عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
ڕزگاركردنی شاری قه‌عیلا 
1
كاتێك به‌ داود ڕاگه‌یه‌نرا و گوترا: «فه‌له‌ستییه‌كان له‌ دژی قه‌عیلا ده‌جه‌نگن و جۆخینه‌كان[a] تاڵان ده‌كه‌ن،»
2
ئه‌ویش له‌ یه‌زدانی پرسی و گوتی: «بچم، له‌و فه‌له‌ستییانه‌ بده‌م؟»
یه‌زدانیش به‌ داودی فه‌رموو: «بڕۆ له‌ فه‌له‌ستییه‌كان بده‌ و قه‌عیلا ڕزگار بكه‌.»
3
به‌ڵام پیاوه‌كانی داود پێیان گوت: «ئێمه‌ لێره‌ له‌ یه‌هوداین وا ده‌ترسین، ئه‌ی چه‌ند زیاتر ئه‌گه‌ر له‌ دژی له‌شكری فه‌له‌ستییه‌كان بچینه‌ قه‌عیلا؟»
4
دیسان داود گه‌ڕایه‌وه‌ له‌ یه‌زدانی پرسی، یه‌زدانیش وه‌ڵامی دایه‌وه‌ و فه‌رمووی: «هه‌سته‌ و بڕۆ بۆ قه‌عیلا، چونكه‌ من فه‌له‌ستییه‌كان ده‌ده‌مه‌ ده‌ست تۆ.»
5
ئینجا داود و پیاوه‌كانی چوونه‌ قه‌عیلا، له‌ دژی فه‌له‌ستییه‌كان جه‌نگان و ئاژه‌ڵه‌ ماڵییه‌كانی ئه‌وانیان برد. ئیتر داود زیانێكی گه‌وره‌ی به‌ فه‌له‌ستییه‌كان گه‌یاند و دانیشتووانی قه‌عیلاشی ڕزگار كرد.
6
كه‌ ئه‌بیاتاری كوڕی ئه‌حیمه‌له‌خ بۆ لای داود هه‌ڵاتبوو چووبووه‌ قه‌عیلا، ئێفۆدێكی له‌گه‌ڵ خۆی بردبوو.
ڕاونانی داود له‌لایه‌ن شاوله‌وه‌ 
7
به‌ شاول ڕاگه‌یه‌نرا كه‌ داود هاتووه‌ بۆ قه‌عیلا، شاول گوتی: «خودا داویه‌تییه‌ ده‌ستم، چونكه‌ به‌ هاتنه‌ ژووره‌وه‌ی بۆ ناو شارێك كه‌ ده‌رگا و شمشیره‌ی[b] هه‌یه‌ تێكه‌وت.»
8
ئینجا شاول هه‌موو هێزه‌كانی بۆ جه‌نگ بانگكرد، بۆ دابه‌زین بۆ قه‌عیلا و گه‌مارۆدانی داود و پیاوه‌كانی.
9
كاتێك داود به‌و پیلانگێڕییه‌ خراپه‌ی شاولی زانی، به‌ ئه‌بیاتاری كاهینی گوت: «ئێفۆده‌كه‌ بهێنه‌.»
10
داود گوتی: «ئه‌ی یه‌زدانی په‌روه‌ردگاری ئیسرائیل، به‌نده‌كه‌ت به‌ دڵنیایی بیستوویه‌تی كه‌ شاول ده‌یه‌وێت بێته‌ قه‌عیلا تاوه‌كو به‌هۆی منه‌وه‌ شاره‌كه‌ كاول بكات.
11
ئایا خه‌ڵكی قه‌عیلا ده‌مده‌نه‌ ده‌ستیه‌وه‌؟ ئایا شاول دێت، هه‌روه‌ك به‌نده‌كه‌ت بیستوویه‌تی؟ ئه‌ی یه‌زدانی په‌روه‌ردگاری ئیسرائیل، ئه‌م شتانه‌ بۆ به‌نده‌كه‌ت ئاشكرا بكه‌.»
یه‌زدانیش فه‌رمووی: «دێت.»
12
ئه‌م جاره‌ داود گوتی: «ئایا خه‌ڵكی قه‌عیلا من و پیاوه‌كانم ده‌ده‌نه‌ ده‌ست شاول؟» یه‌زدانیش فه‌رمووی: «به‌ده‌سته‌وه‌تان ده‌ده‌ن.»
13
ئیتر داود و پیاوه‌كانی كه‌ نزیكه‌ی شه‌ش سه‌د كه‌س بوون خۆیان ئاماده‌ كرد و قه‌عیلایان به‌جێهێشت و له‌ شوێنێكه‌وه‌ ده‌چوون بۆ شوێنێكی دیكه‌. كاتێك به‌ شاول ڕاگه‌یه‌نرا كه‌ داود له‌ قه‌عیلا ده‌ربازی بووه‌، به‌دوایاندا نه‌چوو.
14
داودیش له‌ چۆڵه‌وانی له‌ قه‌ڵاكاندا مایه‌وه‌، له‌ چیادا له‌ چۆڵه‌وانی زیف مایه‌وه‌، شاولیش به‌رده‌وام به‌دوایه‌وه‌ بوو، به‌ڵام خودا نه‌یدایه‌ ده‌ست شاول.
15
كاتێك داود له‌ چۆڵه‌وانی زیف له‌ حۆرێش بوو زانی شاول بۆ كوشتنی هاتووه‌ته‌ ده‌ره‌وه‌.
16
جا یۆناتانی كوڕی شاول هه‌ستا و چوو بۆ لای داود بۆ حۆرێش و وای لێكرد بۆ هێزی پشت به‌ خودا ببه‌ستێت،
17
پێی گوت: «مه‌ترسه‌. شاولی باوكم ده‌ستی ناتگاتێ. تۆ ده‌بیته‌ پاشای ئیسرائیل، منیش كه‌سی دووه‌م ده‌بم، ته‌نانه‌ت شاولی باوكیشم ئه‌مه‌ ده‌زانێت.»
18
هه‌ردووكیان په‌یمانێكیان له‌به‌رده‌م یه‌زداندا به‌ست و دوای ئه‌وه‌ یۆناتانیش گه‌ڕایه‌وه‌ بۆ ماڵه‌كه‌ی خۆی، به‌ڵام داود له‌ حۆرێشدا مایه‌وه‌.
19
پاشان زیفییه‌كان سه‌ركه‌وتن بۆ گیڤعا، بۆ لای شاول، گوتیان: «ئایا داود له‌لای ئێمه‌ خۆی نه‌شاردووه‌ته‌وه‌، له‌ناو قه‌ڵاكانی حۆرێش له‌ گردی حه‌كیلا ئه‌وه‌ی به‌لای باشووری یه‌شیمۆنه‌؟
20
ئێستاش ئه‌ی پاشا دابه‌زه‌، هه‌ر كاتێك ویستت دابه‌زه‌، ئێمه‌ش له‌سه‌رمانه‌ بیده‌ینه‌ ده‌ستی پاشا.»
21
شاولیش وه‌ڵامی دانه‌وه‌: «یه‌زدان به‌ره‌كه‌تدارتان بكات، چونكه‌ به‌زه‌ییتان پێمدا هاته‌وه‌،
22
ئێستا بڕۆن و دڵنیابنه‌وه‌، بزانن و ته‌ماشای ئه‌و جێگایه‌ بكه‌ن كه‌ لێی ده‌بێت و كێ له‌وێ بینیویه‌تی. پێم گوتراوه‌ زۆر زۆرزانه‌.
23
ته‌ماشا بكه‌ن و هه‌موو ئه‌و حه‌شارگانه‌ی كه‌ خۆی تێیاندا حه‌شار ده‌دات بزانن و به‌ هه‌واڵی ته‌واوه‌وه‌ بگه‌ڕێنه‌وه‌ بۆ لام، منیش له‌گه‌ڵتاندا دێم، ئه‌گه‌ر له‌و ناوچه‌یه‌ بێت، ئه‌وا له‌نێو هه‌موو خێڵه‌كانی یه‌هودا به‌دوایدا ده‌گه‌ڕێم.»
24
ئینجا هه‌ستان و له‌پێش شاوله‌وه‌ چوون بۆ زیف و له‌و كاته‌دا داود و پیاوه‌كانی له‌ چۆڵه‌وانی ماعۆن بوون، له‌ عه‌راڤا[c] له‌لای باشووری یه‌شیمۆن.
25
شاول و پیاوه‌كانی چوون به‌دوایدا بگه‌ڕێن، به‌ داود ڕاگه‌یه‌نرا و ئه‌ویش دابه‌زی بۆ تاشه‌به‌رده‌كه‌ و له‌ چۆڵه‌وانی ماعۆندا مایه‌وه‌. كاتێك شاول ئه‌مه‌ی بیست، چوو بۆ چۆڵه‌وانی ماعۆن و دوای داود كه‌وت.
26
شاول به‌م لای چیاكه‌دا ده‌ڕۆیشت و داود و پیاوه‌كانیشی به‌ لایه‌كه‌ی دیكه‌دا ده‌ڕۆیشتن، داود به‌ په‌له‌ له‌به‌رده‌م شاولدا هه‌ڵده‌هات، شاول و پیاوه‌كانی خه‌ریك بوون داود و پیاوه‌كانی گه‌مارۆ بده‌ن هه‌تا ده‌ستبه‌سه‌ریان بكه‌ن.
27
له‌م كاته‌دا نێردراوێك هاته‌ لای شاول و گوتی: «خێرا بكه‌ و وه‌ره‌وه‌، چونكه‌ فه‌له‌ستییه‌كان به‌سه‌ر خاكه‌كه‌یاندا داوه‌.»
28
لێره‌دا شاول له‌ ڕاونانی داود گه‌ڕایه‌وه‌ و بۆ به‌ره‌نگاربوونه‌وه‌ی فه‌له‌ستییه‌كان چوو. له‌به‌ر ئه‌وه‌ ئه‌و شوێنه‌ ناونرا تاشه‌به‌ردی جیابوونه‌وه‌.
29
ئینجا داود له‌وێوه‌ سه‌ركه‌وت و له‌ قه‌ڵاكانی كانی گه‌دی مایه‌وه‌.
  1. a. 23‏:1 جۆخین یان سه‌رخه‌رمان ئه‌و زه‌وییه‌ ته‌رخانكراوه‌یه‌ كه‌ له‌لایه‌ن وه‌رزێر و جوتیاره‌وه‌ به‌كارهێنراوه‌ بۆ كوتانی دانه‌وێڵه‌ له‌سه‌ری له‌دوای كۆكردنه‌وه‌ی له‌ كێڵگه‌.
  2. b. 23‏:7 شمشیر، پارچه‌ دارێك بووه‌ له‌ جیاتی قوفڵ له‌ دواوه‌ی ده‌رگا به‌ شێوه‌ی ئاسۆیی دانراوه‌ بۆ داخستنی ده‌رگا.
  3. c. 23‏:24 شیوێك بوو له‌ ده‌ریاچه‌ی جه‌لیله‌وه‌ هه‌تا ده‌ریای مردوو.