عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
په‌رتوکا پیرۆز
- ئبلیس عیسای تاقی دكەت
- 1
- عیسا ژ رویبارێ ئوردن ڤەگەڕیا، یێ پڕ ژ گیانێ پیرۆز. گیانی چل رۆژان رێڤەبەریا وی د چۆلی دا دكر
- 2
- و ژ لایێ ئبلیسی ڤە دهاتە تاقیكرن. ل وان رۆژان چ نەخوار، دەمێ هەر چل رۆژ ب دویماهی هاتین، برسی بوو.
- 3
- ئبلیسی گۆتێ: «ئەگەر تۆ كوڕێ خودێی، بێژە ڤی بەری ببە نان.»
- 4
- عیسای بەرسڤا وی دا و گۆتێ: «یا هاتیە نڤیسین: ‹مرۆڤ نە ب تنێ ب نانی دژیت.›[a] »
- 5
- پاشی ئبلیسی ئەو برە جهەكێ بلند و هەمی پاشایەتیێن جیهانێ د چركەیەكێ دا نیشا دان
- 6
- و گۆتێ: «ئەز دێ ڤێ هەمی دەستهەلاتێ و مەزناهیا وان دەمە تە، چنكو ئەڤ جیهانە بۆ من یا هاتیە دان و ئەز ژی دێ دەمە وی یێ من بڤێت،
- 7
- لەوما ئەگەر تۆ بۆ من سوجدێ ببەی، هەمی دێ بنە یێن تە.»
- 8
- عیسای بەرسڤا وی دا و گۆتێ: «یا هاتیە نڤیسین: ‹بۆ خودان خودایێ خۆ سوجدێ ببە و وی ب تنێ بپەرێسە.›[b] »
- 9
- پاشی ئبلیسی ئەو برە ئورشەلیمێ و ل سەر لێڤا بانێ پەرستگەهێ راوەستاند و گۆتێ: «ئەگەر تۆ كوڕێ خودێی، خۆ ژ ڤی بانی بهاڤێژە خوارێ،
- 10
- چنكو یا هاتیە نڤیسین: ‹ئەو دێ دەربارەی تە فەرمانێ ل فریشتەیێن خۆ كەت، كو تە بپارێزن›
- 11
- و ‹ئەو دێ تە ل سەر دەستێن خۆ هەلگرن، نەكو پێیێ تە ب بەرەكی بكەڤیت.›[c] »
- 12
- ئینا عیسای بەرسڤا وی دا و گۆتێ: «یا هاتیە گۆتن: ‹خودان خودایێ خۆ تاقی نەكە.›[d] »
- 13
- دەمێ ئبلیسی هەمی تاقیكرن ب دویماهی ئیناین، عیسا تا دەمەكی هێلا و چوو.
- عیسا ل جەلیلێ دەست ب كارێ خۆ دكەت
- 14
- عیسا ب هێزا گیانی[e] بەرەڤ دەڤەرا جەلیل ڤەگەڕیا و ناڤودەنگێن وی ل هەمی گوندێن دەوروبەران بەڵاڤ بوون.
- 15
- ئەوی ل كنیشتەیێن[f] وان فێركرن دكر و هەمیان پەسنا[g] وی دكر.
- باژێڕێ ناسیرە عیسای رەت دكەت
- 16
- پاشی هاتە باژێڕكێ ناسیرە، ئەوێ لێ مەزن بووی و ل دویڤ تیتالێن خۆ، ل رۆژا شەمبیێ چوو د كنیشتەیێ ڤە و رابوو ژ پێرڤە داكو بخوینیت.
- 17
- ئینا پەرتووكا ئیشایا پێغەمبەری داڤێ. دەمێ پەرتووك ڤەكری ئەو جهـ دیت، ئەوێ كو تێدا هاتبوو نڤیسین:
- 18
- «گیانێ خودانی ل سەر منە،
چنكو وی ئەز یێ ب زەیتكرنێ[h] دەستنیشان كریم
دا مزگینیێ بدەمە بەلەنگازان.
ئەز یێ هنارتیم دا ئازادیێ بۆ دیلكریان
و بینینێ بۆ كۆرەیان رابگەهینم،
دا ئازادیێ بدەمە بندەستان، - 19
- دا مزگینیا هاتنا ساڵا خودانی یا رەزامەندیێ رابگەهینم.»[i]
- 20
- پاشی پەرتووك پێچا[j] و داڤ خزمەتكاری و روینشت و هەمی كەسێن ل كنیشتەیێ ئامادە، چاڤێن وان رك ل عیسای بوون
- 21
- و دەست پێ كر و گۆتە وان: «ئەڤرۆ ب بهیستنا هەوە، ئەڤ نڤیسارە ب جهـ هات.»
- 22
- هەمیان ل وێرێ بەحسێ وی ب باشی دكر، ژ گۆتنێن چاكانە یێن ژ دەڤێ وی دەركەفتین، حێبەتی دبوون و پرسیار دكر: «ما ئەڤە نە كوڕێ یوسڤیە؟»
- 23
- ئەڤجا گۆتە وان: «بێگۆمان هوین دێ ڤێ گۆتنێ بێژنە من: ‹نۆژدارۆ، خۆ چارەسەر بكە!› و ئەوێن مە بهیستین تە ل كەفەرناحوم یێن كرین، ل باژێڕێ خۆ ژی بكە.»
- 24
- هەروەسا گۆت: «راستیێ دبێژمە هەوە: چ پێغەمبەر د باژێڕێ خۆ دا ناهێنە وەرگرتن.
- 25
- ئەز راستیێ دبێژمە هەوە: ل سەردەمێ ئلیاسی، دەمێ سێ ساڵ و شەش هەیڤان باران نەباری و كولبەكا مەزن ل ئەردی هەمیێ چێبووی، گەلەك بیژن ل ئیسرائیلێ هەبوون،
- 26
- لێ ئلیاس بۆ كەسەكێ ژ وان نەهاتبوو هنارتن، ژبلی بیژنەكێ ل سارێفاتا سایدایێ.[k]
- 27
- هەروەسا ل سەردەمێ ئەلیشەع پێغەمبەری ژی گەلەك ل ئیسرائیلێ هەبوون تووشی گوڕیاتیێ ببوون، لێ كەس ژ وان نەخۆشان چارەسەر نەبوو، ب تنێ نەعمانێ سوری[l] نەبیت.»
- 28
- دەمێ ئەوێن د كنیشتەیێ ڤە، ئەڤ ئاخفتنە بهیستی، هەمی تۆڕە بوون
- 29
- و رابوون ژ باژێڕی دەرئێخست و برە سەر لێڤا وی چیایێ باژێڕێ وان ل سەر هاتیە ئاڤاكرن، داكو تێدا بهاڤێژن.
- 30
- لێ عیسا د ناڤ هەمیان را دەرباز بوو و چوو.
- عیسا گیانەكێ پیس دەردئێخیت
- 31
- ئەو خوار كەفتە كەفەرناحوم، كو باژێڕەكێ دەڤەرا جەلیلێیە و د شەمبیێ دا خەلك فێر دكر.
- 32
- خەلك ژ فێركرنا وی حێبەتی بوون، چنكو ئاخفتنا وی یا ب دەستهەلات بوو.
- 33
- ل كنیشتەیێ زەڵامەك هەبوو گیانەكێ پیس د وی دا بوو، ئینا وی ب دەنگەكێ بلند گازی كر:
- 34
- «وەی! عیسایێ ناسیرەیی، تە چ ژ مە دڤێت؟ تۆ هاتی مە ژ ناڤ ببەی؟ ئەز دزانم تۆ كی، تۆ پیرۆزێ خودێی.»
- 35
- عیسای ئەو پاشڤە بر و گۆتێ: «بێدەنگ بە و ژێ دەركەڤە.» ئەڤجا ئەجنەی ئەو ل ناڤەندا وان ل ئەردی دا و بێی ب ئێشینیت ژێ دەركەفت.
- 36
- گوهشینێ هەمی گرتن و پرسیار ژ ئێكودوو كرن «ئەڤە چ پەیڤە؟ ب دەستهەلات و هێز فەرمانێ ل گیانێن پیس دكەت و دەردكەڤن!»
- 37
- ئێدی ناڤودەنگێن وی ل هەمی دەڤەرێن دەوروبەر بەڵاڤ دبوون.
- عیسا گەلەك نەخۆشان ساخ دكەت
- 38
- پاشی ژ كنیشتەیێ دەركەفت و چوو مالا شەمعونی. تایەكا گەلەك دژوار ل خەسیا شەمعونی بوو. ئەڤجا وان هاریكاری ژێ خواست.
- 39
- عیسا ل هنداڤ وێ راوەستیا و ل تایا وێ خوڕی، ئینا تایێ بەردا و ئێكسەر رابووڤە و وێ دەست ب خزمەتا وان كر.
- 40
- دەمێ رۆژ ئاڤا دبوو، هەر كەسێ نەخۆشەك هەبا و چ جۆرێ ئێشێ لێ با، دئینانە نك عیسای و ئەوی دەستێن خۆ ددانانە سەر هەر ئێك ژ وان و ساخ دكرن.
- 41
- ئەجنە ژی ژ گەلەكان دەردكەفتن و گازی دكرن و دگۆتن: «تۆ كوڕێ خودێی.» ئەوی ئەو پاشڤە دبرن و نەدهێلا بئاخڤن، چنكو وان دزانی ئەو مەسیحە.
- عیسا د كنیشتەیان ڤە مزگینیێ رادگەهینیت
- 42
- دەمێ رۆژ هەلاتی، چوو جهەكێ ڤەدەر و خەلك لێ دگەڕیا و هاتنە نك وی و مانە پێڤە كو وان ب جهـ نەهێلیت،
- 43
- لێ گۆتە وان: «دڤێت ئەز مزگینیا پاشایەتیا خودێ بگەهینمە باژێڕێن دی ژی، چنكو ژ بەر ڤێ چەندێ ئەز یێ هاتیمە هنارتن.»
- 44
- و ل كنیشتەیێن یەهودیایێ ب بەردەوامی مزگینی رادگەهاند.
- a. 4:4 گۆتارا مووسای 8:3
- b. 4:8 گۆتارا مووسای 6:13
- c. 4:11 زەبوور 91:11-12
- d. 4:12 گۆتارا مووسای 6:16
- e. 4:14
q گیان: ئانكو گیانێ پیرۆز، كو گیانێ خودێیە. - f. 4:15
q كنیشتە: جهێ پەرستنێ یێ جوهیانە. ل فەرهەنگۆكێ بنێڕە. - g. 4:15
q پەسن: مەدح و سەنا - h. 4:18 نیشانە كو خودێ ئەو دەستنیشان كر. ل فەرهەنگۆكێ بنێڕە زەیتكرن*.
- i. 4:19 ئیشایا 61:1-2
- j. 4:20 ل وی سەردەمی نڤیسین ل سەر كەڤلی بوو و دهاتە پێچان.
- k. 4:26 1 پاشا 17:8-16
- l. 4:27 2 پاشا 5:1-14
