عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
به‌خشین له‌ پێویستی خۆت 
1
ئینجا عیسا ته‌ماشای كرد و بینی ده‌وڵه‌مه‌نده‌كان به‌خشینیان ده‌خه‌نه‌ ناو گه‌نجینه‌ی په‌رستگا.
2
بێوه‌ژنێكی هه‌ژاریشی بینی دوو فلسی خسته‌ ناوی.
3
ئینجا فه‌رمووی: «ڕاستیتان پێ ده‌ڵێم، ئه‌م بێوه‌ژنه‌ هه‌ژاره‌ له‌ هه‌موویان زیاتری دانا.
4
هه‌موو ئه‌وانه‌ی دیكه‌ ئه‌وه‌ی له‌ خۆیان زیاده‌یه‌ به‌خشییان، به‌ڵام ئه‌م بێوه‌ژنه‌، سه‌ره‌ڕای هه‌ژارییه‌كه‌ی هه‌موو بژێوییه‌كه‌ی به‌خشی.»
نیشانه‌كانی كۆتایی سه‌رده‌م 
5
هه‌ندێك له‌ قوتابییه‌كانی عیسا باسی په‌رستگایان ده‌كرد كه‌ به‌ به‌ردی جوان و دیارییه‌ ته‌رخانكراوه‌كان بۆ خودا ڕازێنراوه‌ته‌وه‌. به‌ڵام عیسا پێی فه‌رموون:
6
«ئه‌مه‌ی ده‌یبینن، ڕۆژانێك دێت به‌ردی به‌سه‌ر به‌ردیه‌وه‌ نامێنێت كه‌ نه‌ڕووخێت.»
7
ئینجا لێیان پرسی: «مامۆستا، كه‌ی ئه‌مانه‌ ڕووده‌ده‌ن، چ نیشانه‌یه‌ك له‌ كاتی نزیكبوونه‌وه‌یاندا ده‌رده‌كه‌وێت؟»
8
فه‌رمووی: «وریابن هه‌ڵنه‌خه‌ڵه‌تێن، چونكه‌ زۆر كه‌س به‌ ناوی منه‌وه‌ دێن و ده‌ڵێن: ”من ئه‌وم،“ و ”كاته‌كه‌ نزیك بووه‌ته‌وه‌.“ دوایان مه‌كه‌ون.
9
كاتێك گوێتان له‌ باسوخواسی جه‌نگ و شۆڕش ده‌بێت، مه‌تۆقن، چونكه‌ جارێ ده‌بێ ئه‌م شتانه‌ ببێت، به‌ڵام كۆتایی یه‌كسه‌ر دوای ئه‌مه‌ نایه‌ت.»
10
ئینجا پێی فه‌رموون: «نه‌ته‌وه‌ له‌ نه‌ته‌وه‌ ڕاست ده‌بێته‌وه‌ و شانشین له‌ شانشین.
11
له‌ زۆر شوێن بوومه‌له‌رزه‌ی گه‌وره‌ و قاتوقڕی و ده‌رد ده‌بێت، ترس و نیشانه‌ی گه‌وره‌ش له‌ ئاسماندا ده‌بێت.
12
«به‌ڵام پێش هه‌موو ئه‌مانه‌ ده‌تانگرن و ده‌تانچه‌وسێننه‌وه‌، ده‌درێنه‌ كه‌نیشت و به‌ندیخانه‌كان، له‌ پێناوی ناوی من ده‌بردرێنه‌ لای پاشا و فه‌رمانڕه‌واكان.
13
به‌و شێوه‌یه‌ شایه‌تیم بۆ ده‌ده‌ن.
14
ئه‌وه‌تان له‌ بیر بێت كه‌ پێشوه‌خت نیگه‌رانی ئه‌وه‌ مه‌بن كه‌ چۆن به‌رگری له‌ خۆتان بكه‌ن،
15
چونكه‌ من ده‌م و داناییه‌كتان ده‌ده‌مێ كه‌ هه‌موو به‌رهه‌ڵسكارانتان نه‌توانن به‌رگری بكه‌ن و به‌رپه‌رچی بده‌نه‌وه‌.
16
ته‌نانه‌ت دایك و باوك و برا، خزم و هاوڕێیانیش به‌ گرتنتان ده‌ده‌ن، لێتان ده‌كوژن.
17
له‌به‌ر ناوی من هه‌مووان ڕقیان لێتان ده‌بێته‌وه‌.
18
به‌ڵام مووێكی سه‌رتان نافه‌وتێت.
19
به‌ خۆڕاگرتنتان خۆتان ده‌به‌نه‌وه‌.
هاتنه‌وه‌ی عیسای مه‌سیح 
20
«كاتێك ده‌بینن به‌ سوپا ده‌وری ئۆرشه‌لیم دراوه‌، ئه‌وسا بزانن ڕووخانی نزیك بووه‌ته‌وه‌.
21
ئینجا با ئه‌وانه‌ی له‌ هه‌رێمی یه‌هودیا نیشته‌جێن با هه‌ڵبێن بۆ چیاكان و ئه‌وانه‌ی له‌ناو شاره‌كه‌دان بچنه‌ ده‌ره‌وه‌، هه‌روه‌ها دانیشتووانی گونده‌كان نه‌چنه‌ ناو شار،
22
چونكه‌ ئه‌مانه‌ ڕۆژانی تۆڵه‌سه‌ندنه‌وه‌ن، تاكو هه‌رچی نووسراوه‌ بێته‌ دی.
23
له‌و ڕۆژانه‌دا قوڕبه‌سه‌ر ژنی دووگیان یان شیرده‌ر، چونكه‌ ناخۆشییه‌كی گه‌وره‌ به‌سه‌ر زه‌ویدا دێت و تووڕه‌ییش به‌سه‌ر ئه‌م گه‌له‌.
24
به‌ شمشێر ده‌كوژرێن و بۆ نێو هه‌موو نه‌ته‌وه‌كان ڕاپێچ ده‌كرێن، ئۆرشه‌لیم له‌لایه‌ن نه‌ته‌وه‌كانه‌وه‌ پێشێل ده‌كرێت، هه‌تا ڕۆژگاری نه‌ته‌وه‌كان ته‌واو ده‌بێت.
25
«له‌ خۆر و مانگ و ئه‌ستێره‌كان نیشانه‌ ده‌رده‌كه‌ون، له‌سه‌ر زه‌ویش سه‌رسامی گه‌لان، شێوانی هاژه‌ی ده‌ریا و شه‌پۆل.
26
له‌ ترس و چاوه‌ڕوانی ئه‌و شتانه‌ی به‌سه‌ر جیهاندا دێن، خه‌ڵكی بێ هۆش ده‌بن، چونكه‌ خۆر و مانگ و ئه‌ستێره‌كانی ئاسمان ده‌هه‌ژێن.
27
ئه‌وسا كوڕی مرۆڤ به‌ هێز و شكۆیه‌كی گه‌وره‌وه‌ به‌سه‌ر هه‌وره‌وه‌ ده‌بینن دێت.
28
كاتێك ڕوودانی ئه‌م شتانه‌ ده‌ستی پێكرد، هه‌ستن و سه‌ر به‌رز بكه‌نه‌وه‌، چونكه‌ ڕزگاریتان[a] نزیك ده‌بێته‌وه‌.»
29
نموونه‌یه‌كی بۆ هێنانه‌وه‌: «سه‌یری دار هه‌نجیر و هه‌موو داره‌كان بكه‌ن.
30
كاتێك ده‌بینن ئه‌وا گه‌ڵای كردووه‌، خۆتان ده‌زانن كه‌ هاوین نزیكه‌.
31
ئێوه‌ش كه‌ ده‌بینن ئه‌مانه‌ ڕووده‌دات، بزانن پاشایه‌تی خودا نزیكه‌.
32
«ڕاستیتان پێ ده‌ڵێم، ئه‌م نه‌وه‌یه‌ به‌سه‌رناچێت، هه‌تا هه‌موو ئه‌مانه‌ نه‌یه‌نه‌ دی.
33
ئاسمان و زه‌وی به‌سه‌رده‌چن، به‌ڵام وشه‌كانم هه‌رگیز به‌سه‌رناچن.»
به‌خه‌به‌ر بن و وریابن 
34
«ئاگاداری خۆتان بن، نه‌وه‌ك دڵتان له‌سه‌ر ڕابواردن و سه‌رخۆشی و خه‌م و خه‌فه‌تی ژیان بێت و ئه‌و ڕۆژه‌ له‌ناكاو وه‌ك ته‌ڵه‌ به‌سه‌رتاندا بدات،
35
چونكه‌ دێته‌ سه‌ر هه‌موو ئه‌وانه‌ی له‌سه‌ر ته‌واوی ڕووی زه‌وی دانیشتوون.
36
كه‌واته‌ ئێشك بگرن و هه‌موو كاتێك نوێژ بكه‌ن، تاكو بتوانن له‌ هه‌موو ئه‌و ڕووداوانه‌ ده‌رباز بن كه‌ تووشتان ده‌بن و له‌به‌رده‌م كوڕی مرۆڤ ڕاوه‌ستن.»
37
عیسا به‌ ڕۆژ له‌ په‌رستگا خه‌ریكی فێركردن بوو، شه‌وانیشی له‌و كێوه‌ به‌سه‌رده‌برد كه‌ پێی ده‌گوترا زه‌یتوون.
38
هه‌موو خه‌ڵك له‌ به‌ره‌به‌یان ده‌هاتنه‌ په‌رستگا بۆ ئه‌وه‌ی گوێی لێ بگرن.
  1. a. 21‏:28 یۆنانی: كڕینه‌وه‌.