عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
خۆئاماده‌كردنی یاقوب بۆ دیداری عیسۆ 
1
یاقوبیش به‌ ڕێگای خۆیدا ڕۆیشت و فریشته‌كانی خودا به‌ره‌و پیری هاتن.
2
كاتێك یاقوب ئه‌وانی بینی، گوتی: «ئه‌مه‌ له‌شكری خودایه‌.» ئیتر ئه‌و شوێنه‌ی ناونا مه‌حه‌نه‌یم[a] .
3
یاقوب له‌پێش خۆیه‌وه‌ نێردراوی نارده‌ لای عیسۆی برای بۆ خاكی سێعیر له‌ وڵاتی ئه‌دۆم.
4
فه‌رمانی پێدان و گوتی: «ئاوا به‌ عیسۆی گه‌وره‌م ڕاده‌گه‌یه‌نن، كه‌ یاقوبی خزمه‌تكارت وا ده‌ڵێت: ”له‌لای لابان ئاواره‌ بووم و هه‌تا ئێستاش له‌لای ئه‌وم.
5
بووشم به‌ خاوه‌نی گا و گوێدرێژ، مه‌ڕ و بزن، خزمه‌تكار و كه‌نیزه‌. ئه‌وا ناردیشمه‌ لای گه‌وره‌ی خۆم هه‌تا پێی ڕابگه‌یه‌نم، بۆ ئه‌وه‌ی له‌به‌رچاوی تۆ په‌سه‌ند بم.“»
6
نێردراوه‌كان گه‌ڕانه‌وه‌ لای یاقوب و گوتیان: «چووینه‌ لای عیسۆی برات، وا ئه‌ویش به‌ڕێوه‌یه‌ بۆ دیداریت، چوار سه‌د پیاویشی له‌گه‌ڵدایه‌.»
7
به‌مه‌ یاقوب ترسێكی گه‌وره‌ی لێ نیشت و په‌رێشان بوو. ئه‌و كه‌سانه‌ی له‌گه‌ڵی بوون له‌گه‌ڵ مه‌ڕ و مانگا و وشتره‌كان دابه‌شی كردن بۆ دوو له‌شكر.
8
گوتی: «ئه‌گه‌ر عیسۆ هاته‌ سه‌ر له‌شكرێكیان و لێیدا، ئه‌وا له‌شكره‌كه‌ی دیكه‌ ده‌مێنێته‌وه‌ بۆ ده‌ربازبوون.»
9
ئینجا یاقوب له‌ خودا پاڕایه‌وه‌ و گوتی: «ئه‌ی خودای ئیبراهیمی باوكم و خودای ئیسحاقی باوكم، ئه‌و یه‌زدانه‌ی كه‌ پێی فه‌رمووم: ”بگه‌ڕێوه‌ خاكی خۆت و بۆ لای كه‌سوكاره‌كه‌ت، باش ده‌بم له‌گه‌ڵت.“
10
من شایسته‌ی هه‌موو ئه‌و خۆشه‌ویستییه‌ نه‌گۆڕه‌ و دڵسۆزییانه‌ نیم كه‌ له‌گه‌ڵ خزمه‌تكاری خۆتت كردووه‌، چونكه‌ به‌ خۆم و گۆچانه‌كه‌مه‌وه‌ له‌م ڕووباری ئوردونه‌ په‌ڕیمه‌وه‌، به‌ڵام ئێستاش بووم به‌ دوو له‌شكر.
11
له‌ چنگی عیسۆی برام فریام بكه‌وه‌، چونكه‌ من لێی ده‌ترسم نه‌وه‌ك بێت و لێم بدات، له‌ دایكان و منداڵه‌كانیان.
12
به‌ڵام تۆ خۆت فه‌رمووت: ”باش ده‌بم له‌گه‌ڵت و نه‌وه‌كه‌ت وه‌ك لمی ده‌ریا لێ ده‌كه‌م، كه‌ له‌به‌ر زۆری له‌ ژماردن نه‌یێت.“»
13
ئیتر ئه‌و شه‌وه‌ی له‌وێ به‌سه‌ربرد، له‌وه‌شی له‌گه‌ڵ ده‌ستی خۆیدا هێنابووی، دیارییه‌كی بۆ عیسۆی برای هه‌ڵبژارد:
14
دوو سه‌د بزن و بیست ته‌گه‌، دوو سه‌د مه‌ڕ و بیست به‌ران،
15
سی وشتری مێی شیرده‌ر به‌ به‌چكه‌كانیانه‌وه‌، چل مانگا و ده‌ گا له‌گه‌ڵ بیست ماكه‌ر و ده‌ نێره‌كه‌ر.
16
هه‌موو ئه‌مانه‌ی مێگه‌ل مێگه‌ل به‌ جیا دایه‌ ده‌ست خزمه‌تكاره‌كانی و پێی گوتن: «پێشم بكه‌ون و بواریش بخه‌نه‌ نێوان مێگه‌له‌كانه‌وه‌.»
17
فه‌رمانیشی به‌وه‌ی یه‌كه‌میان دا و گوتی: «ئه‌گه‌ر عیسۆی برام پێت گه‌یشت و لێی پرسیت: ”سه‌ر به‌ كێیت و بۆ كوێ ده‌چیت، ئه‌وه‌ی له‌پێشته‌وه‌یه‌ هی كێیه‌؟“
18
ده‌ڵێیت: ”هی یاقوبی خزمه‌تكارتن. دیارییه‌ و نێردراوه‌ بۆ عیسۆی گه‌وره‌م، خۆی له‌دوای ئێمه‌ دێت.“»
19
هه‌روه‌ها فه‌رمانی دا به‌ دووه‌میان و سێیه‌میان و هه‌موو ئه‌وانه‌ی به‌دوای مێگه‌ل و گاگه‌له‌كاندا ده‌ڕۆیشتن، پێی گوتن: «ئێوه‌ش هه‌ر هه‌مان شت به‌ عیسۆ ده‌ڵێن، كاتێك تووشی ده‌بن.
20
له‌بیر مه‌كه‌ن بڵێن: ”یاقوبی خزمه‌تكارت له‌دوای ئێمه‌ دێت.“» ئه‌مه‌شی كردووه‌ چونكه‌ گوتی: «به‌م دیارییه‌ی كه‌ له‌پێش خۆمه‌وه‌ ده‌ینێرم ئاشتی ده‌كه‌مه‌وه‌، دوای ئه‌مه‌ ڕووبه‌ڕووی ده‌بمه‌وه‌، به‌ڵكو لێم ڕازی بێت.»
21
ئیتر دیارییه‌كان پێش خۆی كه‌وتن، به‌ڵام خۆی ئه‌و شه‌وه‌ی له‌ ئۆردوگاكه‌ به‌سه‌ربرد.
زۆرانبازی یاقوب له‌گه‌ڵ خودا 
22
یاقوب ئه‌و شه‌وه‌ هه‌ستا و هه‌ردوو ژنه‌كه‌ی و هه‌ردوو كه‌نیزه‌كه‌ی و هه‌ر یازده‌ كوڕه‌كه‌ی هه‌ڵگرت و له‌ ته‌نكاییه‌كه‌ی ڕووباری یه‌بۆق په‌ڕییه‌وه‌.
23
هه‌ڵیگرتن و له‌ جۆگه‌كه‌ په‌ڕینه‌وه‌، له‌گه‌ڵ هه‌رچی كه‌ هه‌یبوو.
24
ئیتر یاقوب هه‌ر خۆی مایه‌وه‌، پیاوێكیش ده‌ركه‌وت، هه‌تا به‌ره‌به‌یان زۆرانبازی له‌گه‌ڵی كرد.
25
كه‌ بینی ده‌ره‌قه‌تی نایه‌ت، له‌لای سه‌ره‌وه‌ی ئێسكی ڕانی دا و ڕانی یاقوب له‌ زۆرانبازیه‌كه‌دا له‌جێ چوو.
26
ئینجا فه‌رمووی: «به‌رمده‌، وا به‌ره‌به‌یان ده‌ركه‌وت.»
به‌ڵام یاقوب گوتی: «ئه‌گه‌ر به‌ره‌كه‌تدارم نه‌كه‌یت به‌رت ناده‌م.»
27
پیاوه‌كه‌ لێی پرسی: «ناوت چییه‌؟»
یاقوب وه‌ڵامی دایه‌وه‌: «یاقوب.»
28
ئینجا پیاوه‌كه‌ پێی فه‌رموو: «له‌مه‌ودوا ئیتر ناوت به‌ یاقوب ناهێنرێت، به‌ڵكو به‌ ئیسرائیل[b] ، چونكه‌ له‌گه‌ڵ خودا و پیاوان تێكۆشاویت و سه‌ركه‌وتوویت.»
29
یاقوبیش پێی گوت: «تكایه‌، ناوی خۆتم پێ بڵێ.»
به‌ڵام ئه‌و فه‌رمووی: «بۆچی پرسیار له‌ ناوم ده‌كه‌یت؟» ئیتر له‌وێ به‌ره‌كه‌تداری كرد.
30
ئیتر یاقوب ناوی له‌و شوێنه‌ نا په‌نیێل[c] ، گوتی: «چونكه‌ ڕوو به‌ ڕوو خودام بینی و گیانیشم ده‌رباز بوو.»
31
كاتێك له‌ په‌نیێل ده‌په‌ڕییه‌وه‌ خۆری لێ هه‌ڵهات، له‌به‌ر ڕانی ده‌شه‌لی.
32
هه‌ر له‌به‌ر ئه‌وه‌شه‌ كه‌ نه‌وه‌ی ئیسرائیل هه‌تا ئه‌مڕۆش ئه‌و ماسوولكه‌ ژێیه‌ی گرژ ده‌بێته‌وه‌، له‌لای سه‌ره‌وه‌ی ئێسكی ڕانه‌ نایخۆن، له‌به‌ر ئه‌وه‌ی ده‌ستدرا له‌لای سه‌ره‌وه‌ی ئێسكی ڕانی یاقوب. نزیك له‌م ماسوولكه‌ ژێیه‌ی گرژ ده‌بێته‌وه‌.
  1. a. 32‏:2 مه‌حه‌نه‌یم: واته‌ (دوو ئۆردوگا).
  2. b. 32‏:28 ناوێكی عیبرییه‌ به‌ واتای تێكۆشان له‌گه‌ڵ خودا.
  3. c. 32‏:30 واته‌ ڕووی خودا.