عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
په‌رتوکا پیرۆز
- بارێن ئێكودوو هەلگرن
- 1
- گەلی خویشك و برایان، ئەگەر ئێك ل سەر گونەهەكێ بهێتە گرتن، هوین یێن كو ل بن رێبەریا گیانێ پیرۆز دچن، ب دەروونبچویكیێ وی كەسی راستڤە بكەن، لێ تۆ ژی هشیاری خۆ بە، داكو نەهێیە تاقی كرن.
- 2
- بارێن ئێكودوو هەلگرن، هۆسا دێ دەستوورێ مەسیحی ب جهـ ئینن.
- 3
- ئەگەر ئێك خۆ دبینیت كو تشتەكە و ئەو ب خۆ چ نینە، ئەو خۆ دخاپینیت.
- 4
- بلا هەر ئێك كارێ خۆ تاقی بكەت، وی دەمی ئەو دێ ب كارێ خۆ ب تنێ، نە ب كارێ كەسێن دی، شانازیێ بەت.
- 5
- چنكو هەر ئێك دێ بارێ خۆ هەلگریت.
- 6
- ئەوێ فێری پەیڤێ[a] دبیت، بلا پشكەكێ ژ هەمی تشتێن خۆ یێن باش، بكەتە بەهرا مامۆستایێ خۆ.
- 7
- نەهێنە خاپاندن! تڕانە ب خودێ ناهێنە كرن. چنكو مرۆڤ چ دچینیت، هەر دێ وی هەلینیت.
- 8
- ئەوێ بۆ لەشێ خۆ بچینیت، دێ ژ لەشی رزیبوونێ هەلینیت، لێ ئەوێ بۆ گیانی بچینیت، دێ ژ گیانی ژیانا هەروهەر هەلینیت.
- 9
- بلا ئەم ژ كرنا چاكیێ دلسار نەبین، چنكو ئەگەر ئەم دەست ژێ بەرنەدەین، ئەم دێ د دەمێ گونجای دا هەلینین.
- 10
- ئەڤجا هندی مە دەلیڤە هەبیت، بلا ئەم چاكیێ ل گەل هەمیان بكەین، ب تایبەتی ل گەل خویشك و برایێن مە د باوەرداریێ دا.
- شیرەتێن دویماهی و سڵاڤێن ئاشتیێ
- 11
- بەرێ خۆ بدەنێ، ئەز پیتێن چەند مەزن ب دەستێ خۆ بۆ هەوە دنڤیسم!
- 12
- ئەوێن حەز دكەن ب لەشی دیمەنەكێ باش ل بەر چاڤێن خەلكی بدەنە دیاركرن، بزاڤێ دكەن هەوە نەچار بكەن كو هوین بهێنە سونەتكرن، ب تنێ دا ئەو ژ بەر خاچا مەسیحی نەهێنە تەپەسەركرن.
- 13
- خۆ ئەوێن هاتینە سونەتكرن ژی، دەستووری ب جهـ نائینن، لێ ئەو حەز دكەن هوین بهێنە سونەتكرن، دا ئەو شانازیێ ب لەشێ هەوە ببەن.
- 14
- لێ ژ لایێ من ڤە، حاشا، كو ئەز شانازیێ ب تشتەكی ببەم، ژبلی خاچا خودانێ مە عیسایێ مەسیح. ب رێكا وێ جیهان دەربارەی من هاتیە خاچدان و ئەز ژی دەربارەی جیهانێ هاتیمە خاچدان.[b]
- 15
- چنكو سونەتبوونێ و سونەتنەبوونێ ژی مفا بۆ مرۆڤی نینە، ب تنێ یا مفای دگەهینیتە وی ئەوە كو ببیتە ئافرندەیەكێ نوی.
- 16
- ئاشتی و دلۆڤانی ل سەر وان هەمیان بیت، یێن ل گۆر ڤی بنەمای دچن، هەروەسا ل سەر ئیسرائیلا خودێ ژی.
- 17
- ژ نوكە و پێڤە بلا كەس نەخۆشیێ بۆ من چێنەكەت، چنكو شوین برینێن عیسای، یێن ل سەر لەشێ من هەین.
- 18
- گەلی خویشك و برایان، بلا كەرەما خودانێ مە عیسایێ مەسیح ل گەل گیانێ هەوە بیت. ئامین.
- a. 6:6 مەبەست پێ گۆتنێن خودێنە
- b. 6:14 ئانكو: ب رێكا وێ ئەز ب خاچدانێ ژ جیهانێ ڤەقەتیایمە و جیهان ژی ب خاچدانێ ژ من ڤەقەتیایە.
