عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
به‌هره‌ی ڕاگه‌یاندنی په‌یامی خودا 
1
به‌دوای خۆشه‌ویستی بكه‌ون، تامه‌زرۆی به‌هره‌كانی ڕۆحی پیرۆز بن، به‌ تایبه‌تی ڕاگه‌یاندنی په‌یامی خودا.
2
ئه‌وه‌ی به‌ زمان[a] ده‌دوێت، قسه‌ بۆ خه‌ڵك ناكات، به‌ڵكو بۆ خودا، كه‌س لێی تێناگات، چونكه‌ به‌ ڕۆحی پیرۆز باسی نهێنی ده‌كات.
3
به‌ڵام ئه‌وه‌ی په‌یامی خودا ڕاده‌گه‌یه‌نێت، ئه‌وه‌ بۆ بنیادنان و هاندان و دڵنه‌وایی خه‌ڵك ده‌دوێت.
4
ئه‌وه‌ی به‌ زمان ده‌دوێت، خۆی بنیاد ده‌نێت، به‌ڵام ئه‌وه‌ی په‌یامی خودا ڕاده‌گه‌یه‌نێت، ئه‌وا كڵێسا بنیاد ده‌نێت.
5
حه‌ز ده‌كه‌م هه‌مووتان به‌ زمانه‌كان بدوێن، به‌ڵام باشتره‌ په‌یامی خودا ڕابگه‌یه‌نن. ئه‌وه‌ی په‌یامی خودا ڕاده‌گه‌یه‌نێت گه‌وره‌تره‌ له‌وه‌ی به‌ زمانه‌كان ده‌دوێت، مه‌گه‌ر لێكی بداته‌وه‌، تاكو كڵێسا بنیادنانی ده‌ستبكه‌وێت.
6
ئێستا ئه‌ی خوشك و برایانم، ئه‌گه‌ر هاتمه‌ لاتان و به‌ زمانه‌كان دوام، چ سوودم بۆتان ده‌بێت، مه‌گه‌ر به‌ ئاشكراكراوێك[b] یان به‌ زانیارییه‌ك یان به‌ په‌یامێك له‌ خوداوه‌ یان به‌ فێركردنێك بۆتان بدوێم؟
7
ته‌نانه‌ت ئه‌و شته‌ بێ ڕۆحانه‌ی ده‌نگ ده‌رده‌كه‌ن، شمشاڵ یان قیساره‌، ئه‌گه‌ر ئاوازی جیاواز نه‌دات، چۆن بزانرێت ئه‌وه‌ی ده‌ژه‌نرێت شمشاڵه‌ یان قیساره‌یه‌؟
8
ئه‌گه‌ر كه‌ڕه‌نا ده‌نگێكی ڕوون نه‌دات، كێ بۆ شه‌ڕ خۆی ئاماده‌ ده‌كات؟
9
ئێوه‌ش ئاوا، ئه‌گه‌ر به‌ زمان قسه‌یه‌كی ڕوون نه‌ده‌ن، ئه‌وه‌ی گوتراوه‌ چۆن ده‌زانرێ؟ چونكه‌ هه‌ر له‌ هه‌وادا ده‌دوێن.
10
بێگومان له‌ جیهاندا جۆره‌ها زمان هه‌یه‌ و هیچیان بێ واته‌ نین.
11
بۆیه‌ ئه‌گه‌ر له‌ واتای ده‌نگێك نه‌زانم، بۆ قسه‌كه‌ر ده‌بمه‌ به‌ربه‌ری[c] ، قسه‌كه‌ریش به‌ربه‌رییه‌ بۆ من،
12
ئێوه‌ش به‌ هه‌مان شێوه‌ن. له‌به‌ر ئه‌وه‌ی به‌ په‌رۆشن بۆ به‌هره‌كانی ڕۆحی پیرۆز، كه‌واته‌ هه‌وڵ بده‌ن له‌و به‌هرانه‌ زیاد بكه‌ن كه‌ له‌ پێناوی بنیادنانی كڵێسایه‌.
13
له‌به‌ر ئه‌م هۆیه‌ ئه‌وه‌ی به‌ زمان ده‌دوێت، با نوێژ بكات تاكو لێكی بداته‌وه‌،
14
چونكه‌ ئه‌گه‌ر به‌ زمانێك نوێژ بكه‌م، ڕۆحم نوێژ ده‌كات، به‌ڵام مێشكم بێ به‌روبوومه‌.
15
كه‌واته‌ چییه‌؟ به‌ ڕۆح نوێژ ده‌كه‌م، هه‌روه‌ها به‌ مێشكیشم نوێژ ده‌كه‌م. به‌ ڕۆح گۆرانی ده‌ڵێم، هه‌روه‌ها به‌ مێشكیشم گۆرانی ده‌ڵێم.
16
ئه‌گینا، ئه‌گه‌ر به‌ ڕۆحی پیرۆز ستایشی خودا بكه‌یت، چۆن یه‌كێكی ده‌ره‌وه‌ به‌ سوپاسكردنه‌كه‌ت بڵێت «ئامین» چونكه‌ نازانێت تۆ چی ده‌ڵێی؟
17
سوپاسكردنه‌كه‌ت باشه‌، به‌ڵام نابێته‌ مایه‌ی بنیادنانی كه‌سێكی دیكه‌.
18
سوپاسی خودا ده‌كه‌م، له‌ هه‌مووتان زیاتر به‌ زمانه‌كان ده‌دوێم،
19
به‌ڵام له‌ كڵێسادا، پێنج وشه‌م له‌ مێشكدایه‌ بیڵێم، تاكو خه‌ڵكیش فێر بكه‌م، باشتره‌ له‌ ده‌ هه‌زار وشه‌ی به‌ زمانێك.
20
خوشكان، برایان، له‌ بیركردنه‌وه‌دا منداڵ مه‌بن. له‌ خراپه‌دا وه‌ك منداڵ بێبه‌ری بن، به‌ڵكو له‌ بیركردنه‌وه‌دا پێگه‌یشتوو بن.
21
له‌ ته‌وراتدا نووسراوه‌: «یه‌زدان ده‌فه‌رموێ،
«{به‌ زمانی بێگانه‌كان و به‌ لێوی نامۆكان
قسه‌ بۆ ئه‌م گه‌له‌ ده‌كه‌م،
له‌گه‌ڵ ئه‌وه‌ش گوێم لێ ناگرن.}[d] »
22
كه‌واته‌ زمانه‌كان نیشانه‌ن، نه‌ك بۆ باوه‌ڕداران، به‌ڵكو بۆ بێباوه‌ڕان، به‌ڵام ڕاگه‌یاندنی په‌یامی خودا بۆ بێباوه‌ڕان نییه‌، به‌ڵكو بۆ باوه‌ڕدارانه‌.
23
بۆیه‌ ئه‌گه‌ر كڵێسا هه‌موو به‌یه‌كه‌وه‌ كۆبوونه‌وه‌ و هه‌موو به‌ زمانه‌كان بدوێن، هه‌ر نه‌زانێك یان بێباوه‌ڕێك بێته‌ ژووره‌وه‌، ئایا ناڵێت كه‌ ئێوه‌ وڕێنه‌ ده‌كه‌ن؟
24
به‌ڵام ئه‌گه‌ر هه‌موو په‌یامی خودا ڕابگه‌یه‌نن و یه‌كێكی بێباوه‌ڕ یاخود نه‌زان بێته‌ ژووره‌وه‌، له‌به‌رده‌م هه‌مووان ویژدانی تاوانباری ده‌كات، له‌لایه‌ن هه‌مووانه‌وه‌ حوكم ده‌درێت،
25
نهێنییه‌كانی دڵی ئاشكرا ده‌بێت، كڕنۆش ده‌بات و خودا ده‌په‌رستێت، ڕایده‌گه‌یه‌نێت: «به‌ڕاستی خودا له‌نێوتاندایه‌!»
كۆبوونه‌وه‌ی ڕێكوپێك 
26
ئه‌ی خوشك و برایان، ئیتر چی بڵێین؟ كاتێك كۆده‌بنه‌وه‌ هه‌ر یه‌كێك زه‌بوورێكی هه‌یه‌، یان فێركردنێك یان ئاشكراكردنێك یان زمانێك یان لێكدانه‌وه‌یه‌ك. با هه‌موو شتێك بۆ بنیادنان بێت.
27
ئه‌گه‌ر كه‌سانێك به‌ زمانێك بدوێن، با دوو یان ئه‌وپه‌ڕی سێ كه‌س بێت و له‌دوای یه‌ك بدوێن، یه‌كێكیش لێكی بداته‌وه‌.
28
به‌ڵام ئه‌گه‌ر لێكده‌ره‌وه‌ نه‌بوو، با له‌ كڵێسا بێده‌نگ بێت، بۆ خۆی و بۆ خودا بدوێت.
29
با دوو یان سێ پێغه‌مبه‌ر بدوێن، ئه‌وانی دیكه‌ش وته‌كانیان هه‌ڵبسه‌نگێنن.
30
به‌ڵام ئه‌گه‌ر ئاشكراكردنێك بۆ یه‌كێك له‌ دانیشتووان هات، با یه‌كه‌میان بێده‌نگ بێت،
31
چونكه‌ هه‌مووتان ده‌توانن یه‌ك به‌ یه‌ك په‌یامی خودا ڕابگه‌یه‌نن، تاكو هه‌موو فێربن و هانبدرێن.
32
ڕۆحی پێغه‌مبه‌ران بۆ پێغه‌مبه‌ران ملكه‌چه‌،
33
چونكه‌ خودا خودای شێواندن نییه‌، به‌ڵكو خودای ئاشتییه‌.
هه‌روه‌ك له‌ هه‌موو كڵێساكانی گه‌لی پیرۆزی خودا،
34
با ژنان له‌ كڵێساكاندا بێده‌نگ بن، چونكه‌ ڕێیان پێنه‌دراوه‌ بدوێن، به‌ڵكو وه‌ك ته‌وراتیش ده‌فه‌رموێ با ملكه‌چ بن.
35
به‌ڵام ئه‌گه‌ر ویستیان شتێك فێربن، له‌ ماڵه‌وه‌ له‌ مێرده‌كانیان بپرسن، چونكه‌ شوره‌ییه‌ بۆ ژن له‌ كڵێسادا بدوێت.[e]
36
ئایا په‌یامی خودا له‌ ئێوه‌وه‌ سه‌رچاوه‌ی گرتووه‌، یان ته‌نها بۆ ئێوه‌ هاتووه‌؟
37
ئه‌گه‌ر یه‌كێك خۆی به‌ پێغه‌مبه‌ر یان كه‌سێكی ڕۆحانی بزانێت، با باش بزانێت ئه‌وه‌ی بۆتان ده‌نووسم ڕاسپارده‌ی مه‌سیحی باڵاده‌سته‌.
38
به‌ڵام ئه‌گه‌ر یه‌كێك پشتگوێی خست، با هه‌ر پشتگوێ بخرێت.
39
كه‌واته‌ برایانم، تامه‌زرۆی ڕاگه‌یاندنی په‌یامی خودا بن و ڕێگری مه‌كه‌ن له‌ دوان به‌ زمانه‌كان.
40
به‌ڵام با هه‌موو شتێك به‌ دروستی و ڕێك بێت.
  1. a. 14‏:2 \+xt بڕوانه‌ 12‏:10‏\+xt*.
  2. b. 14‏:6 په‌یامێكی ڕاسته‌وخۆ له‌ خوداوه‌ بۆ مرۆڤێك.
  3. c. 14‏:11 به‌ربه‌ری: ئه‌و كه‌سانه‌ی كه‌ به‌ زمانی یۆنانی قسه‌ ناكه‌ن، به‌ كه‌سانی ناڕۆشنبیر هه‌ژماردكراون.
  4. d. 14‏:21 \+xt ئیشایا 28‏:11‏-12‏\+xt*‏
  5. e. 14‏:35 مه‌به‌ستی ئه‌وه‌یه‌ كه‌ فێركردن و سه‌رپه‌رشتیكردنی كڵێسا له‌ ده‌سه‌ڵاتی پیاودایه‌.