عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
ئه‌ی سییۆن، به‌ئاگا به‌! به‌ئاگا به‌!
به‌رگی هێزت له‌به‌ر بكه‌،
ئه‌ی ئۆرشه‌لیم، شاری پیرۆز،
به‌رگی جوانیت بپۆشه‌،
چونكه‌ ئیتر له‌مه‌ودوا نایه‌ته‌ ناوت
خه‌ته‌نه‌ نه‌كراو و گڵاو.
2
ئه‌ی ئۆرشه‌لیم، له‌ناو خۆڵ هه‌سته‌ و
خۆت بته‌كێنه‌، له‌سه‌ر ته‌خت دابنیشه‌.
ئه‌ی ڕاپێچكراوه‌كه‌، شاری سییۆن،
كۆته‌كانی ملت بكه‌ره‌وه‌.
3
ئێستا یه‌زدان ئه‌مه‌ ده‌فه‌رموێت:
«به‌خۆڕایی فرۆشران،
به‌بێ پاره‌ ده‌كڕدرێنه‌وه‌.»
4
هه‌روه‌ها یه‌زدانی باڵاده‌ست ئه‌مه‌ ده‌فه‌رموێت:
«سه‌ره‌تا گه‌له‌كه‌م دابه‌زین بۆ میسر و ئاواره‌بوون له‌وێ،
له‌م دواییانه‌شدا ئاشور سته‌می لێده‌كرد.»
5
یه‌زدان ده‌فه‌رموێت: «ئێستا لێره‌ چیم هه‌یه‌؟
«گه‌له‌كه‌م به‌خۆڕایی بردرا و
فه‌رمانڕه‌واكانی ده‌لوورێنن،
به‌رده‌وام به‌ درێژایی ڕۆژیش
كفر به‌ ناوی من ده‌كرێت.
6
له‌به‌ر ئه‌وه‌ گه‌له‌كه‌م به‌ ناوی من ئاشنا ده‌بن،
له‌و ڕۆژه‌دا ده‌زانن
ئه‌وه‌تام، ئه‌وه‌ منم كه‌ ئه‌م به‌ڵێنه‌ ده‌ده‌م.»
یه‌زدان ده‌فه‌رموێت.
7
چه‌ند جوانه‌ له‌سه‌ر چیاكان
پێیه‌كانی مزگێنیده‌ران،
ڕاگه‌یه‌نه‌ری ئاشتی،
مزگێنیده‌ری خۆشی،
ڕاگه‌یه‌نه‌ری ڕزگاری،
ئه‌وانه‌ی به‌ سییۆن ده‌ڵێن:
«خودات پاشایه‌تی ده‌كات!»
8
گوێ بگره‌! ئێشكگره‌كانت ده‌نگیان هه‌ڵده‌بڕن،
پێكه‌وه‌ هاواری خۆشی ده‌كه‌ن،
به‌ چاوی خۆیان ده‌بینن
كاتێك یه‌زدان ده‌گه‌ڕێته‌وه‌ بۆ سییۆن.
9
ئه‌ی كه‌لاوه‌كانی ئۆرشه‌لیم،
پێكه‌وه‌ به‌ خۆشی گۆرانی بڵێن،
چونكه‌ یه‌زدان دڵنه‌وایی گه‌له‌كه‌ی خۆی ده‌كات،
بێگومان ئۆرشه‌لیم ده‌كڕێته‌وه‌.
10
یه‌زدان بازووی پیرۆزی خۆی هه‌ڵده‌كات
له‌به‌رچاوی هه‌موو نه‌ته‌وه‌كان،
هه‌ر چوار لای زه‌ویش
ڕزگاریی خودای ئێمه‌ ده‌بینن.
11
ئه‌ی هه‌ڵگرانی كه‌لوپه‌لی په‌رستگای یه‌زدان،
جیا بنه‌وه‌، جیا بنه‌وه‌، له‌ بابل بچنه‌ ده‌ره‌وه‌!
ده‌ست مه‌ده‌نه‌ هیچ گڵاوێك!
له‌ناوه‌ڕاستی بێنه‌ ده‌ره‌وه‌، خۆتان پاك بكه‌نه‌وه‌!
12
به‌ڵام به‌ په‌له‌ ده‌رناچن،
به‌ هه‌ڵاتن ناڕۆن،
چونكه‌ یه‌زدان له‌به‌رده‌متانه‌وه‌ ده‌ڕوات،
خودای ئیسرائیل پاشڕه‌و و پارێزه‌رتانه‌.
ئازار چێژتنی به‌نده‌ی یه‌زدان 
13
ببینه‌، به‌نده‌كه‌م وا به‌ وریاییه‌وه‌ هه‌ڵسوكه‌وت ده‌كات،
به‌رز و بڵند و زۆر پایه‌به‌رز ده‌بێت.
14
وه‌ك ئه‌وه‌ی زۆر كه‌س واقیان لێی وڕما،
دیمه‌نی وه‌ك مرۆڤ نه‌بوو،
وێنه‌ی له‌ ئاده‌میزاد نه‌ده‌چوو.
15
ئاوا زۆر له‌ نه‌ته‌وه‌كان ده‌پرژێنێت،
له‌به‌ر ئه‌و پاشایان ده‌می خۆیان ده‌گرن،
چونكه‌ ئه‌وه‌ی بۆیان باس نه‌كرابوو ده‌یبینن،
ئه‌وه‌ی نه‌یانبیستبوو تێی ده‌گه‌ن.