عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
حوكمدانی ته‌واو و خۆشه‌ویستی نه‌گۆڕ 
1
له‌ چواره‌م ساڵی داریوشی پاشا، له‌ چواری مانگی نۆ له‌ كیسلێڤ فه‌رمایشتی یه‌زدان بۆ زه‌كه‌ریا هات.
2
خه‌ڵكی بێت‌ئێل شه‌رئه‌چه‌ر و ڕه‌گه‌م‌مه‌له‌خیان له‌گه‌ڵ پیاوه‌كانیان نارد بۆ ئه‌وه‌ی له‌ یه‌زدان بپاڕێنه‌وه‌،
3
بۆ ئه‌وه‌ی له‌ كاهینه‌كانی ماڵی یه‌زدانی سوپاسالار و له‌ پێغه‌مبه‌ره‌كان بپرسن: «ئایا له‌ مانگی پێنجدا بگریێین و خۆمان ته‌رخان بكه‌ین، هه‌روه‌ك ئه‌م چه‌ند ساڵه‌ی ڕابردوو كردوومانه‌؟»
4
ئینجا فه‌رمایشتی یه‌زدانی سوپاسالارم بۆ هات:
5
«به‌ هه‌موو گه‌لی خاكه‌كه‌ و به‌ كاهینه‌كان بڵێ: ”كاتێك به‌ ڕۆژوو بوون و شیوه‌نتان گێڕا، له‌ مانگی پێنج و مانگی حه‌وت، له‌ ماوه‌ی حه‌فتا ساڵی ڕابردوو، ئایا به‌ڕاستی بۆ من به‌ڕۆژوو بوون؟
6
ئه‌ی كه‌ ده‌تانخوارد و ده‌تانخوارده‌وه‌، ئایا بۆ خۆتان نه‌بوو ئاهه‌نگتان ده‌گێڕا؟
7
ئایا هه‌مان ئه‌و په‌یامه‌ نه‌بوو كه‌ یه‌زدان له‌ ڕێگه‌ی پێغه‌مبه‌ره‌كانی پێشووه‌وه‌ ڕایگه‌یاند، له‌ كاتێكدا كه‌ ئۆرشه‌لیم ئاوه‌دان و ئارام بوو، شارۆچكه‌كانی ده‌وروبه‌ری و نه‌قه‌ب و زوورگه‌كانی[a] یه‌هودا ئاوه‌دان بوون؟“»
8
ئینجا فه‌رمایشتی یه‌زدان بۆ زه‌كه‌ریا هات:
9
«یه‌زدانی سوپاسالار ئه‌مه‌ ده‌فه‌رموێت: ”به‌ دادپه‌روه‌ری ڕاسته‌قینه‌ حوكم بده‌ن، له‌گه‌ڵ یه‌كتری میهره‌بان و به‌ به‌زه‌یی بن.
10
بێوه‌ژن و هه‌تیو، نامۆ و هه‌ژار مه‌چه‌وسێننه‌وه‌، له‌ دڵه‌وه‌ بیر له‌ خراپه‌ مه‌كه‌نه‌وه‌ به‌رامبه‌ر به‌ یه‌كتری.“
11
«به‌ڵام نه‌یانویست گوێ شل بكه‌ن، شانی یاخبوونیان دایه‌به‌ر، خۆیان كه‌ڕ كرد.
12
دڵیان وه‌ك به‌رده‌ئه‌ستێ ڕه‌قكرد نه‌وه‌ك گوێیان له‌ فێركردنه‌كان و له‌و وشانه‌ بێت كه‌ یه‌زدانی سوپاسالار به‌ ڕۆحی خۆی له‌ ڕێگه‌ی پێغه‌مبه‌ره‌كانی پێشووه‌وه‌ ناردی. ئیتر یه‌زدانی سوپاسالار زۆر تووڕه‌ بوو.
13
«یه‌زدانی سوپاسالار ده‌فه‌رموێت: ”چۆن بانگم كرد و گوێیان نه‌گرت، ئه‌وانیش ئاوا نزا ده‌كه‌ن و گوێ ناگرم.
14
به‌ ڕه‌شه‌بایه‌ك به‌ناو هه‌موو نه‌ته‌وه‌كاندا په‌رتوبڵاوم كردنه‌وه‌ و له‌وێ نامۆ بوون. له‌پاش ئه‌وان زه‌وییه‌كه‌ وێران بوو و كه‌س هاتوچۆی پێیدا نه‌كرد. به‌م جۆره‌ خاكی شادییان وێران كرد.“»
  1. a. 7‏:7 زوورگ: له‌ ته‌پۆڵكه‌ به‌رزتره‌، هه‌روه‌ك به‌رزاییه‌كانی زوورگه‌زراو له‌ كوردستان.