عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
مه‌رگی ئه‌بشالۆم 
1
داود سه‌رژمێری ئه‌و پیاوانه‌ی كرد كه‌ له‌گه‌ڵیدا بوون، فه‌رمانده‌ی هه‌زاران و سه‌دانی به‌سه‌ره‌وه‌ دانان.
2
ئینجا داود سێیه‌كی سه‌ربازه‌كانی به‌ ده‌ستی یۆئابدا نارد، سێیه‌كیش به‌ ده‌ستی ئه‌بیشه‌ی كوڕی چه‌رویای برای یۆئاب، سێیه‌كیش به‌ ده‌ستی ئیتتایی گه‌تی. پاشا به‌ سوپاكه‌ی گوت: «هه‌روه‌ها به‌ دڵنیاییه‌وه‌ منیش له‌گه‌ڵتان ده‌بم.»
3
به‌ڵام سه‌ربازه‌كان گوتیان: «مه‌چووه‌ ده‌ره‌وه‌، چونكه‌ ئه‌گه‌ر ئێمه‌ هه‌ڵبێین گوێمان پێ ناده‌ن، ئه‌گه‌ر نیوه‌شمان لێ بمرێت هه‌ر گوێمان پێ ناده‌ن، به‌ڵام تۆ هێنده‌ی ده‌ هه‌زار كه‌سی له‌ ئێمه‌، ئێستاش باشتره‌ كه‌ تۆ بۆ یارمه‌تیدانمان له‌ شاره‌كه‌ بیت.»
4
پاشاش وه‌ڵامی دانه‌وه‌: «ئه‌وه‌ی پێتان باشه‌ ده‌یكه‌م.»
ئیتر پاشا له‌لای ده‌روازه‌كه‌وه‌ وه‌ستا و هه‌موو پیاوان به‌ یه‌كه‌ی سه‌دان و به‌ هه‌زاران چوونه‌ ده‌ره‌وه‌.
5
پاشا فه‌رمانی به‌ یۆئاب و ئه‌بیشه‌ی و ئیتتای كرد و گوتی: «له‌به‌ر من، له‌گه‌ڵ ئه‌و گه‌نجه‌ نه‌رم بن، له‌گه‌ڵ ئه‌بشالۆم.» هه‌موو سه‌ربازه‌كانیش گوێیان لێبوو كاتێك پاشا سه‌باره‌ت به‌ ئه‌بشالۆم فه‌رمانی به‌ سه‌ركرده‌كان كرد.
6
سوپای داود چوونه‌ ده‌ره‌وه‌ بۆ به‌ره‌نگاربوونه‌وه‌ی ئیسرائیل له‌ ده‌شتوده‌ر، شه‌ڕه‌كه‌ش له‌ دارستانی ئه‌فرایم ڕوویدا.
7
له‌وێ سوپای ئیسرائیل له‌به‌رده‌م خزمه‌تكاره‌كانی داود شكان، له‌و ڕۆژه‌دا كوشتارێكی گه‌وره‌ ڕوویدا، بیست هه‌زار پیاو كوژرا.
8
شه‌ڕه‌كه‌ له‌ هه‌موو ناوچه‌كه‌دا بڵاو بووه‌وه‌، له‌و ڕۆژه‌دا ئه‌وانه‌ی له‌ناو دارستانه‌كه‌دا له‌ناوچوون زیاتر بوون له‌وانه‌ی به‌ شمشێر له‌ناوچوون.
9
ئه‌بشالۆم به‌ سواری هێستره‌كه‌یه‌وه‌ به‌ڕێكه‌وت تووشی خزمه‌تكاره‌كانی داود بوو. هێستره‌كه‌ چووه‌ ژێر لقه‌كانی دار به‌ڕووێكی گه‌وره‌ و سه‌ری ئه‌بشالۆم له‌نێوان لقه‌كانی دار به‌ڕووه‌كه‌دا گیربوو، له‌نێوان ئاسمان و زه‌ویدا هه‌ڵواسرا، هێستره‌كه‌ی ژێریشی ڕۆیشت.
10
پیاوێك بینی و به‌ یۆئابی ڕاگه‌یاند: «هه‌ر ئێستا ئه‌بشالۆمم بینی به‌ دار به‌ڕووه‌كه‌وه‌ هه‌ڵواسرابوو.»
11
یۆئابیش به‌و پیاوه‌ی گوت كه‌ پێی ڕاگه‌یاند: «هه‌ر ئێستا بینیت؟ ئه‌ی بۆچی له‌وێ به‌ زه‌ویتدا نه‌دا، هه‌تا ده‌ شاقل[a] زیو و پشتێنێكت بده‌مێ؟»
12
به‌ڵام پیاوه‌كه‌ به‌ یۆئابی گوت: «ته‌نانه‌ت ئه‌گه‌ر هه‌زار شاقل[b] زیویش بكێشن و به‌ ده‌ستم بگات، به‌ هیچ جۆرێك ده‌ستم بۆ كوڕی پاشا درێژ ناكه‌م، چونكه‌ پاشا له‌به‌رده‌می ئێمه‌ فه‌رمانی به‌ تۆ و ئه‌بیشه‌ی و ئیتتای كرد و گوتی: ”له‌به‌ر من ئه‌و گه‌نجه‌، ئه‌بشالۆم بپارێزن و ده‌ستی لێ مه‌ده‌ن.“
13
ئه‌گه‌ر نا سته‌مم له‌گه‌ڵ خۆم ده‌كرد، پاشاش هیچی لێ ناشاردرێته‌وه‌، تۆش له‌ دژم ده‌وه‌ستایت.»
14
یۆئابیش گوتی: «من به‌م شێوه‌یه‌ له‌به‌رده‌متدا ئارام ناگرم.» جا سێ ڕمی گرت به‌ ده‌ستیه‌وه‌ و له‌ دڵی ئه‌بشالۆمی گرت كه‌ هێشتا له‌ناو دار به‌ڕووه‌كه‌دا زیندوو بوو.
15
ده‌ خزمه‌تكار كه‌ هه‌ڵگرانی تفاقه‌كانی یۆئاب بوون چوارده‌وریان دا، له‌ ئه‌بشالۆمیان دا و كوشتیان.
16
ئه‌وسا یۆئاب فووی به‌ كه‌ڕه‌نادا كرد و ڕێگای له‌سه‌ر سه‌ربازه‌كان گرت، سه‌ربازه‌كانیش له‌ ڕاونانی ئیسرائیل گه‌ڕانه‌وه‌.
17
ئیتر ئه‌بشالۆمیان هه‌ڵگرت و له‌ دارستانه‌كه‌دا فڕێیاندایه‌ ناو چاڵێكی گه‌وره‌، به‌ردێكی زۆریان له‌سه‌ری كه‌ڵه‌كه‌ كرد. هه‌موو ئیسرائیلیش هه‌ریه‌كه‌ و بۆ شوێنی خۆی هه‌ڵات.
18
پێشتر ئه‌بشالۆم كه‌ هێشتا زیندوو بوو، ئه‌و كۆڵه‌كه‌یه‌ی كه‌ له‌ دۆڵی پاشادا بوو بردبووی و بۆ خۆی دایمه‌زراندبوو، چونكه‌ گوتبووی: «كوڕێكم نییه‌ بۆ یادكردنه‌وه‌ی ناوه‌كه‌م.» كۆڵه‌كه‌كه‌شی به‌ ناوی خۆیه‌وه‌ ناونا، هه‌تا ئه‌مڕۆش پێ ده‌گوترێت «یاده‌وه‌ری ئه‌بشالۆم».
گریانی داود بۆ ئه‌بشالۆم 
19
ئه‌وه‌ بوو ئه‌حیمه‌عه‌چی كوڕی سادۆق گوتی: «با ڕابكه‌م و مژده‌ بده‌مه‌ پاشا: ”یه‌زدان حه‌قی بۆ سه‌ندیته‌وه‌ و له‌ دوژمنه‌كانت ڕزگاری كردیت.“»
20
یۆئابیش پێی گوت: «تۆ ئه‌مڕۆ خاوه‌ن مژده‌ نیت، له‌ ڕۆژێكی دیكه‌دا مژده‌ بده‌ و ئه‌مڕۆ مژده‌ مه‌ده‌، چونكه‌ كوڕی پاشا مردووه‌.»
21
یۆئاب به‌ كوشییه‌كی[c] گوت: «بڕۆ و ئه‌وه‌ی بینیت به‌ پاشای ڕابگه‌یه‌نه‌.» كوشییه‌كه‌ش كڕنۆشی بۆ یۆئاب برد و ڕایكرد.
22
ئه‌حیمه‌عه‌چی كوڕی سادۆق دووباره‌ به‌ یۆئابی گوت: «هه‌رچییه‌ك بووه‌ لێمگه‌ڕێ با منیش به‌دوای كوشییه‌كه‌دا ڕابكه‌م.»
یۆئابیش گوتی: «كوڕم، تۆ بۆ ڕاده‌كه‌یت، له‌ كاتێكدا مژده‌یه‌كت نییه‌ شایانی پاداشت بێت؟»
23
ئه‌ویش گوتی: «هه‌رچی بێت، ڕاده‌كه‌م.»
یۆئابیش پێی گوت: «ڕابكه‌!» ئه‌وسا ئه‌حیمه‌عه‌چ به‌ ڕێگای پێده‌شته‌كه‌دا ڕایكرد و به‌ پێش كوشییه‌كه‌ كه‌وت.
24
كاتێك داود له‌نێوان ده‌روازه‌كانی ژووره‌وه‌ و ده‌ره‌وه‌ دانیشتبوو، ئێشكگره‌كه‌ سه‌ركه‌وته‌ سه‌ربانی ده‌رگاكه‌ بۆ سه‌ر شووراكه‌، چاوی هه‌ڵبڕی و بینی پیاوێك به‌ ته‌نها ڕاده‌كات.
25
ئێشكگره‌كه‌ هاواری كرد و به‌ پاشای ڕاگه‌یاند.
پاشاش گوتی: «ئه‌گه‌ر به‌ ته‌نها بێت مژده‌ی پێیه‌.» پیاوه‌كه‌ش ڕایده‌كرد و نزیك ده‌بووه‌وه‌.
26
ئینجا ئێشكگره‌كه‌ پیاوێكی دیكه‌ی بینی ڕاده‌كات، بانگی ده‌رگاوانه‌كه‌ی كرد و پێی گوت: «ئه‌وه‌تا پیاوێك به‌ ته‌نها ڕاده‌كات.»
پاشاش گوتی: «ئه‌مه‌ش هه‌ر مژده‌ی پێیه‌.»
27
ئێشكگره‌كه‌ گوتی: «من ده‌بینم كه‌ ڕاكردنی یه‌كه‌م وه‌ك ڕاكردنی ئه‌حیمه‌عه‌چی كوڕی سادۆق وایه‌.»
پاشاش گوتی: «ئه‌مه‌ پیاوچاكه‌ و مژده‌یه‌كی چاكیش ده‌هێنێت.»
28
ئه‌حیمه‌عه‌چ هاواری كرد و به‌ پاشای گوت: «سڵاو.» كڕنۆشی بۆ پاشا برد و سه‌ری خسته‌ سه‌ر زه‌وی، گوتی: «ستایش بۆ یه‌زدانی په‌روه‌ردگارت، ئه‌وه‌ی ئه‌و خه‌ڵكه‌ی ڕاده‌ست كرد كه‌ له‌ پاشای گه‌وره‌م هه‌ستابوون!»
29
پاشاش گوتی: «ئه‌و گه‌نجه‌، ئه‌بشالۆم سه‌لامه‌ته‌؟»
ئه‌حیمه‌عه‌چیش گوتی: «گه‌وره‌م، كاتێك كه‌ یۆئابی به‌رده‌ستی تایبه‌تی تۆ منی ده‌نارد، شڵه‌ژانێكی گه‌وره‌م بینی، به‌ڵام نه‌مزانی چی بوو.»
30
پاشاش گوتی: «بسووڕێوه‌ و لێره‌ ڕابوه‌سته‌.» ئه‌ویش سووڕایه‌وه‌ و ڕاوه‌ستا.
31
له‌و كاته‌دا كوشییه‌كه‌ش هات، كوشییه‌كه‌ گوتی: «پاشای گه‌وره‌م مژده‌م بده‌رێ، چونكه‌ یه‌زدان ئه‌مڕۆ حه‌قی بۆ سه‌ندیته‌وه‌ و له‌ هه‌موو ئه‌وانه‌ی لێت ڕاست بوونه‌وه‌ ڕزگاری كردیت!»
32
پاشاش به‌ كوشییه‌كه‌ی گوت: «ئه‌و گه‌نجه‌، ئه‌بشالۆم سه‌لامه‌ته‌؟»
كوشییه‌كه‌ش گوتی: «با دوژمنه‌كانی پاشای گه‌وره‌م و هه‌موو ئه‌وانه‌ی بۆ خراپه‌ له‌ دژی تۆ سه‌رهه‌ڵده‌ده‌ن وه‌ك ئه‌و گه‌نجه‌یان لێ بێت.»
33
جا پاشا نیگه‌ران بوو، ده‌گریا و سه‌ركه‌وته‌ ژووری سه‌ر ده‌روازه‌كه‌، به‌ ده‌م ڕۆیشتنه‌وه‌ ئاوای ده‌گوت: «كوڕه‌كه‌م ئه‌بشالۆم! كوڕه‌كه‌م، كوڕه‌كه‌م ئه‌بشالۆم! خۆزگه‌ له‌ جێی تۆ بمردبامایه‌، كوڕه‌كه‌م ئه‌بشالۆم! كوڕه‌كه‌م!»
  1. a. 18‏:11 نزیكه‌ی 115 گرام.
  2. b. 18‏:12 نزیكه‌ی 12 كیلۆگرام.
  3. c. 18‏:21 له‌ وڵاتێكه‌ له‌ سه‌رووی ڕووباری نیل.