عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
نه‌خۆشی حه‌زقیا 
1
له‌و ڕۆژانه‌ی[a] حه‌زقیا نه‌خۆش كه‌وت، له‌ سه‌ره‌ مه‌رگ بوو، ئیشایا پێغه‌مبه‌ر كوڕی ئامۆچ هات بۆ لای و پێی گوت: «یه‌زدان ئه‌مه‌ ده‌فه‌رموێت: وه‌سیه‌ت بۆ ماڵه‌كه‌ت بكه‌، چونكه‌ ده‌مریت و ناژیت.»
2
حه‌زقیا ڕووی له‌ دیواره‌كه‌ كرد و نوێژی بۆ یه‌زدان كرد،
3
گوتی: «ئای یه‌زدان، ئه‌وه‌ت له‌یاد بێت كه‌ چۆن به‌ دڵسۆزی و پڕ به‌ دڵ دۆستایه‌تیم كردیت، ئه‌وه‌ی پێت باش بوو كردم.» ئینجا حه‌زقیا به‌كوڵ گریا.
4
جا ئیشایا فه‌رمایشتی یه‌زدانی بۆ هات، فه‌رمووی:
5
«بڕۆ و به‌ حه‌زقیا بڵێ: ”یه‌زدان، په‌روه‌ردگاری داودی باپیره‌ گه‌وره‌ت ئه‌مه‌ ده‌فه‌رموێت: گوێم له‌ پاڕانه‌وه‌كه‌ت بوو و فرمێسكه‌كانتم بینی، پازده‌ ساڵ له‌ ته‌مه‌نت زیاد ده‌كه‌م و
6
فریای خۆت و ئه‌م شاره‌ش ده‌كه‌وم، به‌رگری له‌م شاره‌ ده‌كه‌م له‌ ده‌ستی پاشای ئاشور.
7
«”ئه‌مه‌ش نیشانه‌ بێت بۆت له‌لایه‌ن یه‌زدانه‌وه‌، كه‌ یه‌زدان ئه‌م كاره‌ ده‌كات كه‌ به‌ڵێنی دا:
8
ئه‌وه‌تا سێبه‌ر ده‌گه‌ڕێنمه‌وه‌ به‌و پلانه‌ی پێی هاتووه‌ته‌ خواره‌وه‌، به‌ پله‌كانی ئاحاز به‌ خۆر، ده‌ پله‌ به‌ره‌و دواوه‌.“» جا خۆر ده‌ پله‌ گه‌ڕایه‌وه‌ به‌و پلانه‌ی پێی هاتبووه‌ خوار.
9
نووسراوی حه‌زقیای پاشای یه‌هودا، دوای ئه‌وه‌ی نه‌خۆش كه‌وت و له‌ نه‌خۆشییه‌كه‌ی چاك بووه‌وه‌:
10
گوتم: «ئایا له‌ هه‌ڕه‌تی گه‌نجیمدا
من ده‌چم بۆ جیهانی مردووان
چونكه‌ یه‌زدان له‌ پاشماوه‌ی ژیانم بێبه‌شی كردووم؟»
11
گوتم: «یه‌زدان نابینم
له‌ خاكی زیندوواندا،
له‌مه‌ودوا چیتر سه‌یری ئاده‌میزاد ناكه‌م
له‌سه‌ر ڕووی زه‌وی.
12
خانووم هه‌ڵته‌كا و له‌لام ڕۆیشت
وه‌ك خێوه‌تی شوانان،
وه‌كو جۆڵا ژیانی خۆمم پێچایه‌وه‌ و
له‌ ته‌ونه‌كه‌مدا بڕیمه‌وه‌.
شه‌و و ڕۆژ تۆ له‌ناوم ده‌به‌یت،
13
هه‌تا به‌یانی هاوار ده‌كه‌م،
وه‌ك شێر ئێسكم ورد بكات،
شه‌و و ڕۆژ تۆ له‌ناوم ده‌به‌یت.
14
وه‌ك په‌ڕه‌سێلكه‌ و ڕیشۆڵه‌ جیكه‌ جیك ده‌كه‌م،
وه‌كو كۆتر ده‌گمێنم،
چاوم شل بوو هێنده‌ له‌ ئاسمان بڕوانم.
وه‌ڕس بووم، ئه‌ی په‌روه‌ردگار، به‌ هانام وه‌ره‌!»
15
ئیتر چی بڵێم؟
ئه‌و پێی فه‌رمووم و ئه‌و خۆی كردی.
به‌ بێفیزی به‌ هه‌موو ساڵانمدا ده‌ڕۆم
له‌به‌ر تاڵاوی گیانم.
16
ئه‌ی په‌روه‌ردگار، مرۆڤ له‌سه‌ر ئه‌مانه‌ ده‌ژین،
ژیانی ڕۆحیم له‌ هه‌موو ئه‌مانه‌دایه‌.
تۆ منت چاككرده‌وه‌ و
ژیانت پێ به‌خشیم.
17
بێگومان سوودی بۆ من هه‌بوو كه‌
تاڵی له‌سه‌ر تاڵیم چێشت.
له‌ خۆشه‌ویستیدا تۆ گیانی منت
له‌ ته‌ڵه‌ی له‌ناوچوون ڕزگار كرد،
چونكه‌ هه‌موو گوناهه‌كانی منت
فڕێدایه‌ پشت خۆته‌وه‌.
18
چونكه‌ جیهانی مردووان سوپاست ناكات و
مردووانیش ستایشت ناكه‌ن،
هه‌روه‌ها ئه‌وانه‌ی له‌ گۆڕ ده‌نرێن
هیوایان به‌ دڵسۆزی تۆ نییه‌.
19
زیندووان، ته‌نها زیندووان سوپاست ده‌كه‌ن،
باوكان دڵسۆزی تۆ
به‌ منداڵه‌كانیان ده‌ناسێنن.
20
یه‌زدان ڕزگارم ده‌كات،
هه‌موو ڕۆژانی ژیانمان
مۆسیقا ده‌ژه‌نین
له‌ په‌رستگای یه‌زدان.
21
ئینجا ئیشایا گوتی: «با هه‌ویری هه‌نجیر هه‌ڵبگرن و بیخه‌نه‌ سه‌ر دوومه‌ڵه‌كه‌، چاك ده‌بێته‌وه‌.»
22
حه‌زقیاش گوتبووی: «نیشانه‌ چییه‌، كه‌ ده‌چمه‌ په‌رستگای یه‌زدان؟»
  1. a. 38‏:1 مه‌به‌ست له‌و ڕۆژانه‌یه‌ پێش ڕووداوه‌كانی به‌شی 36.