نەبیت،
9
راستیا باوەریێ[d] ب وژدانەكا پاقژ بپارێزن.
10
بلا ئەو ل بەراهیێ بهێنە تاقیكرن، پاشی ئەگەر گازندە ل سەر نەبن، بلا وەكو خزمەتكار خزمەتێ بكەن.
11
هەروەسا ژن[e] ژی پێدڤیە بڕێز بن، بوهتانكار نەبن، ل سەر خۆ د زاڵ بن و د هەمی تشتان دا د دلسۆز بن.
12
پێدڤیە خزمەتكار مێرێ ئێك ژن بیت و ب باشی رێڤەبەریا زاڕۆكێن خۆ و مالا خۆ بكەت.
13
چنكو ئەوێن ب باشی خزمەتكاریێ دكەن، پلەیەكا باش و پشتڕاستیەكا مەزن د وێ باوەریێ دا ب دەست خۆ ڤە دئینن، ئەوا ب مەسیح عیسای.
رەفتاركرن د مالا خودێ دا 
14
ئەز هیڤیدارم ل دەمەكێ نێزیك بهێمە نك تە، لێ ئەز ڤان تشتان بۆ تە دنڤیسم،
15
دا ئەگەر ئەز گیرۆ ببم، تۆ بزانی كا پێدڤیە ئێك چەوا د مالا خودێ دا رەفتارێ بكەت. ئەو مال كەنیسەیا خودایێ زیندیە، ستوین و شەنگستەیێ راستیێیە.
16
بێگۆمان، نهێنیا خودێترسیێ [f] یا مەزنە:
ئەو ب لەشی دیار بوو[g] ،
ژ لایێ گیانێ پیرۆز ڤە راستدار هاتە دەرئێخستن،
ژ لایێ فریشتەیان ڤە هاتە دیتن،
مزگینیا وی د ناڤ مللەتان دا هاتە راگەهاندن،
د جیهانێ دا باوەری پێ هاتە ئینان
و د مەزناهیێ دا هاتە بلندكرن.
  1. a. 3‏:3 مەی ڤەخۆر نەبیت: مەبەست پێ ئەوە كو گەلەك مەیێ ڤەنەخۆت و سەرخۆش نەبیت. بنێڕە ئەفەسۆس 5‏:18
  2. b. 3‏:7 ئانكو یێن نەباوەردار
  3. c. 3‏:2‏-7 تیتۆس 1‏:6‏-9
  4. d. 3‏:9 دەقێ یونانی دبێژیت: ‹نهێنیا باوەریێ›، ئەو نهێنیە یا ب رێكا فێركرنا پاولۆسی هاتیە ئاشكراكرن. بنێڕە رۆما 16‏:25‏-26
  5. e. 3‏:11 ژنێن خزمەتكاران یان ژی ئەو ژن یێن د كەنیسەیان دا پلەیا خزمەتكاریێ هەی. بنێڕە: رۆما 16‏:1
  6. f. 3‏:16 مەبەست پێ ئەو نهێنی بوو یا ب رێكا فێركرنا پاولۆسی هاتیە ئاشكراكرن.
  7. g. 3‏:16 بنێڕە: یوحەننا 1‏:14