عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
گڵاوكردنی په‌رستگا 
1
ئه‌وه‌ بوو له‌ پێنجی مانگی شه‌شی ساڵی شه‌شه‌م،[a] كاتێك له‌ ماڵی خۆم دانیشتبووم و پیرانی یه‌هوداش به‌رامبه‌رم دانیشتبوون، له‌وێ ڕۆحی یه‌زدانی باڵاده‌ست هاته‌ سه‌رم.
2
جا ته‌ماشام كرد ئه‌وه‌تا شێوه‌یه‌كی وه‌ك مرۆڤم بینی، وێنه‌كه‌ی له‌ ناوقه‌دیه‌وه‌ به‌ره‌و خواره‌وه‌ ئاگر و له‌ ناوقه‌دیه‌وه‌ به‌ره‌و سه‌ره‌وه‌ وه‌ك وێنه‌ی بریسكانه‌وه‌ له‌ شێوه‌ی كانزایه‌كی ئاگراوی بوو.
3
شتێكی درێژكرد له‌ شێوه‌ی ده‌ست بوو، به‌ قژی سه‌رم منی گرت. ڕۆحی خودا له‌نێوان زه‌وی و ئاسماندا هه‌ڵیگرتم و له‌ چه‌ند بینینێكدا منی هێنایه‌ ئۆرشه‌لیم، بۆ داڵانی ده‌روازه‌كه‌ی حه‌وشه‌ی ناوه‌وه‌، ئه‌وه‌ی ڕووه‌و باكووره‌ كه‌ دیوه‌خانی ئه‌و په‌یكه‌ره‌یه‌[b] كه‌ ئیره‌یی[c] خودا ده‌جۆشێنێت.
4
شكۆمه‌ندی خودای ئیسرائیل له‌وێ بوو، وه‌ك ئه‌و بینینه‌ی كه‌ له‌ ده‌شته‌كه‌ بۆم ئاشكرا كرا.
5
ئینجا پێی فه‌رمووم: «ئه‌ی كوڕی مرۆڤ، چاوت به‌ره‌و ڕێگای باكوور هه‌ڵبڕه‌.» چاوم به‌ره‌و ڕێگای باكوور هه‌ڵبڕی و ئه‌و په‌یكه‌ره‌م بینی كه‌ ئیره‌یی خودا ده‌جۆشێنێت، له‌لای ده‌رگای باكووری حه‌وشه‌ی قوربانگاكه‌، به‌رامبه‌ر ده‌روازه‌ی باكوور.
6
پاشان پێی فه‌رمووم: «ئه‌ی كوڕی مرۆڤ، بینیت چی ده‌كه‌ن؟ ئه‌و قێزه‌ونییه‌ گه‌ورانه‌ی كه‌ بنه‌ماڵه‌ی ئیسرائیل لێره‌ ده‌یكه‌ن، بۆ ئه‌وه‌ی له‌ پیرۆزگاكه‌م دوورم بخه‌نه‌وه‌؟ به‌ڵام هێشتا شتی قێزه‌ونتریش ده‌بینیت.»
7
ئینجا منی هێنایه‌ به‌ر ده‌رگای حه‌وشه‌كه‌، جا ته‌ماشام كرد و كونێكم له‌ دیواره‌كه‌ بینی.
8
پێی فه‌رمووم: «ئه‌ی كوڕی مرۆڤ، ئێستا دیواره‌كه‌ هه‌ڵكۆڵه‌.» منیش دیواره‌كه‌م هه‌ڵكۆڵی و ده‌رگایه‌كم بینییه‌وه‌.
9
پێی فه‌رمووم: «بڕۆ ژووره‌وه‌ و ئه‌و نه‌ریته‌ قێزه‌ونه‌ خراپانه‌ ببینه‌ كه‌ له‌وێ ده‌یكه‌ن.»
10
منیش چوومه‌ ژووره‌وه‌ و سه‌یرم كرد، ئه‌وه‌تا شێوه‌ی هه‌موو جۆره‌ خشۆكێك و گیانله‌به‌ری گڵاو و هه‌موو بته‌كانی بنه‌ماڵه‌ی ئیسرائیل له‌سه‌ر دیواره‌كه‌ به‌ هه‌ر چوارده‌وریدا وێنه‌ی كێشراوه‌.
11
حه‌فتا پیاو له‌ پیرانی بنه‌ماڵه‌ی ئیسرائیل له‌به‌رده‌میان وه‌ستابوون و یازه‌نیاهوی كوڕی شافانیش له‌ناوه‌ڕاستیان وه‌ستابوو. هه‌ركه‌سێك بخووردانی خۆی به‌ده‌سته‌وه‌ بوو، بۆنی دووكه‌ڵی بخووریش هه‌ڵده‌ستا.
12
پێی فه‌رمووم: «ئه‌ی كوڕی مرۆڤ، بینیت پیرانی بنه‌ماڵه‌ی ئیسرائیل له‌ تاریكیدا چی ده‌كه‌ن، هه‌ركه‌سه‌ و له‌ نزرگه‌ی بته‌كه‌ی خۆی؟ چونكه‌ ده‌ڵێن: ”یه‌زدان نامانبینێت، یه‌زدان خاكه‌كه‌ی به‌جێهێشتووه‌.“»
13
ئینجا پێی فه‌رمووم: «هێشتا ده‌گه‌ڕێیته‌وه‌ و كاری قێزه‌ونتریش ده‌بینیت كه‌ ئه‌وان ده‌یكه‌ن!»
14
پاشان منی هێنایه‌ داڵانی ده‌روازه‌ی ماڵی یه‌زدان، ئه‌وه‌ی ڕووه‌و باكووره‌، ئه‌وه‌تا ژنان دانیشتوون و بۆ ته‌مووز[d] ده‌گریێن.
15
پێی فه‌رمووم: «ئه‌ی كوڕی مرۆڤ، ئه‌مه‌ت بینی؟ هێشتا ده‌گه‌ڕێیته‌وه‌ و كاری قێزه‌ونتریش ده‌بینیت.»
16
ئینجا منی هێنایه‌ حه‌وشه‌كه‌ی ناوه‌وه‌ی ماڵی یه‌زدان، ئه‌وه‌تا له‌لای داڵانی پیرۆزگای یه‌زدان له‌نێوان هه‌یوان و قوربانگاكه‌، نزیكه‌ی بیست و پێنج پیاو پشتیان له‌ په‌رستگای یه‌زدانه‌ و ڕوویان له‌ ڕۆژهه‌ڵاته‌، ڕووه‌و ڕۆژهه‌ڵات كڕنۆشیان بۆ خۆر بردووه‌.
17
پێی فه‌رمووم: «ئه‌ی كوڕی مرۆڤ، بینیت؟ ئایا ئه‌و كرده‌وه‌ قێزه‌ونانه‌ی بنه‌ماڵه‌ی یه‌هودا لێره‌ كردوویانه‌ كه‌مه‌؟ سه‌رباری ئه‌وه‌ش خاكه‌كه‌یان پڕكردووه‌ له‌ سته‌م و ده‌گه‌ڕێنه‌وه‌ بۆ په‌ستكردنم، ببینه‌ چیلكه‌ دار له‌ لووتیان نزیك ده‌كه‌نه‌وه‌[e] .
18
هه‌روه‌ها منیش به‌ تووڕه‌ییه‌وه‌ هه‌ڵسوكه‌وتیان له‌گه‌ڵدا ده‌كه‌م، چاوه‌كانم به‌زه‌ییان نایه‌ته‌وه‌ و ده‌ستم لێیان ناپارێزم. ئه‌گه‌ر به‌ ده‌نگی به‌رز له‌ گوێمدا هاوار بكه‌ن گوێیان لێ ناگرم.»
  1. a. 8‏:1 مه‌به‌ست له‌و ماوه‌یه‌ له‌دوای ڕاپێچكردنی یه‌هۆیاكینی پاشای یه‌هودا بۆ بابل، كه‌ به‌رامبه‌ر به‌ ساڵنامه‌ی ئێستا ده‌كاته‌ حه‌ڤده‌ی مانگی نۆ ساڵی 592ی پێش زایین.
  2. b. 8‏:3 مه‌به‌ست له‌ په‌یكه‌ری ئه‌شێره‌ی خواژنه‌ كه‌نعانییه‌كانه‌ كه‌ خودای زاوزێ بوو، خه‌ڵكی له‌ ده‌وروبه‌ری وه‌ك جۆرێك له‌ په‌رستن هه‌موو داوێنپیسییه‌كیان ده‌كرد. بڕوانه‌ \+xt دووه‌م پاشایان 21‏:7‏\+xt*.
  3. c. 8‏:3 ئیره‌یی: واتای هه‌ڵوێستی توندی خودا به‌رامبه‌ر به‌ بتپه‌رستی، چونكه‌ خودا ده‌یه‌وێت ته‌نها ئه‌و بپه‌رسترێت.
  4. d. 8‏:14 ته‌مووز: خودای زاوزێ و خوداوه‌ندی جیهانی خواره‌وه‌، واته‌ جیهانی مردووان.
  5. e. 8‏:17 هێمایه‌كی ئاشورییه‌كان بوو بۆ په‌رستنی خوداوه‌نده‌كانیان.