عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.
KLA©
مافێ چاپێ یێ پاراستییە
مافێ چاپێ یێ پاراستییە
په‌رتوکا پیرۆز
- هاریكارێ مە مەسیحە
- 1
- گەلی زاڕۆكێن من، ئەز بۆ هەوە ڤان تشتان دنڤیسم، دا هوین گونەهان نەكەن. لێ ئەگەر كەسەك گونەهێ بكەت، مە ل نك بابی هاریكارەكێ[a] هەی، كو عیسایێ مەسیحێ راستدارە.
- 2
- ئەوە كەفارەت بۆ گونەهێن مە، نە ب تنێ بۆ گونەهێن مە، لێ بۆ گونەهێن هەمی جیهانێ ژی.
- 3
- ئەم ب وێ چەندێ دزانین كو ئەم وی دنیاسین، ئەگەر ئەم فەرمانێن وی ب جهـ بینین.
- 4
- ئەوێ دبێژیت: «ئەز وی دنیاسم» و فەرمانێن وی ب جهـ نەئینیت، ئەو درەوینە و راستی د دلێ وی دا نینە.
- 5
- لێ یێ پەیڤا وی ب جهـ بینیت، ئەڤە ب راستی حەزژێكرنا خودێ د دلێ وی دا یا كامل بووی. ب ڤێ چەندێ ئەم دزانین ئەم د ئێكبوونا ل گەل وی داینە:
- 6
- ئەوێ دبێژیت: «ئەز د ناڤ وی دا یێ بنەجهم،» پێدڤیە وەسا بژیت، هەروەكو عیسا ژیای[b] .
- فەرمانا نوی
- 7
- گەلی خۆشتڤیان، ئەز فەرمانەكا نوی بۆ هەوە نانڤیسم، لێ فەرمانەكا كەڤن، كو هەوە ژ دەستپێكێ هەبوو. فەرمانا كەڤن ئەو پەیڤە یا هەوە بهیستی.[c]
- 8
- سەرەڕای هندێ ژی، ئەز فەرمانەكا نوی بۆ هەوە دنڤیسم، كو راستیا وێ د وی دا و د هەوە ژی دا هەیە، چنكو تاریاتی بەرەڤ نەمانێ دچیت و رۆناهیا راستەقینە نوكە شەوقێ ددەت.
- 9
- ئەوێ دبێژیت: «ئەز یێ د رۆناهیێ دا» و كەربێن وی ژ خویشك یان برایێ وی ڤەدبن، ئەو هێشتا یێ د تاریاتیێ دا.
- 10
- یێ حەز ژ خویشك و برایێن خۆ دكەت، ئەو د رۆناهیێ دا یێ بنەجهە و چ ئەگەرێن هەلنگفتنێ بۆ وی نینن.
- 11
- لێ یێ كەربێن وی ژ خویشكا وی یان برایێ وی ڤەدبن، ئەو یێ د تاریاتیێ دا و د تاریاتیێ دا دژیت و نزانیت كیڤە دچیت، چنكو تاریاتیێ چاڤێن وی یێن كۆرە كرین.
- 12
- ئەز بۆ هەوە دنڤیسم، گەلی زاڕۆكان،
چنكو ل سەر خاترا ناڤێ وی ل گونەهێن هەوە هاتیە بورین. - 13
- ئەز بۆ هەوە دنڤیسم، گەلی بابان،
چنكو هوین وی دنیاسن، ئەوێ ژ دەستپێكێ هەی.
ئەز بۆ هەوە دنڤیسم، گەلی خۆرتان،
چنكو هوین ل سەر یێ خرابكار[d] ب سەر كەفتن.
من بۆ هەوە نڤیسی، گەلی زاڕۆكان،
چنكو هوین خودایێ باب دنیاسن. - 14
- من بۆ هەوە نڤیسی، گەلی بابان،
چنكو هوین وی دنیاسن، ئەوێ ژ دەستپێكێ هەی.
من بۆ هەوە نڤیسی گەلی گەنجان،
چنكو هوین ب هێزن.
پەیڤا خودێ د هەوە دا یا بنەجهە
و هوین ل سەر یێ خرابكار ب سەر كەفتن. - 15
- نە حەز ژ جیهانێ بكەن، نە ژی تشتێن د جیهانێ دا. ئەگەر كەسەك حەز ژ جیهانێ بكەت، حەزژێكرنا بابی د دلێ وی دا نینە.
- 16
- چنكو هەمی تشتێن د جیهانێ دا، ئارەزوویا لەشی و ئارەزوویا چاڤان و شانازیبرن ب ملك و مالێ ژیانێ، نە ژ بابینە، لێ ژ جیهانێنە.
- 17
- جیهان دچیت و ئارەزوویێن وێ ژی، لێ یێ حەزا خودێ ب جهـ دئینیت، ئەو دێ هەتا هەتایێ مینیت.
- ژ دژەمەسیحان ئاگەهدار ببن
- 18
- گەلی زاڕۆكان، ئەڤە دەمژمێرا دویماهیێیە. هەروەكو هەوە بهیستی كو دژەمەسیح دێ هێت، نوكە گەلەك دژەمەسیح[e] یێن دەركەفتین. ژ ڤێ چەندێ ئەم دزانین دەمژمێرا دویماهیێیە.
- 19
- ئەو ژ ناڤ مە دەركەفتن، لێ ئەو ژ مە نەبوون، چنكو ئەگەر ئەو ژ مە بان، دا ل گەل مە مینن. لێ ئەو دەركەفتن، دا دیار ببیت كو ئەو هەمی نە ژ مەنە.
- 20
- لێ هوین ژ لایێ یێ پیرۆز ڤە هاتینە زەیتكرن[f] و هوین هەمی ژی راستیێ دزانن.
- 21
- من بۆ هەوە نڤیسی، نە چنكو هوین راستیێ نزانن، لێ چنكو هوین راستیێ دزانن و دزانن كو چ درەو ژ راستیێ نینن.
- 22
- درەوین كیە؟ ما نە ئەوە یێ ماندەل[g] دكەت كو عیسا ب خۆ مەسیحە. ئها ئەو دژەمەسیحە، ئەوێ بابی و كوڕی[h] ماندەل دكەت.
- 23
- هەر كەسێ كوڕی ماندەل بكەت، وی بەهر د بابی دا نینە، لێ یێ دانپێدانێ ب كوڕی بكەت، بەهر د بابی ژی دا هەیە.
- 24
- بلا ئەو تشتێ هەوە ژ دەستپێكێ بهیستی، د ناڤ دلێ هەوە دا یێ بنەجهـ بیت. ئەگەر ئەو تشتێ هەوە ژ دەستپێكێ بهیستی د ناڤ دلێ هەوە دا بنەجهـ ببیت، هوین ژی دێ د ناڤ كوڕی و د ناڤ بابی دا بنەجهـ بن.
- 25
- ئەڤەیە ئەو سۆزا وی ب خۆ دایە مە، ئەو ژی ژیانا هەتا هەتاییە.
- 26
- من ئەڤ تشتە بۆ هەوە نڤیسین، دەربارەی وان كەسان یێن بزاڤێ دكەن هەوە د سەر دا ببەن.
- 27
- لێ هندی هوینن، ئەو زەیتكرنا هەوە ژ وی[i] وەرگرتی د دلێ هەوە دا یا بنەجهە و هوین د پێدڤی نینن كو كەسەك هەوە فێر بكەت. ئەڤجا د ناڤ مەسیحی دا بنەجهـ ببن، مادەم زەیتكرنا وی هەوە فێر دكەتە هەمی تشتان و ئەو راستە و نە درەوە، وەكو وێ زەیتكرنێ هوین فێر كرین ژی.
- زاڕۆكێن خودێ
- 28
- نوكە ژی، گەلی زاڕۆكان، د ناڤ وی دا بنەجهـ ببن، داكو دەمێ ئەو دیار ببیت، مە پشتڕاستی هەبیت و د هاتنا وی دا شەرم ژێ نەكەین.
- 29
- ئەگەر هوین بزانن كو ئەو یێ راستدارە، هوین دزانن كو هەر كەسێ راستداریێ بكەت، یێ ژ وی بووی.
- a. 2:1
q هاریكار: ب یونانی دبێژیت ‹پاراكلێتۆس›. ل فەرهەنگۆكێ ل پەیڤا پاراكلێتۆس* بنێڕە. - b. 2:6 دەق و دەق: ‹پێدڤیە وەسا بڕێڤە بچیت، هەروەكو عیسا بڕێڤە چووی›.
- c. 2:7 یوحەننا 13:34
- d. 2:13
q خرابكار: ئانكو ئبلیس - e. 2:18
q دژەمەسیح: مەسیحێ سەختەیە، ئەوێ خۆ ددەتە نیاسین كو مەسیحە، لێ ئەو درەوینە و خەلكی د سەر دا دبەت. مەتتا 24:24 - f. 2:20
q زەیتكرن: هێمایە كو خودێ مرۆڤ هەلبژارت و گیانێ پیرۆز رشتە سەر وی. ل فەرهەنگۆكێ بنێڕە زەیتكرن*. - g. 2:22
q ماندەل: ئینكار - h. 2:22 مەبەست ژ كوڕی: مەسیحە و مەبەست ژ بابی: خودێیە.
- i. 2:27 مەبەست پێ مەسیحە.
