عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
پیاوێك له‌ بینینی دانیال 
1
له‌ ساڵی سێیه‌می كۆرشی پاشای فارس، په‌یامێك بۆ دانیال ئاشكراكرا، كه‌ ناونرابوو بێلته‌شه‌سر. په‌یامێكی ڕاست بوو سه‌باره‌ت به‌ جه‌نگی گه‌وره‌. تێگه‌یشتنی په‌یامه‌كه‌ له‌ ڕێگه‌ی بینینێكه‌وه‌ بۆی هات.
2
له‌و ڕۆژانه‌دا، من كه‌ دانیالم سێ هه‌فته‌ی ته‌واو شیوه‌نم گێڕا.
3
هیچ خواردنێكی خۆشم نه‌خوارد، گۆشت و شه‌راب نه‌چووه‌ ده‌ممه‌وه‌، بۆنم له‌ خۆم نه‌دا هه‌تا سێ هه‌فته‌كه‌ ته‌واو بوو.
4
له‌ ڕۆژی بیست و چواری مانگی یه‌كدا كاتێك له‌سه‌ر كه‌ناری ڕووباره‌ گه‌وره‌كه‌ بووم كه‌ دجله‌یه‌،
5
سه‌رم هه‌ڵبڕی و ته‌ماشام كرد، پیاوێك كه‌تانی له‌به‌ردا بوو، پشتێنێكی زێڕی ئوفازیشی له‌ كه‌مه‌ری به‌ستبوو.
6
له‌شی وه‌ك زه‌به‌رجه‌د، ڕووی وه‌ك شێوه‌ی بروسكه‌، چاوه‌كانی وه‌ك چرای ئاگر، قۆڵ و قاچه‌كانی وه‌ك بریسكه‌ی بڕۆنزی سافكراو بوون و هه‌روه‌ها ده‌نگیشی وه‌ك ده‌نگی خه‌ڵكێكی ئێجگار زۆر بوو.
7
من كه‌ دانیالم، به‌ ته‌نها من بینینه‌كه‌م بۆ ئاشكرا كرا، ئه‌و پیاوانه‌ی له‌گه‌ڵمدا بوون نه‌یانبینی، به‌ڵام ترسێكی گه‌وره‌ له‌سه‌ریان نیشت، ڕایانكرد و خۆیان شارده‌وه‌.
8
جا من به‌ ته‌نها مامه‌وه‌ و ته‌ماشای ئه‌م بینینه‌ گه‌وره‌یه‌م ده‌كرد. هێزم تێدا نه‌ما و ڕووم ڕه‌نگی مردووی لێ نیشت، له‌ په‌لوپۆ كه‌وتم.
9
گوێم له‌ قسه‌كانی بوو، له‌و كاته‌ش كه‌ گوێم لێی ده‌گرت، چوومه‌ ناو خه‌وێكی قووڵه‌وه‌، ڕووشم ڕووه‌و زه‌وی بوو.
10
ده‌ستێكم به‌ركه‌وت و به‌ له‌رزه‌وه‌ له‌سه‌ر ده‌ست و ئه‌ژنۆم داینام.
11
پێی گوتم: «ئه‌ی دانیال، ئه‌ی پیاوه‌ خۆشه‌ویسته‌كه‌! ئه‌و قسه‌یه‌ی كه‌ پێت ده‌ڵێم لێی تێبگه‌ و هه‌سته‌ سه‌ر پێت، چونكه‌ من ئێستا نێردراوم بۆ لای تۆ.» كه‌ به‌م شێوه‌یه‌ قسه‌ی له‌گه‌ڵ كردم، به‌ له‌رزه‌وه‌ هه‌ستامه‌ سه‌ر پێ.
12
پێی گوتم: «ئه‌ی دانیال، مه‌ترسه‌. له‌به‌ر ئه‌وه‌ی هه‌ر له‌ یه‌كه‌م ڕۆژه‌وه‌ كه‌ مكوڕ بوویت تێبگه‌یت و له‌به‌رده‌م خوداكه‌ت خۆتت زه‌لیل كرد، پاڕانه‌وه‌كه‌ت بیسترا، منیش له‌به‌ر ئه‌مانه‌ هاتووم.
13
سه‌رۆكی ڕۆحه‌ پیسه‌كانی شانشینی فارس ماوه‌ی بیست و یه‌ك ڕۆژ به‌ره‌نگارم بووه‌وه‌، ئینجا میكائیل كه‌ یه‌كێك له‌ سه‌رۆك فریشته‌كانه‌ بۆ هاریكاریم هات، چونكه‌ من له‌وێ له‌لای پاشای فارس دواخرابووم.
14
جا هاتووم بۆ ئه‌وه‌ی ئه‌وه‌ت تێبگه‌یه‌نم كه‌ له‌ ڕۆژی كۆتایی به‌سه‌ر گه‌له‌كه‌تدا دێت، چونكه‌ بابه‌تی بینینه‌كه‌ ڕۆژانی داهاتووه‌.»
15
كاتێك ئه‌و قسانه‌ی له‌گه‌ڵمدا ده‌كرد، سه‌رم دانه‌واند و بێده‌نگ بووم.
16
ئینجا فریشته‌كه‌، كه‌ له‌ شێوه‌ی مرۆڤ بوو، ده‌ستی له‌ لێوه‌كانم دا، منیش ده‌مم كرده‌وه‌ و قسه‌م كرد. به‌وه‌م گوت كه‌ له‌به‌رده‌ممدا وه‌ستابوو: «گه‌وره‌م، به‌ بینینه‌كه‌ ئازارێكی زۆرم چێژت و له‌ په‌لوپۆ كه‌وتم.
17
ئه‌ی گه‌وره‌م، من خزمه‌تكاری تۆم، چۆن قسه‌ت له‌گه‌ڵ بكه‌م؟ من ئێستا هێزم لێ بڕاوه‌ و هه‌ناسه‌م تێدا نه‌ماوه‌.»
18
دووباره‌ ئه‌وه‌ی له‌ مرۆڤ ده‌چوو ده‌ستی لێم دا و هێزی هێنایه‌وه‌ به‌رم.
19
گوتی: «مه‌ترسه‌، ئه‌ی پیاوه‌ خۆشه‌ویسته‌كه‌. سڵاوت لێ بێت! ئازابه‌ و به‌هێزبه‌!»
كاتێك قسه‌ی له‌گه‌ڵدا كردم، به‌هێز بووم و گوتم: «با گه‌وره‌م قسه‌ بكات، چونكه‌ به‌هێزت كردم.»
20
ئه‌ویش گوتی: «ئایا ده‌زانیت بۆچی هاتمه‌ لات؟ ئێستاش ده‌گه‌ڕێمه‌وه‌ و له‌گه‌ڵ سه‌رۆكی ڕۆحه‌ پیسه‌كانی فارس ده‌جه‌نگم، دوای ئه‌وه‌ی من ده‌ڕۆم سه‌رۆكی ڕۆحه‌ پیسه‌كانی یۆنان دێت.
21
به‌ڵام ئێستا ئه‌وه‌ت پێ ده‌ڵێم كه‌ له‌ په‌ڕتووكی ڕاستیدا نووسراوه‌. كه‌س له‌ دژی ئه‌م سه‌رۆكانه‌ پشتگیریم ناكات، جگه‌ له‌ میكائیلی سه‌رۆكتان.