عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
بارگرانییه‌كم له‌سه‌ر زه‌وی بینیوه‌ كه‌ ئاده‌میزاد خراپ گیرۆده‌ بوون به‌ ده‌ستیه‌وه‌،
2
كه‌سێك خودا ده‌وڵه‌مه‌ندی و سامان و ڕێزی پێدابێت و هیچ كه‌می نه‌بێت له‌وه‌ی گیانی ئاره‌زووی ده‌كات، به‌ڵام خودا ده‌سه‌ڵاتی پێنه‌داوه‌ بۆ ئه‌وه‌ی بیخوات، به‌ڵكو بێگانه‌ ده‌یخوات، ئه‌مه‌ بێ واتایه‌ و ده‌ردێكی خراپه‌.
3
ئه‌گه‌ر كه‌سێك سه‌د منداڵی هه‌بێت و ساڵانێكی زۆر بژیێت و ته‌مه‌نی زۆر بێت، به‌ڵام گیانی تێر خۆشی نه‌بێت و هه‌روه‌ها ناشتنی بۆ نه‌بێت، ده‌ڵێم: له‌بارچووێك له‌و باشتره‌،
4
چونكه‌ بێ واتایانه‌ دێت و به‌ تاریكیدا ده‌ڕوات، ناویشی به‌ تاریكی داده‌پۆشرێت.
5
هه‌روه‌ها نه‌ خۆری بینی و نه‌ ده‌شزانێت، ئه‌م ئاسووده‌تره‌ له‌و كه‌سه‌.
6
ئه‌گه‌ر هه‌زار ساڵ دووباره‌ش بژیێت به‌ڵام خۆشی نه‌بینێت، ئایا هه‌مووان بۆ یه‌ك شوێن ناڕۆن؟
7
هه‌موو ماندووبوونی مرۆڤ بۆ ده‌مییه‌تی،
به‌ڵام هه‌رگیز تێر ناخوات.
8
دانا چی له‌ گێل زیاتره‌؟
چی یارمه‌تی هه‌ژار ده‌دات
كه‌ ئه‌و بزانێت چۆن هه‌ڵسوكه‌وت
له‌گه‌ڵ ئه‌وانه‌ی كه‌ له‌ ژیاندان؟
9
ئه‌وه‌ی هه‌ته‌ و له‌به‌رچاوته‌
باشتره‌ له‌وه‌ی كه‌ نیته‌ و ئاره‌زووت لێیه‌تی.
ئه‌مه‌ش بێ واتایه‌ و گڤه‌ی بایه‌.
10
ئه‌وه‌ی هه‌بووه‌ له‌ كۆنه‌وه‌ ناوی لێنراوه‌ و
زانراوه‌.
مرۆڤ ناتوانێت ململانێ له‌گه‌ڵ یه‌كێك بكات
كه‌ له‌ خۆی به‌هێزتره‌.
11
ئه‌وه‌نده‌ قسه‌ زیاد ده‌بێت،
ئه‌وه‌نده‌ سوودی كه‌م ده‌بێته‌وه‌،
جا مرۆڤ چی بۆ ده‌مێنێته‌وه‌؟
12
كێ ده‌زانێت چی باشه‌ بۆ مرۆڤ له‌ ژیاندا كه‌ درێژی ته‌مه‌نی بێ واتا وه‌ك سێبه‌ر به‌سه‌رده‌چێت؟ كێ به‌ مرۆڤ ڕاده‌گه‌یه‌نێت پاش ئه‌و له‌سه‌ر زه‌وی چی ڕووده‌دات؟