عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
بانگكردنی دوازده‌ نێردراوه‌كه‌ 
1
ئینجا دوازده‌ قوتابییه‌كه‌ی بانگكرد، ده‌سه‌ڵاتی پێدان تاكو ڕۆحی پیس ده‌ربكه‌ن و هه‌رچی نه‌خۆشی و نه‌ساغی هه‌بوو چاك بكه‌نه‌وه‌.
2
ئه‌مانه‌ش ناوی دوازده‌ نێردراوه‌كه‌یه‌: یه‌كه‌مین، شیمۆن كه‌ به‌ په‌ترۆس ناوده‌بردرا و ئه‌ندراوسی برای، یاقوبی كوڕی زه‌بدی و یۆحه‌نای برای،
3
فیلیپۆس و به‌رتۆلماوس، تۆماس و مه‌تای باجگر، یاقوبی كوڕی حه‌لفا و ته‌داوس،
4
شیمۆنی كانه‌وی[a] و یه‌هوزای ئه‌سخه‌ریوتی كه‌ عیسای به‌ گرتن دا.
عیسا نێردراوه‌كانی ده‌نێرێت 
5
عیسا ئه‌م دوازده‌ كه‌سه‌ی نارد، فه‌رمانی پێ كردن: «به‌ ڕێگای نه‌ته‌وه‌كاندا مه‌ڕۆن و مه‌چنه‌ شاری سامیره‌ییه‌كان،
6
به‌ڵكو له‌بری ئه‌وه‌ بڕۆنه‌ لای مه‌ڕه‌ ونبووه‌كانی ماڵی ئیسرائیل.
7
كاتێك ده‌چن، ئه‌م په‌یامه‌ ڕابگه‌یه‌نن: ”پاشایه‌تی ئاسمان نزیك بووه‌ته‌وه‌.“
8
نه‌خۆش چاك بكه‌نه‌وه‌، مردووان زیندوو بكه‌نه‌وه‌، گول پاك بكه‌نه‌وه‌، ڕۆحی پیس ده‌ربكه‌ن. به‌خۆڕایی وه‌رتانگرتووه‌، به‌خۆڕاییش بیده‌ن.
9
زێڕ و زیو و مس له‌ پشتێنتان هه‌ڵمه‌گرن،
10
نه‌ تووره‌كه‌ بۆ ڕێگا، نه‌ دوو كراس و پێڵاوی زیاد و نه‌ گۆچانیش، چونكه‌ كارگه‌ر شایانی نانی خۆیه‌تی.
11
«چوونه‌ هه‌ر شار و گوندێك، به‌ شوێن كه‌سێكی شایسته‌دا بگه‌ڕێن و هه‌تا ئه‌وێ به‌جێده‌هێڵن له‌ ماڵ ئه‌و كه‌سه‌دا بمێننه‌وه‌.
12
كه‌ چوونه‌ ماڵه‌كه‌ سڵاو بكه‌ن.
13
ئه‌گه‌ر ماڵه‌كه‌ شایسته‌ بوون، با ئاشتیتان بۆیان بێت، به‌ڵام ئه‌گه‌ر شایسته‌ نه‌بوون، با ئاشتیتان بۆ خۆتان بگه‌ڕێته‌وه‌.
14
ئه‌وه‌ی پێشوازی لێ نه‌كردن و گوێی له‌ قسه‌تان نه‌گرت، له‌و ماڵه‌ یان له‌و شارۆچكه‌یه‌ بڕۆنه‌ ده‌ره‌وه‌ و تۆزی پێتان بته‌كێنن.
15
ڕاستیتان پێ ده‌ڵێم: له‌ ڕۆژی لێپرسینه‌وه‌دا، دۆخی خاكی سه‌دۆم و عه‌مۆرا سزای سووكتر ده‌بێت له‌وه‌ی ئه‌م شاره‌.
16
ئه‌وه‌تا من وه‌ك مه‌ڕ به‌ناو گه‌له‌ گورگدا ده‌تاننێرم. جا وه‌ك مار ژیر بن و وه‌ك كۆتر له‌ خراپه‌ بێبه‌ری بن.
17
«له‌ خه‌ڵكی به‌ئاگابن، چونكه‌ ده‌تانده‌نه‌ دادگا و له‌ كه‌نیشته‌كانیان به‌ قامچی لێتان ده‌ده‌ن،
18
له‌به‌ر من ده‌بردرێنه‌ به‌رده‌م فه‌رمانڕه‌وایان و پاشایان، وه‌ك شایه‌تێكی من بۆ ئه‌وان و بۆ نه‌ته‌وه‌كانیش.
19
كاتێكیش به‌ گرتنتان ده‌ده‌ن، نیگه‌ران مه‌بن چۆن یان چی بڵێن، له‌و كاته‌دا پێتان ده‌درێت چی بڵێن،
20
چونكه‌ ئه‌وه‌ ئێوه‌ نین كه‌ قسه‌ ده‌كه‌ن، به‌ڵكو ڕۆحی باوكتانه‌ له‌ ئێوه‌دا قسه‌ ده‌كات.
21
«برا برای خۆی بۆ مردن به‌ گرتن ده‌دات، باوكیش منداڵی خۆی. منداڵان له‌ دایك و باوكیان هه‌ڵده‌گه‌ڕێنه‌وه‌ و ده‌یانكوژن.
22
له‌به‌ر ناوی من هه‌مووان ڕقیان لێتان ده‌بێته‌وه‌، به‌ڵام ئه‌وه‌ی تاكو كۆتایی دانبه‌خۆدا بگرێت، ڕزگاری ده‌بێت.
23
كه‌ له‌م شاره‌ ده‌تانچه‌وسێننه‌وه‌، ڕاكه‌ن بۆ شارێكی دیكه‌. ڕاستیتان پێ ده‌ڵێم: شاره‌كانی ئیسرائیل ته‌واو ناكه‌ن پێش هاتنی كوڕی مرۆڤ[b] .
مه‌ترسن 
24
«قوتابی له‌ مامۆستاكه‌ی به‌رزتر نییه‌ و كۆیله‌ش له‌ گه‌وره‌كه‌ی به‌رزتر نییه‌.
25
بۆ قوتابی به‌سه‌ وه‌ك مامۆستاكه‌ی بێت و كۆیله‌ش وه‌ك گه‌وره‌كه‌ی. ئه‌گه‌ر خاوه‌ن ماڵ به‌ ”به‌عل‌زه‌بول“[c] ناو ببردرێت، چه‌ند زیاتر خانه‌واده‌كه‌ی؟
26
«له‌به‌ر ئه‌وه‌ لێیان مه‌ترسن، چونكه‌ شاردراوه‌ نییه‌ ئاشكرا نه‌بێت و نهێنی نییه‌ ده‌رنه‌كه‌وێت.
27
ئه‌وه‌ی له‌ تاریكیدا پێتانی ده‌ڵێم، له‌ ڕووناكی بیڵێنه‌وه‌، ئه‌وه‌ی به‌ چرپه‌ ده‌یبیستن، له‌ سه‌ربانه‌كان جاڕبده‌ن.
28
له‌وانه‌ مه‌ترسن كه‌ جه‌سته‌ ده‌كوژن، به‌ڵام ناتوانن گیان بكوژن، به‌ڵكو له‌وه‌ بترسن كه‌ ده‌توانێ هه‌ردووكیان له‌ دۆزه‌خدا له‌ناوبه‌رێت.
29
ئایا دوو چۆله‌كه‌ به‌ فلسێك نافرۆشرێت؟ كه‌چی هیچ یه‌كێكیان به‌بێ خواستی باوكتان ناكه‌وێته‌ سه‌ر زه‌وی.
30
ئێوه‌ ته‌نانه‌ت مووی سه‌ریشتان هه‌مووی ژمێردراوه‌.
31
كه‌واته‌ مه‌ترسن، ئێوه‌ زۆر له‌ چۆله‌كه‌ به‌نرخترن.
32
«بۆیه‌ ئه‌وه‌ی له‌به‌رده‌م خه‌ڵك دانم پێدا بنێت، منیش له‌لای باوكم كه‌ له‌ ئاسمانه‌، دانی پێدا ده‌نێم.
33
به‌ڵام ئه‌وه‌ی له‌لای خه‌ڵك نكۆڵی له‌ ناسینی من بكات، منیش له‌لای باوكم كه‌ له‌ ئاسمانه‌، نكۆڵی لێ ده‌كه‌م.
ئاشتی نا به‌ڵكو شمشێر 
34
«وا مه‌زانن كه‌ هاتووم تاكو ئاشتی بهێنمه‌ سه‌ر زه‌وی. نه‌هاتووم بۆ هێنانی ئاشتی، به‌ڵكو شمشێر![d]
35
چونكه‌ من هاتووم بۆ هه‌ڵگه‌ڕاندنه‌وه‌ی
«{كوڕ له‌ باوكی و
كچ له‌ دایكی و
بووك له‌ خه‌سووی،
36
دوژمنی مرۆڤیش له‌ خانه‌واده‌كه‌ی خۆی ده‌بێت.}[e]
37
«ئه‌وه‌ی باوك یان دایكی له‌ من خۆشتربووێت، شایانی من نییه‌. ئه‌وه‌ی كوڕ یان كچی له‌ من خۆشتربووێت، شایانی من نییه‌.
38
ئه‌وه‌ی خاچه‌كه‌ی هه‌ڵنه‌گرێت و دوام نه‌كه‌وێت شایانی من نییه‌.
39
ئه‌وه‌ی ژیانی خۆی بدۆزێته‌وه‌ ده‌یدۆڕێنێت، به‌ڵام ئه‌وه‌ی ژیانی خۆی له‌به‌ر من بدۆڕێنێت ده‌یدۆزێته‌وه‌.
40
«ئه‌وه‌ی پێشوازیتان لێ بكات، پێشوازی له‌ من ده‌كات، ئه‌وه‌ش پێشوازیم بكات، پێشوازی له‌وه‌ ده‌كات كه‌ منی ناردووه‌.
41
ئه‌وه‌ی پێشوازی له‌ پێغه‌مبه‌رێك بكات به‌ ناوی پێغه‌مبه‌ر، ئه‌وا پاداشتی پێغه‌مبه‌رێك وه‌رده‌گرێت. ئه‌وه‌ش پێشوازی له‌ پیاوچاكێك بكات به‌ ناوی پیاوچاك، ئه‌وا پاداشتی پیاوچاكێك وه‌رده‌گرێت.
42
ئه‌وه‌ی ته‌نها جامه‌ ئاوێكی سارد بداته‌ یه‌كێك له‌م بچووكانه‌، له‌به‌ر ئه‌وه‌ی قوتابی منن، ڕاستیتان پێ ده‌ڵێم: پاداشتی ون نابێت.»
  1. a. 10‏:4 كانه‌وی پارتێكی نه‌ته‌وه‌یی ڕادیكالی جوله‌كه‌ بوو، شیمۆنیش سه‌ر به‌و پارته‌ بوو. بڕوانه‌ \+xt لۆقا 6‏:15‏\+xt*‏.
  2. b. 10‏:23 هاتنی كوڕی مرۆڤ: زۆربه‌ی زانایان هاوڕان له‌سه‌ر ئه‌وه‌ی كه‌ لێره‌دا مه‌به‌ست له‌ هاتنه‌وه‌ی عیسایه‌ له‌ ڕۆژی دوایی.
  3. c. 10‏:25 به‌عل‌زه‌بول: خوداوه‌ندی شاری عه‌قرون بوو له‌ فه‌له‌ستین، به‌ واتای شه‌یتان دێت.
  4. d. 10‏:34 واته‌ به‌هۆی هاتنی مه‌سیح، خه‌ڵك دژایه‌تی قوتابییه‌كانی ده‌كه‌ن.
  5. e. 10‏:36 \+xt میخا 7‏:6‏\+xt*‏