عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
بینینی ته‌ختی پاشایانه‌ی خودا 
1
پاش ئه‌مه‌ ته‌ماشام كرد ده‌رگایه‌كی كراوه‌م بینی له‌ ئاسماندا، ئه‌و ده‌نگه‌ش كه‌ یه‌كه‌م جار وه‌ك كه‌ڕه‌نا هاته‌ گوێم[a] ، پێی فه‌رمووم: «سه‌ربكه‌وه‌ بۆ ئێره‌، ئه‌وه‌ت پیشان ده‌ده‌م كه‌ دوای ئه‌مه‌ پێویسته‌ ڕووبدات.»
2
ده‌ستبه‌جێ ڕۆحی پیرۆزم هاته‌ سه‌ر و ته‌ختێكم بینی له‌ ئاسمان دانرابوو، له‌سه‌ر ته‌خته‌كه‌ش یه‌كێك دانیشتبوو.
3
ڕوخساری دانیشتووه‌كه‌ له‌ به‌ردی یه‌شب و یاقووتی سوور ده‌چوو، په‌لكه‌زێڕینه‌یه‌كیش وه‌ك زمروود له‌ ده‌وری ته‌خته‌كه‌ ده‌دره‌وشایه‌وه‌.
4
له‌ ده‌وری ته‌خته‌كه‌ش بیست و چوار ته‌خت هه‌بوون، بیست و چوار پیریش كه‌ جلی سپییان پۆشی بوو له‌سه‌ر ته‌خته‌كان دانیشتبوون و تاجی زێڕینیان له‌سه‌ر بوو.
5
له‌ ته‌خته‌كه‌وه‌ هه‌وره‌ بروسكه‌ و ده‌نگه‌ده‌نگ و هه‌وره‌گرمه‌ ده‌هات، له‌به‌رده‌م ته‌خته‌كه‌ش حه‌وت چرای ئاگرین ده‌سووتان، كه‌ حه‌وت ڕۆحه‌كه‌ی خودان.
6
له‌به‌رده‌م ته‌خته‌كه‌ش شوێنێكی وه‌ك ده‌ریایه‌كی شووشه‌یی هه‌بوو، وه‌ك كریستاڵ.
له‌ناوه‌ڕاست، له‌ ده‌وروبه‌ری ته‌خته‌كه‌ چوار بوونه‌وه‌ر هه‌بوون، له‌پێش و پاش به‌ چاو داپۆشرا بوون.
7
بوونه‌وه‌ری یه‌كه‌م وه‌ك شێر بوو، دووه‌م بوونه‌وه‌ر وه‌ك جوانه‌گا، سێیه‌م بوونه‌وه‌ر ڕوخسارێكی وه‌ك مرۆڤی هه‌بوو، چواره‌م بوونه‌وه‌ر وه‌ك هه‌ڵۆیه‌كی فڕیو بوو.
8
چوار بوونه‌وه‌ره‌كه‌ هه‌ریه‌كه‌یان شه‌ش باڵی هه‌بوو، ده‌وروبه‌ر و ژێر باڵیشیان به‌ چاو داپۆشرابوو، ته‌نانه‌ت له‌ژێر باڵه‌كانی، شه‌و و ڕۆژ بێ وه‌ستان ده‌ڵێن:
«پیرۆزه‌، پیرۆزه‌، پیرۆزه‌،
خودای په‌روه‌ردگاری هه‌ره‌ به‌ توانا،
ئه‌وه‌ی هه‌بووه‌ و هه‌یه‌ و دێت.»
9
هه‌ر كاتێك بوونه‌وه‌ره‌كان شكۆ و ڕێز و سوپاس ده‌كه‌ن بۆ ئه‌وه‌ی دانیشتووی سه‌ر ته‌خته‌كه‌یه‌، ئه‌وه‌ی هه‌تاهه‌تایه‌ زیندووه‌،
10
بیست و چوار پیره‌كه‌ی به‌رده‌م دانیشتووی سه‌ر ته‌خته‌كه‌ ده‌كه‌ون و كڕنۆش بۆ زیندووی هه‌تاهه‌تایی ده‌به‌ن و تاجه‌كانیان له‌به‌رده‌م ته‌خته‌كه‌ فڕێده‌ده‌ن و ده‌ڵێن:
11
«ئه‌ی خودای په‌روه‌ردگارمان، تۆ شایانی ئه‌وه‌ی شكۆ و ڕێز و توانا وه‌ربگریت،
چونكه‌ تۆ هه‌موو شتێكت به‌دیهێناوه‌،
به‌ خواستی تۆش هه‌ن و به‌دیهێنران.»
  1. a. 4‏:1 \+xt بڕوانه‌ 1‏:10‏\+xt*.