عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
ڕه‌تكردنه‌وه‌ی شاول له‌ پاشایه‌تی 
1
ساموئێل به‌ شاولی گوت: «یه‌زدان منی نارد بۆ ئه‌وه‌ی تۆ وه‌ك پاشایه‌ك ده‌ستنیشان بكه‌م له‌سه‌ر ئیسرائیلی گه‌له‌كه‌ی. جا ئێستا گوێت له‌ فه‌رمایشتی یه‌زدان بێت،
2
یه‌زدانی سوپاسالار ئه‌مه‌ ده‌فه‌رموێت: ”سزای[a] عه‌مالێقییه‌كان ده‌ده‌م له‌سه‌ر ئه‌وه‌ی به‌ ئیسرائیلیان كرد، كاتێك له‌سه‌ر ڕێگا له‌ دژیان وه‌ستان كه‌ له‌ میسر هاتنه‌ ده‌ره‌وه‌.
3
ئێستاش بڕۆ گورز له‌ عه‌مالێقییه‌كان بوه‌شێنه‌، هه‌موو ئه‌وه‌ی هه‌یانه‌ به‌ ته‌واوی قڕیان بكه‌[b] ، ده‌ستیان لێ مه‌پارێزه‌ و بیانكوژه‌، پیاو و ژن و منداڵ و شیره‌خۆره‌، گا و مه‌ڕ و وشتر و گوێدرێژ.“»
4
جا شاول سوپاكه‌ی بانگكرد و له‌ ته‌لائیم كۆی كردنه‌وه‌، دوو سه‌د هه‌زار پیاده‌[c] و ده‌ هه‌زار پیاوی یه‌هودا.
5
ئینجا شاول چوو بۆ شاری عه‌مالێق و له‌ شیوه‌كه‌دا خۆی مات كرد،
6
به‌ قێنییه‌كانی گوت: «بڕۆن و دووره‌په‌رێز بن و له‌نێو عه‌مالێقییه‌كان بچنه‌ ده‌ره‌وه‌، نه‌وه‌ك ئێوه‌ش له‌گه‌ڵ ئه‌واندا له‌ناو ببه‌م، چونكه‌ ئێوه‌ چاكه‌تان له‌گه‌ڵ هه‌موو نه‌وه‌ی ئیسرائیلدا كردووه‌، كاتێك له‌ میسره‌وه‌ سه‌ركه‌وتن.» جا قێنییه‌كان خۆیان له‌ عه‌مالێقییه‌كان دووره‌په‌رێز گرت.
7
ئینجا شاول له‌ عه‌مالێقییه‌كانی دا، له‌ حه‌ڤیلایه‌وه‌ هه‌تا شوور كه‌ له‌ ڕۆژهه‌ڵاتی میسره‌.
8
هه‌روه‌ها ئه‌گاگی پاشای عه‌مالێقییه‌كانی به‌ زیندوویی گرت و هه‌موو گه‌له‌كه‌ی به‌ شمشێر به‌ ته‌واوی قڕكرد.
9
به‌ڵام شاول و سوپاكه‌ ده‌ستیان له‌ ئه‌گاگ پاراست، هه‌روه‌ها باشترینی مه‌ڕوماڵات و گاوگۆتاڵ و دابه‌سته‌ و هه‌موو ئه‌وه‌ی باش بوو نه‌یانویست به‌ ته‌واوی قڕیان بكه‌ن، به‌ڵام هه‌موو ئه‌و ماڵه‌ی بێ نرخ و لاواز بوو به‌ ته‌واوی قڕیان كرد.
10
ئینجا فه‌رمایشتی یه‌زدان هات بۆ ساموئێل و فه‌رمووی:
11
«خه‌فه‌تبارم له‌وه‌ی كه‌ شاولم كرده‌ پاشا، چونكه‌ لێم هه‌ڵگه‌ڕاوه‌ته‌وه‌ و فه‌رمانه‌كانی منی به‌جێنه‌گه‌یاند.» جا ساموئێل دڵته‌نگ بوو، به‌ درێژایی ئه‌و شه‌وه‌ هاواری بۆ یه‌زدان كرد.
12
به‌یانی زوو ساموئێل بۆ بینینی شاول هه‌ستا، جا به‌ ساموئێل ڕاگه‌یه‌نرا: «شاول چوو بۆ كه‌رمه‌ل[d] و ئه‌وه‌تا تاوه‌رێكی یاده‌وه‌ری بۆ خۆی داناوه‌، سووڕاوه‌ته‌وه‌ و په‌ڕیوه‌ته‌وه‌ و دابه‌زیوه‌ بۆ گلگال.»
13
جا ساموئێل هات بۆ لای شاول، شاول پێی گوت: «با به‌ره‌كه‌تی یه‌زدانت له‌سه‌ر بێت، من فه‌رمانی یه‌زدانم به‌جێگه‌یاند.»
14
به‌ڵام ساموئێل گوتی: «ئه‌ی باعه‌باعی ئه‌و مه‌ڕانه‌ چییه‌ له‌ گوێمدا دێت، ئه‌ی بۆڕه‌بۆڕی ئه‌و مانگایانه‌ چییه‌ ده‌یبیستم؟»
15
شاولیش وه‌ڵامی دایه‌وه‌: «له‌لای عه‌مالێقییه‌كانه‌وه‌ هێناویانه‌، ئه‌وانه‌یه‌ كه‌ گه‌ل له‌ باشه‌كان ده‌ستیان لێ پاراست، له‌ مه‌ڕ و مانگا، بۆ ئه‌وه‌ی بۆ یه‌زدانی په‌روه‌ردگارت سه‌ری ببڕن، ئه‌وانی دیكه‌شمان به‌ ته‌واوی قڕكرد.»
16
ئینجا ساموئێل به‌ شاولی گوت: «بێده‌نگ به‌! با ئه‌وه‌ت پێ ڕابگه‌یه‌نم كه‌ یه‌زدان دوێنێ شه‌و چی پێ فه‌رمووم.»
ئه‌ویش گوتی: «پێم بڵێ.»
17
ساموئێل گوتی: «هه‌رچه‌نده‌ له‌به‌رچاوی خۆت بچووكیت، ئایا نه‌بوویت به‌ سه‌رۆكی هۆزه‌كانی ئیسرائیل؟ ئایا یه‌زدان ده‌ستنیشانی نه‌كردیت ببیته‌ پاشای ئیسرائیل؟
18
یه‌زدان به‌ ئه‌ركێك ڕه‌وانه‌ی كردیت و فه‌رمووی: ”بڕۆ عه‌مالێقییه‌ گوناهباره‌كان به‌ ته‌واوی قڕ بكه‌ و له‌ دژیان بجه‌نگه‌ هه‌تا له‌ناوده‌چن.“
19
ئیتر بۆچی گوێڕایه‌ڵی یه‌زدان نه‌بوویت و په‌لاماری ده‌ستكه‌وته‌كه‌ت دا و له‌به‌رچاوی یه‌زداندا ئه‌م خراپه‌یه‌ت كرد؟»
20
شاولیش به‌ ساموئێلی گوت: «من گوێڕایه‌ڵی یه‌زدان بووم و ئه‌و ئه‌ركه‌م به‌جێهێنا كه‌ پێی سپاردم، ئه‌گاگی پاشای عه‌مالێقم هێنا و عه‌مالێقییه‌كانم به‌ ته‌واوی قڕكرد.
21
جه‌نگاوه‌ران له‌ ده‌ستكه‌وته‌كه‌ مه‌ڕ و مانگایان برد، باشترینی ته‌رخانكراوه‌كان بۆ خودا[e] ، تاكو له‌ گلگال بۆ یه‌زدانی په‌روه‌ردگارت سه‌ری ببڕن.»
22
به‌ڵام ساموئێل گوتی:
«ئایا یه‌زدان دڵخۆشه‌ به‌ قوربانی سووتاندن و سه‌ربڕدراوه‌كان
یان به‌ گوێڕایه‌ڵبوون بۆ فه‌رمایشتی یه‌زدان؟
گوێڕایه‌ڵی له‌ سه‌ربڕین باشتره‌،
سه‌رنجدانیش له‌ چه‌وری به‌رانه‌كان.
23
چونكه‌ یاخیبوون وه‌ك گوناهی فاڵگرتنه‌وه‌یه‌[f] ،
كه‌لله‌ڕه‌قی تاوان و بتپه‌رستییه‌.
له‌به‌ر ئه‌وه‌ی فه‌رمایشتی یه‌زدانت ڕه‌تكرده‌وه‌،
ئه‌ویش له‌ پاشایه‌تی ڕه‌تی كردوویته‌وه‌.»
24
ئینجا شاول به‌ ساموئێلی گوت: «گوناهم كرد. سه‌رپێچی فه‌رمانی یه‌زدان و قسه‌ی تۆم كرد، چونكه‌ له‌ گه‌ل ترسام و به‌ قسه‌ی ئه‌وانم كرد.
25
ئێستاش تكایه‌ له‌ گوناهم خۆشبه‌ و له‌گه‌ڵمدا بگه‌ڕێوه‌، بۆ ئه‌وه‌ی كڕنۆش بۆ یه‌زدان ببه‌م.»
26
به‌ڵام ساموئێل به‌ شاولی گوت: «له‌گه‌ڵتدا ناگه‌ڕێمه‌وه‌، چونكه‌ فه‌رمایشتی یه‌زدانت ڕه‌تكرده‌وه‌، یه‌زدانیش وه‌ك پاشای ئیسرائیل ڕه‌تی كردوویته‌وه‌.»
27
كاتێك ساموئێل ئاوڕی دایه‌وه‌ بۆ ئه‌وه‌ی بڕوات، شاول دامێنی كه‌واكه‌ی گرت و دڕا.
28
ساموئێلیش پێی گوت: «یه‌زدان ئه‌مڕۆ پاشایه‌تی ئیسرائیلی لێت دابڕی و دای به‌ نزیكه‌كه‌ت كه‌ له‌ تۆ باشتره‌.
29
هه‌روه‌ها شكۆی[g] ئیسرائیل درۆ ناكات و بڕیاری ناگۆڕێت، چونكه‌ ئه‌و مرۆڤ نییه‌ تاكو بڕیاری بگۆڕێت.»
30
شاولیش گوتی: «ئێستا گوناهم كردووه‌، تكایه‌ له‌به‌رده‌م پیرانی گه‌له‌كه‌م و له‌به‌رده‌م ئیسرائیلدا ڕێزم لێبنێ، له‌گه‌ڵمدا بگه‌ڕێوه‌ تاكو كڕنۆش بۆ یه‌زدانی په‌روه‌ردگارت ببه‌م.»
31
ئینجا ساموئێل به‌دوای شاولدا گه‌ڕایه‌وه‌، شاول كڕنۆشی بۆ یه‌زدان برد.
32
پاشان ساموئێل گوتی: «ئه‌گاگی پاشای عه‌مالێقم بۆ بهێننه‌ ئێره‌.»
ئه‌گاگیش به‌ متمانه‌وه‌ چوو بۆ لای و گوتی: «بێگومان تاڵی مه‌رگ ڕه‌وییه‌وه‌.»
33
به‌ڵام ساموئێل گوتی:
«وه‌ك چۆن شمشێره‌كه‌ت ژنانی وه‌جاخكوێر كرد،
ئاواش دایكت وه‌جاخكوێر ده‌بێت.»
ئینجا ساموئێل له‌ گلگال له‌به‌رده‌م یه‌زدان ئه‌گاگی پارچه‌پارچه‌ كرد.
34
پاشان ساموئێل چوو بۆ ڕامه‌ و شاولیش سه‌ركه‌وت بۆ ماڵه‌كه‌ی له‌ گیڤعای شاولدا.
35
ئیتر ساموئێل هه‌تا ڕۆژی مردنی نه‌گه‌ڕایه‌وه‌ بۆ بینینی شاول، هه‌رچه‌نده‌ شیوه‌نیشی بۆ ده‌گێڕا. یه‌زدانیش خه‌فه‌تبار بوو كه‌ شاولی كرده‌ پاشای ئیسرائیل.
  1. a. 15‏:2 مه‌به‌ست له‌ هێرشی عه‌مالێقییه‌كانه‌ بۆ سه‌ر گه‌لی ئیسرائیل كاتێك له‌ میسر ده‌رچوون. بڕوانه‌ \+xt ده‌رچوون 17‏:14 و دواوتار 24‏:19.‏\+xt*‏
  2. b. 15‏:3 قڕی بكه‌ن: له‌ زمانی عیبری ئه‌م زاراوه‌یه‌ ده‌گه‌ڕێته‌وه‌ بۆ شتێك یان كه‌سێك كه‌ ده‌به‌خشرێت به‌ یه‌زدان، زۆر جار به‌خشینه‌كه‌ به‌ ته‌واوی له‌ ناوده‌بردرێت.
  3. c. 15‏:4 ئه‌و دوو سه‌د هه‌زاره‌ له‌ هه‌موو هۆزه‌كانی ئیسرائیل بوون، جگه‌ له‌ هۆزی یه‌هودا.
  4. d. 15‏:12 كه‌رمه‌ل: واته‌ كه‌رمه‌ل له‌ باشوور، نه‌ك كێوی كارمه‌ل كه‌ له‌ باكووره‌.
  5. e. 15‏:21 \+xt بڕوانه‌ 15‏:3‏\+xt*.
  6. f. 15‏:23 فاڵگرتنه‌وه‌: بڕوانه‌ بۆ نموونه‌ \+xt حزقیێل 21‏:21‏\+xt*‏.
  7. g. 15‏:29 29 مه‌به‌ست له‌ خودایه‌.