عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
نامه‌یه‌ك بۆ كڵێسای ساردس 
1
هه‌روه‌ها بۆ فریشته‌ی كڵێساكه‌ی ساردس بنووسه‌:
ئه‌وه‌ی حه‌وت ڕۆحی خودا و حه‌وت ئه‌ستێره‌كه‌ی هه‌یه‌ ده‌فه‌رموێ: «ئاگام له‌ كرداره‌كانته‌، تۆ به‌ ناو زیندوویت، به‌ڵام مردوویت.
2
ئێشك بگره‌! ئه‌وه‌ی ماوه‌ به‌هێزی بكه‌، ئه‌وه‌ی خه‌ریكه‌ بمرێت، چونكه‌ له‌به‌رده‌م خودام كاره‌كانتم به‌ ناته‌واوی بینی.
3
ئیتر ئه‌و شته‌ی كه‌ فێری بوویت و بیستت به‌بیر خۆتی بهێنه‌ره‌وه‌ و به‌ باشی پێیه‌وه‌ پابه‌ند به‌ و تۆبه‌ بكه‌. به‌ڵام ئه‌گه‌ر ئێشك نه‌گریت ئه‌وا وه‌ك دزێك دێم و نازانی له‌ چ كاتێكدا بۆت دێم.
4
«كه‌چی خه‌ڵكێكی كه‌مت له‌ ساردسدا هه‌یه‌ به‌رگه‌كانیان گڵاو نه‌كردووه‌، به‌ به‌رگی سپییه‌وه‌ له‌گه‌ڵ من ڕێ ده‌كه‌ن، چونكه‌ شایانی ئه‌وه‌ن.
5
ئه‌وه‌ی سه‌ربكه‌وێت ئاوا به‌رگی سپی ده‌پۆشێت و ناوی له‌ په‌ڕتووكی ژیاندا ناسڕمه‌وه‌ و له‌به‌رده‌م باوكم و له‌به‌رده‌م فریشته‌كانی دان به‌ ناوه‌كه‌یدا ده‌نێم.
6
ئه‌وه‌ی گوێی هه‌یه‌، با ببیستێت ڕۆحی پیرۆز چی به‌ كڵێساكان ده‌فه‌رموێ.»
نامه‌یه‌ك بۆ كڵێسای فیلاده‌لفیا 
7
هه‌روه‌ها بۆ فریشته‌ی كڵێساكه‌ی فیلاده‌لفیا بنووسه‌:
ئه‌وه‌ی پیرۆز و ڕاسته‌، كلیله‌كه‌ی داودی له‌ ده‌سته‌، ئه‌وه‌ی ده‌یكاته‌وه‌ و كه‌س دایناخات، دایده‌خات و كه‌س نایكاته‌وه‌، ده‌فه‌رموێ:
8
«ئاگام له‌ كرداره‌كانته‌. ئه‌وه‌تا ده‌رگایه‌كی كراوه‌م له‌به‌رده‌مت داناوه‌ و كه‌س ناتوانێت دایبخات. ده‌زانم هێزێكی كه‌مت هه‌یه‌، به‌ڵام وشه‌ی من ده‌پارێزیت، نكۆڵیت له‌ ناوی من نه‌كرد.
9
ئه‌وه‌تا ئاوا له‌وانه‌ی كه‌نیشتی شه‌یتان ده‌كه‌م، ئه‌وانه‌ی ده‌ڵێن جوله‌كه‌ین و جوله‌كه‌ش نین، به‌ڵكو درۆ ده‌كه‌ن، وایان لێ ده‌كه‌م بێن و له‌به‌رده‌م پێیه‌كانتدا كڕنۆش ببه‌ن و بزانن تۆم خۆشویستووه‌.
10
له‌به‌ر ئه‌وه‌ی به‌گوێره‌ی ڕاسپارده‌كه‌م دانت به‌خۆتداگرت، منیش له‌ كاتی تاقیكردنه‌وه‌دا ده‌تپارێزم كه‌ به‌سه‌ر هه‌موو جیهاندا دێت بۆ ئه‌وه‌ی دانیشتووانی جیهان تاقی بكرێنه‌وه‌.
11
«زوو دێم. ده‌ست بگره‌ به‌وه‌ی هه‌ته‌، تاكو كه‌س تاجه‌كه‌ت لێ نه‌ستێنێت.
12
ئه‌وه‌ی سه‌ربكه‌وێت ده‌یكه‌مه‌ كۆڵه‌كه‌یه‌ك له‌ناو په‌رستگای خودام و هه‌رگیز لێی ده‌رناچێت. ناوی خودای خۆم و ناوی شاری خودای خۆمی له‌سه‌ر ده‌نووسم، ئۆرشه‌لیمی نوێ، ئه‌وه‌ی له‌لایه‌ن خودای خۆم له‌ ئاسمانه‌وه‌ دێته‌ خواره‌وه‌، هه‌روه‌ها ناوی نوێی خۆمی له‌سه‌ر ده‌نووسم.
13
ئه‌وه‌ی گوێی هه‌یه‌، با ببیستێت ڕۆحی پیرۆز چی به‌ كڵێساكان ده‌فه‌رموێ.»
نامه‌یه‌ك بۆ كڵێسای لاودیكییا 
14
بۆ فریشته‌ی كڵێساكه‌ی لاودیكییا بنووسه‌:
ئه‌مه‌ په‌یامی ئه‌وه‌یه‌ كه‌ به‌ ئامین[a] ناو ده‌بردرێت، كه‌ شایه‌تیده‌ری دڵسۆز و ڕاستگۆیه‌ و سه‌رچاوه‌ی به‌دیهێنراوه‌كانی خودایه‌:
15
«ئاگام له‌ كرداره‌كانته‌، تۆ نه‌ سارد و نه‌ گه‌رمیت. خۆزگه‌ سارد یان گه‌رم بووای،
16
به‌ڵام له‌به‌ر ئه‌وه‌ی شله‌تێنیت، نه‌ ساردیت و نه‌ گه‌رمیت، به‌ته‌مام له‌ ده‌ممه‌وه‌ بتتفێنمه‌وه‌.
17
تۆ ده‌ڵێی: ”ده‌وڵه‌مه‌ندم و زه‌نگین بوومه‌، پێویستیم به‌ هیچ نییه‌.“ به‌ڵام بێئاگای له‌وه‌ی به‌ ده‌رده‌سه‌ری و نه‌گبه‌ت و هه‌ژار و كوێر و ڕووتیت.
18
ئامۆژگاریت ده‌كه‌م زێڕی به‌ ئاگر پوخته‌كراوم لێ بكڕیت تاكو ده‌وڵه‌مه‌ند بیت، جلی سپیش تاكو له‌به‌ری بكه‌یت بۆ ئه‌وه‌ی شه‌رمه‌زاری ڕووتیت ده‌رنه‌كه‌وێت، هه‌روه‌ها كلیش بۆ ئه‌وه‌ی له‌ چاوتی بده‌یت هه‌تا ببینیت.
19
«ئه‌وانه‌ی خۆشم بوێن سه‌رزه‌نشتیان ده‌كه‌م و ته‌مبێیان ده‌كه‌م. بۆیه‌ دڵگه‌رم به‌ و تۆبه‌ بكه‌.
20
ئه‌وه‌تا له‌ به‌رده‌رگا وه‌ستاوم و له‌ ده‌رگا ده‌ده‌م. ئه‌گه‌ر یه‌كێك گوێی له‌ ده‌نگم بوو و ده‌رگاكه‌ی كرده‌وه‌، لێی دێمه‌ ژووره‌وه‌ و نانی له‌گه‌ڵ ده‌خۆم، ئه‌ویش له‌گه‌ڵ من.
21
«ئه‌وه‌ی سه‌ربكه‌وێت ده‌یده‌مێ له‌سه‌ر ته‌خته‌كه‌م له‌گه‌ڵم دانیشێت، وه‌ك منیش سه‌ركه‌وتنم به‌ده‌ستهێنا و له‌گه‌ڵ باوكم له‌ ته‌خته‌كه‌یدا دانیشتم.
22
ئه‌وه‌ی گوێی هه‌یه‌، با ببیستێت ڕۆحی پیرۆز چی به‌ كڵێساكان ده‌فه‌رموێ.»
  1. a. 3‏:14 ناوێكی تایبه‌ته‌ بۆ مه‌سیح.