عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
نه‌خۆشكه‌وتنی حه‌زقیا 
1
له‌و ڕۆژانه‌ی[a] حه‌زقیا نه‌خۆش كه‌وت، له‌ سه‌ره‌ مه‌رگ بوو، ئیشایا پێغه‌مبه‌ر كوڕی ئامۆچ هات بۆ لای و پێی گوت: «یه‌زدان ئه‌مه‌ ده‌فه‌رموێت: وه‌سیه‌ت بۆ ماڵه‌كه‌ت بكه‌، چونكه‌ ده‌مریت و ناژیت.»
2
حه‌زقیا ڕووی له‌ دیواره‌كه‌ كرد و نوێژی بۆ یه‌زدان كرد، گوتی:
3
«ئای یه‌زدان، ئه‌وه‌ت له‌یاد بێت كه‌ چۆن به‌ دڵسۆزی و پڕ به‌ دڵ دۆستایه‌تیم كردیت، ئه‌وه‌ی پێت باش بوو كردم.» ئینجا حه‌زقیا به‌كوڵ گریا.
4
به‌ر له‌وه‌ی ئیشایا هه‌یوانی كۆشكه‌كه‌ به‌جێبهێڵێت، فه‌رمایشتی یه‌زدانی بۆ هات، فه‌رمووی:
5
«بگه‌ڕێوه‌ و به‌ حه‌زقیای فه‌رمانڕه‌وای گه‌له‌كه‌م بڵێ: ”یه‌زدان، په‌روه‌ردگاری داودی باپیره‌ گه‌وره‌ت ئه‌مه‌ ده‌فه‌رموێت: گوێم له‌ پاڕانه‌وه‌كه‌ت بوو و فرمێسكه‌كانتم بینی، ئێستا چاكت ده‌كه‌مه‌وه‌ و له‌ ڕۆژی سێیه‌م ده‌چیته‌ په‌رستگای یه‌زدان.
6
پازده‌ ساڵ له‌ ته‌مه‌نت زیاد ده‌كه‌م و له‌ ده‌ستی پاشای ئاشور فریای خۆت و ئه‌م شاره‌ش ده‌كه‌وم، له‌ پێناوی خۆم و له‌ پێناوی داودی به‌نده‌م به‌رگری له‌م شاره‌ ده‌كه‌م.“»
7
ئینجا ئیشایا گوتی: «نیوه‌لمه‌كێك[b] له‌ هه‌نجیر دروستبكه‌ن.» ئه‌وانیش هێنایان و خستیانه‌ سه‌ر دومه‌ڵه‌كه‌ و چاك بووه‌وه‌.
8
حه‌زقیا له‌ ئیشایای پرسی بوو: «ئه‌و نیشانه‌یه‌ چییه‌ كه‌ یه‌زدان چاكم ده‌كاته‌وه‌ و له‌ ڕۆژی سێیه‌م ده‌چمه‌ په‌رستگای یه‌زدان؟»
9
ئیشایا وه‌ڵامی دایه‌وه‌: «یه‌زدان ئه‌و شته‌ ده‌كات كه‌ پێشتر به‌ڵێنی پێدابووی. ئه‌مه‌ له‌لایه‌ن یه‌زدانه‌وه‌ نیشانه‌یه‌ بۆت: ئایا ده‌ته‌وێ سێبه‌ر ده‌ پله‌ بچێته‌ پێش یان ده‌ پله‌ بگه‌ڕێته‌وه‌ دواوه‌؟»[c]
10
حه‌زقیاش گوتی: «بۆ سێبه‌ر ئاسانه‌ ده‌ پله‌ بچێته‌ پێش. كه‌واته‌ وا بكه‌ ده‌ پله‌ بگه‌ڕێته‌وه‌ دواوه‌.»
11
ئینجا ئیشایای پێغه‌مبه‌ر نزای بۆ یه‌زدان كرد و ئه‌ویش ده‌ پله‌ سێبه‌ری گه‌ڕانده‌وه‌ دواوه‌، به‌پێی پله‌به‌ندییه‌كه‌ی ئاحاز پێی هاته‌ خواره‌وه‌.
نێردراوانی بابل 
12
له‌و كاته‌دا مه‌رۆده‌خ به‌له‌دانی كوڕی به‌له‌دانی پاشای بابل نامه‌ و دیاری بۆ حه‌زقیا نارد، چونكه‌ بیستی كه‌ حه‌زقیا نه‌خۆش كه‌وتووه‌.
13
حه‌زقیا پێشوازی لێكردن و هه‌موو ماڵ و سامانه‌كه‌ی پیشان دان، له‌ زێڕ و زیو و بۆن و زه‌یتی چاك و جبه‌خانه‌كه‌ی و هه‌موو ئه‌و شتانه‌ی كه‌ له‌ گه‌نجینه‌كانی بوون. هیچ شتێك له‌ كۆشكه‌كه‌ی و له‌ شانشینه‌كه‌ی نه‌مایه‌وه‌ كه‌ حه‌زقیا پیشانیان نه‌دات.
14
ئینجا ئیشایا پێغه‌مبه‌ر هاته‌ لای حه‌زقیای پاشا و لێی پرسی: «ئه‌و پیاوانه‌ چییان گوت و له‌كوێوه‌ هاتوونه‌ته‌ لات؟»
حه‌زقیاش وه‌ڵامی دایه‌وه‌: «له‌ خاكێكی دووره‌وه‌، له‌ بابله‌وه‌ هاتوون.»
15
ئیشایا لێی پرسی: «چییان له‌ كۆشكه‌كه‌ت بینی؟»
حه‌زقیاش وه‌ڵامی دایه‌وه‌: «هه‌موو شته‌كانی ناو كۆشكه‌كه‌میان بینی، له‌ گه‌نجینه‌كانم هیچ نه‌مایه‌وه‌ كه‌ پیشانیان نه‌ده‌م.»
16
ئینجا ئیشایا به‌ حه‌زقیای گوت: «گوێ له‌ په‌یامی یه‌زدان بگره‌،
17
یه‌زدان ده‌فه‌رموێت: بێگومان سه‌رده‌مێك دێت هه‌موو ئه‌وه‌ی له‌ كۆشكه‌كه‌تدایه‌ و هه‌موو ئه‌وه‌ی باوباپیرانت هه‌تا ئه‌مڕۆ پاشه‌كه‌وتیان كردووه‌ بۆ بابل بار ده‌كرێن، هیچ شتێك به‌جێناهێڵدرێت.
18
له‌ نه‌وه‌كانیشت، ئه‌وانه‌ی له‌ تۆ ده‌بن، ئه‌وانه‌ی بۆت له‌دایك ده‌بن، لێیان ده‌بردرێت و له‌ كۆشكی پاشای بابل ده‌بنه‌ كاربه‌ده‌ستی خه‌سێنراو.»
19
حه‌زقیا وه‌ڵامی ئیشایای دایه‌وه‌ و گوتی: «ئه‌و په‌یامه‌ی یه‌زدان كه‌ به‌ منت دا، په‌یامێكی باشه‌،» چونكه‌ له‌بیری خۆیدا گوتی: «ئایا ئاشتی و ئاسووده‌یی له‌ ماوه‌ی پاشایه‌تی خۆمدا نابێت؟»
20
ڕووداوه‌كانی دیكه‌ی پاشایه‌تی حه‌زقیا، هه‌موو ده‌ستكه‌وته‌كانی و چۆن گۆمه‌كه‌ و جۆگه‌كه‌ی[d] دروستكرد و ئاوی هێنایه‌ ناو شاره‌كه‌وه‌ له‌ په‌ڕتووكی كاروباری ڕۆژانه‌ی پاشاكانی یه‌هودا تۆمار كراون.
21
حه‌زقیا له‌گه‌ڵ باوباپیرانی سه‌ری نایه‌وه‌، ئیتر مه‌نه‌شه‌ی كوڕی له‌دوای خۆی بوو به‌ پاشا.
  1. a. 20‏:1 ڕووداوه‌كانی به‌شی بیست له‌پێش ڕووداوه‌كانی به‌شه‌كانی 19‏–20 ڕوویانداوه‌.
  2. b. 20‏:7 نیوه‌نمه‌ك.
  3. c. 20‏:9 پله‌به‌ندییه‌ك ڕێكخراوه‌ بۆ زانینی كات به‌گوێره‌ی خۆر.
  4. d. 20‏:20 كه‌ناڵێكی ئاوگواستنه‌وه‌ی به‌ درێژایی 520 مه‌تر له‌ به‌رد له‌ژێر زه‌وی دروستكردووه‌. سه‌رچاوه‌ی ئاوه‌كه‌ی له‌ كانی گیحۆن بووه‌ له‌ ده‌ره‌وه‌ی شوورای شاری ئۆرشه‌لیم، ئاوه‌كه‌ی بۆ گۆمی سیلوام ڕاكێشاوه‌.