عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
«”كاتێك كه‌سێك گوێی له‌ بانگه‌وازی ئاشكرا ده‌بێت بۆ شایه‌تیدان كه‌ شایه‌تی بدات، بێده‌نگ بوو له‌وه‌ی بینیبووی یان زانیبووی، ئه‌وا ئه‌و كه‌سه‌ گوناهی كردووه‌ و تاوانی خۆی له‌ ئه‌ستۆ ده‌گرێت.
2
«”یان ئه‌گه‌ر یه‌كێك به‌ر شتێكی گڵاو كه‌وت، وه‌ك كه‌لاكی[a] ئاژه‌ڵێكی كێوی گڵاو یان كه‌لاكی ئاژه‌ڵێكی ماڵی گڵاو یان كه‌لاكی خشۆكێكی گڵاو، ئه‌گه‌ر ئاگای لێ نه‌بوو و پاشان زانی، ئه‌وا تاوانباره‌.
3
«”یان ئه‌گه‌ر ده‌ستی له‌ شته‌ گڵاوه‌كانی كه‌سێك دا له‌ هه‌موو گڵاوییه‌كانی كه‌ پێی گڵاو ده‌بێت، ئاگای لێ نه‌بوو و پاشان زانی، ئه‌وا تاوانباره‌.
4
«”یان یه‌كێك هه‌ڵه‌شه‌ بوو له‌ سوێندخواردن، بۆ خراپه‌ یان چاكه‌، له‌ هه‌موو ئه‌وه‌ی مرۆڤ له‌ كاتی سوێندخواردن په‌له‌ی لێ ده‌كات، بێ ئه‌وه‌ی بزانێت و پاشان زانی، ئه‌وا ئه‌و كه‌سه‌ له‌و شته‌ تاوانباره‌.
5
«”ئه‌گه‌ر یه‌كێك تاوانبار بوو به‌ شكاندنی بڕگه‌یه‌كی ئه‌و یاسایانه‌ی كه‌ ئاماژه‌ی پێكرا، ئه‌وا دان به‌ گوناهه‌كه‌ی ده‌نێت و
6
به‌ قوربانییه‌كه‌یه‌وه‌ كه‌ مێ بێت، به‌رخ یان گیسك، بۆ تاوانه‌كه‌ی دێته‌ لای یه‌زدان له‌به‌ر ئه‌و گوناهه‌ی كه‌ كردوویه‌تی، قوربانی گوناه، كاهینه‌كه‌ش كه‌فاره‌ت بۆ گوناهه‌كه‌ی ده‌كات.
7
«”ئه‌گه‌ر ده‌ستكورت بوو بۆ به‌رخێك، با دوو كوكوختی یان دوو بێچووه‌ كۆتر وه‌ك قوربانی بۆ یه‌زدان بهێنێت له‌به‌ر تاوانه‌كه‌ی كه‌ گوناهی پێكردووه‌، یه‌كێكیان قوربانی گوناهه‌ و ئه‌وه‌ی دیكه‌ قوربانی سووتاندن.
8
ده‌یانهێنێت بۆ كاهینه‌كه‌ و ئه‌ویش یه‌كه‌م جار ئه‌وه‌ی بۆ گوناهه‌ پێشكه‌شی ده‌كات، سه‌ری له‌لای پشته‌وه‌ ده‌قرتێنێت به‌ڵام به‌ ته‌واوی لێی ناكاته‌وه‌.
9
له‌ خوێنی قوربانی گوناهه‌كه‌ به‌ لاته‌نیشتی قوربانگاكه‌دا ده‌كات، ئه‌وه‌شی له‌ خوێنه‌كه‌ ده‌مێنێته‌وه‌، ده‌گوشرێته‌ بنكه‌ی قوربانگاكه‌، ئه‌وه‌ قوربانی گوناهه‌.
10
ئه‌وه‌ی دیكه‌ به‌پێی ڕێوڕه‌سم ده‌كاته‌ قوربانی سووتاندن، ئینجا كاهینه‌كه‌ كه‌فاره‌تی بۆ ده‌كات له‌ گوناهه‌كه‌ی كه‌ كردوویه‌تی و لێخۆشبوونی بۆ ده‌بێت.
11
«”ئه‌گه‌ر ده‌ستكورت بوو دوو كوكوختی یان دوو بێچووه‌ كۆتر بهێنێت، قوربانییه‌كه‌ی له‌به‌ر ئه‌و گوناهه‌ی كه‌ كردوویه‌تی ده‌یه‌كی ئێفه‌یه‌ك[b] له‌ باشترین ئارد ده‌بێته‌ قوربانی گوناه. زه‌یتی به‌سه‌ردا ناكات و بخووری ساده‌ی له‌سه‌ر دانانێت، چونكه‌ قوربانی گوناهه‌.
12
ده‌یهێنێته‌ لای كاهینه‌كه‌ و ئه‌ویش پڕ به‌ مستی لێی ده‌بات، به‌شی یاده‌وه‌رییه‌كه‌ی و له‌سه‌ر قوربانگاكه‌ له‌سه‌ر قوربانییه‌ به‌ ئاگره‌كانی بۆ یه‌زدان ده‌یسووتێنێت، ئه‌وه‌ قوربانی گوناهه‌.
13
به‌م شێوه‌یه‌ كاهینه‌كه‌ كه‌فاره‌تی بۆ ده‌كات له‌ گوناهه‌كه‌ی كه‌ كردوویه‌تی له‌ هه‌ر یه‌كێك له‌وانه‌ و لێخۆشبوونی بۆ ده‌بێت، ئه‌وه‌ی ده‌شمێنێته‌وه‌ بۆ كاهینه‌كه‌ ده‌بێت، وه‌ك چۆن پاشماوه‌ی پێشكه‌شكراوی دانه‌وێڵه‌ به‌ كاهینه‌كه‌ ده‌درێت.“»
قوربانیدان بۆ تاوان 
14
هه‌روه‌ها یه‌زدان به‌ موسای فه‌رموو:
15
«ئه‌گه‌ر یه‌كێك سه‌رپێچییه‌كی كرد و سه‌باره‌ت به‌ شته‌ پیرۆزكراوه‌كانی یه‌زدان[c] به‌بێ ئه‌نقه‌ست گوناهی كرد، ده‌بێت له‌به‌ر تاوانه‌كه‌ی قوربانییه‌ك بۆ یه‌زدان بهێنێت، به‌رانێكی ساغی مێگه‌ل بێت و به‌و نرخه‌ی بۆی داده‌نێیت به‌ شاقلی زیو به‌پێی شاقلی پیرۆزگا[d] ، ئه‌وه‌ قوربانی تاوانه‌.
16
هه‌روه‌ها قه‌ره‌بووی ئه‌و گوناهه‌ش ده‌كاته‌وه‌ كه‌ سه‌باره‌ت به‌ شته‌ پیرۆزكراوه‌كان كردوویه‌تی و پێنج یه‌كیشی له‌سه‌ر داده‌نێت و ده‌یداته‌ كاهینه‌كه‌. كاهینه‌كه‌ به‌ به‌رانه‌كه‌ی قوربانی تاوان كه‌فاره‌تی بۆ ده‌كات و لێخۆشبوونی بۆ ده‌بێت.
17
«ئه‌گه‌ر یه‌كێك گوناهی كرد و یه‌كێك له‌وانه‌ی كرد كه‌ یه‌زدان فه‌رمانی داوه‌ نه‌كرێن و نه‌یزانی، ئه‌وا تاوانباره‌ و تاوانی خۆی له‌ ئه‌ستۆ ده‌گرێت.
18
به‌ به‌رانێكی ساغی مێگه‌ل و به‌و نرخه‌ی بۆی داده‌نێیت، به‌ قوربانی تاوانه‌وه‌ بۆ لای كاهینه‌كه‌ دێت، كاهینه‌كه‌ش له‌و هه‌ڵه‌یه‌ی كه‌ به‌بێ ئه‌نقه‌ست كردوویه‌تی كه‌فاره‌تی بۆ ده‌كات و لێخۆشبوونی بۆ ده‌بێت.
19
ئه‌وه‌ قوربانی تاوانه‌، چونكه‌ تاوانێكی سه‌باره‌ت به‌ یه‌زدان كردووه‌.»
  1. a. 5‏:2 كه‌لاك: واته‌ لاشه‌ی مردوو یان كوژراو كه‌ بۆ خواردن ناشێت.
  2. b. 5‏:11 نزیكه‌ی دوو لیتر.
  3. c. 5‏:15 شته‌ پیرۆزكراوه‌كانی یه‌زدان: له‌ ڕاستیدا ئه‌مه‌ جۆرێك بوو له‌ قوربانی گوناه. ناوه‌ڕۆكی ڕوخساری ئه‌م قوربانییه‌ تایبه‌ت بوو به‌ به‌كارهێنانی شته‌ پیرۆزكراوه‌كان به‌ شێوه‌یه‌كی ناپیرۆز.
  4. d. 5‏:15 شاقلی پیرۆزگا: نزیكه‌ی 11,5 گرام.