عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
كاتێك به‌لعام بینی له‌به‌رچاوی یه‌زدان په‌سه‌نده‌ كه‌ ئیسرائیل به‌ره‌كه‌تدار بكات، وه‌ك جاری یه‌كه‌م و دووه‌م به‌ڕێ نه‌كه‌وت بۆ جادووگه‌ری، به‌ڵكو ڕووی له‌ چۆڵه‌وانی كرد.
2
كاتێك به‌لعام چاوی هه‌ڵبڕی نه‌وه‌ی ئیسرائیلی بینی هۆز له‌ته‌نیشت هۆز چادریان هه‌ڵداوه‌، ڕۆحی خوداش هاته‌ سه‌ری،
3
ئیتر په‌یامه‌كه‌ی ڕاگه‌یاند و گوتی:
«په‌یامه‌كه‌ی به‌لعامی كوڕی به‌عۆر،
په‌یامه‌كه‌ی ئه‌و پیاوه‌ی چاوی كراوه‌یه‌،
4
په‌یامی ئه‌وه‌ی گوێی له‌ وشه‌كانی خودایه‌،
ئه‌وه‌ی خودای هه‌ره‌ به‌ توانا بینینی بۆ ئاشكرا ده‌كات،
ئه‌وه‌ی به‌سه‌ر ڕوودا ده‌كه‌وێت، به‌ڵام چاو كراوه‌یه‌:
5
«چادره‌كانت چه‌ند جوانه‌ ئه‌ی یاقوب،
نشینگه‌كانت ئه‌ی ئیسرائیل!
6
«وه‌ك ئه‌و دۆڵانه‌ی درێژ بوونه‌ته‌وه‌،
وه‌ك باخچه‌ی كه‌ناری ڕووبار،
وه‌ك ئه‌و دره‌خته‌ ئه‌لوایانه‌ی[a] كه‌ یه‌زدان چاندبێتی،
وه‌ك ئورزی قه‌راغی ئاو،
7
گۆزه‌كانی ئاویان لێ ده‌ڕژێت و
تۆوی ئه‌وان له‌سه‌ر ئاوی زۆر ده‌بێت.
«پاشای له‌ ئه‌گاگ باڵاتر ده‌بێت و
شانشینه‌كه‌ی پایه‌دار ده‌بێت.
8
«خودا له‌ میسر ده‌ریهێنان،
وه‌ك شاخی گای كێوییه‌ بۆیان،
ئه‌و نه‌ته‌وانه‌ی ناحه‌زی ده‌كه‌ن ده‌یانخۆن و
ئێسكیان تێكده‌شكێنن و
به‌ تیره‌كانیان ده‌یانبڕن.
9
خۆیان وه‌ك شێر ماتداوه‌ و ڕاكشاون،
وه‌ك شێره‌ مێ، كێ هه‌ڵیانده‌ستێنێت؟
«به‌ره‌كه‌تدار بن ئه‌وانه‌ی به‌ره‌كه‌تدارتان ده‌كه‌ن،
نه‌فره‌ت لێكراو بن ئه‌وانه‌ی نه‌فره‌تتان لێ ده‌كه‌ن.»
10
ئینجا تووڕه‌یی بالاق به‌سه‌ر به‌لعامه‌وه‌ گڕی گرت، چه‌پڵه‌ی لێدا و به‌ به‌لعامی گوت: «بۆ نه‌فره‌تكردن له‌ دوژمنه‌كانم بانگم كردوویت، كه‌چی تۆ سێ جار داوای به‌ره‌كه‌تت بۆ كردن،
11
ئێستاش بگه‌ڕێوه‌ شوێنی خۆت، گوتم پاداشتێكی گه‌وره‌ت ده‌كه‌م، به‌ڵام یه‌زدان ڕێگری لێ كردیت كه‌ پاداشته‌كه‌ت وه‌ربگریت.»
12
به‌لعامیش به‌ بالاقی گوت: «ئه‌ی من به‌ نێردراوه‌كانتم نه‌گوت كه‌ بۆ لای منت ناردبوون،
13
”ئه‌گه‌ر بالاق به‌ پڕی خانووه‌كه‌ی زێڕ و زیوم پێبدات ناتوانم له‌ فه‌رمانی یه‌زدان ده‌ربچم، بۆ ئه‌وه‌ی له‌ خۆمه‌وه‌ چاكه‌یه‌ك یان خراپه‌یه‌ك بكه‌م، ئه‌وه‌ی یه‌زدان بیڵێت ئه‌وه‌ ده‌ڵێم؟“
14
ئێستاش وا من بۆ لای گه‌له‌كه‌م به‌ڕێ ده‌كه‌وم، به‌ڵام وه‌ره‌ با پێت بڵێم كه‌ ئه‌م گه‌له‌ له‌ دوارۆژدا چی له‌ گه‌له‌كه‌ت ده‌كات.»
چواره‌م په‌یامی به‌لعام 
15
ئیتر په‌یامه‌كه‌ی ڕاگه‌یاند و گوتی:
«په‌یامی به‌لعامی كوڕی به‌عۆر،
په‌یامی ئه‌و پیاوه‌ی چاوی كراوه‌یه‌،
16
په‌یامی ئه‌وه‌ی گوێی له‌ وشه‌كانی خودایه‌،
كه‌ زانینی هه‌یه‌ له‌ هه‌ره‌به‌رزه‌وه‌،
ئه‌وه‌ی خودای هه‌ره‌ به‌ توانا بینینی بۆ ئاشكرا ده‌كات،
ئه‌وه‌ی به‌سه‌ر ڕوودا ده‌كه‌وێت، به‌ڵام چاوی كراوه‌یه‌:
17
«ده‌یبینم، به‌ڵام ئێستا نا،
چاوم پێی ده‌كه‌وێت، به‌ڵام به‌م نزیكانه‌ نا.
ئه‌ستێره‌یه‌ك له‌ یاقوب ده‌رده‌كه‌وێت و
دارده‌ستێك له‌ ئیسرائیل هه‌ڵده‌ستێت.
ناوچه‌وانی مۆئاب ده‌شكێنێت،
كاسه‌سه‌ری هه‌موو نه‌وه‌ی شیت[b] تێكده‌شكێنێت.
18
ئه‌دۆم داگیر ده‌كرێت،
سێعیری دوژمنیشی ده‌بێته‌ خاوه‌ندار،
به‌ڵام ئیسرائیل قاره‌مانیێتی ده‌نوێنێت.
19
ئه‌وه‌ی له‌ یاقوبه‌وه‌یه‌ ده‌سه‌ڵاتدار ده‌بێت،
به‌جێماوه‌كان له‌ شار له‌ناوده‌بات.»
پێنجه‌م په‌یامی به‌لعام 
20
ئینجا به‌لعام عه‌مالێقی بینی و په‌یامه‌كه‌ی ڕاگه‌یاند و گوتی:
«عه‌مالێق یه‌كه‌می نه‌ته‌وه‌كان بوو،
به‌ڵام كۆتاییه‌كه‌ی له‌ناوچوونه‌.»
21
ئینجا قێنییه‌كانی بینی و په‌یامه‌كه‌ی پێ ڕاگه‌یاندن و گوتی:
«نشینگه‌كه‌تان پته‌وه‌ و
هێلانه‌كه‌تان له‌ناو تاشه‌به‌رده‌،
22
به‌ڵام ئه‌ی قێنییه‌كان ئێوه‌ وێران ده‌بن،
كاتێك ئه‌شوورییه‌كان به‌ دیلتان ده‌گرن.»
23
ئیتر په‌یامه‌كه‌ی ڕاگه‌یاند و گوتی:
«ئای كێ ده‌ژیێت كاتێك خودا ئاوا ده‌كات،
24
له‌لای كه‌ناره‌كانی كیتیمه‌وه‌[c] كه‌شتییه‌كان دێن و
ئه‌شوور و عێبه‌ر ژێرده‌سته‌ ده‌كات،
به‌ڵام ئه‌وانیش بۆ له‌ناوچوونن.»
25
ئینجا به‌لعام هه‌ستا و به‌ڕێكه‌وت و گه‌ڕایه‌وه‌ شوێنی خۆی، بالاقیش به‌ ڕێگای خۆیدا ڕۆیشت.
  1. a. 24‏:6 ڕووه‌كێكی دڕكاوییه‌ وه‌ك (سه‌باڕ)، شله‌یه‌كی تێدایه‌ بۆ پێست باشه‌.
  2. b. 24‏:17 نه‌وه‌ی شیت كوڕی ئادام، واته‌ گه‌لی مۆئاب.
  3. c. 24‏:24 قوبرس و كه‌ناره‌كانی ڕۆژئاوای.